“Magpadayon sa Pagsunod Kanako”
1 Ang pagpahimuot sa kaugalingon maoy pangunang gitagad sa daghang tawo, apan sila kasagarang dili malipayon. Sa kasukwahi, gisugyot ni Jesus ang usa ka dalan sa dili-mahakogong pagpanghatag nga mopatunghag tinuod nga kalipay. (Buh. 20:35) Matod niya: “Kon adunay buot mosunod kanako, padumilia siya sa iyang kaugalingon . . . ug magpadayon sa pagsunod kanako.” (Mar. 8:34) Kini wala lang magpasabot nga hikawan panagsa ang atong kaugalingon ug mga kalingawan. Kini nagpasabot sa pagkinabuhi sa matag adlaw aron pahimut-an, dili ang atong kaugalingon, kondili si Jehova.—Roma 14:8; 15:3.
2 Tagda ang panig-ingnan ni apostol Pablo. Tungod sa “pagkalabaw ug bili sa kahibalo ni Kristo Jesus,” gihunong ni Pablo ang pagpangagpas ug personal nga mga tingusbawan ug gideboto ang iyang kinabuhi sa masiboton nga pagpauswag sa intereses sa Gingharian. (Filip. 3:7, 8) “Alang kanako,” matod niya, “ikalipay ko gayod nga magagasto ug bug-os nga pagagastohon” diha sa pag-alagad sa uban. (2 Cor. 12:15) Ang matag usa kanato maayong mangutana: ‘Sa unsang paagi gigamit ko ang akong panahon, kusog, mga abilidad, ug katigayonan? Gitagaan ko bag unang pagtagad ang pagpauswag sa akong kaugalingong mga intereses, o nagtinguha ba ako sa pagpahimuot kang Jehova?’
3 Mga Kahigayonan sa Paghatag: Kada tuig, ang katawhan sa Diyos nagagugol ug kapin sa usa ka bilyong oras diha sa nagaluwas-ug-kinabuhing buluhaton sa pagsangyaw sa Gingharian. Sulod sa kongregasyon, ang batag tigulang nag-atiman sa nagkalainlaing asaynment nga makabenepisyo sa uban. Daghan usab ang buluhaton nga ginahimo maylabot sa mga asembliya ug mga kombensiyon ingon man usab sa pagpanukod ug pagmentinar sa mga tinukod nga gigamit sa pagpauswag sa matuod nga pagsimba. Ug hunahunaa ang mahigugmaong tabang nga gihatag sa mga igsoong lalaki nga nag-alagad sa mga Hospital Liaison Committee ug sa mga Patient Visitation Group. Kanang tanang nagsakripisyo-sa-kaugalingon nga mga paningkamot maoy panalangin sa atong Kristohanong pag-igsoonay!—Sal. 110:3.
4 Ang mga kahigayonan sa pagtabang sa nagkalainlaing paagi mahimong motungha kon mahitabo ang usa ka katalagman o emerhensiya. Hinuon, kasagarang masabtan lang nato nga ang isigka-Kristohanon nagkinahanglag tabang o pagdasig. (Prov. 17:17) Sa dihang kita andam sa pag-alagad ug pagpauswag sa intereses sa Gingharian, kita nagasunod sa panig-ingnan ni Jesus. (Filip. 2:5-8) Hinaot magpadayon kitang maningkamot sa pagbuhat niana.