Pagkuhag Kaayohan Gikan sa Teokratikanhong Ministeryong Tunghaan sa 1996—Bahin 2
1 Wala madugay human ang Teokratikanhong Ministeryong Tunghaan magsugod niadtong 1943, ang usa sa mga sanga sa Sosyedad mitaho: “Kining maayo kaayong kahikayan nagmalamposon sa mubong panahon sa pagtabang sa daghang igsoon kinsa naghunahuna nga dili gayod sila mahimong mga mamumulong sa publiko nga mahimong batid kaayo diha sa plataporma ug mas epektibo sa kanataran.” Ang tunghaan nagapadayon sa pagtaganag ekselenteng pagbansay, nga gikinahanglan natong tanan.
2 Pagbasa sa Bibliya: Silang gihatagan ug mga bahin sa pagpahayag dili sila ra ang makabenepisyo gikan sa tunghaan. Sa pagkatinuod, kitang tanan adunay asaynment—ang senemanang pagbasa sa Bibliya. Daghang Kasulatan nagapahinumdom kanato sa pagbasa sa Bibliya matag adlaw. (Jos. 1:8; Sal. 1:2; Buh. 17:11) Ang pagbasa sa Bibliya hinungdanon alang sa maayong espirituwal nga kahimsog; kini nagapakaon sa hunahuna ug kasingkasing. Kon basahon nato ang Bibliya bisan sa lima ka minutos matag adlaw, kita arang makanunot sa eskedyul sa pagbasa sa Bibliya sa tunghaan. Sa kataposan sa tuig, kita nakabasa na ug kapin sa 150 ka kapitulo sa Pulong sa Diyos.
3 Pakigpulong nga Nagatudlo: Ang mamumulong nga nagahatag sa pakigpulong nga nagatudlo nanginahanglang maggamit ug maayong mga metodo sa pagtudlo aron palamboon ang pagpabili kang Jehova, sa iyang Pulong, ug iyang organisasyon. Ang mga ansiyano ug ministeryal nga mga alagad kinahanglang mangandam pag-ayo, magpasiugda sa tema, ug himoong buhi ang materyal. (Heb. 4:12) Hinungdanon nga ang mamumulong magpabilin sa gitugot niyang panahon. Ang “Tibuok Kasulatan” nga libro nagapresentar ug han-ay sa makapadasig Kasulatanhong materyal nga makaayo kanato sa espirituwal. Ang Mga Magmamantala nga libro naundan sa modernong-adlaw nga kasaysayan sa makitang organisasyon ni Jehova ug nagasaysay sa mga hitabo sa mga kinabuhi sa matuod nga mga tawo kinsa nagpadayag ug pagtuo, kadasig, debosyon, ug gugma.
4 Dagkong mga Puntos sa Bibliya: Ang mga igsoong lalaki nga nahatagan niining maong asaynment kinahanglang magpilig tinong mga bersikulo nga mahimong mapadapat diha sa praktikal nga paagi. Kini nagakinahanglang basahon ang mga kapitulo nga giasayn ug paghimog panukiduki sa pagkaplag sa kahulogan sa tinong mga bersikulo. Diha sa luyo sa Watch Tower Publications Index, anaa ang “Scripture Index,” nga mahimong makatabang sa pagkaplag ug impormasyon bahin sa tinong mga bersikulo sa Bibliya. Ang mga igsoong lalaki nga nagadumala niining bahina kinahanglang maggamit ug pagpanabot ug likayan ang pagdugang sa di-hinungdanong materyal. Kinahanglang dili nila andamon ang dugang materyal kay sa makataronganong makobrehan sa unom ka minutos.
5 Kitang tanan makakuhag kaayohan gikan sa Teokratikanhong Ministeryong Tunghaan. Ang bug-os nga pagpahimulos niini nga tagana sa walay duhaduha makatabang kanato sa paghimo sa atong ‘pag-uswag nga madayag sa tanang tawo.’—1 Tim. 4:15.