Maayong Pamatasan​—Hiyas sa Diyosnong mga Tawo

¹ Ang maayong pamatasan talagsaon karong adlawa. Nganong ingon niana? Ingon na lamang ang pagdali sa mga tawo nga sila tingali talagsa na lang maghunahuna sa pangunang mga kortesiya, sama sa pag-ingong “Palihog,” “Salamat,” o “Pasayloa ko.” Sa katibuk-an, ang pagkadi-mahunahunaon, ug pagkaway-konsiderasyon daw midagsang sa tawhanong katilingban. Gitagna sa Pulong sa Diyos ang pagkahugno sa pamatasan sa kataposang mga adlaw sa dihang miingon kini nga ang mga tawo unya mahimong ‘mahigugmaon sa ilang kaugalingon, mapagawalon, mapahitas-on, dili-mapasalamaton, walay kinaiyanhong pagbati, walay pagpugong-sa-kaugalingon, walay gugma sa pagkamaayo ug gahig ulo.’ (2 Tim. 3:1-4) Kanang tanang kinaiyaha magpatunghag dili maayong pamatasan. Ingong diyosnong mga tawo, ang mga Kristohanon kinahanglang magbantay nga dili mosagop niining iya sa kalibotan nga pagkaway-pagtahod sa uban.

² Unsa ang Pamatasan? Ang maayong pamatasan mahimong hubiton ingong ang dulot nga kaamgohan sa mga pagbati sa uban, ang katakos sa pagkinabuhi duyog sa uban diha sa kalinaw. Ang mga bahin sa maayong pamatasan mao ang kamatinahoron, kalulot, kamataktikanhon, ug kamahunahunaon. Kining mga kinaiyaha nagsumikad sa gugma sa usa alang sa Diyos ug sa silingan. (Luc. 10:27) Kini magamit nga walay gasto, apan kini bililhon kaayo sa pagpasangkad sa atong mga pakiglabot sa uban.

³ Gipakita ni Jesu-Kristo ang hingpit nga panig-ingnan. Gisunod niya ang diyosnong mga sukdanan. Bisag kas-a wala siya masayop sa iyang pamatasan. Kanunay niyang gipadapat ang Bulawanong Lagda: “Sumala sa buot ninyo nga pagabuhaton sa mga tawo nganha kaninyo, mao usab ang inyong pagabuhaton ngadto kanila.” (Luc. 6:31) Dili ba kita mahibulong sa kamahunahunaon ug kamahigugmaon ni Jesus sa pagpakiglabot sa iyang mga tinun-an? (Mat. 11:28-30) Ang iyang maayong pamatasan wala maggikan sa mga libro nga naglatid sa maayong pamatasan. Nagsumikad kini sa tim-os ug mabinationg kasingkasing. Giugmad ni Jesus ang maayong pamatasan gikan sa iyang pagkabata ug pinaagi sa pagpadapat sa diyosnong mga prinsipyo. Kinahanglang maningkamot kita sa pagsundog sa iyang maayong panig-ingnan.

⁴ Kanus-a gikinahanglan sa mga Kristohanon ang maayong pamatasan? Panahon ba lamang sa espesyal nga mga okasyon, sa dihang naghunahuna sa paghimog maayong impresyon? Gikinahanglan ba lamang kini sa dihang mosulay sa pag-impluwensiya sa uban? Dili! Buot natong ipasundayag ang maayong pamatasan sa tanang panahon. Diha sa unsang partikular nga mga paagi nga angay kitang magmahunahunaon bahin niini diha sa atong pagpakig-uban sa usag usa diha sa kongregasyon?

⁵ Diha sa Kingdom Hall: Ang Kingdom Hall maoy atong dapit sa pagsimba. Kita atua didto tungod sa pagdapit ni Jehova nga Diyos. Niana nga diwa, kita maoy mga dinapit. (Sal. 15:1) Kita ba maoy panig-ingnang mga dinapit sa dihang kita moadto sa Kingdom Hall? Gihatagan ba natog angayng pagtagad ang atong panapot ug pamostura? Walay duhaduha buot gayod natong likayan ang pagdayandayan nga kaswal o nanghinobra. Nagatambong man sa mga kombensiyon o sa atong senemanang mga tigom sa kongregasyon, ang katawhan ni Jehova nailhan sa ilang hapsay nga panagway nga haom niadtong nag-angkon nga masimbahon sa Diyos. (1 Tim. 2:​9, 10) Busa atong ipakita ang angayng konsiderasyon ug pagtahod sa atong langitnong Tig-abiabi ug sa ubang mga bisita nga gidapit.

⁶ Ang laing paagi nga atong ikapakita ang maayong pamatasan maylabot sa mga tigom maoy pinaagi sa pagkaanaa sa untop nga panahon. Tinuod, dili kini sayon kanunay. Ang pipila tingali nagpuyo nga layo kaayo o adunay dagkong mga pamilya nga andamon. Dalayegon gayod ang ilang paningkamot sa pagtambong sa Kristohanong mga tigom nga regular. Apan, namatikdan sa ubang mga kongregasyon nga ingon ka daghan sa 25 porsiyento sa mga magmamantala ang nabatasan nang moabot human sa pang-abling awit ug pag-ampo. Kini maoy seryosong butang. Maayong hinumdoman nga ang pamatasan naglakip sa kaamgohan sa mga pagbati sa uban. Si Jehova, ang atong mapuangorong Tig-abiabi, naghikay niining espirituwal nga kombira alang sa atong kaayohan. Atong ipakita ang atong pagpabili ug kamahunahunaon sa iyang mga pagbati pinaagi sa pagkaanaa sa untop nga panahon. Dugang pa, ang pag-abot sa tigom nga ulahi maoy pagbalda ug pagpakitag kawalay-pagtahod niadtong kinsa naminaw na.

⁷ Sa dihang magtigom kita, ginatagad ba nato ang mga bag-ohan nga mitambong? Ang pag-abiabi kanila maoy bahin sa pagkamaayog pamatasan. (Mat. 5:47; Roma 15:7) Ang mapuangorong pagtimbaya, mainitong paglamano, mabinationg pahiyom​—ang tanan gamayng mga butang, apan kini makaamot sa pagpaila kanato ingong tinuod nga mga Kristohanon. (Juan 13:35) Human makatambong sa Kingdom Hall sa unang higayon, ang usa ka lalaki miingon: “Akong nahibalag mas ang daghang tinuod nga mahigugmaong mga tawo, bug-os mga estranghero, sa usa lang ka adlaw kay sa akong nahibalag sa simbahan diin ako gimatuto. Dayag nga akong nakaplagan ang kamatuoran.” Ingong resulta, giusab niya ang dalan sa iyang kinabuhi, ug pito ka tuig sa ulahi siya nabawtismohan. Oo, ang maayong pamatasan adunay layog-abot nga mga epekto!

⁸ Ayawg kalimti ang mga tigulang ug mga baldado nga anaa sa atong taliwala. Kon kita magpakitag maayong pamatasan ngadto sa mga estranghero nga atong mahibalag, dili ba kita angay mohimo sa ingon “ilabina kanila nga atong kabanay sa pagtuo”? (Gal. 6:10) Ang prinsipyo mapadapat: “Magpakita ka ug pagtamod sa tawong tigulang.” (Lev. 19:32) Dili gayod angayng kalimtan ang maong mga tawo diha sa atong mga panagkatigom.

⁹ Paghatag ug Suod nga Pagtagad: Ang maayong pamatasan nagkinahanglan nga kita maminaw pag-ayo sa dihang ginahatag ang espirituwal nga instruksiyon. Panahon sa mga tigom sa kongregasyon, ang Kristohanong mga ministro sa Diyos nagasulti aron ipaambit ang pipila ka espirituwal nga gasa sa pagpalig-on kanato. (Roma 1:11) Tinong kini maoy pagpasundayag gayod ug dili maayong pamatasan kon kita magduka, mag-usap ug gum sa banhang paagi, kanunayng maghunghong ngadto sa usa nga naglingkod sa duol, magsigeg adto sa kasilyas nga wala kinahanglana, magbasa ug walay kalabotang materyal, o mag-atiman sa ubang mga butang panahon sa tigom. Ang mga ansiyano angayng mahimong sulondan niining bahina. Ang maayong Kristohanong mga pamatasan magpalihok kanato sa pagpakitag hustong pagtahod sa mamumulong ug sa iyang pinasukad-sa-Bibliyang mensahe pinaagi sa paghatag kaniya sa atong bug-os nga pagtagad.

¹⁰ Dugang pa, isip konsiderasyon sa mamumulong ug sa mamiminaw, angay natong seguroon nga dili makabalda ang elektronikong mga pager ug cellular nga mga telepono sa atong mga tigom.

¹¹ Pamatasan ug mga Anak: Ang mga ginikanan kinahanglan kanunayng magmaalisto sa panggawi sa ilang mga anak diha sa Kingdom Hall. Kon ang bata mosugod sa paghilak o mahimong dili mahimutang panahon sa tigom ug kini makadisturbo sa uban, maalamon nga dad-on ang bata sa gawas sa awditoryum sa labing madali kon posible aron pahilomon siya. Usahay tingali mahimong lisod kining buhaton, apan hinumdomi, kini nagpakita nga alisto ka sa mga pagbati sa uban. Ang mga ginikanan nga may gagmayng mga anak nga lagmit mahimong dili mahimutang sagad mopili sa paglingkod sa luyo sa awditoryum aron diyutay lang ang posibleng madisturbo kon mahimong kinahanglanon nga sila mobiya sa lingkoranan panahon sa tigom. Siyempre, ang ubang mga tumatambong makapakitag angayng konsiderasyon alang sa mga pamilya pinaagi sa paggahin sa likod nga mga lingkoranan aron ilang magamit, kon gusto nila.

¹² Ang mga ginikanan kinahanglan usab nga magmatikod sa panggawi sa ilang mga anak sa dili pa ug human sa mga tigom. Ang mga bata kinahanglang dili magdagandagan sa sulod sa tinukod, kay kini makamugnag mga aksidente. Ang pagdagandagan sa gawas sa Kingdom Hall mahimong peligroso usab, ilabina sa magabii nga limitado ang kahayag. Ang kusog nga pagsultihanay sa gawas makadisturbo sa mga silingan ug magbanaag ug dili maayo bahin sa atong pagsimba. Ang mga ginikanan nga matanlagong maningkamot sa pagdumala sa ilang mga anak sa sulod ug sa gawas sa Kingdom Hall angayng dayegon tungod kay kini makaamot sa pagkamaayo sa atong pagpuyo diha sa panaghiusa.​—Sal. 133:1.

¹³ Diha sa Pagtuon sa Libro: Atong gipabilhan ang pagkamaabiabihon sa atong mga igsoon nga naghimo sa ilang mga balay nga mabatonan alang sa mga tigom sa kongregasyon. Kini tingali naglakip ug dakong pagpangandam ug kahasol alang kanila. Sa dihang motambong, kinahanglan natong ipasundayag ang maayong pamatasan ug ipakita ang pagtahod ug konsiderasyon alang sa ilang propiedad. Sa dili pa modayon, kinahanglang trapohan natog maayo ang atong mga sapatos aron dili mahugawan ang salog o alpombra. Ang mga ginikanan angayng magdumala sa ilang mga anak, nga magseguro nga sila magpabilin sa dapit sa balay alang sa pagtuon sa libro. Bisan pag ang grupo tingali gamay ra ug ang palibot morag impormal, dili kita angayng molihok nga sobra ka pamilyar diha sa mga balay sa uban. Angayng ubanan sa ginikanan ang iyang bata sa dihang mogamit sa kasilyas. Dugang pa, sanglit ang pagtuon sa libro maoy usa ka tigom sa kongregasyon, angayng magbesti kita sama sa atong panapot ngadto sa Kingdom Hall.

¹⁴ Maayong Pamatasan Hinungdanon: Ang pagpakitag Kristohanong pamatasan dili lamang makapabanaag pag-ayo diha sa atong ministeryo kondili makapauswag usab sa maayong relasyon sa uban. (2 Cor. 6:​3, 4, 6) Ingong mga magsisimba sa malipayong Diyos, kinahanglang natural alang kanato ang pagpahiyom, pagpahimuot, ug bisan sa pagbuhat sa ginagmay, mabinationg mga butang nga maghatag ug kalipay sa uban. Kining maayong mga hiyas magdayandayan sa atong kinabuhi ingong diyosnong mga tawo.