Usa ka Sumbanan Aron Sundon Pag-ayo
1 Si Jesus maoy usa ka maayong sumbanan sa iyang mga tinun-an. Bisan pag dili kita makakab-ot sa iyang sukdanan sa pagkahingpit, kita giagda nga “sundon pag-ayo ang iyang mga tunob.” (1 Ped. 2:21) Sama kang Jesus, kita angayng magtinguha nga masibotong ipaambit ang kamatuoran ngadto sa uban.
2 Si Jesus maoy labaw pa kay sa usa ka magwawali; siya maoy labaw kaayong magtutudlo. “Nahingangha ang mga panon sa katawhan sa iyang paagi sa pagpanudlo.” (Mat. 7:28) Nganong epektibo man siya kaayo? Atong suod nga tan-awon ang iyang “paagi sa pagpanudlo.”
3 Kon Unsaon Nato Pagsunod si Jesus: Ang motibo ni Jesus mao ang pagpasidungog kang Jehova ug paghimaya sa Iyang ngalan. (Juan 17:4, 26) Sa pagpanudlo usab nato, ang atong motibo mao gayod ang pagpasidungog kang Jehova ug dili dalhon ang pagtagad sa atong kaugalingon.
4 Ang tanan nga gitudlo ni Jesus gipasukad sa Pulong sa Diyos ug siya kanunayng naggamit sa dinasig nga Kasulatan. (Mat. 4:4, 7; 19:4; 22:31) Buot natong tultolan ang atong mga mamiminaw ngadto sa Bibliya; sa ingon atong ikapakita kanila nga ang atong giwali ug gitudlo gipasukad sa kinatas-ang awtoridad.
5 Si Jesus naggamit ug mapuslanon, yanong mga argumento. Pananglitan, sa pagpatin-aw kon sa unsang paagi nato mabatonan ang kapasayloan sa Diyos, siya nagdasig kanato nga magmapinasayloon sa uban. (Mat. 6:14, 15) Angayng sulayan nato ang pagsaysay sa mensahe sa Gingharian diha sa yano, mapuslanong mga termino.
6 Si Jesus naggamit ug mga ilustrasyon ug mga pangutana aron pagpalihok sa panghunahuna sa uban. (Mat. 13:34, 35; 22:20-22) Ang mga ilustrasyon bahin sa adlaw-adlaw nga mga butang makatabang sa mga tawo sa pagsabot sa komplikadong mga doktrina sa Bibliya. Angay tang mosuknag mga pangutana nga makapadasig sa atong mga mamiminaw sa paghunahuna bahin sa ilang nadunggan. Ang nagatultol nga mga pangutana makabulig kanila sa pagdangat sa hustong mga konklusiyon.
7 Si Jesus naggahig panahon sa pagpatin-aw sa malisod nga mga butang ngadto sa sinserong mga tawo nga nangayog dugang kasayoran. (Mat. 13:36) Kita usab angayng magmatinabangon sa dihang ang mga pangutana sinserong gisukna. Kon wala nato mahibaloi ang mga tubag, makapangdukiduki kita sa ulohan ug mobalik uban ang tubag sa ulahing panahon.
8 Si Jesus naggamit ug makapatandog nga mga leksiyon sa pagtudlo. Usa ka panig-ingnan niini mao ang iyang paghugas sa mga tiil sa iyang mga tinun-an. (Juan 13:2-16) Kon ipakita nato ang mapaubsanong espiritu, kadtong ginatudloan mapalihok sa pagpadapat sa ilang nakat-onan.
9 Si Jesus nagsangpit sa kasingkasing sa tawo ug sa iyang gugma alang sa pagkamatarong. Buot usab natong aboton ang mga kasingkasing. Atong sulayang tandogon ang kinaiyanhong tinguha sa tanan nga mosimba ug magkinabuhi uban sa uban diha sa kalinaw.
10 Sa Disyembre atong itanyag ang librong Ang Labing Bantogang Tawo nga Nabuhi Sukad. Ang atong pagsundog sa mga hiyas sa pagpanudlo ni Jesus mahimong makapalihok sa sinserong mga tawo sa pagpatalinghog samtang atong isaysay ang iyang gipanudlo.—Mat. 10:40.