Nagatanyag sa Atong Kaugalingon nga Kinabubut-on Alang sa Matag Maayong Buhat
1 Usa ka kalibotanong publikasyon naghisgot sa mga Saksi ni Jehova, nga nagaingon: “Maoy malisod sa pagkaplag ug mga membro sa bisan haing grupo nga nagabuhat nga sama ka mahagoon sa ilang relihiyon kay sa mga Saksi.” Ngano man nga ang mga Saksi ni Jehova nagahago ug maayo ug uban nianang usa ka kinabubut-ong espiritu?
2 Ang usa ka hinungdan mao nga sila natugob sa diwa sa pagkadinalian. Si Jesus miila nga siya may limitadong panahon sa paghuman sa iyang buluhaton sa yuta. (Juan 9:4) Karong adlawa, ang katawhan ni Jehova nagaamgo nga sila adunay limitadong panahon sa pagtuman sa ilang buluhaton. Busa, sila padayong nagatanyag sa ilang kaugalingon nga kinabubut-on alang sa sagradong pag-alagad. (Sal. 110:1-3) Uban sa dugang pang panginahanglan sa mga mamumuo sa alanihon, wala gayoy paghunong ang ilang panikaysikay. (Mat. 9:37, 38) Busa, sila naningkamot sa pagsundog kang Jesus, kinsa nagpahilunag hingpit nga panig-ingnan sa pagkaandam ug kakugi sa iyang buluhaton.—Juan 5:17.
3 Ang laing katarongan kon nganong ang mga Saksi ni Jehova nagabuhat nga tibuok-kalag mao nga ang ilang organisasyon maoy lahi gikan sa tanang ubang grupo. Ang kalibotanong relihiyosong mga organisasyon sagad nanginahanglan lamang ug diyutayng panahon ug paningkamot sa ilang mga sakop. Kon unsay ilang gituohan, may diyutay o walay epekto sa ilang adlaw-adlawng mga kinabuhi. Ilang gipalabi nga ang ilang mga magbalantay ‘magsulti kanila ug malumo nga mga butang,’ nga nagapasalig kanila nga ang ilang taphaw nga paningkamot igo na. (Isa. 30:10) Ang ilang mga klero misanong pinaagig ‘paggitik sa ilang mga dalunggan,’ nga nagasilsil sa espiritu sa kawalay-kadasig ug espirituwal nga katapol.—2 Tim. 4:3.
4 Pagkalahi taliwala sa katawhan ni Jehova! Ang tanang butang sa atong pagsimba nagalangkit sa pagpaningkamot ug buluhaton. Sa matag adlaw ug sa tanang butang nga atong ginabuhat, atong gipadapat kon unsay atong gituohan. Samtang ang kamatuoran nagapatungha ug dakong kalipay, kini nagalangkit sa “kusganon nga pakigbisog” alang kanato sa pagtuman kon unsay gikinahanglan. (Itandi ang 1 Tesalonica 2:2.) Ang pag-atiman lamang sa mga responsibilidad sa adlaw-adlawng pagkinabuhi maoy igo na sa kadaghanang tawo nga mapuliki. Bisan pa, kini dili makapugong kanato sa pag-una sa intereses sa Gingharian.—Mat.6:33.
5 Ang atong pag-alagad kang Jehova mapuslanon kaayo ug dinalian nga kita napalihok sa ‘pagpalit’ sa panahon gikan sa ubang mga pangagpas ug gamiton kana alang sa espirituwal nga mga butang. (Efe. 5:16) Sa pagkahibalo nga ang atong diyosnong debosyon ug kinabubut-ong espiritu nakapahimuot kang Jehova, kita gidasig sa pagpadayon sa atong paghago. Ang atong determinasyon mao ang padayong “nagahago ug nagapanlimbasog sa atong kaugalingon” tungod sa intereses sa Gingharian.—1 Tim. 4:10.
6 Ang Pagkamahinalaron ug ang Espiritu sa Pagsakripisyo-sa-Kaugalingon: Kadaghanang tawo karong adlawa nagauna sa materyal nga mga panginahanglan ug mga intereses labaw sa ubang butang. Ilang gibug-os ang pagtagad diha sa kon unsay ilang kan-on, imnon, o isul-ob. (Mat. 6:31) Nga wala makontento sa mga panginahanglan, sila natukmod sa tumong sa pagkalipay sa maayong pamuyo ngadto sa kabug-osan karon ug sa pagkabaton ug ‘daghang maayong mga butang nga natigom sa daghang katuigan, busa sila magpahayahay, kaon, inom, maglipay sa ilang kaugalingon.’ (Luc. 12:19) Ang kasagarang maninimba mobating ang bisan unsang personal nga paningkamot nga gikinahanglan sa iyang relihiyon maoy pagpanghilabot sa iyang mga katungod. Tungod kay ang iyang panghunahuna nasentro sa iyang kaugalingon, ang pag-ugmad sa usa ka espiritu sa pagsakripisyo-sa-kaugalingon dili mapuslanon.
7 Lahi ang atong panglantaw niining butanga. Ang Pulong sa Diyos nagtuboy sa atong panghunahuna aron magapamalandong sa mga hunahuna sa Diyos inay kay nianang iya sa mga tawo. (Isa. 55:8, 9) Kita may mga tumong sa kinabuhi nga milabaw sa unodnong mga pangagpas. Ang pagbayaw sa pagkamagmamando ni Jehova ug ang pagbalaan sa iyang ngalan mao ang labing hinungdanong mga isyu sa tibuok uniberso. Ang kahinungdanon niining mga isyuha dako kaayo nga, kon itandi, ang tanang kanasoran “maorag wala maglungtad sa iyang atubangan.” (Isa. 40:17) Ang bisan unsang pagsulay sa pagkinabuhi sa atong mga kinabuhi sa paagi nga nagasalikway sa kabubut-on sa Diyos kinahanglang isipon ingong kabuangan.—1 Cor. 3:19.
8 Busa samtang ang pipila ka materyal nga butang gikinahanglan, atong nasabtan nga kini dili gayod mao ang “mas hinungdanong mga butang.” (Filip. 1:10) Kita nagauyon sa espiritu sa 1 Timoteo 6:8 sa paglimite sa atong pagpangagpas sa materyal nga intereses ug pagbug-os sa atong mga kasingkasing diha sa ‘mga butang nga dili-makita nga walay-kataposan.’—2 Cor. 4:18.
9 Sa dugang pa natong gihunahuna ang mga hunahuna sa Diyos, mas menos ang atong kabalaka bahin sa materyal nga mga butang. Sa dihang atong gipamalandong kon unsa na ang nahimo ni Jehova alang kanato ug ang kahibulongang mga panalangin nga iyang gisaad alang sa ugma-damlag, kita andam nga mohimog bisan unsang pagsakripisyo nga iyang ginapangayo kanato. (Mar. 10:29, 30) Utang nato kaniya ang atong paglungtad. Kita mobating obligado sa paghatag sa atong kaugalingon, sanglit kay ang matag butang nga atong ginabuhat sa iyang pag-alagad ‘mao ang angay natong mabuhat.’ (Luc. 17:10) Ang bisan unsang butang nga gipangayo kanato nga ihatag kang Jehova, atong ipaambit nga mangayaon, sa pagkasayod nga kita “magaani nga madagayaon.”—2 Cor. 9:6, 7.
10 Ang Andam nga mga Magbubuhat Gikinahanglan Karon: Sukad sa pagsugod gayod niini, ang Kristohanong kongregasyon misulod ngadto sa usa ka panahon sa madasigong kalihokan. Ang usa ka bug-os nga pagpanaksi kinahanglang himoon una pa ang paglumpag sa Jerusalem niadtong 70 K.P. Sulod nianang panahona ang mga tinun-an ni Jesus “hilabihan kaokupado sa pulong.” (Buh. 18:5) Ang kusog nga pagkaylap nanginahanglan sa pagbansay ug dugang mga tig-ebanghelyo ug mahanasong mga magbalantay. Ang mga lalaki nga may kasinatian sa pagpakiglabot sa sekular nga mga awtoridad maingon man sa takos nga mga lalaki nga makahimo sa pagpanglantaw sa pagkolekta ug pag-apod-apod sa materyal nga mga butang ang gikinahanglan. (Buh. 6:1-6; Efe. 4:11) Samtang ang pipila nag-alagad nga dayag gayod, ang kadaghanan nagpabiling anaa sa likod lamang. Apan silang tanan ‘kusganong nagapanlimbasog sa kaugalingon,’ duyog nga nagabuhat nga kinasingkasing aron mahuman ang buluhaton.—Luc. 13:24.
11 Bisan pag may diyutay lamang panginahanglan alang sa kusganong kalihokan sulod sa mga siglo nga misunod, ang usa ka dakong pagbuhi pag-usab sa kalihokan sa Gingharian misugod sa dihang si Jesus midawat sa iyang Gingharianong gahom sa 1914. Sa sinugdan, dili ang tanan nakaamgo nga dako kaayo ang panginahanglan alang sa mga magbubuhat, nga nagakinahanglan sa tabang sa mga minilyon libot sa tibuok globo.
12 Karong adlawa ang organisasyon nalangkit sa usa ka dagko nagkadaiyang mga proyekto nga halos naghurot sa atong mga kahinguhaan. Ang kalihokan sa Gingharian nagapadayon sa unahan sa dakong gilapdon. Ang pagkadinalian sa atong mga panahon nagapalihok kanato sa pagpanlimbasog sa kaugalingon ug gamiton ang matag kabtangan nga anaa kanato sa pagpalampos sa buluhaton. Sanglit kay haduol na man kaayo ang kataposan sa tibuok daotang sistema sa mga butang, kita makadahom ug labaw pang madasigong kalihokan sa mga adlaw sa unahan! Ang matag dedikadong alagad ni Jehova giawhag nga motanyag sa iyang kaugalingon nga kinabubut-on diha sa dinaliang pagpanigom nga buluhaton!
13 Unsa ang Kinahanglang Buhaton? Kita sa pagkamatinud-anon makaingon nga adunay “daghang buhaton sa buluhaton sa Ginoo.” (1 Cor. 15:58) Sa daghang teritoryo ang alanihon hinog na, apan ang mga mamumuo diyutay ra. Kita gidapit sa pagbuhat sa atong bahin dili lamang sa labaw pang pagbug-os sa pagpanaksi sa tibuok natong kaugalingong teritoryo apan usab sa pagkab-ot sa hagit sa pag-alagad diin may dakong panginahanglan.
14 Maoy dalayegon ang paglantaw kon giunsa sa mga Saksi sa tanang bahin sa kalibotan ang pagtanyag sa kaugalingon nga kinabubut-on sa ubang mga kalihokan. Kini mahimong nagalakip sa pagboluntaryo sa pagpanukod sa mga dapit sa pagsimba, pag-alagad sa mga kombensiyon, pag-abag sa mga paningkamot sa hinabang sa mga panahon sa katalagman, o paghinlo sa lokal nga Kingdom Hall. Kita kinahanglan nga kanunayng magseguro nga ang Kingdom Hall nagpabiling anaa sa mahinlo ug mahapsay nga kahimtang sa matag human sa tigom. Ang pagbuhat sa mga gimbuhaton nga hayan isipong ubos nagapakita sa tukmang pagsabot sa mga pulong ni Jesus sa Lucas 16:10: “Ang tawo nga kasaligan sa unsay labing gamay kasaligan usab sa dako, ug ang tawo nga dili-matarong sa unsay gamay dili-matarong usab sa dako.”
■ Pagsuportar sa mga Kalihokan sa Kongregasyon: Ang matag kongregasyon gilangkoban sa indibiduwal nga mga magmamantala sa Gingharian. Ang mga kalamposan sa kongregasyon nagadependeg dako kon unsa ka dako ang matag Saksi mahinangop ug makaarang sa pagbuhat. Kini nagapunting diha sa pagwali gayod sa maayong balita, paghimog bag-ong mga tinun-an, ug unya palig-onon sila sa espirituwal. Ang matag usa kanato makaamot niining buluhatona. Kita usab makapahilunag mga tumong sa atong kaugalingon diha sa personal nga pagtuon, pagpakig-ambit sa mga tigom, ug pag-abag sa uban nga nanginahanglan sa kongregasyon. Kining mga kalihokana nagatanyag ug dagayang maayong kahigayonan alang kanato sa pagpasundayag sa atong pagkaandam.
■ Pagpanguna sa mga Posisyon sa Pagdumala: Si Jehova nagpiyal sa pagdumala sa matag kongregasyon ngadto sa tinudlong mga ansiyano niini. (Buh. 20:28) Kini maoy mga lalaki nga nagapangab-ot aron makuwalipikado niining pribilehiyoa. (1 Tim. 3:1) Sa pagkatinuod ang matag igsoong lalaki sa kongregasyon may pipila ka purohan nga mahitakos alang sa mas dagkong mga kaakohan. Daghang igsoong lalaki nagaugmad sa espirituwal. Kining mga tawhana kinahanglang makugihong mga estudyante sa Bibliya ug sa atong mga publikasyon. Sila makapasundayag sa ilang pagkaandam pinaagig pagkamasinakopon sa natudlo-espiritung mga ansiyano, nga nagasundog sa ilang pagtuo, ug nagaugmad sa mga hiyas nga ginalantaw alang sa mga magtatan-aw.-Heb. 13:7, 17.
■ Pagsulod sa Bug-os Panahong Pag-alagad: Ang kongregasyon sa panguna nagalihok sa pagwali sa maayong balita. (Mat. 24:14) Pagkadakong panalangin sa dihang ang mga masiboton magapakusog sa ilang mga pagpanikaysikay pinaagig pagpalista ingong mga payunir! Kini sagad nagalangkit sa paghimog mga pagpasibo sa ilang personal nga kinabuhi. Kadtong mitapot niining pribilehiyoa inay kay moundang human sa usa ka tuig o labaw pa tungod sa pipila ka temporaryong pagkaluya seguradong makasinati sa dagayang panalangin ni Jehova. Ang mahigugmaong mga ansiyano ug ubang mga hamtong makatabang sa mga payunir nga molampos, nagadasig kanila pinaagig pulong ug buhat. Pagkamaayong espiritu ang gipasundayag sa mga batan-on nga midiretso ngadto sa payunir nga buluhaton sa pagkatapos sa pagtungha! Ang susama tinuod sa mga hamtong nga nagapalista gilayon ingong mga regular payunir sa dihang ang ilang sekular nga mga obligasyon nakunhoran. Pagkadakong katagbawan kini ngadto sa usa ka dedikadong Kristohanon sa dihang siya nagapakigtambayayong sa pagpatulin ni Jehova sa pagpanigom nga buluhaton!—Isa. 60:22.
■ Pagpakig-ambit sa Pagpanukod ug Mintinasyon sa mga Tigomanan: Gatosan ka modernong mga Kingdom Hall maingon man ang daghang Assembly Hall ang gipangtukod. Ang kadaghanan sa tanang buluhaton ginahimo sa atong mga igsoong lalaki ug babaye nga kinabubut-ong nagboluntaryo sa ilang panahon ug mga kahanas. (1 Cron. 28:21) Kaliboan sa kinabubut-ong mga trabahante naghupot niining maong mga pasilidad diha sa maayong kahimtang pinaagig pagbuhat sa bisan unsang mga gimbuhaton nga gikinahanglan. (2 Cron. 34:8) Sanglit kay kining buluhatona maoy usa ka bahin sa sagradong pag-alagad, kadtong nagaabag nagatanyag sa kaugalingon nga kinabubut-on, wala magapangayong ulian sa nagasto sa ilang serbisyo, maingon nga sila wala mangayog bayad sa pagwali sa balaybalay, paghatag ug pakigpulong publiko, o pagtabang sa buluhaton sa asembliya o kombensiyon. Kining mga boluntaryoha madagayaong nagatanyag sa ilang mga serbisyo sa pagplano ug pagtukod sa mga dapit sa pagsimba ngadto sa kadayegan ni Jehova. Kining mga maunongong mga alagad ni Jehova wala gayod sa bisan unsang paagi magtinguhang makaganansiya sa materyal bisan sa diretso o sa di-diretso gikan sa mga serbisyo nga ilang nahatag, sanglit kay ang tanan nilang kahibalo ug mga kahinguhaan gipahinungod man kang Jehova. Kining kalihokana nagakinahanglag kugihang mga magbubuhat nga nagatuman sa ilang mga pag-alagad nga “tibuok-kalag ingon nga alang kang Jehova.”—Col. 3:23.
15 Nan, unsa man ang nakapahimo sa pagkaandam sa katawhan ni Jehova nga talagsaon? Kana mao ang espiritu sa paghatag. Ang ilang pagkamanggihatagon nagalangkit ug labaw pa kay sa salapi o materyal nga mga butang—sila “nagatanyag sa kaugalingon sa kinabubut-on.” (Sal. 110:3) Kini mao ang diwa sa atong dedikasyon kang Jehova. Kita gigantihan sa usa ka espesyal nga paagi. Kita nakasinati ug “labawng kalipay” ug kita “nagaaning madagayaon” tungod kay ang atong gibuhat gipabilhan sa uban, kinsa sa baylo nagahatag kanato. (Buh. 20:35; 2 Cor. 9:6; Luc. 6:38) Si Jehova “nahigugma sa usa ka masayahong maghahatag.” (2 Cor. 9:7) Siya magabalos kanato sa usa ka gatos ka pilo, uban sa mga panalangin nga molungtad sa walay kataposan. (Mal. 3:10; Roma 6:23) Busa kon ang mga pribilehiyo sa pag-alagad ni Jehova mahimong mabatonan nimo, moboluntaryo ba ang imong kaugalingon ug motubag sama kang Isaias: “Ania ako! Ipadala ako”?—Isa. 6:8.