Mga Tigulang nga Nagasangyaw nga Mapadayonon

¹ Samtang magkatigulang ang mga tawo, daghan kanila nagalantaw sa unahan sa pagretiro gikan sa ilang naandang sekular nga trabaho ug sa pagtagamtam sa walay kabalakang kinabuhi sulod sa ilang nanghibiling mga tuig. Sila tingali mobati nga sila nakatrabaho na pag-ayo ug karon takos sa usa ka pahulay. O hayan buot lamang nilang mopahimulos sa nanghibiling mga tuig sa ilang kinabuhi.​—Luc. 12:19.

² Ingong dedikadong mga alagad ni Jehova, kita adunay lahi nga panglantaw sa kinabuhi. Nasayod kitang walay pagretiro gikan sa pag-alagad sa Diyos. Ang atong panglantaw maoy positibo tungod kay kita padayong “nagalantaw sa kinabuhing walay-kataposan.” (Jud. 21) Ang katuigan sa natigom nga kahibalo ug kasinatian mahimong magpausbaw sa pagsabot sa usa ka tawo. Kini magpaarang sa usa nga mahimong mas maalamon ug mas timbang ug magpadayag ug mas lalom nga pagpabili sa kinabuhi. Kining tanang hiyasa magpabenepisyo ug dako sa usa ka ministro sa maayong balita.

³ Ang pagkatigulang dili lamang usa ka pisikal nga pangedaron; nagalakip usab kini sa tinamdan sa hunahuna sa usa. Kon mangandoy ka sa taas nga kinabuhi ug maninguha ka nga magpabiling batan-on sa imong panglantaw, ang imong mga kahigayonan sa pagbuhat sa ingon hayan mouswag. Ang tigulang nga mga tawo makapalambo sa ilang mga kinabuhi pinaagig pagpauswag sa ilang espirituwal nga kahibalo ug pagpaambit niana ngadto sa uban.​—1 Cor. 9:23.

⁴ Tinuob-Kinabuhing mga Panig-ingnan: Sa pangedarong 86, usa ka sister miingon: “Sa dihang akong pamalandongon ang 60 ka tuig nga miagi sukad nga akong nakat-onan ang kamatuoran, ang makapalagsik nga saad sa Diyos mopadasig sa akong kasingkasing. Oo, si Jehova nga molihok diha sa pagkamaunongon uban sa mga maunongon nagatugot kanato sa pag-ani ug dagayang kalipay.” (Sal. 18:25) Usa ka tigulang nga igsoong lalaki nahinumdom kon sa unsang paagi ang kamatayon sa iyang asawa nakapauknol gayod kaniya, nga human niana ang iyang panglawas mihugo pag-ayo. Siya miingon: “Apan, pinaagi sa di-takos nga kalulot ni Jehova, ako naulian pag-ayo nga nakahimo sa pagsulod sa payunir nga pag-alagad duha ka tuig sa ulahi. Pagkamapasalamaton ko kang Jehova nga ang akong panglawas aktuwal nga miarang-arang duyog niini nga pag-uswag diha sa kalihokang pagsangyaw!”

⁵ Pagkadalayegon niana nga daghan kaayong tigulang ang determinado sa pagpadayon sa pagsangyaw ngadto sa bisan unsang gidak-on nga itugot sa ilang panglawas ug kusog​—nga walay paghunong! Sila adunay maayong katarongan sa pagpatugbaw: “Oh Diyos, imo akong gitudloan gikan sa akong pagkabatan-on, ug hangtod karon ako padayong nagasulti bahin sa imong kahibulongang mga buhat.”​—Sal. 71:17.