Si Jehova Nagahatag ug Gahom nga Labaw sa Kasarangan
1 Usa ka bililhong pribilehiyo sa sagradong pag-alagad—ang Kristohanong ministeryo—ang gisalig ngadto sa tanang tinun-an ni Jesus. (Mat. 24:14; 28:19, 20) Apan, ang tawhanong pagkadili-hingpit ug mga pagpig-ot niining sistemaha sa mga butang usahay magpahinabo nato nga isipon ang atong kaugalingon nga dili gayod takos.
2 Sa dihang kini mahitabo, kita mapahupay sa sulat ni apostol Pablo ngadto sa dinihogang mga Kristohanon sa Corinto. Siya misulat: “Kami nagbaton niini nga bahandi diha sa mga kulonong sudlanan.” (2 Cor. 4:7) Masaligon si Pablo: “Sanglit kami aduna niini nga ministeryo . . . , kami wala moangka.” (2 Cor. 4:1) Tinuod, usa kini ka hagit alang sa matag usa kanato, dinihogan man o sa “ubang mga karnero,” nga magpadayon sa pagmantala sa maayong balita ug ‘dili moangka.’ Nanginahanglan kitag kusog gikan sa Diyos, kinsa nagataganag “gahom nga labaw sa kasarangan.”—Juan 10:16; 2 Cor. 4:7b.
3 Nga makapadasig, daghang Saksi ang masibotong mga tig-ebanghelyo bisan pa sa pagsugamak sa grabeng pagsupak, seryosong mga suliran sa panglawas, o limitadong panalapi. Kitang tanan angayng makaamgo nga ang atong asaynment sa pagsangyaw gipaluyohan ni Jehova. Inay tugotan ang kaluya o kahadlok nga magpahuyang sa atong tinguha sa pagsangyaw, kita ‘mopadayon sa pagbaton ug kagahom diha sa Ginoo ug diha sa pagkagamhanan sa iyang kusog.’—Efe. 6:10; Prov. 24:10.
4 Kon Unsaon Pagbaton ang Gahom sa Diyos: Lahutay sa pag-ampo, nga mangayog tabang ug kusog sa Diyos. (Roma 12:12; Filip. 4:6, 7) Dayon, uban sa tibuok nimong kasingkasing, salig kang Jehova sa pagtaganag gahom nga labaw sa kasarangan. (Prov. 3:5) Basaha ang modernong-adlaw nga mga kaagi sa kinabuhi diha sa atong mga magasin, kay kini nagahatag ug ebidensiya nga si Jehova nagatabang sa iyang mga alagad karon sa paglahutay sa mga pagsulay. Pabiling suod sa mga igsoon sa kongregasyon, ug ayaw pag-isalikway ang mga tigom sa kongregasyon.—Roma 1:11, 12; Heb. 10:24, 25.
5 Hinaot nga atong buhaton ang tanan natong mahimo nga ang atong kaugalingon mahilinya sa pagdawat sa gahom ni Jehova—usa ka gahom nga labaw sa kasarangan ug nga magtabang kanato nga dili moangka diha sa hinungdanon kaayong buluhaton sa pagsangyaw sa Gingharian.