Ipakita ang Personal nga Interes—Pinaagi sa Pagkamapuangoron
1 “Si Jehova mapuangoron.” (Sal. 145:8) Bisan pag siya ang Soberano sa Uniberso, siya maluloton, may konsiderasyon, ug matinahoron diha sa iyang mga pagpakiglabot sa dili-hingpit nga mga tawo. (Gen. 13:14; 19:18-21, 29) Madugangan nato ang kamadanihon sa atong presentasyon sa maayong balita kon sundogon nato ang atong mapuangoron nga Diyos. (Col. 4:6) Labaw pa sa kortesiya ug kamatinahoron sa atong sinultihan ang gipasabot niini.
2 Sa Balaybalay: Komosta man kon mamisita kita sa tagbalay sa alang-alang nga oras o sa panahong puliki siya kaayo nga dili siya makigsulti kanato? Maayo nga atong sabton ang maong mga kahimtang pinaagi sa pagpamubo kaayo sa atong presentasyon o pagsugyot nga kita mobalik sa laing higayon. Sa kamaluloton atong likayan ang pagpugos sa mga tawo sa pagdawat sa literatura kon sila mobalibad. Ang konsiderasyon alang sa uban modasig usab kanato sa pagpakitag pagtahod sa ilang propiedad, sama sa pagsira sa mga ganghaan ug pultahan ug sa pagbansay sa atong mga anak nga buhaton usab kana. Seguroon gayod nato nga dili makita sa lumalabay ang basahon nga ibilin diha sa walay-tawo nga kabalayan. Sa pagkatinuod, ang pagkamapuangoron modasig kanato sa pagbuhat ngadto sa uban sumala sa gusto natong pagabuhaton nila kanato.—Luc. 6:31.
3 Sa Pagsangyaw Diha sa Dalan: Samtang nagsangyaw sa dalan, makapakita kitag pagkamatinahoron pinaagi sa dili pagbabag sa mga aseras ug pagtapok atubangan sa mga tindahan. Kita magmasensitibo sa mga kahimtang sa uban, nga makigsulti sa mga tawo nga tingali wala kaayo magdali imbes sa mga tawong tin-aw nga nagdali. May higayon nga basin kinahanglan kitang mosultig kusog aron madunggan diha sa saba nga dalan. Apan kinahanglang himoon nato kana uban sa kaligdong, nga dili magpatagad sa kaugalingon.—Mat. 12:19.
4 Sa Dihang Magsangyaw Ginamit ang Telepono: Ang pagkamay-konsiderasyon alang sa uban modasig kanato sa pagsangyaw ginamit ang telepono diha sa dapit nga mapugngan ang kalangas sa palibot. Atong ipakita ang maayong pamatasan kon magpaila dayon kita sa atong kaugalingon ug magsaysay sa katuyoan sa atong pagtelepono. Ang pagpatungod sa atong baba sa telepono samtang mosulti ug kanunayng pagsulti sa nindot nga tono makatabang aron malangkit ang uban sa makapalig-ong panag-estoryahay nga gipasukad sa Kasulatan. (1 Cor. 14:8, 9) Pinaagi sa pagkamaluloton, pagkamay-konsiderasyon, ug pagkamatinahoron sa maong nagkadaiyang paagi, makasundog kita sa atong mapuangoron nga Diyos, si Jehova.