Ipakita ang Pagtahod Alang sa Dapit sa Pagsimba Kang Jehova
1 Sa dihang kita mga bisita sa balay sa laing tawo, atong ipakita ang pagtahod sa propiedad sa maong tawo, nga dili maghimog bisan unsa sa pagdaot niana, ug dili nato baldahon ang hapsay nga rutina sa panimalay. Mas pa gayod ang pagkatinuod niini sa dihang kita maoy mga bisita ni Jehova! Angay kitang masayod kon unsaon paggawi sa atong kaugalingon diha sa iyang panimalay. (Sal. 15:1; 1 Tim. 3:15) Ang atong Kristohanong tigom gihimo man diha sa Kingdom Hall, sa pribadong balay, o sa usa ka publikong pasilidad, ang kadaghanan gayod kanato kanunayng nagapakitag pagtahod alang sa atong dapit sa pagsimba nga maorag kini mao ang balay ni Jehova, kansang “himaya maoy labaw sa yuta ug sa langit.”—Sal. 148:13.
2 Ang nagapanawng mga magtatan-aw ug uban pa nakamatikod, hinunoa, nga ang pipila ka igsoon nagapakitag kawalay-pagtahod sa mga tigom pinaagig pagsabasaba o paglihok nga daw ang impormasyon nga gipresentar dili bililhon. Ang pipila ka hamtong nagaestoryahanay nga di-kinahanglanon diha sa agianan, sa lawak hulatanan, sa kasilyas, o sa gawas sa Kingdom Hall samtang nagapadayon ang tigom. Sa dihang ang magulang nga bata tugyanan sa pag-atiman sa manghod, usahay ang duha mosugod sa pagduladula ug makabenepisyog diyutay gikan sa programa. Ang pipila ka batan-on nakita sa gawas sa Kingdom Hall human sa mga tigom, nanggidula, nga sobra ka banha, nga daw nagkaratehay pa gani sa usag usa. Sa pipila ka kaso nakasamok sila sa mga silingan o nakabalda sa trapiko diha sa parkinganan o dalan.
3 Kon Unsaon Paglikay nga Di-Magmatinahoron: Ang pagpabili sa dignidad ug pagkasagrado sa atong pagsimba, sa walay duhaduha dili nato buot nga baldahon ang uban pinaagig paghunghonganay, pagkaonkaon, pag-usap-usap ug suwinggam, pagpaklipaklig mga papel, pagngadtongari sa kasilyas nga wala kinahanglana, o sa nabatasang pag-abot nga ulahi sa mga tigom. Ang matinahoron ug mapabilhong mga ginikanan dili motugot sa ilang mga anak sa paghugaw sa alpombra, sa mga kasangkapan, o sa mga dingding sa Kingdom Hall o sa balay nga didto gihimo ang pagtuon sa libro. Ug sa walay duhaduha kitang tanan mouyon nga wala gayod ing luna alang sa bisan unsang matang sa makauulaw nga panggawi, sa pagsultig binuang, o sa law-ayng katistis diha sa atong mga tigom.—Efe. 5:4.
4 Kon atong hinumdoman kanunay ang katuyoan sa atong Kristohanong mga tigom, atong tinoon nga kita ug ang atong mga anak magpakitag nahiangayng pagtahod alang sa pagsimba kang Jehova diha sa dapit diin atong “gipili nga mobarog.”—Sal. 84:10.