Isangyaw ang Maayong Balita sa Tanang Dapit

¹ Ang sayong mga Kristohanon nagwali sa maayong balita sa tanang dapit. Masiboton kaayo sila nga sulod sa 30 anyos sa pagkabanhaw ni Jesu-Kristo, ang mensahe sa Gingharian “gikawali diha sa tibuok kalalangan ilalom sa langit.”​—Col. 1:23.

² Ang mainitong mga alagad ni Jehova karong adlawa adunay samang tumong​—aron aboton ang tanan nga maarangan pinaagig maayong balita sa Gingharian. Unsay makatabang kanato sa pagkab-ot niining tumonga? Nagakadaghan ang katawhan nga nagatrabahong bug-os panahon ug kasagarang wala sa balay sa dihang moduaw kita. Kon wala sila magtrabaho, sila nagabiyahe, nagapamalit, o nagalulinghayaw. Unsaon man nga maabot ang mga takos sa ilang taliwala pinaagig mensahe sa Gingharian?​—Mat. 10:11.

³ Ang pipila makontak sa ilang dapit trabahoan. Bisan sa gagmayng mga lungsod adunay dapit negosyohanan diin daghang tawo nagagahin sa kinadak-an sa adlaw. Sa dagkong mga siyudad, ang katawhan nga nagatrabaho sa industriyal nga mga parke o opisina sa tag-as nga mga tinukod ug kanilang nagapuyo sa gibantayan pag-ayong mga apartment nasangyawan man​—kadaghanan sa unang higayon. Sa hinapos sa mga semana, ang pipila nga nakontak samtang nagpahayahay sa mga parke, mga dapit lulinghayawanan, o samtang naghulat sa mga paradahan o sa mga shopping mall nakaplagang mauyonon sa maayong balita.

⁴ Dugang ug dugang mga magmamantala nagahimog linaing paningkamot sa pagpanaksi sa publikong mga dapit, bisan diin ang katawhan makaplagan. Sa sinugdan, kining mga Saksiha nagduhaduha ug maorag gikulbaan sanglit naanad na sa pagsangyaw sa balaybalay. Unsay ilang gibati karon?

⁵ “Nakapalagsik kini pag-usab sa akong ministeryo!” mipahayag ang usa nga may kasinatiang igsoong lalaki. Lain pa midugang: “Kini nagapapunting kanako.” Mimatikod ang edaran nga payunir: “Makapapresko kadto sa hunahuna, sa pisikal, ug sa espirituwal, . . . ug ako padayong napalambo!” Usa ka magmamantala nagamatikod nga siya karon nakakontak sa daghang katawhan nga wala pa gayod kanhi ikasulti sa mga Saksi ni Jehova. Mainitong nakig-ambit usab ang mga batan-on niining buluhatona. Usa ka batan-on mipahayag sa iyang kaugalingon niining paagiha: “Makapahimuot sanglit makapakigsulti ka sa daghan kaayong tawo!” Lain pa miingon: “Nakapahiluna akog dugang literatura kay sukad masukad!” Kining tanan nahitabo sa teritoryo nga sublisubli nang gikobrehan!

⁶ Nagapanawng mga Magtatan-aw Nagapanguna: Nga miila nga “ang talan-awon niining kalibotana nagakausab,” ang Sosyedad nagsugyot di pa dugay nga ang nagapanawng mga magtatan-aw mopasibo sa senemanang eskedyul sa ilang pag-alagad sa kanataran aron kutob sa maarangan mas daghan pang mga tawo ang maabot sa maayong balita. (1 Cor. 7:31) Sa katuigan, ang mga magtatan-aw sa sirkito naggahin sa mga buntag sa semana sa pamalaybalayng buluhaton, samtang gideboto ang mahapon sa mga pagbalikduaw ug pagdumalag mga pagtuon sa Bibliya sa balay. Sa pipila ka dapit, kana nga eskedyul hayan praktikal gihapon. Sa uban, basin gamay ang malampos pinaagig pagpamalaybalay sa mga buntag sa semana. Sa maong mga kaso, ang nagapanawng magtatan-aw hayan mohukom nga sayo nianang adlawa maoy maayo kon himoon ang buluhaton sa katindahanan o pagsangyaw sa kadalanan. O hayan maghikay siya ug ginagmayng mga grupo nga mosangyaw sa opisina sa tag-as nga mga tinukod, mga dapit palitanan, mga paradahan, o ubang publikong mga dapit. Pinaagig labi pang epektibong paggamit sa panahon sa pag-alagad sa kanataran, daghan pang tawo ang makontak.

⁷ Ang mga taho nagapakita nga kini nga pagpasibo gidawat pag-ayo sa nagapanawng mga magtatan-aw ug mga magmamantala usab. Ubay-ubay sa mga lawas sa mga ansiyano ang mihangyo sa magtatan-aw sa sirkito nga bansayon ang pipila ka magmamantala diha sa mga bahin sa buluhaton nga nanginahanglag pagtagad. Kini nga mga magmamantala nakabenepisyo pinaagig pagkuyog sa nagapanawng magtatan-aw samtang siya nagapakig-ambit sa usa niining mga buluhatona. Sila, sa baylo, nakaarang sa pagbansay sa uban. (2 Tim. 2:2) Ingong resulta, dugang pang mga tawo ang naabot sa maayong balita.

⁸ Siyempre, dili na kinahanglan pang hulaton mo nga moduaw ang magtatan-aw sa sirkito aron sulayan ang pipila niining ubang mga paagiha sa pagsangyaw. Aniay lainlaing mga ideya nga hayan praktikal sa imong teritoryo:

⁹ Pagsangyaw sa Kadalanan: ‘Asa na ang tanang tawo?’ kita usahay matingala sa dihang moduaw kita sa biniyaang dapit puy-anan sa usa ka buntag sa semana. Pipila tingali nagapamalit. Nasulayan mo na bang aboton sila pinaagig pagsangyaw sa kadalanan? Kon kini gihimo sa hustong paagi, kining bahina sa ministeryo mahimong mabungahon kaayo. Inay kay mobarog sa usa ka dapit uban sa mga magasin, labing maayong moduol sa mga tawo ug mosugod sa mahigalaong kulokabildo. Dili kinahanglang mopamatuod sa matag lumalabay. Pakigsulti niadtong wala magdali, sama niadtong nagalantaw sa mga gipasundayag (disple), niadtong anaa sa giparadang mga sakyanan, o mga tawong nagahulat sa sakyanang publiko. Sa sinugdan, mopaabot ka lamang ug hinigalang timbaya ug hulata ang sanong. Kon andam makig-estorya ang tawo, pangayoa ang iyang opinyon sa usa ka ulohan nga imong gibating makapainteres kaniya.

¹⁰ Sa miduaw sa usa ka kongregasyon, usa ka nagapanawng magtatan-aw midapit ug unom ka magmamantala nga moduyog kaniya ug sa iyang asawa diha sa pagsangyaw sa kadalanan. Uban sa unsang mga resulta? “Maayo kaayo ang among buntag!” siya mitaho. “Walay mga wala sa balay. Kawaloan ka magasin ug daghang tracts ang napahiluna. Aduna kamiy ubay-ubayng makapadasig nga mga panaghisgot. Usa sa mga magmamantala, nga mipakig-ambit sa buluhaton sa kadalanan sa unang higayon, mipatugbaw: ‘Ako anaa na sa kamatuoran sa katuigan ug wala makaamgo kon unsay nakulang kanako!’ Sa kataposan sa semana, nahurot ang nagtipun-og nga suplay sa magasin nga iya sa kongregasyon.”

¹¹ Samtang nag-alagad sa sunod nga kongregasyon, ang samang nagapanawng magtatan-aw nakahibalo nga ubay-ubayng mga magmamantala ang nakig-ambit sa pagsangyaw sa kadalanan sayo sa usa ka buntag apan adunay limitado lamang kalamposan. Usa ka sister nakapakigsulti lamang sa duha ka tawo sulod sa tibuok yugto sa pagsangyaw, sanglit ang tanan niyang gikasugat nagdali sa trabaho. Ang nagapanawng magtatan-aw misugyot nga silang tanan mobalik sa samang dalan sa mas buntag na. Gihimo nila, ug mipabilin sila hangtod sa udto. Ang sister nga nakapakigsulti lamag duha sayosayo sa buntag nakahimog mas maayo pa sa iyang pagbalik. Nakapahiluna siyag 31 ka magasin ug 15 ka brosyur, nakakuhag mga ngalan ug mga adres sa pito ka indibiduwal, ug nakasugod ug duha ka pagtuon sa Bibliya sa balay! Ang uban sa grupo adunay susamang makapadasig nga mga resulta.

¹² Sa dihang makakaplag kag usa nga nagapakitag interes, sulayig kuha ang ngalan sa tawo, adres, ug numero sa telepono. Inay kay hangyoon dayon ang impormasyon, ikaw hayan moingon: “Nalipay ko niini nga panaghisgot. Aduna bay paagi nga mapadayon ta kini sa laing higayon?” O suknaa: “Aduna bay paagi nga makakontak ko nimo sa balay?” Daghan ang nakontak niining paagiha miuyon sa usa ka balikduaw. Tinoa nga adunay igoigong suplay sa handbills alang kang bisan kinsang buot nga motambong sa atong mga tigom.

¹³ Sa dihang ikasulti mo ang interesadong tawo nga nagpuyo sa teritoryo sa laing kongregasyon, ipasa gayod ang impormasyon aron ang mga igsoon didto makasundal sa interes. Ang pagsangyaw ba sa kadalanan maoy epektibong paagi sa pagpakaylap sa maayong balita sa inyong dapit? Kon mao, sublia ang artikulong “Kaplaga ang mga Interesado Pinaagig Epektibong Pagpamatuod sa Kadalanan” sa Hulyo 1994 nga isyu sa Atong Ministeryo sa Gingharian. Hikaya dayon ang pagpakig-ambit sa pagsangyaw sa kadalanan sa tukmang panahon sa adlaw nga makapaarang nimo sa pag-abot sa mas daghang katawhang posible.

¹⁴ Pagsangyaw sa Sakyanang Publiko: Usa ka buntag pipila ka payunir ang mihukom sa pagsangyaw sa katawhan nga naghulat sa bus duol sa lokal nga kolehiyo. Samtang sila adunay makapahimuot nga mga panaghisgot, dihay problema. Sa dihang nagkaanindot na ang panaghisgot, ang bus moabot, nga magpahunong sa panaghisgot. Gisulbad sa mga payunir ang suliran pinaagig pagsakay sa bus ug sa pagpadayon sa pagsangyaw sa mga pasahero samtang sila nagabiyahe latas sa lungsod. Pag-abot sa dulnganan, ang mga payunir mobalik pagsakay sa bus, nga mosangyaw samtang sila nagabiyahe. Human sa pipila ka ngadto-nganhi nga biyahe, ilang gisuma ang resulta sa ilang paningkamot: Kapin sa 200 ka magasin ang napahiluna ug unom ka pagtuon sa Bibliya ang nasugdan! Pipila ka pasahero andam nga mihatag sa ilang adres ug numero sa telepono aron sila maduaw sa balay. Sa sunod semana, ang mga payunir mibalik sa hunonganan sa bus ug misunod sa samang paagi sa miagi. Nakapahiluna silag 164 ka magasin ug nakasugod ug usa pa ka pagtuon sa Bibliya! Sa usa ka paghunong usa ka pasahero misakay sa bus ug milingkod sa bugtong bakanteng lingkoranan​—tapad sa usa ka payunir. Siya mitan-aw sa igsoon ug miingon nga mapahiyomon: “Hibalo ko, duna ka ing Bantayanang Torre para nako!”

¹⁵ Daghang magmamantala epektibong nakasangyaw samtang nagabiyahe sa bus, tren, o ayroplano. Unsaon nimo pagsugod ug panaghisgot sa pasahero tapad kanimo? Usa ka 12-anyos-edad nga magmamantala misugod lamang sa pagbasa ug kopya sa Pagmata! diha sa bus, naglaom nga pukawon ang kamasukitsukiton sa tin-edyer nga babaye nga naglingkod sa iyang tapad. Milampos kadto! Ang babaye nangutana niya kon unsay iyang gibasa, ug ang batan-on mitubag nga iyang gibasa ang bahin sa solusyon sa mga suliran nga atubangon gayod sa mga batan-on. Siya midugang nga nakabenepisyo siyag dako gikan sa artikulo ug makatabang usab kaniya kadto. Malipayon niyang gidawat ang mga magasin. Ang ilang panaghisgot nadunggan sa lain pang duha ka batan-on kinsa mihangyo usab ug mga kopya sa mga magasin. Niini, gipahunong sa drayber ang sakyanan sa daplin sa karsada ug nangutana kon nganong adunay tumang interes niining mga magasina. Sa dihang iyang nakaplagan, siya usab midawat ug mga kopya. Siyempre, kining tanan dili posible kon wala pay igong suplay sa mga magasin ang batan-ong magmamantala aron ipaambit sa tanan nga nagpakitag interes!

¹⁶ Pagsangyaw sa mga Parke ug sa mga Paradahan: Kon itugot sa panahon, ang pagsangyaw sa mga parke ug sa mga paradahan maoy ekselenteng paagi sa pag-abot sa katawhan. Nasulayan na ba nimong mosangyaw sa parkinganan sa usa ka shopping center? Sa imong pag-abot sa luna, obserbahi sa makadiyot ang imong mga palibot. Pangitag usa nga wala magdali o nagahulat sa giparada nga sakyanan ug sulayi pagsugod ang mahigalaong panaghisgot. Kon ang panaghisgot magapadayon, ipatungha ang mensahe sa Gingharian. Sulayi ang pagkobre nga magbulag apan uban sa lain pang magmamantala diha sa palibot. Likayi ang pagdala ug dako, gabugdong bag o sa laing paagi makakuhag pagtagad sa imong buluhaton. Magmaalamon. Hayan mas maayo nga mogahin lamang ug gamayng panahon sa usa ka paradahan ug dayon mobalhin sa lain. Kon adunay dili buot makigsulti kanimo, matinahorong mobiya ug pangitag lain nga maduol. Sa paggamit niining mga paagiha, usa ka igsoong lalaki nakapahilunag 90 ka magasin sa usa ka bulan samtang nagsangyaw sa mga paradahan!

¹⁷ Ang ubang mga tawo moadto sa usa ka parke aron magpahayahay; ang uban moadto didto aron magdula o mogahin ug panahon duyog sa ilang mga anak. Nga dili makabalda kaayo sa ilang mga kalihokan, magmabinantayon sa kahigayonan aron makasangyaw. Usa ka igsoong lalaki misugod ug panaghisgot sa magbalantay sa parke ug nakaplagang siya nabalaka bahin sa mga droga ug kaugmaon sa iyang mga anak. Ang pagtuon sa Bibliya sa balay nasugdan ug regular nga gidumala sa parke!

¹⁸ Di-pormal nga Pagsangyaw sa mga Shopping Mall: Samtang dili kanunay posible ang pagsangyaw sa pormal nga paagi sa mga tindahan sa shopping malls gumikan sa lokal nga mga pagdili sa maong mga buluhaton, pipila ka magmamantala nagahimog mga kahigayonan sa pagsangyaw didto sa di-pormal. Molingkod sila sa usa ka bangko ug mosugod ug mahigalaong panaghisgot sa uban nga mohunong aron mopahulay. Kon ipakita ang interes, maalamon nilang itanyag ang usa ka tract o magasin ug maningkamot sa paghimog mga kahikayan sa pagbalikduaw. Human makagahin ug pipila ka minutos sa pagsangyaw sa usa ka seksiyon sa mall, moadto sila sa lain ug makigsulti sa laing tawo. Siyempre, angayng mag-amping aron dili makahimog wala kinahanglanang pagtagad samtang nagapanaksi nga di-pormal niining paagiha.

¹⁹ Sa dihang motimbaya sa usa ka tawo, sugdi ang panaghisgot sa mahigalaong paagi. Kon mosanong ang imong mamiminaw, pangutan-a, dayon paminaw pag-ayo samtang ipahayag niya ang iyang kaugalingon. Magmainteresado gayod kon unsay iyang ginaingon. Ipakita nga imong gipabilhan ang iyang opinyon. Diin posible, uyoni siya.

²⁰ Usa ka sister adunay makaiikag nga pakigsulti sa usa ka tigulang babaye pinaagig paghisgot kon sa unsang paagi nahitabo ang pagtaas sa mga palaliton. Ang babaye miuyon dayon, ug misangpot sa buhing panaghisgot. Nakuha sa sister ang ngalan ug adres sa babaye, ug ang balikduaw nahimo sa maong semana.

²¹ Pagsangyaw sa Katindahanan: Pipila ka kongregasyon adunay negosyohanang mga distrito ingong bahin sa ilang natudlong teritoryo. Ang igsoong lalaki nga nagaatiman sa teritoryo hayan makaandam ug linaing mapa sa mga kard niining nagdasok negosyohanang mga luna. Ang bisan unsang residensiyal nga teritoryo sa mapa sa mga kard nga mosaylo niini angay nga tin-awng magpakita nga ang mga negosyohanan kobrehang separado. Sa ubang mga teritoryo, ang mga dapit negosyohanan makobrehang dungan sa mga residensiya. Mahimong imbitahan sa mga ansiyano ang takos nga mga magmamantala sa pagkobre sa negosyohanang mga teritoryo sa makanunayong paagi aron ang pagkobre sa katindahanan dili mapasagdan.

²² Kon naimbitahan ka sa pagpakig-ambit niining buluhatona ug wala ka pa makahimo niini sukad, ang maayong paagi sa ‘pagbaton ug kaisog’ mao ang pagkobre una sa pipila ka gagmay nga mga tindahan; dayon, sa dihang masaligon ka na, kobrehi ang mga dagko. (1 Tes. 2:2) Sa pagkobre sa mga tindahan, pagsenina samag ikaw motambong sa usa ka tigom sa Kingdom Hall. Kon posible, sulod sa tindahan sa dihang walay mga pumapalit nga naghulat nga masilbihan. Hangyo nga makigsulti sa manedyer o sa tawo nga gisaligan. Magmainiton, ug labaw sa tanan, magmamubo. Dili kinahanglang mapangayoog pasaylo. Daghang negosyo ang anad-sa-kustomer ug nagdahom na ug mga kabaldahan.

²³ Human matimbaya ang tindera-tindero, ikaw hayan makaingon niini: “Pig-ot kaayo ang eskedyul sa mga negosyante nga panagsa namo silang makaplagan sa balay, busa giduaw namo kamo dinhi sa inyong lugar negosyohanan aron bilinan niining makapalihok-hunahuna nga artikulo nga mabasa.” Dayon komentohig usa o duha ang bag-ong magasin.

²⁴ O hayan masulayan nimo kini sa duolon ang usa ka manedyer: “Namatikdan namong ang mga negosyante naningkamot nga mahibalo pag-ayo. Ang ulahing isyu sa Ang Bantayanang Torre (o Pagmata!) nagapasiugdag artikulo nga makaapektar kanatong tanan sa personal.” Isaysay kon unsa kana, ug tiklopi sa pag-ingon: “Segurado kami nga mahimuot ka sa pagbasa niana.”

²⁵ Kon adunay mga empleyado, ug daw tukma, hayan ikaw makadugang: “Motugot ka ba nga himoon ko ang samang mubong presentasyon ngadto sa imong mga empleyado?” Kon ihatag ang permiso, hinumdomi nga misaad kang mubo ra, ug dahomon sa manedyer nga tumanon mo ang imong pulong. Kon adunay mga empleyado nga buot makighisgot ug dugay, labing maayo kon adtoon sila sa ilang balay.

²⁶ Dili pa dugay ang pipila ka magmamantala sa usa ka gamay nga lungsod mikuyog sa magtatan-aw sa sirkito sa buluhatong pagkobre sa katindahanan. Pipila ka magmamantala mahadlokon sa sinugdan, kay wala pa sukad makahimo sa maong buluhaton sa miagi; apan sa wala madugay relaks na sila ug misugod sa pagkalipay niana. Wala pay usa ka oras, nakahisgot na sila ngadto sa 37 ka tawo ug nakapahilunag 24 ka magasin ug 4 ka brosyur. Usa ka igsoong lalaki nakamatikod nga kasagarang usa ka bulan sa pagpamalaybalay, sila dili makakontak ug sama ka daghang tawo kay sa ilang nahimo samtang misangyaw sa katindahanan sa maong mubong panahon.

²⁷ Paghimog mga Kahigayonan Aron Makasangyaw: Wala kutohi ni Jesus ang iyang pagsangyaw sa pormal nga mga kahimtang. Iyang gipalapad ang maayong balita sa matag tukmang okasyon. (Mat. 9:9; Luc. 19:1-10; Juan 4:6-15) Matikdi kon giunsa sa pipila ka magmamantala sa paghimog mga kahigayonan aron makasangyaw.

²⁸ Ginahimong batasan sa pipila ang pagsangyaw sa mga ginikanan nga nagahulat sa ilang mga anak duol sa entrada sa eskuylahan. Sanglit daghang ginikanan moabot 20 minutos nga sayo pa, adunay panahon sa makapadasig nga panaghisgot kanila sa usa ka Kasulatanhong ulohan.

²⁹ Daghang payunir mahunahunaon sa pag-abot sa katawhan nga may linaing interes sa usa ka tinong ulohan nga gihisgotan sa atong mga magasin. Pananglitan, maayo ang sanong nga nakuha sa usa ka sister sa unom ka eskuylahan sa teritoryo sa iyang kongregasyon sa seryeng “Mga Tunghaan Anaa sa Krisis,” nga napatik sa Disyembre 22, 1995, nga Pagmata! Miduaw usab siya sa mga serbisyo sa pag-atiman sa pamilya dala ang mga magasin maylabot sa pamilyahanong kinabuhi ug pag-abuso sa bata ug gidapit nga mobalik uban ang umaabot nga mga isyu nga maghisgot sa susamang mga ulohan. Ang sanong nga iyang nadawat sa opisina sa pagkawalay trabaho sa Marso 8, 1996, nga Pagmata! maylabot sa pagkawalay trabaho gihubit ingon nga “talagsaon.”

³⁰ Usa ka magtatan-aw sa distrito nagtaho nga siya ug ang iyang asawa makanunayong nagasangyaw sa di-pormal nga paagi samtang nagapamalit sa ilang groserya. Mamalit sila sa oras sa adlaw sa dili pa magguot pag-ayo ang tindahan, ug ang mga pumapalit nagangadto-ngari sa agianan nga wala pa magdali. Nagtaho silag daghang maayong panaghisgot.

³¹ Daghang magmamantala nagtahog maayong mga resulta samtang nagsangyaw sa katawhan sa publikong mga labhanan. Dili lamang nila basta ibilin ang mga magasin kon walay mga kustomer. Ang ilang tumong mao ang pag-abot sa mga tawo pinaagig maayong balita, busa naningkamot sila sa pagpakigsulti sa personal niadtong nagagamit sa maong pasilidad.

³² Sa ubang mga dapit, ang piniling mga magmamantala adunay awtorisasyon sa pagsangyaw sa mga tugpahanan sa ayroplano. May mga panahon nga sila nakabaton ug kalipay sa pagsangyaw sa internasyonal nga mga magpapanaw kinsa nagapuyo sa mga nasod nga diyutay lamang ang katawhan ni Jehova. Sa dihang makaplagan ang interes, ilang gitanyag ang tract o mga magasin.

³³ Kon dili tugotan sa pagsangyaw sa personal nga paagi sa mga namuyo sa binantayan pag-ayong mga apartment sa teritoryo sa kongregasyon, gihimong batasan sa pipila ang pagsangyawng mataktikanhon sa mga security guard nga nagbantay o sa mga manedyer sa mga opisina. Kining samang paagi gigamit sa pribado, kinoral nga mga komunidad. Usa ka magtatan-aw sa sirkito ug pipila ka magmamantala nakaduaw ug pito ka gambalay sa apartment niining paagiha. Sa matag kaso, ilang giingnan ang manedyer nga bisan tuod wala sila tugoti sa pagduaw sa mga apartment sa naandang paagi, dili nila buot nga masayloan niya ang impormasyon sa labing ulahing mga mantalaan. Ang mga manedyer sa tanang pito ka gambalay nalipay sa pagdawat sa mga magasin ug mihangyo alang sa sunod nga mga isyu usab! Ang mga molupyo sa maong mga gambalay gikontak pinaagig telepono sa laing higayon.

³⁴ Panikaysikay sa Imong Kaugalingon sa Pagsangyaw sa Tanang Dapit: Ang pagkinabuhi sumala sa atong dedikasyon nagalakip sa pagbati sa pagkadinalian sa atong asaynment sa pagwali sa mensahe sa Gingharian. Aron maabot ang katawhan sa panahon nga maluag alang kanila, kinahanglan natong ipadaplin ang atong personal nga mga hilig aron atong “maluwas sa bisan unsa mang paagi ang pipila.” Ang tanang dedikadong alagad ni Jehova buot nga makaingon, sama kang apostol Pablo: “Akong gihimo ang tanang butang tungod ug alang sa maayong balita, aron ako mamahimong usa ka mag-aambit niini sa uban.”​—1 Cor. 9:22, 23.

³⁵ Si Pablo misulat ug dugang: “Busa, sa labihang kasaya ako manghambog hinuon bahin sa akong mga kaluyahon, aron ang gahom sa Kristo mahimong samag tolda nga magpabilin ibabaw kanako. . . . Kay sa dihang ako maluya, niana ako gamhanan.” (2 Cor. 12:9, 10) Sa laing pagkasulti, walay usa kanato nga makalampos niining buluhatona sa atong kaugalingong kusog. Angay kitang mag-ampo kang Jehova alang sa iyang gamhanang balaang espiritu. Kon kita mag-ampo sa Diyos alang sa kusog, makasalig kitang siya magatubag sa atong mga pag-ampo. Dayon ang atong gugma sa katawhan motukmod kanato sa pagpangitag mga kahigayonan sa pagsangyaw sa maayong balita ngadto kanila, bisan asa sila tingali makaplagan. Sa umaabot nga semana, nganong dili sulayan ang usa sa mga sugyot nga gihisgotan niini nga pasukip?