Ipakita ang Pagtagad sa Uban—Bahin 2
1 Kutob sa maarangan, buot natong mentinahon ang maayong mga pakiglabot sa katawhan sa atong komunidad. Kini nagakinahanglan nga ipakita nato ang pagtagad ug pagtahod sa ilang mga katungod ug mga pagbati.
2 Ang mga Saksi ni Jehova nailhan sa maayong mga pamatasan. Ang atong mga suntoan sa kaligdong diha sa silinganan, sa tunghaan, sa dapit-trabahoan, ug sa atong mga asembliya, nahimong ulohan sa daghang paborableng mga komento.—Tan-awang Hunyo 15, 1989, nga Bantayanang Torre, panid 20.
3 Ang maayong panggawi nagalakip sa kamatinud-anon, pagkakugihan, ug maayong moral. Kini nagalakip usab sa pagkamatinahoron sa mga namuyo sa dapit palibot sa atong Kingdom Hall. Ang atong diyosnong panggawi sa ubang mga butang mahimong isalikway kon mapakyas kita sa pagkamatinagdanon sa atong mga silingan. Si Pablo nag-awhag kanato nga “managgawi sa paaging takos sa maayong balita.”—Filip. 1:27.
4 Usahay, ang mga nanagpuyo sa duol sa pipila ka Kingdom Hall nagareklamo tungod sa ilang gibating kakulang sa pagtagad niadtong nagatambong sa mga tigom. Ang mga igsoon kinahanglang maglikay sa pagtapok diha sa agianan sa atubangan sa Kingdom Hall ug bibong mag-estoryahanay nga madungog sa duol nga mga balay. Ang mga bata dili gayod tugotan sa pagdagandagan sulod ug gula sa Kingdom Hall. Ang dinanghag nga paglagpak sa mga sera sa sakyanan o pagsirbato makadisturbo sa silinganan. Kining matanga sa panggawi nagabanaag ug di-paborable sa kongregasyon.
5 Ang samang mga suliran ang gikataho maylabot sa pagparking sa mga sakyanan. Ang mga sakyanan dili angayng iparking diha sa pribadong luna o sa mga dapit diin makabalda kini sa trapiko o makababag sa mga agianan. Ang mga parkinganan sa duol nga negosyohanan dili gayod gamiton gawas kon mohatag silag pagtugot. Usab, hinungdanon nga atong bantayan ang tanang balaod sa trapiko sa dihang nagamaneho sa maong dapit.—Roma 13:1, 2, 5.
6 Ang Bibliya nagaawhag kanato nga “himoa ang tanang butang alang sa kahimayaan sa Diyos,” ug kana nagalakip sa pagpakitag konsiderasyon sa mga tagagawas. (1 Cor. 10:31-33) Kon kita ‘managtan-aw sa personal nga kaayohan sa uban,’ kita dili kay magdinanghag sa pagsugok diha sa ilang propiedad. (Filip. 2:4) Likayan usab nato nga makabalda sa mga kalihokan sa negosyo sa lokal nga mga negosyante.
7 Ang pagpakitag pagtagad sa uban—sa sulod o sa gawas man sa kongregasyon—maoy panggawas nga kapahayagan sa kon unsay gibati sa atong mga kasingkasing. Kon unsay atong gibuhat ug gisulti magapasundayag gayod nga atong ‘gihigugma ang atong mga silingan ingon sa atong kaugalingon.’—Mat. 7:12; 22:39.