“Ipakita ang Inyong Kaugalingon nga Mapasalamaton”
1 Kadaghanan kanato gibansay sukad pa sa pagkabata sa pag-ingong “palihog” ug “salamat” sa dihang may usa nga nagpakita kanatog kalulot. Si Pablo nagatambag kanunay kanato sa ‘pagpakita sa atong kaugalingon nga mapasalamaton,’ ug ilabinang kita mapasalamaton ngadto kang Jehova. (Col. 3:15, 16) Apan unsaon man nato pagpakita sa pagkamapasalamaton ngadto sa atong Dakong Maglalalang? Ug unsay mga katarongan nga atong nabatonan sa pagkamapasalamaton ngadto kaniya?
2 Si apostol Pablo misulat: “Salamat sa Diyos, kay siya nagahatag kanato sa kadaogan pinaagi sa atong Ginoong Jesu-Kristo!” (1 Cor. 15:57) Sa panahon sa Memoryal sa matag tuig, kita gipahinumdoman sa walay sukod nga gugma sa Diyos ug ni Kristo nga gipakita diha sa pagtagana sa lukat. (Juan 3:16) Sanglit ang kadaghanan kanato nawad-an ug mga minahal diha sa kamatayon, pagkamapasalamaton nato sa saad ni Jesus sa pagkabanhaw! Ang atong mga kasingkasing puno gayod sa pasalamat sa dihang atong pamalandongon ang paglaom sa paglabang-buhi sa kataposan niining sistemaha nga dili na gayod mamatay. (Juan 11:25, 26) Malisod ikahubit sa mga pulong ang pagpasalamat alang sa tanang kahibulongang mga panalangin nga ato pang tagamtamon sa umaabot nga yutan-ong Paraiso. (Pin. 21:4) Aduna ba ing mas maayong mga rason nga huptan ni bisan kinsa aron ‘ipakita ang iyang kaugalingon nga mapasalamaton’ ngadto sa Diyos?
3 Kon Unsaon Pagpahayag ang Pasalamat Ngabto sa Diyos: Tukma kanunay ang pagpahayag sa atong mga pasalamat diha sa pag-ampo ngadto kang Jehova tungod sa iyang kaayo. (Sal. 136:1-3) Kita matukmod, usab, sa pagpasundayag sa atong mga pasalamat ngadto kaniya sa ubang positibong mga paagi. Pananglitan, kita gayod motambong sa Dominggo, Marso 23, sa Memoryal sa kamatayon ni Kristo. Kita malipayng ‘pasidunggan si Jehova uban sa atong bililhong mga butang’ aron makatabang sa pagkab-ot sa materyal nga mga panginahanglan sa lokal nga kongregasyon ug sa tibuok-kalibotang buluhaton. (Prov. 3:9) Bug-os natong paluyohan ang mga ansiyano ug makigtambayayong kanila, nga sa ingon nagapakita sa atong pagkamapasalamaton kang Jehova tungod sa tabang nga iyang ginatagana pinaagi kanila. (1 Tes. 5:12, 13) Matag adlaw, kita nagapaningkamot sa paghupot kanunay sa atong maayong panggawi nga nagahimaya sa ngalan sa Diyos. (1 Ped. 2:12) Si Jehova mahimuot pinaagi niining tanang ebidensiya sa atong pagkamapasalamaton.—1 Tes. 5:18.
4 Atong Labing Maayong Pagpahayag sa Pasalamat: Ang paghimo sa bug-os-kalag nga pagpakig-ambit sa buluhaton sa pagsangyaw sa Gingharian, ang pagpasidungog sa ngalan ni Jehova, ang pagpahayag ug pasalamat diha sa pag-ampo, ug ang maunongong paglaban sa kamatuoran mao ang pipila sa labing maayong mga kapahayagan sa kinasingkasing nga mga pasalamat nga atong mahimo ngadto sa atong Maglalalang. Si Jehova mahimuot sa pagtan-aw kanatong nagatanyag ug sagradong pag-alagad sa pagsuportar sa iyang kabubut-on “nga ang tanang matang sa mga tawo maluwas.” (1 Tim. 2:3, 4) Mao kanay hinungdan kon nganong daghang magmamantala ang misanong sa awhag nga anaa sa Atong Ministeryo sa Gingharian sa Pebrero sa pagpatala ingong mga oksilyare payunir sulod sa usa o mas pang mga bulan sa Marso, Abril, ug Mayo. Makaarang ka ba sa pag-apil sa ranggo sa mga payunir sa Abril? sa Mayo?
5 Sa dihang ang atong paglaom sa pagkinabuhi sa walay kataposan matuman na, makabaton pa kitag dugang gayong katarongan nga magpadayon sa paghatag ug malipayong mga pasalamat ngadto kang Jehova.—Sal. 79:13.