Kon Giunsa Pagpadayag sa Diyos ang Iyang mga Saad

Sukad nga gibuhat sa Diyos ang mga tawo, siya nakigkomunikar kanila pinaagi sa mga anghel ug propeta. Gawas pa niana, iyang gipasulat ang iyang mensahe ug mga saad. Kini nga mga saad sa Diyos mohatag nimog maayong kaugmaon. Busa asa nimo makita karon ang mga saad sa Diyos?

Ang mensahe sa Diyos kanato anaa sa Balaang Kasulatan. (2 Timoteo 3:16) Sa unsang paagi gigamit sa Diyos ang mga propeta sa pagsulat sa iyang mensahe? (2 Pedro 1:21) Gibutang sa Diyos ang iyang hunahuna diha sa hunahuna sa mga magsusulat, dayon ila kining gisulat. Parehas kana sa usa ka negosyante nga nagsugo sa iyang sekretaryo sa pagsulat sa iyang mensahe. Bisag ang sekretaryo ang nagsulat, nahibalo ta nga ang mensahe gikan sa negosyante. Sa susama, bisag gigamit sa Diyos ang pipila ka tawo sa pagsulat sa iyang mensahe, siya ang tinuod nga Awtor sa Sagradong mga Sinulat.

ANG PULONG SA DIYOS MABASA SA DAGHANG PINULONGAN

Importante kaayo ang mensahe sa Diyos, maong giseguro niya nga ang “maayong balita” mabasa ug masabtan sa “matag nasod ug tribo ug pinulongan.” (Pinadayag 14:6) Pinaagi sa paggiya sa Diyos, ang Sagradong mga Sinulat o ang mga bahin niini mabasa sa kapig 3,000 ka pinulongan, nga labaw pa kay sa bisan unsang libro nga nasulat.