Pagpauswag sa Atong Kahanas sa Ministeryo—Pagbansay sa mga Bible Study nga Batasanon ang Pagtuon

Kon Nganong Hinungdanon: Bisag natun-an na sa mga Bible study ang pangunang mga pagtulon-an sa Bibliya, dili kini garantiya nga mouswag na sila sa espirituwal. Gikinahanglan nila ang padayong pagtuon. (Heb. 5:12–6:1) Ang pagtuon nagkinahanglag paningkamot nga ilang makita ang koneksiyon sa bag-o nilang nakat-onan ug sa ila nang nahibaloan, ug masabtan ang kaayohan kon ila ning ipadapat. (Prov. 2:1-6) Kon sila makakat-on sa pag-research, ilang matubag ang mga pangutana bahin sa Bibliya pinaagi sa paggamit sa atong mga publikasyon. Kon maningkamot sila sa pagpadapat sa ilang makat-onan, sila makalahutay sa mga pagsulay nga ilang maatubang ingong Kristohanon.—Luc. 6:47, 48.

Kon Unsaon Paghimo:

Ipasiugda nga mag-ampo kang Jehova sa dili pa magtuon.—Juan 14:26; 1 Cor. 2:10.
Bisag bag-o pa nimo siya nga Bible study, dasiga na siya nga mangandam para sa inyong pagtuon. Ipakita ang imong kopya sa publikasyon nga inyong ginatun-an, ug tudloi siya sa pagbadlis sa pangunang mga pulong o prase.
Tabangi siya nga motubag sa iyang kaugalingong pulong. Ayaw himoa nga pangutanag tubag lang ang inyong pagtuon, nga basta basahon lang ang tubag sa libro.
Dasiga ang imong estudyante nga magbasag Bibliya adlaw-adlaw. Ipakita ang eskedyul diha sa jw.org nga nagsugyot ug praktikal nga mga paagi sa pagbasag Bibliya. Gikinahanglan ang determinasyon aron iyang mabatasan ang pagbasag Bibliya adlaw-adlaw. Ang iyang paningkamot dili gyod makawang.—Sal. 1:2, 3.
Tudloi siya sa pagpangitag tubag sa mga pangutana bahin sa Bibliya diha sa Watchtower Library o Watchtower ONLINE NGA LIBRARYA. Tabangi siya nga mapamilyar sa mga simbolo sa mga publikasyon nga sagad gigamit sa tigom; pananglitan, ang be nagtumong sa librong Tunghaan sa Ministeryo.

Sulayi Karong Bulana:

Human matun-an ang usa ka sub-ulohan o kapitulo, ipasumaryo sa imong Bible study ang iyang nakat-onan. Kon wala kay Bible study, bansaya ang imong kaugalingon sa pagsumaryog teksto sa Bibliya o parapo diha sa Bantayanang Torre aron mouswag ang imong pagsabot.