Tabangi ang mga Anak sa Pagkuhag Mas Pang Kaayohan Gikan sa mga Tigom
1 Sa dihang motambong ang inyong mga anak sa mga tigom, sila ba gayod nagapatalinghog? Ila bang ikaasoy kaninyo pagkahuman niana ang mga butang nga ilang nakat-onan gikan sa matag miting? Ikaw ba nagapahimutag aktibong sumbanan pinaagig imong mga pagpatugbaw diha sa mga tigom, kanang ilang makita, madungog, ug masundog? Ang inyo bang mga anak nagasundog sa inyong pagtuo? Ang positibong mga tubag niining mga pangutanaha hinungdanon kaayo kon ang mga anak magatubo man ugaling ingong debotadong mga alagad ni Jehova.
ISILSIL ANG KAHINUNGDANON SA PAGTAMBONG SA TIGOM
2 Ang usa ka bata nagakinahanglan ug instruksiyon kon ugaling iyang mabatonan ang kinabuhing walay kataposan. (Juan 17:3) Kon ang usa ka bata makakat-on man ugaling sa pagpabili sa espirituwal nga mga butang, ang pagtambong sa tigom gikinahanglan. May mga panahon, nga ang mga ginikanan magduhaduha sa pagdala sa ilang mga anak ngadto sa mga tigom tungod kay sila mahadlok nga ang ilang kabataan makadisturbo sa uban. Ang uban magbilin sa ilang mga anak sa balay aron himoon ang ilang ‘school home work’ o leksiyon sa eskuwelahan. Apan, ang maalamong ginikanan magdala sa iyang mga anak ngadto sa mga miting.—Deut. 31:12.
3 Ang unang butang nga kinahanglang makat-onan sa usa ka bata gikan sa iyang pagkamasuso mao ang pag-adto sa Kingdom Hall aron maminaw. Apan kon hatagan siyag mga butang aron padayong lingawon siya, sama sa mga dulaan o pagkaon, o kon tugotan siyang magdula diha sa iyang lingkoranan, siya ba makakat-on sa pagpatalinghog ug sa pag-apresyar kon ngano kitang nagatambong sa mga tigom sa Kingdom Hall? Kon ang usa ka bata magbinuang, ang maalamong ginikanan magatul-id kaniya ug mahigugmaong bansayon siya sa pagpaminaw, dili sa paghiphip kaniya pinaagig dulse o mga dulaan, kondili sa pagpadapat sa disiplina sa Pulong sa Diyos.—Prov. 13:24; Efe. 6:4.
IMONG PANIG-INGNAN INGONG GINIKANAN
4 Ang Bantayanang Torre sa Hulyo 15, 1982, panid 19 (Enero 15, 1982, panid 17 sa Ingles), misukna sa mosunod nga mga pangutana: “Nasayod ba ang imong mga anak nga imong gipabilhan ang mga tigom sa pagtuon sa Bibliya? Ila bang makita nga imong giisip kining mga tigoma nga hinungdanon dili kay sa pagtambong lamang apan ikaw makigbahin usab, mopahayag ug mga komento kon kini gikinahanglan?” Kon makita sa imong mga anak nga ikaw nakig-estorya nga wala kinahanglana sa panahon sa mga tigom o kon ikaw o ang uban nagapakigdula uban kanila, unsang impresyon ang mahimo niana nganha kanila? Unsa man ang ilang pag-isip sa mga panahon sa miting? Sanglit kay ang mga bata maayo mang mga magsusundog, ang imong panig-ingnan adunay dulot nga epekto diha kanila.
5 Nakaplagan sa ubang ginikanan nga mapuslanon sa pagtagana bisan sa gagmayng kabataan ug ilang kaugalingong mga kopya sa mga basahon nga gigamit sa mga miting. Tingali sa panahon sa pagtuon sa pamilya, ilang tabangan ang ilang mga anak sa pag-andam sa tukmang mga komento. Usab, ang mga ginikanan makapalig-on sa ilang mga anak pinaagig pagsubli sa mga puntos nga gihisgotan sa tigom ug sa paggahin ug panahon sa pagtubag sa mga pangutana nga ila tingaling isukna. Kinahanglan usab nga alisto ang mga ginikanan sa pagdayeg sa ilang mga anak tungod sa ilang pakig-ambit diha sa mga tigom.
6 Maoy tinuod nga kining pagbansaya nagalangkit ug panikaysikay alang sa mga ginikanan. Bisan pa niana, ang pagbuhat sa mga butang sumala sa paagi sa Diyos magpatunghag maayong mga resulta. Ingon sa gibungat sa kasulatan: “Ang matarong nagalakat diha sa iyang integridad. Malipayon ang iyang mga anak sunod kaniya.”—Prov. 20:7.