“Masinangkapan Alang sa Tanang Maayong Buhat”
1 Ang katawhan ni Jehova karong adlawa gipanalanginan uban ang dagayang espirituwal nga pagkaon. (Isa. 25:6) Adunay daghan kaayong Kasulatanhong materyal nga matagamtam pinaagig personal ug pamilyahanong pagtuon ug sa mga tigom sa kongregasyon, mga asembliya, ug mga kombensiyon. Apan ato bang gipahimuslan pag-ayo kining tanan uban ang paglantaw nga mahimong “bug-os makasarang, kompleto nga masinangkapan alang sa tanang maayong buhat”?—2 Tim. 3:17.
2 Hunahunaa lamang ang espirituwal nga potahe sa tuig 1998, nga natapos na ang katunga! Pinaagig senemanang mga tigom sa kongregasyon, atong ginakobrehan ang pipila ka dagkong mga puntos sa 23 ka libro sa Kristohanong Gregong Kasulatan, nagasubli sa impormasyon nga makaplagan sa Insight on the Scriptures maylabot sa mga kinabuhi sa 49 ka tawo sa Bibliya, ug nagakonsiderar sa 138 ka panid sa Mga Magmamantala nga libro. Atong ginasubli usab ang un tersiya sa Kahibalo nga libro, halos ang katibuk-an sa Kalipay sa Pamilya nga libro, ug ang enterong Pulong sa Diyos nga libro. Dugang pa, kita ginapahimsog sa 12 ka gula sa Atong Ministeryo sa Gingharian, 52 ka tun-anang artikulo sa Bantayanang Torre, ug duolan sa 52 ka pahayag publiko bahin sa nagkadaiyang mga ulohan sa Bibliya. Ang dagayang mga programa sa kombensiyon ug sa asembliya maoy dugang niining tanan. Pagkadagayang maayong mga butang sa espirituwal ang gitagana alang kanato!
3 Pabilhi ang mga Tagana ni Jehova: Aron makapahimulos sa bug-os, kinahanglang atong sabton kon nganong si Jehova nagatagana sa maong espirituwal nga kadagaya. Ang pagkaon niining maayong mga butang magpahimsog sa atong pagtuo ug magpalig-on sa atong relasyon uban kaniya. (1 Tim. 4:6) Bisan pa niana, ang espirituwal nga pagkaon wala itagana alang lamang sa atong kaugalingong instruksiyon. Mopalihok kini kanato nga ipaambit ang kamatuoran ngadto sa uban ug mosangkap kanato nga mahimong epektibo sa pagbuhat niana ingong mga ministro sa maayong balita.—2 Tim. 4:5.
4 Dili nato pasagdan ang atong espirituwal nga mga panginahanglan, apan kanunayng mag-ugmad ug pangandoy alang sa dagaya ug makapatagbawng mga tagana sa espirituwal gikan sa lamesa ni Jehova. (Mat. 5:3; 1 Ped. 2:2) Aron makapahimulos sa bug-os kinahanglang maggahin ug igong panahon alang sa maong bililhong mga butang sama sa makanunayong personal ug pamilyahanong pagtuon sa Bibliya ug pagtambong sa tigom. (Efe. 5:15, 16) Ang makapalipayng mga ganti sa pagbuhat sa ingon maoy uyon sa inspiradong pagdasig nga gisulat ni Pablo ngadto sa matinumanon Hebreohanong mga Kristohanon, ingon sa natala sa Hebreohanon 13:20, 21.