Pagpamatuod Pinaagig Maayong Panggawi
1 Sa matinugotong katilingban karong adlawa, daghang batan-on ang madanghagong nagawaldaswaldas sa ilang mga kinabuhi diha sa mga droga, imoralidad, rebelyon, ug kapintasan. Sa kasukwahi, ang panig-ingnan nga panggawi sa buotang mga batan-on diha sa Kristohanong kongregasyon maoy makapalagsik nga tan-awon ug tinong usa ka butang sa katahom ngadto kang Jehova. Kini nagasilbing gamhanang pamatuod nga mahimong magbutad sa uban ngadto sa kamatuoran.—1 Ped. 2:12.
2 Daghang kasinatian ang nagapakita nga ang maayong pamatasan sa Kristohanong mga batan-on adunay positibong epekto sa mga maniniid. Naghisgot bahin sa usa ka batan-ong Saksi nga iyang estudyante, ang usa ka magtutudlo miingon ngadto sa tibuok klase nga ang Diyos niining batan-ong babaye, si Jehova, mao ang matuod nga Diyos. Siya miingon niini tungod kay ang panggawi sa batan-ong babaye kanunayng matinahoron. Ang laing magtutudlo misulat sa Sosyedad, nga nag-ingon: “Buot kong dayegon kamo tungod sa buotang mga batan-on sa inyong relihiyon. . . . Ang inyong mga batan-on usa gayod ka sulundan. Sila nagtahod sa ilang mga tigulang, matinahoron, ug kasarangan sa panapot. Ug sila nahibalo gayod sa ilang mga Bibliya! Kana gayod ang relihiyon!”
3 Lain pang magtutudlo nakadayeg sa maayong panggawi sa siyete-anyos-edad nga Saksi diha sa iyang klase. Nadani siya sa lumo ug sayag nga personalidad sa batang lalaki, nga nagpalahi kaayo niya sa ubang mga batang lalaki. Nakadayeg siya sa iyang seryosong tinamdan sa iyang relihiyosong mga tinuohan—wala siya maulaw nga lahi tungod sa iyang gituohan. Iyang nakita nga ang iyang tanlag nabansay ug nga siya nakahimo “nga mailhan ang husto ug ang sayop.” (Heb. 5:14) Sa kapulihay, ang inahan sa batang lalaki miduaw sa magtutudlo, ug ang usa ka pagtuon sa Bibliya nasugdan. Miabot ang panahon, ang magtutudlo nabawtismohan ug sa ulahi nahimong regular payunir!
4 Usa ka batan-ong lalaki naimpluwensiyahan sa maayong panggawi sa usa ka Saksi sa iyang tunghaan. Lahi siya kaayo—matinahoron kaayo, tigtuon, ug kanunayng kasarangan sa iyang pamesti; usab, dili sama sa ubang mga batan-ong babaye, wala gayod siya magkiniat uban sa mga lalaki. Iyang nakita nga siya nagkinabuhi pinaagig mga prinsipyo sa Bibliya. Ang batan-ong lalaki misukna kaniyag mga pangutana bahin sa iyang relihiyosong mga tinuohan ug nakadayeg sa iyang nakat-onan. Nagsugod siya pagtuon, sa wala madugay nabawtismohan, ug sa kapulihay nakig-ambit sa payunir nga ministeryo ug sa pag-alagad sa Bethel.
5 Kon ikaw usa ka batan-ong Kristohanon kinsa buot mohatag ug maayong pamatuod ngadto sa uban, bantayi ang imong panggawi sa tanang paagi. Ayaw pakubsi ang imong pagbantay pinaagi sa pagkahimong mauyonon sa matinugotong mga tinamdan sa kalibotan, mga panglantaw, o mga estilo sa kinabuhi. Ipahiluna ang taas nga matang sa panig-ingnan diha sa imong sinultihan, pamesti, ug pamostura, dili lamang samtang nagapakig-ambit sa ministeryo sa kanataran ug sa mga tigom sa kongregasyon apan usab samtang diha sa tunghaan ug sa dihang nagalulinghayaw. (1 Tim. 4:12) Makabaton ka ug tinuod nga kalipay sa dihang may usa nga mainteresado sa kamatuoran tungod kay imong ‘gipalamdag ang imong kahayag’ pinaagi sa imong maayong panggawi.—Mat. 5:16.