Ipakita ang Pagpabili sa Balay sa Diyos
1 Sa kapanahonan sa Bibliya si Jehova nagsugo sa iyang katawhan sa pagtigom nga makanunayon diha sa iyang balay. (Lev. 23:2) Kining mga panagkatigoma nagtaganag panahon alang kanila sa paghisgot ug pagpamalandong sa Kasugoan ni Jehova. Ang ilang mga hunahuna napuno sa mga panghunahuna sa Diyos. Ang kahikayan nagpasiugdag panaghiusa ug mahinlong pagsimba. Ang mga tigom sa balay sa Diyos karon dili kay menos ug kahinungdanon.
2 Unsaon Nato Pagpakita nga Atong Gipabilhan ang mga Tigom? Usahay ang situwasyon sa usa ka tawo magpugong kaniya sa pagtambong sa usa ka tigom. Apan gitugotan ba nimo ang gamayng mga suliran sa pagbalda sa regular nga pagtambong sa tigom? Ang pipila mapakyas sa pagtambong kon sila adunay gamayng sakit sa ulo o mibatig kakapoy human sa usa ka puliking adlaw. Ang uban mibating obligado sa pag-abiabi sa mga paryente nga nagaduaw. Ang pipila nagpalta pa gani sa mga tigom aron makatan-aw sa usa ka paboritong programa sa TV. Ang gidak-on sa pagpabili nga gipakita niining mga kahimtanga halayo ra kaayo sa kinasingkasing nga tinguha nga gipahayag sa mga anak nga lalaki ni Kore: “Ang akong kalag gihidlaw ug nangandoy usab sa mga sawang ni Jehova.”—Sal. 84:2.
3 Bisan pag adunay dagayang espirituwal nga pagkaon nga gitagana sa mga tigom, ang pipila may kalisdanan sa pagpaminaw. Mahimong nakaplagan nila ang kaugalingong nagarawraw (nagahanduraw), nagahunahuna bahin sa mga kabalaka sa adlaw, o nagaduka pa gani. Daghan ang nakakaplag nga ang pagkuhag mubong mga nota makabulig kanilang kanunayng alerto. Dugang pa, kon abante kitang mangandam pag-ayo, makaarang kita sa “paghatag ug labaw pa kay sa kasagarang pagtagad.”—Heb. 2:1.
4 Ang mga kabataan nagakinahanglan usab nga magmaikag sa instruksiyon nga gitagana sa mga tigom. Ang makat-onan sa mga kabataan limitado ra kaayo kon ang mga ginikanan maghatag ug mga dulaan o librong koloranan aron pagpahilom kanila. Adunay kakulang sa tukmang disiplina kon tugotan ang mga kabataang magdula, magsaba, maghilak, o magbuhat ug ubang mga butang nga makadisturbo sa uban. Ang subsob ug wala-kinahanglanang pag-adto sa kasilyas sa panahon sa tigom sagad makunhoran kon ang bata nakahibalo nga usa sa iyang ginikanan kanunayng mouban kaniya.
5 Ang Pagkauntop Hinungdanon: Usahay, ang dili malikayang mga kahimtang magpugong kanato sa pag-abot nga untop sa usa ka tigom, apan ang nabatasang pag-abot nga ulahi human sa pangbukas nga awit ug pag-ampo magapakitag kakulang sa pagtahod sa mga tigom. Hinumdomi nga ang pag-awit ug pag-ampo uban sa atong mga igsoon sa mga tigom sa kongregasyon maoy bahin sa atong pagsimba. Ang nabatasang pagkalangayan maoy sagad nga resulta sa dili maayong abanteng pagplano. Ang pagkahimong untop nagapakita nga atong gitahod ug gipabilhan ang atong mga tigom.
6 Samtang ang adlaw mas nagakaduol na, ang panginahanglang magtigom labaw pang magakadako. (Heb. 10:24, 25) Atong ipakita ang atong pagpabili pinaagig regular nga pagtambong, abanteng pangandam, pagkauntop, pagpaminaw pag-ayo, ug unya pagpadapat sa atong makat-onan.