Mga Tigom Mohatag Kaayohan sa Atong mga Kabataan
1 Ang nasod sa Israel gisugo sa “pagtigom . . . sa mga lalaki ug mga babaye ug gagmayng mga kabataan . . . , aron sila magapatalinghog ug aron sila makakat-on.” (Deut. 31:12) Oo, ang mga kabataan gilakip diha sa mga tigom sa Israel alang sa pagsimba. Mao man usab karon, ang atong mga tigom sa kongregasyon makahatag ug kaayohan sa mga kabataan.—Sal. 148:1, 12.
2 Siyempre, ang mga kabataan kinahanglang tudloan aron magpatalinghog pag-ayo kon unsa ang gihisgotan diha sa mga tigom. Nagakinahanglan usab ug tabang sa pagsabot sa pipila ka materyal nga gipresentar. Ang mosunod nga mga sugyot makabulig sa atong mga kabataan aron makapahimulos ug labing dako diha sa mga miting.
PANGANDAM ALANG SA MGA MITING
3 Ang hustong pagbansay sa panimalay moabag sa mga kabataan sa pagpabili nga ang pakigtigom sa uban sa pagsimba kang Jehova nagapakitag pagkamasinundanon sa kabubut-on sa Diyos.—Sal. 133:1; Isa. 48:17; Mat. 19:14.
4 Ang personal nga pagpangandam mopadako sa pagtagamtam sa bata sa mga miting. Makabulig kon ang mga bata adunay ilang kaugalingong Bibliya, songbok ug ubang publikasyon nga gigamit. Kinahanglang abagan sa mga ginikanan ang mga kabataan sa pag-andam ug usa ka bahin sa leksiyon alang sa matag tigom.—Heb. 10:23.
5 Ang ubang kabataan mabenepisyohan pinaagig pagbaton ug espesyal nga mga asaynment sa panahon sa mga miting. Ang mga bata mahimong monota kon pila ka higayon ang ngalan sa Diyos o ang Gingharian gihisgotan. Kadtong dakodako na mahimong itudlo sa paglista sa mga teksto nga gibasa o gikutlo. Sila usab mahimong hatagan ug higayon sa ulahi sa pagkomento sa mga puntos nga nakat-onan sa maong miting.
6 Ang tanang kabataan nga makabasa kinahanglang tabangan sa pagbaton ug programa sa pagbasa sa mga basahon sa Sosyedad, sama sa Estorya sa Bibliya, Dakong Magtutudlo, ug Pagkabatan-on nga mga libro, maingon man sa mga artikulo diha sa mga magasin.
SENINA UG PAMOSTURA
7 Napanid-an nga ang panapot o pananina sa usa ka bata adunay kalabotan sa iyang tinamdan ug pamatasan diha sa mga tigom. Sa dihang moduaw sa sangang buhatan sa Sosyedad, maoy tukma alang sa mga bata ug mga hamtong sa pagsenina sama sa ilang panapot sa pagtambong sa miting sa kongregasyon.—om p. 131.
8 Ang maayong pamatasan sa mga kabataan sa mga tigom nagadala usab ug pagdayeg ug kadungganan kang Jehova. Busa, ang mga ginikanan kinahanglang magbaton gayod ug suod nga pag-atiman diha sa mga miting. Ang mabalak-ong mga ginikanan mohikay alang sa pamilya nga tapad nga manglingkod ug tinoon nga ang ilang mga anak maghupot kanunay ug hustong panggawi sa panahon sa mga tigom. Para sa dugang mapuslanong mga sugyot, ang mga ginikanan makapakigsulti man sa uban nga adunay maayong kalamposan uban sa ilang gagmayng kabataan.
9 Maoy atong tinguha nga ang mga kabataan bug-os nga makaambit diha sa pagsimba sa atong Kristohanong mga miting ug ‘magpadasig sa uban sa gugma ug sa maayo kaayong mga buhat.’ (Heb. 10:24) Diha sa kahikayan ni Jehova nga Diyos, ang mga miting alang man usab sa mga kabataan.