Reperensiya Para sa Workbook sa Tigom nga Kinabuhi ug Ministeryo
Abril 1-7
BAHANDI GIKAN SA PULONG SA DIYOS | 1 CORINTO 7-9
“Pagkatagsaanon—Usa ka Gasa”
(1 Corinto 7:32) Sa pagkatinuod, gusto nako nga mahigawas mo sa kabalaka. Ang lalaking dili minyo mabalak-on sa mga butang sa Ginoo, kon sa unsang paagi mabatonan niya ang pag-uyon sa Ginoo.
Pahimusli ang Imong Pagkatagsaanon
3 Sagad ang usa ka tagsaanon mas daghag panahon ug mas gawasnon kay sa tawong minyo. (1 Cor. 7:32-35) Kini maoy talagsaong kahigayonan nga mapauswag niya ang iyang ministeryo, mapasangkad ang iyang gugma sa uban, ug mas masuod kang Jehova. Busa, daghang Kristohanon ang nakaamgo sa mga benepisyo niini ug mihukom sa ‘paghatag ug luna alang niini,’ bisag sulod sa mubong panahon. Sa sinugdan, ang uban tingali wala magplano nga magkinabuhing tagsaanon, apan sa dihang nabag-o ang ilang kahimtang, sila mainampoong namalandong niini ug nakaamgo nga madawat ra nila ang ilang kahimtang sa tabang ni Jehova. Busa, sila naghatag ug luna alang sa pagkatagsaanon.—1 Cor. 7:37, 38.
(1 Corinto 7:33, 34) Apan ang lalaking minyo mabalak-on sa mga butang sa kalibotan, kon sa unsang paagi mabatonan niya ang pag-uyon sa iyang asawa, 34 mao nga siya mabahin. Dugang pa, ang babayeng dili minyo, maingon man ang ulay, mabalak-on sa mga butang sa Ginoo, aron siya mabalaan diha sa iyang lawas ug espiritu. Apan ang babayeng minyo mabalak-on sa mga butang sa kalibotan, kon sa unsang paagi mabatonan niya ang pag-uyon sa iyang bana.
Mga Pangunang Punto sa mga Sulat Ngadto sa mga Taga-Corinto
7:33, 34—Unsay buot ipasabot sa “mga butang sa kalibotan” nga gikabalak-an sa mga minyo? Si Pablo nagtumong sa adlaw-adlawng panginahanglan nga angayng hunahunaon sa mga minyo. Kini naglakip sa pagkaon, besti, ug puy-anan, apan wala maglakip sa daotang mga butang niining kalibotana, nga angayng likayan sa mga Kristohanon.—1 Juan 2:15-17.
(1 Corinto 7:37, 38) Apan kon ang usa nakahukom na sa iyang kasingkasing ug walay ingon niini nga panginahanglan ug makakontrolar sa iyang kaugalingong mga tinguha ug determinado nga magpabiling dili minyo, maayo kini nga desisyon. 38 Sa susama, ang usa nga magminyo naghimog maayong desisyon, apan ang usa nga dili magminyo naghimog mas maayong desisyon.
Pagkadili-Minyo—Usa ka Pultahan Ngadto sa Walay Pagkalinga nga Kalihokan
14 Ang usa ka dili-minyong Kristohanon nga nagagamit sa iyang dili-minyong kahimtang sa pagpangagpas sa hakog nga mga tumong dili maghimong “mas maayo” kay sa minyong mga Kristohanon. Siya nagpabiling dili-minyo, dili “tungod sa gingharian,” kondili alang sa personal nga mga katarongan. (Mateo 19:12) Ang dili-minyong lalaki o babaye angay nga “mabalak-on sa mga butang sa Ginoo,” mabalak-on nga ‘makabaton sa pag-uyon sa Ginoo,’ ug ‘kanunayng nagaatiman nganha sa Ginoo nga walay pagkalinga.’ Kini nagkahulogag paghatag ug bug-os nga pagtagad sa pag-alagad kang Jehova ug kang Kristo Jesus. Pinaagi lamang sa pagbuhat niini nga ang dili-minyong Kristohanong mga lalaki ug mga babaye nagahimog “mas maayo” kay sa minyong mga Kristohanon.
Pagpangitag Espirituwal nga Bahandi
(1 Corinto 7:11) Apan kon siya mobulag, siya magpabiling dili minyo o kaha makig-uli sa iyang bana; ug ang bana dili gayod mobiya sa iyang asawa.
Apendise
Sa talagsaon kaayong mga kahimtang, ang pipila ka Kristohanon midesisyon sa pagbulag o pagdiborsiyo sa iyang kapikas bisag wala makahimog pakighilawas. Sa maong kaso, ang Bibliya nagbaod nga ang mibulag ‘magpabiling dili-minyo o makig-uli ba hinuon.’ (1 Corinto 7:11) Ang maong Kristohanon dili libreng makapangitag pangasaw-onon o pamanhonon. (Mateo 5:32) Matikdi dinhi ang pipila ka talagsaon kaayong mga kahimtang nga giisip sa uban nga pasikaranan sa panagbulag.
• Tinuyo nga dili pagsustento sa pamilya. Ang usa ka pamilya tingali nag-ilaid sa kakabos kay wala sila sustentohi sa bana, bisan pag makahimo siya. Ang Bibliya nag-ingon: “Kon adunay si bisan kinsa nga wala magtagana alang sa . . . mga sakop sa iyang panimalay, siya naglimod sa pagtuo ug mas daotan pa kay sa tawong walay pagtuo.” (1 Timoteo 5:8) Kon ang bana dili magbag-o, makahukom ang asawa nga legal nga makigbulag aron mapanalipdan ang iyang kaayohan ug sa iyang mga anak. Hinuon, angay gayong susihon pag-ayo sa mga ansiyano ang akusasyon nga ang usa ka Kristohanon midumili sa pagsustento sa iyang pamilya. Ang bana ikapalagpot kon dili siya mosustento sa iyang pamilya.
• Grabeng pisikal nga pagdagmal. Magmapintason tingali kaayo ang usa ka abusadong kapikas nga mahimong mameligro na ang panglawas ug bisan ang kinabuhi sa iyang kapikas. Kon Kristohanon ang abusadong kapikas, angayng susihon sa mga ansiyano sa kongregasyon ang mga akusasyon. Ang mga pagsinta sa kasuko ug mapintas nga panggawi maoy pasikaranan sa pagpalagpot.—Galacia 5:19-21.
• Grabeng kapeligrohan sa matuod nga pagsimba. Tingali maningkamot gayod ang usa ka kapikas nga mapugngan ang matuod nga pagsimba sa iyang kapikas o pugson siya aron makalapas sa mga sugo sa Diyos. Sa maong kaso, ang nameligrong kapikas makadesisyon kon ang bugtong paagi ba sa ‘pagsugot sa Diyos ingong magmamando inay ang mga tawo’ mao ang legal nga pagpakigbulag.—Buhat 5:29.
(1 Corinto 7:36) Apan kon ang dili minyo mibati nga dili niya mapugngan ang iyang pangibog, ug kon lapas na siya sa pagbuswak sa pagkabatan-on, mas maayo nga magminyo siya. Dili kini sala.
Ikaw Makapabiling Putli Diha sa Imoral nga Kalibotan
Busa, ang mga batan-on dili angayng magdalidali sa pagminyo sa dihang unang masinati nila ang pagkapukaw sa mga agda sa sekso. Ang kaminyoon nagkinahanglan ug pakigsaad, ug ang pagtuman niana nga responsabilidad nagkinahanglan ug kahamtong. (Genesis 2:24) Mas maayo nga maghulat hangtod ang usa “lapas na sa pagbuswak sa pagkabatan-on”—ang yugto sa dihang ang seksuwal nga pagbati kusganon ug makadaot sa panghukom sa usa. (1 Corinto 7:36) Ug pagkadili-maalamon ug pagkadaotan gayod alang sa usa ka hamtong nga gustong magminyo nga malangkit sa imoral nga mga relasyon tungod lamang kay walay makitang minyoan!
Pagbasa sa Bibliya
(1 Corinto 8:1-13) Karon bahin sa mga pagkaon nga gihalad ngadto sa mga idolo: Nahibalo ta nga kitang tanan dunay kahibalo. Ang kahibalo makapagarboso, apan ang gugma makapalig-on. 2 Kon dunay naghunahuna nga siya may nahibaloan, siya wala pa mahibalo sa tanan nga angay niyang mahibaloan bahin niini. 3 Apan kon ang usa nahigugma sa Diyos, kini siya iyang nailhan. 4 Karon bahin sa pagkaon sa mga kalan-on nga gihalad ngadto sa mga idolo, nahibalo ta nga ang idolo walay bili sa kalibotan ug nga walay laing Diyos gawas sa usa lang. 5 Kay bisan tuod dunay ginatawag nga mga diyos, sa langit man o sa yuta, sama nga dunay daghang “diyos” ug daghang “ginoo,” 6 alang kanato sa pagkatinuod dunay usa lang ka Diyos, ang Amahan, nga naggikan kaniya ang tanang butang ug kita naglungtad alang kaniya; ug dunay usa ka Ginoo, si Jesu-Kristo, nga pinaagi kaniya milungtad ang tanang butang ug kita milungtad pinaagi kaniya. 7 Bisan pa niana, dili tanan ang nahibalo niini. Apan ang pipila, kay sila nagsimba kaniadto sa mga idolo, dihang mokaon ug pagkaon nga gihalad ngadto sa mga idolo maghunahuna nga sila nagsimbag idolo, ug ang ilang konsensiya, kay huyang man, nahugawan. 8 Apan ang pagkaon dili makapasuod kanato sa Diyos; dili ta mahimong daotan kon dili ta mokaon ug dili ta mahimong mas maayo kon mokaon ta. 9 Apan pagbantay kanunay nga ang inyong katungod sa pagpili dili mahimong kapandolan niadtong mga luya. 10 Kay kon may makakita kanimo, ikaw nga may kahibalo, nga nagkaon diha sa templo sa idolo, dili ba madasig ang konsensiya niadtong usa nga luya nga mokaon usab ug pagkaon nga gihalad ngadto sa mga idolo? 11 Busa tungod sa imong kahibalo, ang tawong luya nadaot, ang imong igsoon nga tungod kaniya ang Kristo namatay. 12 Dihang nakasala mo sa inyong mga igsoon niining paagiha ug nasamdan ninyo ang ilang huyang nga konsensiya, nakasala mo sa Kristo. 13 Busa kon ang pagkaon makapandol sa akong igsoon, dili na gyod ko mokaon pag-usab ug karne, aron dili ko makapandol sa akong igsoon.
Abril 8-14
BAHANDI GIKAN SA PULONG SA DIYOS | 1 CORINTO 10-13
“Si Jehova Kasaligan”
(1 Corinto 10:13) Walay tentasyon nga miabot kaninyo gawas nianang sagad sa mga tawo. Apan ang Diyos kasaligan, ug dili niya itugot nga tentalon mo nga labaw sa inyong maantos, apan uban sa tentasyon siya magtaganag kalingkawasan aron makalahutay mo niini.
Mga Pangutana Gikan sa mga Magbabasa
Si apostol Pablo misulat nga si Jehova ‘dili motugot nga tentalon kamo nga labaw sa inyong maantos.’ (1 Cor. 10:13) Nagpasabot ba kini nga timbangtimbangon daan ni Jehova kon unsay atong maantos, dayon pilion niya kon unsang pagsulay ang modangat nato?
▪ Tagda kon unsay nalangkit sa maong panglantaw. Usa ka brader kansang anak naghikog nangutana: ‘Gitimbangtimbang bang daan ni Jehova nga maagwanta ra namo sa akong asawa ang kaguol nga bation tungod sa paghikog sa among anak? Nahitabo ba kadto tungod kay nahibalo nang daan ang Diyos nga maantos namo kana?’ Makataronganon bang motuo nga maniobrahon ni Jehova ang mga panghitabo sa atong kinabuhi sa espesipikong mga paagi?
Ang dugang pagkonsiderar sa mga pulong ni Pablo sa 1 Corinto 10:13 motultol niini nga konklusyon: Dili nato mabasa sa Kasulatan nga timbangtimbangon daan ni Jehova kon unsay atong maantos ug dayon, base niana, pilion niya kon unsang mga pagsulay ang modangat nato. Hisgotan nato ang upat ka rason kon nganong makaingon ta niana.
Una, gihatagan ni Jehova ang mga tawo ug kagawasan sa pagpili. Buot niyang mopili ta kon unsay atong gusto nga dalan sa kinabuhi. (Deut. 30:19, 20; Jos. 24:15) Kon pilion nato ang hustong dalan, makalaom ta sa giya ni Jehova. (Prov. 16:9) Pero kon pilion nato ang sayop nga dalan, antoson nato ang resulta niana. (Gal. 6:7) Kon si Jehova pay mopili kon unsang mga pagsulay ang modangat nato, dili ba sama ra kanag gilimitahan niya ang atong kagawasan sa pagpili?
Ikaduha, dili ta panalipdan ni Jehova batok sa ‘panahon ug wala damhang panghitabo.’ (Eccl. 9:11) Ang usa tingali maaksidente, nga lagmit may mapait nga resulta, kay naatol nga tua siya sa maong dapit. Si Jesus naghisgot bahin sa usa ka trahedya diin 18 ka tawo ang namatay dihang natumpagan sa torre, ug miingon siya nga dili kadto pagbuot sa Diyos. (Luc. 13:1-5) Busa, dili makataronganon ang paghunahuna nga tinoon daan sa Diyos kon kinsay mabuhi ug mamatay tungod sa wala damhang panghitabo.
Ikatulo, ang matag usa kanato nalangkit sa isyu sa integridad. Hinumdomi nga gikuwestiyon ni Satanas ang integridad sa tanang magsisimba ni Jehova, nga nangangkong dili ta magmaunongon kang Jehova kon makaagom sa mga pagsulay. (Job 1:9-11; 2:4; Pin. 12:10) Kon ilikay ta ni Jehova sa pipila ka pagsulay kay nakita niyang daan nga dili nato kana maantos, dili ba makahatag nag dugang pamatuod sa pangangkon ni Satanas nga nag-alagad ta sa Diyos tungod sa hakog nga motibo?
Ikaupat, dili kinahanglang sayron ni Jehova ang tanang mahitabo kanato. Ang ideya nga pilion daan sa Diyos kon unsang mga pagsulay ang modangat nato magpasabot nga nahibalo siya sa tanang mahitabo nato sa umaabot. Apan dili kana Kasulatanhon. Tinuod, puwedeng sayron sa Diyos ang umaabot. (Isa. 46:10) Pero gipakita sa Bibliya nga iyang pilion kon unsang mga panghitabo sa umaabot ang iyang sayron. (Gen. 18:20, 21; 22:12) Busa dihang gamiton niya ang iyang katakos sa pagkahibalong daan sa umaabot, ipakita sab niya ang iyang pagtahod sa atong kagawasan sa pagpili. Dili ba mao kanay atong madahom sa Diyos kinsa nagpabili sa atong kagawasan ug kanunayng naggamit sa iyang mga hiyas sa balanseng paagi?—Deut. 32:4; 2 Cor. 3:17.
Nan, unsaon nato pagsabot ang mga pulong ni Pablo: “Dili . . . itugot [sa Diyos] nga tentalon kamo nga labaw sa inyong maantos”? Gihisgotan ni Pablo dinhi kon unsay buhaton ni Jehova panahon sa pagsulay, dili sa wala pa ang pagsulay. Ang gisulti sa apostol nagpasalig nato nga bisan unsa mang pagsulay ang modangat, si Jehova motabang nato kon mosalig ta niya. (Sal. 55:22) Ang makapahupay nga mga pulong ni Pablo gibase sa duha ka hinungdanong kamatuoran.
Una, ang mga pagsulay nga atong giatubang maoy “sagad sa mga tawo.” Busa, ang atong mga pagsulay komon nang nasinatian sa mga tawo. Ang maong mga pagsulay maantos ra nato—basta mosalig ta sa Diyos. (1 Ped. 5:8, 9) Sa konteksto sa 1 Corinto 10:13, si Pablo naghisgot sa mga pagsulay nga naatubang sa Israel sa kamingawan. (1 Cor. 10:6-11) Ang maong mga pagsulay nasinati na sa mga tawo ug naantos sa matinumanong mga Israelinhon. Upat ka beses nga si Pablo miingon nga ang “pipila kanila” misupak. Ikasubo, ang pipila ka Israelinhon nagpadaog sa sayop nga mga tinguha kay wala sila mosalig sa Diyos.
Ikaduha, “ang Diyos kasaligan.” Ang rekord sa mga pakiglabot sa Diyos sa iyang katawhan nagpakita nga ihatag niya ang iyang maunongong gugma “niadtong nahigugma kaniya ug niadtong nagatuman sa iyang mga sugo.” (Deut. 7:9) Gipakita usab niana nga ang Diyos kanunayng motuman sa iyang mga saad. (Jos. 23:14) Tungod sa iyang rekord sa pagkamaunongon, kadtong nahigugma ug nagmatinumanon kaniya makasalig nga tumanon niya ang iyang saad maylabot sa mga pagsulay nga ila tingaling maatubang: (1) Dili niya tugotang moabot sa punto nga imposible nang maantos ang pagsulay, ug (2) ‘siya magtagana [kanilag] kalingkawasan.’
Sa unsang paagi si Jehova magtaganag kalingkawasan niadtong nagsalig niya? Siyempre, kon iyang kabubut-on, puwede niyang taposon ang usa ka pagsulay. Apan hinumdomi ang giingon ni Pablo: “Siya [si Jehova] usab magtaganag kalingkawasan aron kamo makahimo sa pag-antos niini.” Busa, sa daghang kahimtang, siya nagtaganag “kalingkawasan” pinaagi sa paghatag sa atong gikinahanglan aron makalahutay ta sa mga pagsulay. Tagda ang pipila ka paagi nga si Jehova nagtaganag kalingkawasan:
▪ Siya ‘magahupay kanato sa tanan natong kasakitan [o, pagsulay].’ (2 Cor. 1:3, 4) Si Jehova makahupay sa atong hunahuna ug kasingkasing pinaagi sa iyang Pulong, balaang espiritu, ug sa espirituwal nga pagkaon nga gitagana sa matinumanong ulipon.—Mat. 24:45; Juan 14:16; Roma 15:4.
▪ Siya makagiya nato pinaagi sa balaang espiritu. (Juan 14:26) Dihang motungha ang mga pagsulay, ang espiritu mahimong magpahinumdom kanato sa mga asoy ug prinsipyo sa Bibliya ug dayon mahibaloan nato kon unsay maalamong buhaton.
▪ Mahimong gamiton niya ang iyang mga anghel sa pagtabang nato.—Heb. 1:14.
▪ Mahimong motabang siya nato pinaagi sa atong mga isigkamagsisimba kinsa “makapalig-on” nato pinaagi sa pulong ug buhat.—Col. 4:11.
Nan, unsa may atong ikahinapos maylabot sa kahulogan sa gisulti ni Pablo sa 1 Corinto 10:13? Dili pilion ni Jehova ang mga pagsulay nga atong atubangon. Pero, kon motungha man ang mga pagsulay, makaseguro ta niini: Kon bug-os tang mosalig kang Jehova, dili gyod niya tugotan ang pagsulay nga moabot sa punto nga imposible na natong maantos; motagana gyod siyag kalingkawasan aron makalahutay ta niana. Makapahupay gayod kana!
(1 Corinto 10:13) Walay tentasyon nga miabot kaninyo gawas nianang sagad sa mga tawo. Apan ang Diyos kasaligan, ug dili niya itugot nga tentalon mo nga labaw sa inyong maantos, apan uban sa tentasyon siya magtaganag kalingkawasan aron makalahutay mo niini.
(1 Corinto 10:13) Walay tentasyon nga miabot kaninyo gawas nianang sagad sa mga tawo. Apan ang Diyos kasaligan, ug dili niya itugot nga tentalon mo nga labaw sa inyong maantos, apan uban sa tentasyon siya magtaganag kalingkawasan aron makalahutay mo niini.
Pagpangitag Espirituwal nga Bahandi
(1 Corinto 10:8) Ni maghimog seksuwal nga imoralidad, sama sa gihimo sa pipila kanila, mao nga ang 23,000 kanila nangapukan sa usa ka adlaw.
Mga Pangutana Gikan sa mga Magbabasa
Nganong nag-ingon ang 1 Corinto 10:8 nga 23,000 ka Israelinhon ang gipatay sa usa ka adlaw tungod sa pagpakighilawas, samtang ang Numeros 25:9 naghatag sa gidaghanong 24,000?
Dunay daghang rason kon nganong lainlaing mga numero ang gihatag niining duha ka teksto. Ang kinayanohang rason tingali mao nga ang aktuwal nga gidaghanon maoy tali sa 23,000 ug 24,000, busa puwedeng himoong tibuok ang numero paubos o pataas.
Tagda ang laing posibilidad. Si apostol Pablo nagkutlo sa asoy sa mga Israelinhon sa Sitim ingong pasidaang panig-ingnan alang sa mga Kristohanon sa karaang Corinto, usa ka siyudad nga gibantog tungod sa mahilayong pagkinabuhi sa mga tawo didto. Siya misulat: “Ni makighilawas kita, ingon sa pipila kanila nga nakighilawas, aron lamang mangapukan, kawhaag-tulo ka libo kanila sa usa ka adlaw.” Nagtumong niadtong gipatay ni Jehova tungod sa ilang pagpakighilawas, ang numero nga gihatag ni Pablo maoy 23,000.—1 Corinto 10:8.
Apan, ang Numeros kapitulo 25 nag-ingon nga “ang Israel nakiglambigit sa Baal sa Peor; ug ang kasuko ni Jehova misilaob batok sa Israel.” Dayon, gisugo ni Jehova si Moises sa pagpatay sa “tanang pangulo sa katawhan.” Si Moises, sa baylo, nagsugo sa mga hukom sa paghimo sa maong sugo. Sa kataposan, sa dihang abtik nga milihok si Pinehas sa pagpatay sa Israelinhon nga nagdalag babayeng Midianhon diha sa kampo, “ang hampak mihunong.” Ang asoy gitapos niining mga pulonga: “Kadtong nangamatay gumikan sa hampak mikabat ug kawhaag-upat ka libo.”—Numeros 25:1-9.
Ang gidaghanon nga gihatag diha sa Numeros dayag nga naglakip sa mga “pangulo sa katawhan” nga gipatay sa mga hukom ug kadtong direktang gipatay ni Jehova. Tingali dihay usa ka libong pangulo nga namatay sa mga kamot sa mga hukom, mao nga mikabat kini sa gidaghanong 24,000. Nakighilawas man sila, nakigbahin sa mga kasadyaan, o mikonsentir niadtong mibuhat niini, kining maong mga pangulo, o mga dakodako, sad-an tungod sa ‘pagpakiglambigit sa Baal sa Peor.’
Bahin sa pulong nga “nakiglambigit,” ang usa ka reperensiya sa Bibliya nagpatin-aw nga kini mahimong magkahulogan sa “pagtapot sa usa ka tawo ngadto sa laing tawo.” Ang mga Israelinhon maoy katawhan nga nagpahinungod kang Jehova, apan sa dihang sila “nakiglambigit sa Baal sa Peor,” ilang giputol ang ilang napahinungod nga relasyon sa Diyos. Mga 700 ka tuig sa ulahi, pinaagi sa manalagnang si Oseas, giingnan ni Jehova ang mga Israelinhon: “Nangadto sila kang Baal sa Peor, ug ilang gipahinungod ang ilang kaugalingon sa makauulaw nga butang, ug sila nahimong dulumtanan sama sa butang nga ilang gihigugma.” (Oseas 9:10) Ang tanang nakiglambigit kang Baal takos sa pagdawat ug bug-at nga paghukom sa Diyos. Busa, gipahinumdoman ni Moises ang mga anak sa Israel: “Ang inyong mga mata mao ang nakakita sa gibuhat ni Jehova batok sa Baal sa Peor, nga ang tanang tawo nga misunod sa Baal sa Peor mao ang gilaglag ni Jehova nga inyong Diyos gikan sa inyong taliwala.”—Deuteronomio 4:3.
(1 Corinto 11:5, 6) apan ang matag babaye nga nagaampo o nagapanagna nga walay pandong sa iyang ulo nagapakaulaw sa iyang ulo, kay kini sama ra nga siya usa ka babaye nga kiniskisan ang ulo. 6 Kay kon ang usa ka babaye dili magpandong sa iyang ulo, angay siyang magpaputol ug buhok; apan kon makauulaw alang sa usa ka babaye nga magpaputol ug buhok o magpakiskis sa ulo, angay siyang magpandong.
(1 Corinto 11:10) Mao nga ang babaye angay nga magbaton ug timaan sa awtoridad diha sa iyang ulo, tungod sa mga anghel.
Mga Pangutana Gikan sa mga Magbabasa
Kinahanglan bang magpandong ang usa ka sister kon siya magdumalag pagtuon sa Bibliya diin presente ang usa ka lalaking magmamantala?
▪ Sa “Mga Pangutana Gikan sa mga Magbabasa” nga gipatik sa Hulyo 15, 2002, nga gula sa Ang Bantayanang Torre, gihisgotan nga angayng magpandong ang usa ka sister kon siya magdumalag pagtuon sa Bibliya diin presente ang usa ka lalaking magmamantala, bawtismado man kini o dili. Gipakita sa dugang pagsusi niini nga haom ang paghimog diyutayng kausaban bahin niini nga lagda.
Kon bawtismado ang lalaking magmamantala nga miuban sa sister dihang siya nagdumalag regular nga pagtuon sa Bibliya, buot gayod niyang magpandong. Sa ingon, iyang gipakita nga siya nagtahod sa kahikayan ni Jehova sa pagkaulo diha sa kongregasyon kay gibuhat niya ang usa ka buluhaton nga maoy responsabilidad sa usa ka brader. (1 Cor. 11:5, 6, 10) Apan makahangyo ang sister sa kauban niyang brader nga maoy magdumala sa pagtuon kon siya kuwalipikado ug makahimo niana.
Sa laing bahin, kon ang kauban sa sister sa pagdumalag pagtuon sa Bibliya dili-bawtismado nga magmamantalang lalaki kinsa dili niya bana, ang Kasulatan wala ra mag-obligar kaniya nga magpandong. Apan bisan sa maong mga sirkumstansiya, ang pipila ka sister makahukom nga magpandong tungod sa ilang konsensiya.
Pagbasa sa Bibliya
(1 Corinto 10:1-17) Karon gusto nakong mahibalo mo, mga igsoon, nga ang tanan natong katigulangan nailalom sa panganod ug milatas sa dagat 2 ug ang tanan nabawtismohan ingong sumusunod ni Moises pinaagi sa panganod ug sa dagat, 3 ug ang tanan nangaon sa samang espirituwal nga pagkaon 4 ug ang tanan nanginom sa samang espirituwal nga ilimnon. Kay tig-imnanan sila gikan sa espirituwal nga bato nga nagsunod kanila, ug kana nga bato nagtumong sa Kristo. 5 Apan ang Diyos wala malipay sa kadaghanan kanila, mao nga gipamatay sila sa kamingawan. 6 Karon kining mga butanga maoy panig-ingnan alang kanato, aron dili ta magtinguhag makadaot nga mga butang, sama sa ilang pagtinguha niini. 7 Ni mahimong mga tigsimbag mga idolo, sama sa gihimo sa pipila kanila; sumala sa nasulat: “Ang katawhan nanglingkod aron mangaon ug manginom. Unya sila nanindog aron maglipaylipay.” 8 Ni maghimog seksuwal nga imoralidad, sama sa gihimo sa pipila kanila, mao nga ang 23,000 kanila nangapukan sa usa ka adlaw. 9 Ni ibutang nato si Jehova sa pagsulay, sama nga ang pipila kanila nagbutang kaniya sa pagsulay, aron lang mangalaglag pinaagi sa mga halas. 10 Ni mahimong mga bagulbolan, sama nga ang pipila kanila nagbagulbol, aron lang mangalaglag pinaagi sa tiglaglag. 11 Karon kining mga butanga nahitabo kanila ingong mga pananglitan, ug kini gisulat ingong pasidaan kanato nga nagkinabuhi sa kataposan sa mga sistema sa mga butang. 12 Busa siya nga naghunahuna nga siya nagbarog magbantay nga dili siya mapukan. 13 Walay tentasyon nga miabot kaninyo gawas nianang sagad sa mga tawo. Apan ang Diyos kasaligan, ug dili niya itugot nga tentalon mo nga labaw sa inyong maantos, apan uban sa tentasyon siya magtaganag kalingkawasan aron makalahutay mo niini. 14 Busa, akong mga hinigugma, kalagiw gikan sa idolatriya. 15 Kamo mga tawong dunay katakos sa pag-ila, busa hukmi ninyo kon husto ba o dili ang akong ginasulti. 16 Kon moinom ta sa kopa sa panalangin nga atong gipanalanginan, dili ba nakig-ambit kita sa dugo sa Kristo? Kon mokaon ta sa tinapay nga atong gipikaspikas, dili ba nakig-ambit kita sa lawas sa Kristo? 17 Dunay usa ka tinapay, busa bisan tuod daghan ta, kita usa ka lawas, kay kitang tanan nagapakig-ambit nianang usa ka tinapay.
Abril 22-28
BAHANDI GIKAN SA PULONG SA DIYOS | 1 CORINTO 14-16
“Ang Diyos Mahimong Tanang Butang Ngadto sa Tanan”
(1 Corinto 15:24, 25) Unya, sa kataposan, iyang itugyan ang Gingharian ngadto sa iyang Diyos ug Amahan, dihang iya nang mawagtang ang tanang gobyerno ug tanang awtoridad ug gahom. 25 Kay kinahanglan siyang magmando ingong hari hangtod mabutang na sa Diyos ang tanang kaaway ilalom sa iyang mga tiil.
“Ang Kamatayon Pagawagtangon”
10 “Ang kataposan” mao ang kataposan sa Usa ka Libo ka Tuig nga Pagmando ni Kristo, sa dihang si Jesus mapaubsanon ug maunongong magtugyan sa Gingharian ngadto sa iyang Diyos ug Amahan. (Pinadayag 20:4) Ang katuyoan sa Diyos nga “tigomon pag-usab ang tanang butang diha sa Kristo” matuman na. (Efeso 1:9, 10) Apan, laglagon una ni Kristo ang “tanang kagamhanan ug tanang awtoridad ug gahom” nga supak sa Soberanong kabubut-on sa Diyos. Naglakip kini ug labaw pa sa kalaglagan nga mahitabo sa Armagedon. (Pinadayag 16:16; 19:11-21) Si Pablo miingon: “[Si Kristo] kinahanglan magmando ingong hari hangtod mabutang sa Diyos ang tanang kaaway ilalom sa iyang mga tiil. Ingong kataposang kaaway, ang kamatayon pagawagtangon.” (1 Corinto 15:25, 26) Oo, ang tanang timailhan sa Adamikong sala ug kamatayon wagtangon na. Nan, kinahanglang nahabwaan na sa Diyos ang “handomanang mga lubnganan” pinaagi sa pagbuhi pag-usab sa mga patay.—Juan 5:28.
(1 Corinto 15:26) Ug ang kataposang kaaway, ang kamatayon, pagawagtangon.
Tumanon sa Gingharian ang Kabubut-on sa Diyos sa Yuta
21 Komosta ang komong sangkoanan sa sakit, ang di kaikyasang resulta sa sala—ang kamatayon? Kana ang atong “kataposang kaaway,” nga dili gyod mapildi sa tanang dili hingpit nga tawo. (1 Cor. 15:26) Pero ang kamatayon ba kaaway nga dili mapildi ni Jehova? Matikdi ang gitagna ni Isaias: “Iyang lamyon gayod ang kamatayon hangtod sa kahangtoran, ug ang Soberanong Ginoong Jehova tinong magpahid sa mga luha gikan sa tanang nawong.” (Isa. 25:8) Mahulagway ba nimo kana nga panahon? Wala nay ipanglubong, menteryo, ug luha sa kasub-anan! Modagayday hinuon ang mga luha sa kalipay kay tumanon na ni Jehova ang iyang saad sa pagbanhaw sa mga patay! (Basaha ang Isaias 26:19.) Sa kataposan, ang tanang kasakit gumikan sa kamatayon maalim na.
(1 Corinto 15:27, 28) Kay “gipasakop sa Diyos ang tanang butang ilalom sa iyang mga tiil.” Apan dihang miingon siya nga ‘ang tanang butang gipasakop na,’ dayag nga wala kini maglakip sa Usa nga nagpasakop sa tanang butang ngadto kaniya. 28 Apan dihang ang tanang butang mapasakop na ngadto kaniya, niana ang Anak magpasakop usab sa Usa nga nagpasakop sa tanang butang ngadto kaniya, aron ang Diyos mahimong tanang butang ngadto sa tanan.
Kalinaw Sulod sa Usa ka Libo ka Tuig—Ug Hangtod sa Hangtod!
17 Human sa usa ka libo ka tuig, haom kaayo ang mga pulong nga “ang Diyos mahimong tanang butang ngadto sa tanan.” Unsay ipasabot niana? Hunahunaa ang panahon balik sa Eden, sa dihang bahin pa si Adan ug Eva sa malinawon ug nagkahiusang pamilya ni Jehova. Ingong Soberano sa uniberso, si Jehova direktang nagmando sa tanan niyang linalang sa langit ug sa yuta. Sila direktang makaestorya ug makasimba kaniya, ug makadawat sa iyang panalangin. Ang Diyos maoy “tanang butang ngadto sa tanan” kaniadto.
Pagpangitag Espirituwal nga Bahandi
(1 Corinto 14:34, 35) ang mga babaye maghilom lang diha sa mga kongregasyon, kay wala sila tugoting mosulti. Hinuon magpasakop sila, sumala sa giingon usab sa Balaod. 35 Kon may gusto silang makat-onan, papangutan-a sila sa ilang mga bana sa balay, kay makauulaw alang sa usa ka babaye nga mosulti diha sa kongregasyon.
Gidid-an ba ni Apostol Pablo ang mga Babaye sa Pagsulti?
“Ang mga babaye magpakahilom diha sa mga kongregasyon,” misulat si apostol Pablo. (1 Corinto 14:34) Unsay iyang gipasabot? Gipakamenos ba niya ang ilang kinaadman? Wala. Sa pagkatinuod, siya subsob nga naghisgot sa maayong pagpanudlo sa mga babaye. (2 Timoteo 1:5; Tito 2:3-5) Sa iyang sulat sa mga taga-Corinto, gitambagan ni Pablo dili lang ang mga babaye kondili ang mga indibiduwal usab nga may gasa sa pagsultig lainlaing pinulongan ug pagpanagna sa ‘pagpakahilom’ kon dunay laing magtutuo nga nagsulti. (1 Corinto 14:26-30, 33) Lagmit ang pipila ka Kristohanong babaye nalipay pag-ayo sa ilang bag-ong tinuohan mao nga mosagbat sila sa mamumulong aron mangutana, nga maoy kostumbre nianang dapita. Aron malikayan kana, giawhag ni Pablo ang mga babaye nga ‘mangutana sa ilang mga bana sa balay.’—1 Corinto 14:35.
(1 Corinto 15:53) Kay ang madunot angayng magsul-ob ug pagkadili-madunot, ug ang may kamatayon angayng magsul-ob ug pagkawalay-kamatayon.
Pagkadili-madunoton
Kay nahiusa kang Jesus diha sa dagway sa iyang pagkabanhaw, ang iyang kaubang mga manununod gibanhaw usab dili lamang ngadto sa kinabuhing walay kataposan ingong espiritung mga linalang kondili ngadto sa pagkawalay-kamatayon ug pagkadili-madunoton. Kay nagkinabuhi, nag-alagad nga matinumanon, ug namatay diha sa madunot nga tawhanong mga lawas, sila karon makadawat ug dili-madunot nga espirituhanong mga lawas, ingon sa tin-awng gipahayag ni Pablo diha sa 1 Corinto 15:42-54. Busa ang pagkawalay-kamatayon dayag nga nagtumong sa kinaiyahan sa kinabuhi nga ilang mapahimuslan, ang pagkawalay-kataposan ug pagkadili-malaglag niini, samtang ang pagkadili-madunoton lagmit nga nalangkit sa organismo o lawas nga gihatag sa Diyos kanila, nga sa kinaiyanhon dili madunot, madaot, o malaglag. Busa mopatim-aw nga ang Diyos naghatag kanila sa kagahom nga magpadayon sa paglungtad sa ilang kaugalingon, nga dili mag-agad sa panggawas nga mga tinubdan sa enerhiya sama sa uban niyang mga linalang, unodnon ug espirituhanon. Kini maoy usa ka talagsaong ebidensiya sa pagsalig sa Diyos kanila. Apan, ang maong independente ug dili-malaglag nga paglungtad wala magpahigawas kanila gikan sa pagkontrolar sa Diyos; ug sila, sama sa ilang Ulo nga si Kristo Jesus, padayong magpasakop sa kabubut-on ug mga direksiyon sa ilang Amahan.—1Co 15:23-28; tan-awa ang pagkawalay-kamatayon; kalag.
Pagbasa sa Bibliya
(1 Corinto 14:20-40) Mga igsoon, ayaw mo pagpakabata sa inyong pagsabot, apan pagpakabata sa pagkadaotan; ug pagpakahamtong sa inyong pagsabot. 21 Diha sa Balaod nasulat kini: “‘Pinaagi sa mga dila sa mga langyaw ug sa mga ngabil sa mga estranyo ako makigsulti niini nga katawhan, ug bisan pa niana sila dili magpatalinghog kanako,’ miingon si Jehova.” 22 Busa, ang pagsultig lainlaing pinulongan dili ilhanan alang sa mga magtutuo kondili alang sa mga dili magtutuo, samtang ang tagna dili alang sa mga dili magtutuo kondili alang sa mga magtutuo. 23 Busa kon ang tibuok kongregasyon magtigom sa usa ka dapit ug silang tanan magsultig lainlaing pinulongan, apan ang mga ordinaryong tawo o dili magtutuo mosulod, dili kaha sila moingon nga nangabuang na mo? 24 Apan kon kamong tanan nagapanagna unya may ordinaryong tawo o dili magtutuo nga mosulod, siya badlongon ug usisahon pag-ayo nilang tanan. 25 Unya ang mga tinagoan sa iyang kasingkasing madayag, mao nga siya mohapa ug mosimba sa Diyos, nga magpahayag: “Ang Diyos anaa gayod sa inyong taliwala.” 26 Nan unsa man ang buhaton, mga igsoon? Dihang magtigom mo, ang usa mag-awit ug salmo, ang lain manudlo, ang lain magsultig pinadayag, ang lain mosultig laing pinulongan, ug ang lain maghubad sa kahulogan. Himoa ang tanang butang alang sa pagpalig-on. 27 Ug kon dunay magsultig laing pinulongan, limitahan kini sa duha o tulo ka tawo ang kinadaghanan, ug magturnohay sila, ug angayng may usa nga mohubad. 28 Apan kon walay maghuhubad, angay siyang maghilom diha sa kongregasyon ug mosulti sa iyang kaugalingon ug sa Diyos. 29 Pasultiha ang duha o tulo ka propeta, ug ang uban maoy mosabot sa kahulogan. 30 Apan kon ang lain makadawat ug pinadayag samtang naglingkod didto, mohilom una ang unang nagsulti. 31 Kay kamong tanan makapanagna man nga turnohay, aron ang tanan makakat-on ug madasig. 32 Angayng gamiton sa mga propeta ang mga gasa sa espiritu sa hustong paagi. 33 Kay ang Diyos usa ka Diyos dili sa kasamok kondili sa kalinaw. Sama sa tanang kongregasyon sa mga balaan, 34 ang mga babaye maghilom lang diha sa mga kongregasyon, kay wala sila tugoting mosulti. Hinuon magpasakop sila, sumala sa giingon usab sa Balaod. 35 Kon may gusto silang makat-onan, papangutan-a sila sa ilang mga bana sa balay, kay makauulaw alang sa usa ka babaye nga mosulti diha sa kongregasyon. 36 Diha ba kaninyo naggikan ang pulong sa Diyos, o diha ba lamang kini kaninyo gihatag? 37 Kon ang usa naghunahuna nga siya propeta o may gasa sa espiritu, angay niyang ilhon nga ang mga butang nga akong ginasulat kaninyo maoy mga sugo sa Ginoo. 38 Apan kon ang usa magbalewala niini, siya pagabalewalaon. 39 Busa, mga igsoon, padayon sa pagpaningkamot sa pagpanagna, apan ayawg idili ang pagsultig lainlaing pinulongan. 40 Hinuon himoa ang tanang butang nga may kahapsay ug pinaagig kahikayan.
Abril 29–Mayo 5
BAHANDI GIKAN SA PULONG SA DIYOS | 2 CORINTO 1-3
“Si Jehova—‘Ang Diyos sa Tanang Paghupay’”
(2 Corinto 1:3) Madayeg unta ang Diyos ug Amahan sa atong Ginoong Jesu-Kristo, ang Amahan nga malumo ug maluluy-on ug ang Diyos sa tanang paghupay,
“Hilak Uban sa mga Tawong Nanghilak”
4 Ang atong maluluy-ong Amahan namatyan usab ug mga minahal—si Abraham, Isaac, Jacob, Moises, ug Haring David. (Num. 12:6-8; Mat. 22:31, 32; Buh. 13:22) Ang Pulong sa Diyos nagpasalig kanato nga si Jehova naghinamhinam o nangandoy gayod sa panahon nga iyang buhion sila pag-usab. (Job 14:14, 15) Sila mabuhi nga malipayon ug himsog. Hinumdomi sab nga nakaagom ug mapait nga kamatayon ang pinalanggang Anak sa Diyos—ang usa nga “iyang gikahinangpan pag-ayo.” (Prov. 8:22, 30) Seguradong wala gyoy pulong nga makahubit sa kaguol nga gibati ni Jehova.—Juan 5:20; 10:17.
(2 Corinto 1:4) kinsa nagahupay kanato sa tanan natong pagsulay aron makahupay ta sa uban nga nag-atubang ug bisan unsang matang sa pagsulay pinaagi sa paghupay nga atong nadawat sa Diyos.
“Hilak Uban sa mga Tawong Nanghilak”
14 Busa, dili ikatingala nga lisod ang pagpangitag mga pulong nga ikasulti sa mga nagbangotan. Bisan pa niana, ang Bibliya nag-ingon nga “ang dila sa mga maalamon makaayo.” (Prov. 12:18) Daghan ang nakakitag makapahupayng mga punto nga puwedeng ipaambit sa uban diha sa brosyur nga Sa Dihang ang Imong Minahal Mamatay. Pero sagad ang kinamaayohan nimong matabang mao ang ‘paghilak uban sa mga tawong nanghilak.’ (Roma 12:15) “Mga luha lang ang makapahayag sa akong pagbati,” miingon ang nabiyudang si Gaby. “Maong mahupayan ko dihang mohilak pod uban nako ang akong mga higala. Nianang mga panahona, dili ko mobating nag-inusara.”
Pagpangitag Espirituwal nga Bahandi
(2 Corinto 1:22) Siya nagbutang usab sa iyang selyo kanato ug naghatag kanato sa timaan sa kon unsay moabot, nga mao, ang espiritu, diha sa atong mga kasingkasing.
Mga Pangutana Gikan sa mga Magbabasa
Unsa ang “timaan” ug “timbre” nga nadawat sa matag dinihogang Kristohanon gikan sa Diyos?—2 Cor. 1:21, 22.
▪ Timaan: Sumala sa usa ka reperensiya, ang Gregong pulong nga gihubad ug “timaan” diha sa 2 Corinto 1:22 maoy “legal ug komersiyal nga termino” nga nagkahulogang “unang data, deposito, patinga, garantiya sa butang nga gipalit, ug busa naghatag ug legal nga katungod sa mipalit niana, o naghimong balido sa usa ka kontrata.” Maylabot sa mga dinihogan, ang bug-os nga bayad, o ganti, gihubit diha sa 2 Corinto 5:1-5 ingong pagsul-ob ug dili madunot nga langitnong lawas. Ang ganti naglakip usab sa pagkadawat sa gasa nga imortalidad.—1 Cor. 15:48-54.
Sa modernong Grego, ang susamang ekspresyon gigamit alang sa singsing nga kinuptanan. Kini maoy haom nga paghulagway niadtong mahimong bahin sa simbolikong asawa ni Kristo.—2 Cor. 11:2; Pin. 21:2, 9.
▪ Timbre: Kaniadto, ang timbre gigamit ingong pirma aron pamatud-an ang usa ka kasabotan, o ang pagpanag-iya o pagkatinuod sa usa ka butang. Maylabot sa mga dinihogan, sila “gitimbrehan,” o gimarkahan, sa balaang espiritu sa simbolikong paagi ingong gipanag-iya sa Diyos. (Efe. 1:13, 14) Hinunoa, ayha pa mahimong permanente ang timbre sa mga dinihogan sa hapit na silang mamatay nga matinumanon o sa dili pa magsugod ang dakong kasakitan.—Efe. 4:30; Pin. 7:2-4.
(2 Corinto 2:14-16) Apan salamat sa Diyos, nga kanunayng nanguna kanato diha sa parada sa kadaogan kauban ang Kristo ug nagsabwag sa alimyon sa kahibalo bahin kaniya pinaagi kanato diha sa tanang dapit! 15 Kay alang sa Diyos kita maoy humot nga alimyon sa Kristo taliwala niadtong ginaluwas ug taliwala niadtong nagpadulong sa kalaglagan; 16 sa mga nagpadulong sa kalaglagan usa ka alimyon sa kamatayon nga moresultag kamatayon, sa mga ginaluwas usa ka alimyon sa kinabuhi nga moresultag kinabuhi. Ug kinsa gayod ang kuwalipikado niining mga butanga?
Nahibalo Ka Ba?
Unsa ang anaa sa hunahuna ni apostol Pablo sa dihang naghisgot siya ug “parada sa kadaogan”?
▪ Si Pablo misulat: “[Ang] Diyos . . . nanguna kanato diha sa parada sa kadaogan kauban ni Kristo ug naghimo sa alimyon sa kahibalo kaniya nga daling mamatikdan pinaagi kanato diha sa tanang dapit! Kay alang sa Diyos kita maoy humot nga alimyon ni Kristo taliwala niadtong ginaluwas ug taliwala niadtong nagakalaglag; sa mga ulahi usa ka alimyon nga nagagikan sa kamatayon ngadto sa kamatayon, sa mga nauna usa ka alimyon nga nagagikan sa kinabuhi ngadto sa kinabuhi.”—2 Corinto 2:14-16.
Ang gitumong ni Pablo mao ang batasan sa mga Romano nga maghimog parada aron pasidunggan ang usa ka heneral sa iyang kadaogan batok sa mga kaaway. Ilang iparada ang mga butang nga inagaw, mga binihag, ug mga toro nga ihalad, samtang ang heneral ug ang iyang mga sundalo abibahon sa mga tawo. Pagkahuman sa parada, ang mga toro ihalad ug lagmit daghang piniriso ang pamatyon.
Ang pamulong nga “humot nga alimyon ni Kristo” nga nagkahulogang kinabuhi alang sa pipila ug kamatayon alang sa uban “lagmit gibase sa batasan sa mga Romano nga magsunog ug insenso samtang nagparada,” miingon ang The International Standard Bible Encyclopedia. “Ang alimyon nga nagsimbolo sa kalamposan sa mga mananaog nagpahinumdom sa mga binihag nga hapit na silang patyon.”
Pagbasa sa Bibliya
(2 Corinto 3:1-18) Kinahanglan ba namong ipailaila pag-usab ang among kaugalingon kaninyo? O sama sa pipila ka tawo, kinahanglan pa ba ming mohatag kaninyog mga sulat sa rekomendasyon o nanginahanglan ba mi niini gikan kaninyo? 2 Kamo mismo ang among sulat, nga nasulat sa among mga kasingkasing ug naila ug ginabasa sa tanang tawo. 3 Kay dayag nga kamo maoy sulat sa Kristo nga gisulat namo ingong mga ministro, nga nasulat dili pinaagig tinta kondili pinaagi sa espiritu sa buhing Diyos, dili diha sa papan nga mga bato kondili diha sa unodnong mga papan, diha sa mga kasingkasing. 4 Nabatonan namo kini nga matang sa pagsalig ngadto sa Diyos pinaagi sa Kristo. 5 Wala mi mag-ingon nga kuwalipikado mi sa paghimo niini nga buluhaton sa amo lang kaugalingon, apan ang among pagkakuwalipikado naggikan sa Diyos, 6 kinsa sa pagkatinuod naghimo kanamong kuwalipikado ingong mga ministro sa usa ka bag-ong pakigsaad, dili sa sinulat nga mga lagda, kondili sa espiritu; kay ang sinulat nga mga lagda maghukom ngadto sa kamatayon, apan ang espiritu maghatag ug kinabuhi. 7 Karon kon ang mga lagda nga nagpahamtang ug kamatayon ug gikulit diha sa mga bato gihatag uban ang dakong himaya nga tungod niana ang mga anak ni Israel dili makasud-ong sa nawong ni Moises tungod sa himaya sa iyang nawong, usa ka himaya nga wagtangon ra, 8 dili ba dunay mas dakong himaya ang paghatag sa espiritu? 9 Kay kon ang mga lagda nga nagpahamtang ug paghukom mahimayaon, labaw na nga mahimayaon ang pagpahamtang sa pagkamatarong! 10 Sa pagkatinuod, bisan ang mahimayaon kanhi nahukasan sa himaya tungod kay may himaya nga mas labaw pa niini. 11 Kay kon ang wagtangon ra gihatag uban ang himaya, nan ang nagpabilin makadawat ug mas dakong himaya! 12 Kay nabatonan namo ang dakong paglaom, kami may dakong kagawasan sa pagsulti, 13 ug wala magbuhat sa gibuhat ni Moises dihang gitaptapan niya ang iyang nawong aron ang mga anak ni Israel dili makasud-ong sa kataposan nianang wagtangon ra. 14 Apan ang ilang mga hunahuna nahabol. Kay hangtod niining adlawa, ang samang taptap wala gihapon matangtang dihang gibasa ang daang pakigsaad, kay kini makuha lang pinaagi sa Kristo. 15 Gani, hangtod niining adlawa dihang ginabasa ang mga basahon ni Moises, may taptap ang ilang kasingkasing. 16 Apan dihang ang usa modangop kang Jehova, ang taptap makuha. 17 Karon si Jehova maoy Espiritu, ug kon asa gani ang espiritu ni Jehova, dunay kagawasan. 18 Ug samtang walay taptap ang atong nawong ug gibanaag nato ang himaya ni Jehova samag salamin, kitang tanan ginausab ngadto sa samang larawan gikan sa usa ka sukod sa himaya ngadto sa lain, sumala gayod sa ginabuhat ni Jehova nga Espiritu.