Repaso sa Teokratikanhong Tunghaan sa Ministeryo

Ang mosunod nga mga pangutana pagatagdon nga binaba panahon sa Teokratikanhong Tunghaan sa Ministeryo sa semana nga magsugod sa Abril 26, 2004. Dumalahon sa magtatan-aw sa tunghaan ang 30–​minutos nga repaso pinasukad sa materyal nga gikobrehan diha sa mga asaynment alang sa mga semana sa Marso 1 hangtod sa Abril 26, 2004. [Matikdi: Kon walay mga reperensiya human sa pangutana, kinahanglang mohimo kag kinaugalingong panukiduki aron makaplagan ang mga tubag.​—Tan-awa ang Tunghaan sa Ministeryo, pp. 36-7.]

MGA HIYAS SA PAGPANULTI

1. Sa dihang kita mopakigpulong, nganong mas maayo ang pagsulti nga gipasukad sa usa ka laraw inay mogamit ug usa ka manuskrito? [be p. 166 par. 3] Ang pagsulti nga gipasukad sa usa ka laraw mas makapasayon kanato sa pagpakigsulti sa inato ug kinasingkasing nga paagi. Kon ang atong atensiyon gipunting nganha sa mamiminaw, masabtan nila nga kita naghunahuna gayod kanila ug nagpasibo sa atong materyal aron mohaom sa ilang mga kahimtang.

2. Sa pagpangandam alang sa pag-alagad sa kanataran, sa unsang paagi atong maorganisar ang atong mga ideya nga mahimong usa ka laraw diha sa hunahuna? [be p. 167 par. 3] Paghunahuna ug usa ka isyu nga gikaikagan sa komunidad. Hunahunaa pag-ayo ang usa ka espesipikong butang nga imong ikasulti bahin sa maong ulohan, nga maglakip ug usa o duha ka teksto. Magmaandam sa pagpasiugda nga ang Gingharian ni Jehova ilalom sa pagmando ni Jesu-Kristo mao ang kagamhanan nga magdalag kahupayan. Dasiga ang imong mamiminaw nga molihok pinasukad sa kon unsay nahisgotan.

3. Ginamit ang Buhat 13:16-41 ug Buhat 17:2, 3, ipatin-aw kon sa unsang paagi ‘gipamatud-an ni Pablo sa makataronganong paagi nga si Jesus mao ang Kristo.’ (Buh. 9:22) [be p. 170 par. 2] Una, si Pablo nangitag puntong gikauyonan, nga mao, ang mga Hudiyo nag-angkon nga nagtuo kon unsay giingon sa Hebreohanong Kasulatan bahin sa Mesiyas. Sunod, gikan sa maong Kasulatan, iyang gipili ang mga bahin nga naghisgot sa kinabuhi ug ministeryo sa Mesiyas ug gipakita kon sa unsang paagi kini nalangkit sa kinabuhi ni Jesus. Dayon, gitabangan ni Pablo ang iyang mga mamiminaw sa paghimog dayag nga konklusyon nga si Jesus mao ang Mesiyas, o Kristo.

4. Unsa ang pipila ka bentaha sa ekstemporanyong pagpahayag? [be p. 175 mga par. 2-5] (1) Ang imong pagsulti mas madasigon ug mas realistiko, nga maghimo nianang mas makaiikag sa imong mga tigpatalinghog. (2) Makatan-aw ka kanunay sa imong mamiminaw. (3) Ang imong mga tigpatalinghog lagmit mobati nga ikaw nahibalo pag-ayo sa imong ulohan ug nga ikaw sinserong nagtuo sa imong ginasulti. (4) Ang imong pagpahayag mas mapailin-ilinon, nga magtugot kanimo sa paghimog mga kausaban kon gikinahanglan. (5) Mapukaw ang imong hunahuna, nga motabang kanimo nga mahimong relaks, aron imong mapadako ang pipila ka ideya o mapasiugda ang ubang mga punto.

5. Unsa ang posibleng mga kapeligrohan sa ekstemporanyong pagpahayag, ug unsay makatabang kanato aron malikayan kana? [be p. 175 par. 6–p. 176 par. 3] Ang kiling sa pag-obertaym malikayan pinaagi sa atong pagsunod gayod sa tayming nga gitugot sa matag seksiyon sa pakigpulong. Ang kapeligrohan sa sobrang pagsalig sa kaugalingon mabuntog pinaagi sa atong pagbaton ug pagkamapaubsanon ug pagpabili sa pribilehiyo sa pagpakigbahin diha sa programa sa edukasyon sa atong Dakong Instruktor. Ang pagkahadlok nga makalimot sa atong gihunahuna mabuntog pinaagi sa maayong pagpangandam ug pagsalig sa espiritu sa Diyos. (Isa. 30:20; Roma 12:6-8)

ASAYNMENT NUM. 1

6. Sumala sa asoy sa Genesis 32:24-32, unsay gihimo sa 97-anyos nga si Jacob aron maangkon ang panalangin ni Jehova, ug unsay gitudlo niini kanato? [w02 8/1 pp. 29-31] Gihatagan ni Jacob ug dakong pagtagad ang kabubut-on ni Jehova ug gimahal ang iyang panulondon. Tim-os siyang nag-ampo alang sa panalangin sa Diyos, ug milihok siya sa positibong paagi nga nahiuyon sa kabubut-on sa Diyos. Kining asoya nagtudlo kanato nga walay pagsapayan sa atong edad o gidugayon sa atong pag-alagad kang Jehova, kitang tanan makabenepisyo sa pagsundog sa pakigbisog nga gipasundayag ni Jacob. Dili gayod kita mohunong sa atong pagpakigbisog sa pag-alagad kang Jehova nga bug-os kalag.

7. Unsa ang “katakos sa panghunahuna,” ug sa unsang paagi kini makapugong kanato nga mawad-an sa panimbang ug masakitan nga wala kinahanglana? (Prov. 1:4) [w02 8/15 pp. 21-2] Ang Hebreohanong pulong nga gihubad ug “katakos sa panghunahuna” naggikan sa lintunganayng pulong nga nagkahulogang “pagplano o paglaraw.” Busa, ang katakos sa panghunahuna naglangkit sa pagpasundayag ug abanteng panglantaw ug pagtagad sa kapiliang mga lihok ug sa posibleng mga sangpotanan sa mga lihok sa usa. Tungod kay “walay tawo nga dili makasala,” kita dili angayng matingala kon ang usa ka Kristohanong igsoon makapikal o makasilo kanato. Kay nasayod niini, makapangandam kita kon ugaling mahitabo kana ug makapamalandong kon sa unsang paagi kita angayng molihok. Kini motabang kanato sa paglikay nga mahinayak sa dihang maglagot. (1 Hari 8:46)

8. Sa unsang paagi ang mga mamumulong sa publiko makahimo sa Kasulatan nga basehanan sa ilang mga pakigpulong? [be p. 52 par. 6–p. 53 par. 5] Inay kay yanong magsaysay ug maghatag ug impormasyon, ang usa ka mamumulong maningkamot sa pagpasundayag kon sa unsang paagi ang kamatuoran nga ginahisgotan gipasukad sa Kasulatan. Ang piniling mga teksto sa Bibliya mahimong susihon, ipatin-aw sumala sa konteksto, iilustrar, ug ipadapat. Ang mga mamumulong sa publiko angayng maningkamot sa pagtabang sa mamiminaw sa pagsabot sa Bibliya ug sa pag-ila kon unsay kinahanglang buhaton nga nahiuyon sa kabubut-on sa Diyos.

9. Sa pag-usab sa usa ka laraw sa pakigpulong ngadto sa undanong kabatbatan sa Kasulatan, ang usa ka mamumulong kinahanglang mohimog unsang mga desisyon? [be p. 54 mga par. 2-4] Ang usa ka mamumulong kinahanglang modesisyon kon unsa ka taas ang panahon nga iyang gugolon sa paghisgot sa kada segundaryong mga punto. Angay niyang tagdon kon unsang mga puntoha ang labing maayong makapasiugda sa Pulong sa Diyos, nga magtukod ug pagpabili kang Jehova ug sa iyang mga tagana, nga motabang sa pagpasa sa pangunang mga ideya sa pakigpulong, ug makabenepisyo gayod sa mamiminaw.

10. Nganong gipakaon man ni Jehova ang mga Israelinhon ug mana kada semana, kada bulan, didto sa kamingawan, ug unsay atong makat-onan gikan niini? (Deut. 8:16) [w02 9/1 p. 30 mga par. 3-4] Bisan pag ang pipila gipul-an na sa maong pagkaon ug giisip kining makaluod, dayag nga gitagana kadto ni Jehova ingong pagsulay aron sa pagtudlo ug pagkamapaubsanon ug pagsalig kaniya. (Deut. 8:3) Ang atong pagkamapaubsanon mahimong masulayan usab pinaagi sa organisasyonal nga mga kausaban ug mga katin-awan sa kamatuoran sa Bibliya nga gihatag ni Jehova pinaagi sa “matinumanon ug maalamong ulipon.” (Mat. 24:45-47)

SENEMANANG PAGBASA SA BIBLIYA

11. Sumala sa gipakita sa Genesis 37:12-17, unsang kaamgiran ang atong makaplagan tali sa dalan ni Jose ug sa iya ni Jesus? [w87 5/1 p. 12 par. 12] Bisan pag gikontra siya sa iyang mga igsoon, si Jose mitabang dayon kanila. (Gen. 37:5-11) Sa samang paagi, malipayong gidawat ni Jesus ang buluhaton nga gihatag ni Jehova dinhi sa yuta, bisan pag kadto magkahulogan ug dakong pag-antos.

12. Sumala sa makita sa asoy diha sa Genesis 42:25-35, sa unsang paagi si Jose nagpakitag pagkamabination sama sa gipakita ni Jesus? [w87 5/1 p. 18 par. 10; p. 19 par. 17] Human matino nga ang paghinulsol sa iyang mga igsoon sa amahan maoy tiunay, si Jose nagpakitag pagkamaluluy-on kanila pinaagi sa pagpuno sa ilang mga sako sa trigo, pag-uli sa ilang kuwarta, ug paghatag kanilag pagkaon alang sa ilang panaw. Sa samang paagi, si Jesus nagpakitag kaluoy ug nag-atiman sa mahinulsolong “ubang mga karnero” karon. (Juan 10:16)

13. Sa unsang paagi ang mga tagana nga gihatag sa ulipon nga matang karon katumbas sa pagpang-apod-apod ug lugas sa adlaw ni Jose? (Gen. 47:21-25) Ilalom sa pagtultol ni Jesus, ang Dakong Jose, ang ulipon nga matang karong adlawa mohimo kutob sa ilang maarangan nga uyon sa Kasulatan sa pagtino nga ang nagpahinungod nga mga Saksi ni Jehova, maingon man ang mga interesado, makadawat ug makapabuhi nga espirituwal nga pagkaon. Dugang pa, ang maong ulipon nag-organisar ug mga kongregasyon ug nagtagana nilag daghan kaayong basahon sa Bibliya nga magamit diha sa natad nga giasayn kanila. [4, w87 5/1 p. 15 mga par. 3-4]

14. Sa pag-ingon, “Ako mamao kon unsay mamao ako,” unsay gibutyag ni Jehova bahin sa iyang ngalan? (Ex. 3:14, 15) Gibutyag ni Jehova ang kahulogan sa iyang ngalan. Kining mga pulonga nagpaila nga si Jehova mahimong mao kon unsay gikinahanglan sa pagpalampos sa iyang mga katuyoan. Iyang ipadayag ang iyang kaugalingon ingong Magtutuman sa mga saad sa paaging wala hisayri sukad sa mga katigulangan sa mga Israelinhon. (Ex. 6:2, 3) [5, w95 3/1 p. 10 par. 6]

15. Unsang duha ka kinaiyanhong mga kapeligrohan sa pagreklamo ang gihisgotan sa Exodo 16:2, 3? [w93 3/15 pp. 20-1] Una, ang pagreklamo mananakod. Ikaduha, sagad pasobrahan sa reklamador ang problema. Niining kahimtanga, ang mga Israelinhon miingon nga mas maayo pa ang ilang kahimtang sa Ehipto, diin didto sila makakaog tinapay ug karne sumala sa ilang gusto. Sila nagreklamo nga sila gidala ngadto sa kamingawan aron mamatay lamang sa kagutom.