Pangutana

◼ Sa dihang ang kongregasyon hangyoon aron motabang sa paghikay sa lubong, ang mosunod nga mga pangutana hayan motungha:

Kinsa man gayob ang mohatag sa pakigpulong sa patay? Kini maoy desisyon nga himoon sa mga membro sa pamilya. Mahimong pilion nila ang bisan kinsang bawtismadong igsoong lalaki nga maayo ang dungog. Kon ang lawas sa mga ansiyano hangyoon sa pagtagana ug mamumulong, sila kasagarang magpili ug usa ka takos nga ansiyano sa paghatag ug pakigpulong nga gipasukad sa outline sa Sosyedad.

Mahimo bang gamiton ang Kingbom Hall? Oo, kon ang pagtugot ihatag pinaagi sa lawas sa mga ansiyano ug kon kini dili mobalda sa regular nga eskedyul sa mga tigom. Ang tigomanan hayan magamit kon ang namatay adunay hinlong reputasyon ug namembro sa kongregasyon o minor nga anak sa usa ka membro. Kon ang indibiduwal gibantog sa pagkadaotan sa publiko pinaagig di-Kristohanong panggawi, mahimong hukman sa mga ansiyano nga dili gamiton ang tigomanan.​—Tan-awa ang Atong Ministeryo nga libro, mga panid 62-3.

Kasagaran, ang mga Kingdom Hall dili gamiton para sa mga lubong sa mga di-magtutuo. Ang usa ka eksepsiyon tingali himoon kon ang buhing mga membro sa pamilya maoy aktibong nagapakig-uban ingong bawtismadong mga magmamantala, ang namatay nailhan sa ubay-ubayng mga magmamantala diha sa kongregasyon nga mauyonon sa kamatuoran ug adunay maayong reputasyon sa katilingban, ug walay kalibotanong mga kostumbre ang malangkit sa programa. Kinahanglang walay buhaton nga makapadaot sa kongregasyon o makapahugaw sa dungog niini.

Sa dihang tugotan sa paggamit sa Kingdom Hall, tagdon sa mga ansiyano kon naandan ba nga makita ang lungon nga presente diha sa pakigpulong sa patay. Kon mao, mahimong tugotan nilang dad-on kini sulod sa tigomanan.

Komosta ang mga lubong alang sa kalibotanong mga tawo? Kon ang namatay adunay maayong dungog diha sa komunidad, ang usa ka igsoong lalaki mahimong mohatag ug makapahupayng pakigpulong sa Bibliya didto sa punerarya o sa lubnganan. Dumilian sa kongregasyon ang pagdumala sa lubong alang sa usa kinsa nailhan sa imoral, supak-sa-balaod nga panggawi o kansang estilo sa kinabuhi sukwahi sa mga prinsipyo sa Bibliya. Ang usa ka igsoong lalaki dili gayod makig-ambit uban sa usa ka klerigo sa pagdumala sa panagtapo-sa-pagtuo nga serbisyo ni sa bisan unsang lubong nga himoon diha sa simbahan sa Dakong Babilonya.

Komosta na man kon ang namatay pinalagpot? Ang kongregasyon sa kinatibuk-an dili manginlabot, ni gamiton ang Kingdom Hall. Kon ang tawo nagpakita na ug ebidensiya sa paghinulsol ug nagpasundayag ug tinguha nga mapasig-uli, ang tanlag sa usa ka igsoong lalaki tingali magtugot kaniya sa paghatag ug pakigpulong sa Bibliya didto sa punerarya o sa lubnganan, aron makapamatuod ngadto sa mga di-magtutuo ug sa paghupay sa mga paryente. Sa dili pa maghimo niining desisyona, bisan pa niana, maalamon alang sa maong igsoong lalaki nga mokonsulta sa lawas sa mga ansiyano ug tagdon kon unsay ilang irekomendar. Kon dili maalamon sa maong igsoong lalaki nga malangkit, hayan tukma alang sa usa ka igsoong lalaki kinsa membro sa pamilya sa namatayng tawo sa paghatag ug pakigpulong sa paghupay sa mga paryente.​—Tan-awa Ang Bantayanang Torre sa Oktubre 15, 1990, mga panid 30-1; Marso 15, 1982, panid 31; ug Disyembre 1, 1977, mga panid 347-8.