Ang Atong Diyos Nagmahal Kanato
1. ANG DIYOS NAGPASUBANG SA ADLAW
Duna kahay mabuhi sa yuta kon walay kahayag gikan sa adlaw? Ang adlaw ang naghatag ug enerhiya sa mga kahoy aron kini motubo, manalingsing, mamulak, mamunga, ug magpatunghag binhi. Pinaagi sab sa adlaw, ang mga kahoy mosuhop ug tubig gikan sa yuta pinaagi sa mga gamot niini. Dayon ang tubig mopaingon sa mga dahon ug moalisngaw ngadto sa hangin.
2. ANG DIYOS NAGPAULAN
Ang ulan maoy bililhong regalo gikan sa Diyos kay pinaagi niini ang yuta magpatunghag pagkaon para kanato. Ang Diyos nagpaulan ug naghatag ug mabungahong mga panahon aron abunda ta sa pagkaon ug magmalipayon.
3. ANG DIYOS NAGHATAG NATOG PAGKAON UG BESTI
Daghang amahan ang nabalaka sa pagtaganag igong pagkaon ug besti sa ilang pamilya. Matikdi ang giingon sa Balaang Kasulatan: “Panid-i pag-ayo ang mga langgam; sila wala magpugas o mag-ani o magtigom diha sa mga kamalig, apan ginapakaon sila sa inyong langitnong Amahan. Dili ba labaw pa man mog bili kay sa mga langgam?”—Mateo 6:25, 26.
“Matikdi kon giunsa pagtubo sa mga lirio sa kapatagan . . . ; apan sultihan ko kamo nga si [Haring] Solomon, bisan sa iyang kadato, wala makasul-ob ug besti nga sama ka nindot nianang sa mga lirio. Kon ingon niana ang pagbesti sa Diyos sa mga tanom sa kapatagan . . . , dili ba mas labaw pa nga kamo iyang bestihan?”—Mateo 6:28-30.
Kay ang Diyos naghatag man natog pagkaon ug besti, seguradong tabangan sab ta niya sa atong ubang panginahanglan. Kon atong buhaton ang kabubut-on sa Diyos, iyang panalanginan ang atong mga paningkamot sa pagpananom o tabangan ta niya sa pagpangitag trabaho aron mapalit nato ang atong gikinahanglan.—Mateo 6:32, 33.
Human nato hisgoti ang adlaw, ulan, mga langgam, ug mga bulak makaingon gyod ta nga angay natong higugmaon ang Diyos. Hisgotan sa mosunod nga artikulo kon sa unsang paagi ang Diyos nakigkomunikar sa mga tawo.