Paggawi sa Paaging Takos sa Maayong Balita
1 Ingong mga Saksi ni Jehova, gitinguha natong makapasidungog sa ngalan ni Jehova. Atong nahibaloan nga ang atong panggawi, sinultihan, pamostura, ug sinina makaimpluwensiya sa pag-isip sa uban sa tinuod nga pagsimba. Kini ilabinang tinuod sa atong mga panagkatigom. Buot natong maseguro nga ang tanang butang gisulti ug gibuhat diha sa mga tigom maoy takos sa maayong balita ug magapasidungog kang Jehova.—Filip. 2:4.
2 Ang kalibotanong mga sukdanan sa paninina ug pamostura nahimo nang kaduhaduhaan sa daghang dapit. Kini maoy butang nga kinahanglang hatagan ug maampingong pagtagad sa mga ministro sa maayong balita. Ang Hunyo 1, 1989, Bantayanang Torre, panid 20, miingon: “Ang atong sinina dili kinahanglang mahalon, apan kini angay nga limpiyo, nindot, ug kasarangan. Ang atong sapatos angay usab nga dili guba ug maayo ang dagway. Sa susama, sa tanang tigom, apil ang Pagtuon sa Libro sa Kongregasyon, ang atong mga lawas angay nga mahinlo, ug angay nga ang atong biste hinlo ug haom.”
3 Ang pagkatukma sa panahon maoy ilhanan sa mahigugmaong konsiderasyon ug pagkamahunahunaon. Usahay, ang dili malikayang mga sirkumstansiya mahimong magpugong kanato sa pag-abot nga untop alang sa usa ka tigom. Apan ang pagbatasan sa pag-abot nga ulahi mahimong magpakitag kakulang sa pagtahod alang sa sagradong katuyoan sa mga tigom. Usab, ang mga ulahing nangabot kasagaran makabalda sa uban ug magpagupong kanila sa pagkuhag bug-os nga kaayohan gikan sa programa. Ang pagkatukma sa panahon nagapakitag pagtahod alang sa mga pagbati ug mga interes sa tanan nga nanambong.
4 Ang gugma alang sa atong mga silingan kinahanglang motabang kanato nga dili magpahinabog mga kabaldahan sa panahon sa mga tigom. Ang paghunghonganay, pagkaon, pag-usap ug chewing gum, pagkasakasa sa mga papel, mga pag-adto sa kasilyas nga wala kinahanglana, makadisturbo sa uban ug makabalda sa pagkahalangdon nga angay sa dapit sa pagsimba nga iya ni Jehova. Maoy dili angay alang kang bisan kinsa nga maghimog negosyo sa kongregasyon o makig-estorya sa uban gawas kon adunay pipila ka emerhensiya nga nanginahanglang mobiya ang mga igsoon gikan sa ilang mga lingkoranan. Gawas niini, ang tanan kinahanglang nagalingkod ug nagapatalinghog sa programa aron makabenepisyo sa ilang kaugalingon ug ang ilang mga pamilya. Ang dili maayong batasan walay luna diha sa Kingdom Hall tungod kay ang “gugma . . . dili magagawing binastos.”—1 Cor. 13:4, 5; Gal. 6:10.
5 Ang maayong batasan sa atong mga kabataan diha sa mga tigom magapasidungog usab sa ngalan ni Jehova. Ang suod nga pagdumala sa mga ginikanan maoy hinungdanon. Ang mga kabataan kinahanglang dasigon sa pagpaminaw ug pakig-ambit. Daghang ginikanan uban ang gagmayng mga anak mopili sa paglingkod sa dapit nga sayon alang kanila ang paggawas ug pag-atiman sa mga panginahanglan sa ilang mga kabataan nga walay pagbalda sa uban.
6 Si Pablo mitambag: “Panaggawi sa paaging takos sa maayong balita.” (Filip. 1:27) Nan, atong panlimbasogan nga mahimong maayog batasan ug mahunahunaon sa uban sa dihang nagatambog mga tigom.