Ang Teokratikanhong Ministeryong Tunghaan Nagahatag mga Kaayohan
1 Ang Teokratikanhong Ministeryong Tunghaan nagapadayon sa paglampos sa duha ka dagkong tumong niini: (1) aron pauswagon ang katakos sa pagsulti sa kamatuoran sa Bibliya ug (2) aron himoon kitang mas sinati sa Pulong sa Diyos, mga doktrina niini, ug mga prinsipyo niini. Daghan ang mipatugbaw ug pagpabili sa mauswagong pagbansay nga nadawat. Ang mga igsoong lalaki ug babaye nabuligan sa ‘paggamit sa pulong sa kamatuoran sa hustong paagi.’—2 Tim. 2:15.
PAGHIMOG KAUSWAGAN
2 Kadtong bag-ong nalista makakuhag labing dakong benepisyo pinaagig pag-andam pag-ayo sa ilang mga asaynment. Napanid-an nga ang pipila mibasa sa ilang mga presentasyon. Aron mahimong hanas sa pagpamatuod gikinahanglan ang maayong pagbasa ug katakos sa pagsulti sa kaugalingon sa paaging ekstemporanyo.
3 Ang librong Nangatarongan napamatud-an nga maayo kaayong tabang sa atong buluhaton, ug ang Teokratikanhong Ministeryong Tunghaan makaabag kanato sa pagkahimong mas pang sinati sa mga bahin niini. Ang pagkahimong sinati niining publikasyona makabulig kanato sa pagpatugbaw sa mga ideya diha sa atong kaugalingong mga pulong ug mahimong mas pang makokabildohon o kombersisyonal.
MGA INSTRUKSIYON PARA SA 1989
4 Sulod sa 1989, ang ‘Assignment No. 1’ ipasukad gihapon sa “All Scripture Is Inspired of God and Beneficial.” Bisan tuod 15 minutos ang igahin niini, ang diyutay nga kausaban gihimo. Gikan sa 10 ngadto sa 12 minutos mahimong gamiton alang sa pahayag ug 3 ngadto sa 5 minutos para sa binaba nga pagsubli.
5 Ang mga igsoong lalaki nga magdumala sa ‘highlights’ gikan sa pagbasa sa Bibliya kinahanglang motabang sa tigpaminaw sa pagsabot kon ngano ug kon sa unsang paagi ang impormasyon maoy bililhon alang kanato. Ang paggamit sa ‘Scripture index’ diha sa Watch Tower Publications Index makatabang ug dako. Dugang pa, ang espesyal nga mga artikulo maylabot sa mga basahon sa Hebreohanong Kasulatan padayon mang mapatik diha sa Ang Bantayanang Torre, ug kini magtaganag saysay-kaagi nga materyal ug ubang mapuslanong mga puntos nga mahimong magamit.
SINULAT NGA MGA REPASO
6 Sugod sa 1989, ang kausaban himoon sa paaging dumalahon ang sinulat nga mga pagsubli. Ang mga repaso pagahimoon sa makatulo sulod sa tuig—sa kataposan sa Abril, Agosto ug Disyembre. Dili na ang Sosyedad magtagana ug ‘printed review sheet,’ kondili ang matag magmamantala magdala sa iyang kaugalingong papel ug igsusulat aron siya makaambit. Ingon sa miagi, ang inandam nga mga pangutana uban sa mga tubag niini itagana sa Sosyedad. Diha sa sinulat nga mga repaso, ang linaing atensiyon himoon nganha sa materyal nga gikobrehan sa ‘Assignment No. 1’ ug ‘Bible highlights.’
PAGBASA SA BIBLIYA
7 Kita ba sa personal nakabenepisyo gikan sa natudlong pagbasa sa Bibliya? Samtang kita magabasa, tan-awon ta ang mga teksto nga magpalig-on sa pagpabili, kanang magpalig-on sa mga hiyas nga gikinahanglan sa atong personal ug banaynong kinabuhi, o kanang makabulig kanato sa pagpadapat sa mga panig-ingnan sa mga gihisgotan. Ato bang gisulayan ang atong pagbasa sa Bibliya samtang nagapaminaw sa mga teyp sa Bibliya nga iya sa Sosyedad? Dili ta sayloan ang tabang nga ikahatag niini nga mga teyp alang sa mga igsoong natudlong mag-andam sa ‘Talk No. 2.’ Sa pagtagad gayod sa hustong paglitok, pag-usab sa tingog, ug pasiugda sa kahulogan, kini magpahimo sa ilang pagbasa nga mas buhi ug makahuloganon.
8 Naghimo si Jehova ug dagaya espirituwal nga tagana sa pag-abag kanato sa atong hinungdanon buluhatong pagsangyaw. Sa Salmo 19:14, si David mipatugbaw sa iyang mainampoong tinguha: “Pasagding ang mga pulong sa akong baba ug ang pagpalandong sa akong kasingkasing makapahimuot sa imong atubangan, O Jehova nga akong Bato ug akong Manluluwas.” Kon, sama sa kahimtang ni David, dako diha sa atong kasingkasing ang gugma kang Jehova ug sa iyang Anak, ang Teokratikanhong Ministeryong Tunghaan makabulig kanato sa paghimo sa mga pulong sa atong baba nga mas kahimut-an ni Jehova sa 1989. Magdesidido kita karon sa bug-os nga pagbenepisyo gikan niining mahigugmaong tagana sa atong maluloton langitnong Amahan.