Reperensiya Para sa Workbook sa Tigom nga Kinabuhi ug Ministeryo
Mayo 6-12
BAHANDI GIKAN SA PULONG SA DIYOS | 2 CORINTO 4-6
“Wala Mi Moundang”
(2 Corinto 4:16) Busa wala mi moundang, apan bisan kon ang among pagkatawo sa gawas nagkahugo, seguradong ang among pagkatawo sa sulod ginabag-o sa adlaw-adlaw.
Gikapoy Apan Dili Molunga
16 Siyempre, ang pag-atiman sa atong espirituwal nga kahimsog hinungdanon gayod. Kon kita adunay suod nga relasyon kang Jehova nga Diyos, kita tingali kapoyon sa pisikal, apan dili gayod kita kapoyon sa pagsimba kaniya. Si Jehova mao ang “naghatag ug gahom sa gikapoy; ug sa walay dinamikong kusog siya nagpadagaya sa bug-os nga gahom.” (Isaias 40:28, 29) Si apostol Pablo, kinsa nakasinati mismo sa pagkatinuod niining mga pulonga, misulat: “Wala kami moangka, apan bisan pa kon ang among pagkatawo sa gawas nagakahugo, tino nga ang among pagkatawo sa sulod ginabag-o sa adlaw-adlaw.”—2 Corinto 4:16.
17 Matikdi ang ekspresyong “sa adlaw-adlaw.” Kini nagpasabot nga pahimuslan nato ang mga tagana ni Jehova sa adlaw-adlaw. Usa ka misyonarya nga matinumanong nag-alagad sulod na sa 43 ka tuig kinahanglang moatubang ug mga yugto sa pisikal nga kakapoy ug pagkaluya sa buot. Apan wala siya molunga. Siya miingon: “Gibatasan nako ang pagbangon ug sayo aron nga sa dili pa magsugod ug bisan unsang trabaho, makagugol ako ug panahon sa pag-ampo kang Jehova ug pagbasa sa iyang Pulong. Kining adlaw-adlaw nga rutina nakatabang kanako sa paglahutay hangtod karon.” Sa pagkatinuod, makasalig kita sa nagapalig-ong gahom ni Jehova kon kita regular, oo “sa adlaw-adlaw” moampo kaniya ug mamalandong sa iyang hamiling mga hiyas ug sa iyang mga saad.
(2 Corinto 4:17) Kay bisan tuod ang kasakitan kadiyot lang ug gaan, kini magdala kanamog himaya nga hilabihan gayod ka dako ug walay kataposan;
Paglahutay
Hinungdanon usab nga dili gayod malimot sa Kristohanong paglaom, ang kinabuhing walay kataposan diin ang usa wala nay sala. Bisan pag ang usa patyon sa mga maglulutos dili gayod mahimong walay pulos kini nga paglaom. (Rom 5:4, 5; 1Te 1:3; Pin 2:10) Ang pag-antos sa pagkakaron mahimong balewala ra kon itandi sa katumanan sa maong dako nga paglaom. (Rom 8:18-25) Kon palandongon ang kinabuhing walay kataposan, ang bisan unsang pag-antos, bisan pag grabe kaayo sa kasamtangan, maoy “makadiyot lamang ug magaan.” (2Co 4:16-18) Sa dihang hinumdoman sa usa ka tawo nga ang mga pagsulay maoy temporaryo lamang ug huptan niya nga malig-on ang Kristohanong paglaom, malikayan niya ang sobrang pagkaguol ug ang pagkadili-matinumanon kang Jehova nga Diyos.
(2 Corinto 4:18) samtang gitutok namo ang among mga mata, dili sa mga butang nga makita, kondili sa mga butang nga dili makita. Kay ang mga butang nga makita lumalabay lang, apan ang mga butang nga dili makita walay kataposan.
Pagpangitag Espirituwal nga Bahandi
(2 Corinto 4:7) Hinuon, nabatonan namo kini nga bahandi diha sa mga sudlanang kulonon, aron ang gahom nga labaw sa kasarangan maggikan sa Diyos ug dili kanamo.
‘Pahimut-i si Jehova’
Si David Splane sa Nagamandong Lawas naghisgot niining Kasulatanhong tema. (2 Corinto 4:7) Unsa man ang bahandi? Kini ba kahibalo o kaalam? “Dili,” matod sa mamumulong. “Ang bahandi nga gihisgotan ni Pablo dinhi mao ang ‘ministeryo’ sa ‘pagpadayag sa kamatuoran.’” (2 Corinto 4:1, 2, 5) Gipahinumdoman ni Brader Splane ang mga estudyante nga ang lima ka bulan nga ilang gigugol sa pagtuon maoy pagpangandam alang sa linaing asaynment sa ministeryo. Kana maoy angay nilang pabilhan pag-ayo.
Gipatin-aw sa mamumulong nga ang “sudlanan nga kulonon” nagtumong sa atong lawas. Iyang gitandi ang sudlanang kulonon nianang gama sa bulawan. Ang mga sudlanang bulawan dili pirmeng gamiton. Sa laing bahin, ang mga sudlanang kulonon kanunayng gamiton. Kon kita magbutang ug bahandi sa sudlanang bulawan, mas mahatagan natog pagtagad ang sudlanan inay ang bahandi nga gisulod niini. “Dili ninyo buot nga kamo ang hatagag pagtagad sa mga tawo,” giingnan ni Brader Splane ang mga estudyante. “Ingong mga misyonaryo, buot ninyong danihon ang mga tawo ngadto kang Jehova. Kamo maoy mapainubsanong mga sudlanang kulonon.”
(2 Corinto 6:13) Busa mosulti ko samag ngadto sa akong mga anak, palihog buhata usab kana kanamo, buksi pag-ayo ang inyong kasingkasing.
Palaloma pa ang Inyong Inigsoong Gugma
7 Komosta sa atong bahin? Sa unsang paagi kita ‘makapasangkad’ sa pagpasundayag ug inigsoong gugma? Ang mga indibiduwal nga managsamag edad o kagikan dali ra tingaling magkasuod. Kadtong susamag mga hilig maylabot sa kalingawan subsob nga magkauban. Apan kon kadtong parehas natog gusto ang pirme na lang natong ikauban, kita kinahanglang “magpasangkad.” Maalamong suknaon nato ang atong kaugalingon: ‘Panagsa ra ba kong makig-partner ug sangyaw o makighugoy-hugoy sa mga igsoon nga dili nako suod? Diha sa Kingdom Hall, ako bang gilimitehan ang akong pagpakig-uban niadtong bag-ong nakig-uban sa kongregasyon tungod kay naghunahuna ko nga kinahanglan pa silang maningkamot aron mahimo ko nilang higala? Pareho ba nakong timbayahon ang mga tigulang ug ang mga batabata pa sa kongregasyon?’
Pagbasa sa Bibliya
(2 Corinto 4:1-15) Busa, kay nabatonan man namo kini nga ministeryo sumala sa kaluoy nga gipakita kanamo, kami wala moundang. 2 Apan among gibiyaan ang makauulaw ug malimbongong mga butang, nga wala magalakaw pinaagig lipatlipat o magtuis sa pulong sa Diyos; apan pinaagi sa pagpadayag sa kamatuoran, among girekomendar ang among kaugalingon ngadto sa konsensiya sa matag tawo atubangan sa Diyos. 3 Sa pagkatinuod, kon ang maayong balita nga among ginapahayag gitaptapan, kini gitaptapan taliwala niadtong mga nagpadulong sa kalaglagan, 4 taliwala kanilang ang diyos niini nga sistema sa mga butang nagbuta sa hunahuna sa mga dili magtutuo, aron nga ang kahayag sa mahimayaong maayong balita bahin sa Kristo, ang larawan sa Diyos, dili makadan-ag. 5 Kay kami nagawali, dili bahin sa among kaugalingon, kondili bahin kang Jesu-Kristo ingong Ginoo ug sa among kaugalingon ingong inyong mga ulipon tungod kang Jesus. 6 Kay ang Diyos mismo ang nag-ingon: “Mosidlak ang kahayag gikan sa kangitngit,” ug siya misidlak sa among kasingkasing aron madan-agan kini sa mahimayaong kahibalo sa Diyos pinaagi sa nawong sa Kristo. 7 Hinuon, nabatonan namo kini nga bahandi diha sa mga sudlanang kulonon, aron ang gahom nga labaw sa kasarangan maggikan sa Diyos ug dili kanamo. 8 Kami ginapiit pag-ayo sa tanang paagi, apan dili kay dili na makalihok; kami nangalibog, apan dili kay wala na gyoy kalingkawasan; 9 kami ginalutos, apan wala biyai; kami nangatumba, apan wala malaglag. 10 Ginaantos kanunay sa among lawas ang makamatay nga pagtratar nga giantos ni Jesus, aron ang kinabuhi ni Jesus madayag usab sa among lawas. 11 Kay bisag buhi mi, kanunay ming nag-atubang sa kamatayon tungod kang Jesus, aron ang kinabuhi ni Jesus madayag usab sa among may kamatayong lawas. 12 Busa bisag kanunay ming nag-atubang sa kamatayon, nagadala kinig kinabuhi kaninyo. 13 Karon kay kami dunay espiritu sa pagtuo nga sama nianang sa nasulat: “Duna koy pagtuo, busa misulti ko”; kami usab may pagtuo ug busa kami nagasulti, 14 nga nahibalo nga ang Usa nga nagbanhaw kang Jesus magbanhaw usab kanamo uban kang Jesus ug magpresentar kanamo uban kaninyo. 15 Kay kining tanang butang maoy alang kaninyo, aron nga mas daghan pang tawo ang makadawat sa dili hitupngang pagkamaayo sa Diyos kay nagkadaghan ang nagpasalamat kaniya. Pinaagi niana siya mahimaya.
Mayo 13-19
BAHANDI GIKAN SA PULONG SA DIYOS | 2 CORINTO 7-10
“Ang Atong Pagpanghatag ug Hinabang”
(2 Corinto 8:1-3) Karon gusto namong mahibalo mo, mga igsoon, bahin sa dili hitupngang pagkamaayo sa Diyos nga gipakita ngadto sa mga kongregasyon sa Macedonia. 2 Panahon sa dakong pagsulay ilalom sa kasakitan, ang kadako sa ilang kalipay ug ang ilang grabeng kakabos nagpadagaya sa ilang pagkamahinatagon. 3 Kay gihatag nila ang tanan nilang maarangan, oo, makapamatuod ko nga mas labaw pa kadto sa ilang maarangan,
“Gihigugma sa Diyos ang Usa ka Masayahong Maghahatag”
Una, gisultihan ni Pablo ang mga taga-Corinto labot sa mga taga-Macedonia, kansang pagsanong sa mga paningkamot sa paghatag ug hinabang maoy talagsaon. “Sa panahon sa usa ka dakong pagsulay ilalom sa kasakitan,” si Pablo misulat, “ang ilang kadagaya sa kangaya ug ang ilang hilabihang kakabos mipadagaya sa bahandi sa ilang kamahinatagon.” Ang mga taga-Macedonia dili kinahanglang itukmod. Sa kasukwahi, si Pablo nag-ingon nga “sila sa ilang kaugalingon padayong nagahangyo kanamo uban ang tumang pagpangaliyupo alang sa pribilehiyo sa malulotong pagpanghatag.” Ang masayahong pagkamahinatagon sa mga taga-Macedonia ilabinang talagsaon kon atong isipon nga sila mismo anaa sa “hilabihang kakabos.”—2 Corinto 8:2-4.
Ministeryo sa Paghatag ug Hinabang
MGA 46 C.E. niadto, ug dihay gutom sa Judea. Mahal kaayo ang mga prisyo sa pagkaon kay gamay rag suplay, mao nga dili makapalit ang Hudiyong mga tinun-an ni Kristo. Sila gipanggutom ug nameligrong kurawon. Pero hapit na ang proteksiyon ni Jehova sa paaging wala pa sukad masinati sa mga tinun-an ni Kristo. Unsay hapit nang mahitabo?
(2 Corinto 8:4) samtang sila mismo ang naghangyo namo nga ihatag kanila ang pribilehiyo sa mahigugmaong pagpanghatag, nga makigbahin sa pagpanghatag ug hinabang alang sa mga balaan.
Ministeryo sa Paghatag ug Hinabang
4 Sa iyang ikaduhang sulat sa mga taga-Corinto, gipatin-aw ni Pablo nga ang ministeryo sa mga Kristohanon may duha ka bahin. Bisag ang sulat ni Pablo maoy para sa dinihogang mga Kristohanon, ang iyang mga pulong maaplikar sab sa “ubang mga karnero” karon. (Juan 10:16) Usa ka bahin sa atong ministeryo ang “ministeryo sa pagpasig-uli,” ang buluhatong pagsangyaw ug paghimog tinun-an. (2 Cor. 5:18-20; 1 Tim. 2:3-6) Ang laing bahin mao ang pag-alagad para sa isigkamagtutuo. Gitawag kana ni Pablo nga ‘ministeryo sa pagpanghatag’ ug hinabang. (2 Cor. 8:4) Nianang duha ka ekspresyon, “ministeryo sa pagpasig-uli” ug ‘ministeryo sa pagpanghatag,’ ang pulong “ministeryo” gihubad gikan sa Gregong pulong nga di·a·ko·niʹa. Nganong makahuloganon kana?
5 Dihang gigamit ni Pablo ang usa ka pulong para sa duha ka kalihokan, iyang gigrupo ang paghatag ug hinabang uban sa laing matang sa ministeryo nga gihimo sa kongregasyon. Una pa niana, siya miingon: ‘Adunay nagkadaiyang mga pag-alagad [o, ministeryo], apan adunay mao ra nga Ginoo; ug adunay nagkadaiyang mga pagpalihok [o, buluhaton], apan gihimo sa usa ug mao ra nga espiritu.’ (1 Cor. 12:4-6, 11) Sa pagkatinuod, gikonektar ni Pablo ang nagkadaiyang ministeryo sa kongregasyon sa “sagradong pag-alagad.” (Roma 12:1, 6-8) Dili katingad-ang gibati niyang haom ang paggahig panahon “aron alagaran ang mga balaan”!—Roma 15:25, 26.
6 Gitabangan ni Pablo ang mga taga-Corinto nga masabtan kon nganong bahin sa ilang ministeryo ug pagsimba kang Jehova ang paghatag ug hinabang. Matikdi ang iyang pangatarongan: Mohatag ang mga Kristohanon ug hinabang kay sila “mapinasakopon sa maayong balita bahin kang Kristo.” (2 Cor. 9:13) Busa kay gustong mosunod sa mga pagtulon-an ni Kristo, ang mga Kristohanon motabang sa isigkamagtutuo. Miingon si Pablo nga ang ilang mga buhat sa kaluoy para sa mga igsoon nagpasundayag sa “labawng dili-takos nga kalulot sa Diyos.” (2 Cor. 9:14; 1 Ped. 4:10) Bahin sa pag-alagad sa nanginahanglang mga igsoon, apil ang paghatag ug hinabang, ang Bantayanang Torre sa Hunyo 1, 1976 miingon: “Dili gayod kita magduhaduha nga si Jehova nga Diyos ug iyang Anak si Jesu-Kristo tinuod nga nagpabili niining matanga sa pag-alagad.” Oo, ang paghatag ug hinabang maoy bililhong matang sa sagradong pag-alagad.—Roma 12:1, 7; 2 Cor. 8:7; Heb. 13:16.
(2 Corinto 9:7) Ipabuhat sa matag usa kon unsay gihukom sa iyang kasingkasing, dili kontragusto o pinugos, kay gihigugma sa Diyos ang nagahatag nga malipayon.
Pinansiyal nga Pagsuportar sa Buluhaton sa Gingharian
10 Una, mohatag kitag boluntaryong mga amot kay kita nahigugma kang Jehova ug gustong mobuhat sa “mga butang nga makapahimuot sa iyang mga mata.” (1 Juan 3:22) Si Jehova mahimuot gyod sa magsisimba nga kinasingkasing nga mohatag. Susihon nato ang giingon ni apostol Pablo bahin sa Kristohanong pagpanghatag. (Basaha ang 2 Corinto 9:7.) Ang matuod nga Kristohanon dili magduhaduha o pugson sa paghatag. Hinuon siya mohatag kay kini “gihukom diha sa iyang kasingkasing.” Sa ato pa, siya mohatag human mapamalandong nga may panginahanglan ug nga siya may ikatabang. Kana nga maghahatag gimahal ni Jehova, kay “gihigugma sa Diyos ang malipayong maghahatag.” Ang laing hubad nag-ingon: “Ang Diyos nahigugma sa mga tawo nga nahigugmang mohatag.”
Pagpangitag Espirituwal nga Bahandi
(2 Corinto 9:15) Salamat sa Diyos tungod sa iyang dili mahubit nga walay bayad nga gasa.
Gipalihok Ka ba sa “Dili-Mahubit nga Walay Bayad nga Gasa” sa Diyos?
2 Nahibalo si Pablo nga ang tanang nindot nga mga saad sa Diyos gigarantiyahan sa hingpit nga halad ni Kristo. (Basaha ang 2 Corinto 1:20.) Busa, ang “dili-mahubit nga walay bayad nga gasa” naglakip sa tanang kaayo ug maunongong gugma nga gipakita ni Jehova kanato pinaagi kang Jesus. Sa pagkatinuod, ang maong gasa kahibulongan kaayo nga dili kana mahubit sa paagi nga bug-os natong masabtan. Unsay angayng epekto kanato nianang talagsaong gasa? Ug sa unsang praktikal nga mga paagi nga kining maong gasa magpalihok kanato samtang mangandam kita sa pagsaulog sa Memoryal sa kamatayon ni Kristo sa Miyerkoles, Marso 23, 2016?
(2 Corinto 10:17) “Apan ang usa nga nagapanghambog, papanghamboga siya diha kang Jehova.”
Sayop ba nga Mahimong Mapasigarbohon?
Diha sa Kristohanon Gregong Kasulatan, ang berbong kau·khaʹo·mai, nga gihubad nga “magpasigarbo, maghugyaw, manghambog,” gigamit diha sa negatibo ug positibong diwa. Pananglitan, si Pablo miingon nga kita mahimong ‘maghugyaw, pinasukad sa paglaom sa himaya sa Diyos.’ Siya nagrekomendar usab: “Siya nga nagapanghambog, papanghamboga siya diha kang Jehova.” (Roma 5:2; 2 Corinto 10:17) Kini nagpasabot sa pagpasigarbo kang Jehova isip atong Diyos, usa ka pagbati nga mahimong motultol kanato sa paghugyaw tungod sa iyang maayong ngalan ug reputasyon.
Pagbasa sa Bibliya
(2 Corinto 7:1-12) Busa mga hinigugma, kay nabatonan man nato kini nga mga saad, hinloan nato ang atong kaugalingon sa tanang kahugawan sa unod ug espiritu, aron mahimo tang mas balaan samtang nahadlok ta sa Diyos. 2 Hatagi mi ninyog luna diha sa inyong kasingkasing. Wala miy gibuhatag sayop, wala miy gihimoag kadaot, wala miy gipahimuslan. 3 Wala nako kini isulti aron hukman mo. Kay giingon na nako kaniadto nga ania mo sa among kasingkasing, mamatay man kita o mabuhi. 4 Duna koy dakong kagawasan sa pagsulti kaninyo. Gipanghambog mo nako pag-ayo. Napuno ko sa paghupay; hilabihan ang akong kalipay sa tanan namong kasakitan. 5 Sa pagkatinuod, dihang miabot mi sa Macedonia, wala mi makabatog kahupayan, apan padayon ming gisakit sa tanang paagi—dihay mga panag-away sa gawas, mga kahadlok sa sulod. 6 Apan ang Diyos, kinsa nagahupay niadtong mga magul-anon, naghupay kanamo pinaagi sa presensiya ni Tito; 7 apan dili lang pinaagi sa iyang presensiya, kondili pinaagi usab sa paghupay nga iyang nadawat tungod kaninyo. Gisultihan mi niya nga gusto ko ninyong makita, nga naguol mo pag-ayo, ug nabalaka mo pag-ayo kanako; maong mas nalipay ko. 8 Kay bisan kon napasubo mo nako pinaagi sa akong sulat, wala ko magmahay niini. Bisan kon sa sinugdan nagmahay ko niini (kay nakita nako nga ang sulat nakapasubo kaninyo, bisag kadiyot lang), 9 karon ako nalipay, dili kay basta lang nasubo mo, kondili kay nasubo mo nga miresultag paghinulsol. Kay nasubo mo sa paaging nakapalipay sa Diyos, mao nga wala mo makaagom ug kadaot tungod namo. 10 Kay ang kasubo nga makapalipay sa Diyos moresultag paghinulsol nga motultol sa kaluwasan, nga dili kamahayan; apan ang kasubo sa kalibotan moresultag kamatayon. 11 Kay tan-awa kon unsa ka dako ang epekto kaninyo sa inyong kasubo nga nakapalipay sa Diyos, oo, paghinlo sa inyong kaugalingon, oo, kasuko, oo, kahadlok, oo, sinserong tinguha, oo, kadasig, oo, pagtul-id sa sayop! Sa tanang paagi inyong gipasundayag nga putli mo niining butanga. 12 Bisan tuod misulat ko kaninyo, wala nako ni gibuhat alang sa nakahimog sayop o sa gihimoan ug sayop, apan aron ang inyong tinuod nga pagkamasinugtanon kanamo madayag taliwala kaninyo atubangan sa Diyos.
Mayo 20-26
BAHANDI GIKAN SA PULONG SA DIYOS | 2 CORINTO 11-13
“‘Tunok sa Unod’ ni Pablo”
(2 Corinto 12:7) tungod lang kay nakadawat ko niining talagsaong mga pinadayag. Aron dili ko manghambog pag-ayo, gihatagan kog tunok sa unod, nga samag anghel ni Satanas nga kanunayng nagsagpa nako, aron dili ko manghambog pag-ayo.
Gamhanan Bisag May mga Kahuyangan
Ang laing matinumanong alagad sa Diyos mihangyo kang Jehova nga kuhaon ang iyang “tunok sa unod,” usa ka problema nga padayong naghasol kaniya. Katulo mihangyo si apostol Pablo sa Diyos nga makalingkawas unta siya sa maong pagsulay. Wala kita mahibalo kon unsa kadto, apan sama sa usa ka tunok, kadto mahimong makawala sa kalipay ni Pablo sa pag-alagad kang Jehova. Sumala pa niya, daw kanunay siyang gisagpa. Agig tubag, si Jehova miingon kaniya: “Ang akong dili-takos nga kalulot igo na alang kanimo; kay ang akong gahom ginahingpit diha sa kaluyahon.” Wala kuhaa ni Jehova ang maong tunok sa unod. Kinahanglang antoson kana ni Pablo. Bisan pa niana, siya miingon: “Sa dihang ako maluya, ako gamhanan hinuon.” (2 Cor. 12:7-10) Unsay buot niyang ipasabot?
(2 Corinto 12:8, 9) Katulo ko mihangyo sa Ginoo bahin niini, nga mawala na unta kini kanako. 9 Apan siya miingon kanako: “Igo na kanimo ang akong dili hitupngang pagkamaayo, kay mas kusgan ang akong gahom dihang huyang ka.” Busa malipayon kaayo kong manghambog bahin sa akong mga kahuyangon, aron ang gahom sa Kristo magpabilin kanako nga samag tolda.
Si Jehova Nagahatag ug “Balaang Espiritu Niadtong Nagapangayo Kaniya”
17 Ingong tubag sa mga pag-ampo ni Pablo giingnan siya sa Diyos: “Ang akong dili-takos nga kalulot igo na alang kanimo; kay ang akong gahom ginahingpit diha sa kaluyahon.” Si Pablo miingon: “Busa, sa tumang kalipay ako manghambog hinuon bahin sa akong mga kaluyahon, aron ang gahom ni Kristo mahimong samag tolda nga magpabilin ibabaw kanako.” (2 Corinto 12:9; Salmo 147:5) Busa, naeksperyensiyahan ni Pablo nga pinaagi kang Kristo, ang gamhanang panalipod sa Diyos gibuklad ibabaw kaniya samag usa ka tolda. Sa pagkakaron, si Jehova nagatubag sa atong mga pag-ampo sa samang paagi. Iyang gibuklad ang iyang panalipod samag usa ka tolda ibabaw sa iyang mga alagad.
18 Siyempre, ang usa ka tolda dili makapugong sa pagbundak sa ulan o sa paghuros sa hangin, apan kini nagtaganag igong proteksiyon batok nianang maong mga elemento. Sa samang paagi, ang tolda nga gitagana pinaagi sa “gahom ni Kristo” dili mosanta sa mga pagsulay o mga kalisdanan nga modangat kanato. Bisan pa niana, kini maghatag ug espirituwal nga panalipod batok sa makadaot nga mga elemento niining kalibotana ug sa mga pag-atake sa magmamando niini, si Satanas. (Pinadayag 7:9, 15, 16) Busa, bisan pag nagsagubang ka ug pagsulay nga dili ‘mobiya kanimo,’ makaseguro ka nga si Jehova nahibalo sa imong pagpakigbisog ug siya misanong sa “tingog sa imong pagtuaw.” (Isaias 30:19; 2 Corinto 1:3, 4) Si Pablo misulat: “Ang Diyos kasaligan, ug dili niya itugot nga tentalon kamo nga labaw sa inyong maantos, apan uban sa tentasyon siya usab magtaganag kalingkawasan aron kamo makahimo sa pag-antos niini.”—1 Corinto 10:13; Filipos 4:6, 7.
(2 Corinto 12:10) Busa nalipay ko sa mga kahuyangon, sa mga panginsulto, sa mga panahon sa panginahanglan, sa mga paglutos ug kalisdanan, alang sa Kristo. Kay dihang huyang ko, gamhanan hinuon ko.
“Siya Naghatag ug Gahom sa Gikapoy”
8 Basaha ang Isaias 40:30. Bisag daghan tingali tag katakos, limitado ra ang atong mahimo sa kaugalingon natong kusog. Butang kana nga angay natong makat-onan. Bisag may katakos si apostol Pablo, siya may mga limitasyon nga nakapugong niya sa pagbuhat sa tanang gusto niyang buhaton. Dihang gisulti niya sa Diyos ang iyang gibati, siya giingnan: “Ang akong gahom ginahingpit diha sa kaluyahon.” Nasabtan ni Pablo ang punto. Siya miingon: “Dihang ako maluya, ako gamhanan hinuon.” (2 Cor. 12:7-10) Unsa may iyang gipasabot?
9 Nahibalo si Pablo nga limitado lang ang iyang mahimo kon walay tabang sa Diyos. Ang balaang espiritu sa Diyos makahatag sa kusog nga gikinahanglan ni Pablo. Dili kay kana ra. Ang espiritu sa Diyos makatabang kang Pablo sa paghimo sa mga butang nga dili niya mapalampos sa iyang kaugalingong kusog. Mao man usab kanato. Kon hatagan ta ni Jehova ug kusog, molig-on gyod ta!
Pagpangitag Espirituwal nga Bahandi
(2 Corinto 12:2-4) Duna koy nailhang tawo nga nahiusa sa Kristo. Ug 14 ka tuig kanhi siya gisakgaw ngadto sa ikatulong langit—kon diha ba sa lawas o gawas sa lawas wala ko mahibalo, apan ang Diyos nahibalo. 3 Oo, nakaila ko sa maong tawo—kon diha ba sa lawas o bulag sa lawas wala ko mahibalo, apan ang Diyos nahibalo— 4 nga gisakgaw ngadto sa paraiso ug nakadungog ug mga pulong nga dili angayng isulti ug dili subay sa balaod nga isulti sa tawo.
Mga Pangutana Gikan sa mga Magbabasa
Ang “ikatulong langit” nga gihisgotan sa 2 Corinto 12:2 lagmit mao ang Mesiyanikong Gingharian ubos sa pagmando ni Jesu-Kristo ug sa 144,000, ang “bag-ong mga langit.”—2 Ped. 3:13.
Kini ang “ikatulong langit” kay ang Gingharian maoy kinalabwan ug binayaw kaayong klase sa pagmando.
Ang “paraiso” diin si Pablo “gisakgaw” diha sa panan-awon lagmit nagtumong sa (1) pisikal nga Paraiso sa yuta sa umaabot, (2) espirituwal nga paraiso nga matagamtam sa umaabot, nga mas dako kay sa espirituwal nga paraiso nga natagamtam karon, ug (3) “paraiso sa Diyos” sa langit panahon sa bag-ong kalibotan.
(2 Corinto 11:23-27) Ministro ba sila sa Kristo? Labaw na gyod ko. Mosulti ko nga samag buang: Mas daghan kog gibuhat, mas kadaghan kong nabilanggo, nag-antos kog daghang pagbunal, ug kadaghan kong hapit mamatay. 24 Kalima ko nakadawat ug 39 ka hampak gikan sa mga Hudiyo, 25 katulo ko gibunalan, kausa ko gibato, katulo ko nakasinatig pagkalunod, usa ka gabii ug usa ka adlaw ko sa lawod; 26 sa daghan nakong panaw, nakasinati kog kapeligrohan sa mga suba, sa mga tulisan, sa kaugalingon nakong katawhan, sa kanasoran, sa siyudad, sa kamingawan, sa dagat, sa taliwala sa dili tinuod nga mga igsoon. 27 Nakasinati sab kog kahago ug kabudlay, daghang gabiing walay tulog, kagutom ug kauhaw, kanunay kong walay kaon, ug nakasinati kog katugnaw ug walay igong sinina.
Atubanga ang mga Kalisdanan Uban ang Kaisog
7 Tagda usab ang ehemplo ni apostol Pablo. Nakasinati siyag ‘kapeligrohan diha sa siyudad, sa kamingawan, ug sa dagat.’ Naghisgot siyag ‘kagutom ug kauhaw, katugnaw ug kahubo.’ Katulo siya nakasakayg barko nga nalunod, nga kas-a migugol ug ‘usa ka gabii ug usa ka adlaw diha sa lawod.’ (2 Cor. 11:23-27) Bisan pa niining tanan, maayo gihapon ang iyang tinamdan. Sa usa ka higayon nga hapit siyang mamatay, siya miingon: “Kini aron kami magasalig, dili sa among kaugalingon, kondili sa Diyos nga nagabangon sa mga patay. Gikan sa ingon ka dakong butang sama sa kamatayon siya nagluwas kanamo ug magluwas kanamo.” (2 Cor. 1:8-10) Dili tanan ang nakaeksperyensiya sa mga nasinatian ni Pablo. Apan daghan kanato ang nakasabot sa iyang gibati ug nadasig sa iyang kaisog.
Pagbasa sa Bibliya
(2 Corinto 11:1-15) Hinaot nga mapasensiyahan ko ninyo bisag daw dili ko makataronganon. Apan, sa pagkatinuod, ginapasensiyahan na ko ninyo! 2 Kay ang akong pagtagad kaninyo sama sa pagtagad nga iya sa Diyos, kay gisaad mo nako sa kaminyoon ngadto sa usa ka bana, sa Kristo, ug gusto mo nakong ipresentar kaniya ingong ulay. 3 Apan nahadlok ko nga sa unsa mang paagi, sama nga ang halas nagdaldal kang Eva pinaagi sa lipatlipat niini, basig ang inyong kaisipan mapahisalaag gikan sa kasinsero ug kaputli nga angay sa Kristo. 4 Kay sa pagkatinuod, dali ra mong modawat kon dunay moabot ug magwali ug Jesus nga lahi kay sa usa nga among giwali, o modawat ug espiritu nga lahi kay sa inyong nadawat, o modawat ug maayong balita nga lahi kay sa inyong nadawat. 5 Kay giisip nako nga dili ko ubos kay sa inyong maayong laki nga mga apostoles bisan sa usa ka butang. 6 Apan bisan kon dili ko batid sa pagsulti, seguradong dili ko ingon niana maylabot sa kahibalo; sa pagkatinuod gipakita namo kana kaninyo sa tanang paagi ug sa tanang butang. 7 O nakasala ba ko kay gipaubos nako ang akong kaugalingon aron mabayaw mo, kay malipayon nakong gipahayag kaninyo nga walay bayad ang maayong balita sa Diyos? 8 Ang ubang mga kongregasyon gihikawan nako pinaagi sa pagdawat ug mga tagana aron maalagaran mo. 9 Apan dihang uban ko kaninyo ug nanginahanglan ko, wala ko magpabug-at kang bisan kinsa, kay ang mga igsoong nangabot gikan sa Macedonia madagayaong nagtagana sa akong mga panginahanglan. Oo, sa tanang paagi wala gyod ko magpabug-at kaninyo ug padayon nako kining buhaton. 10 Hangtod nga anaa kanako ang kamatuoran sa Kristo, dili nako undangon kini nga pagpanghambog diha sa mga rehiyon sa Acaya. 11 Unsa may rason? Tungod ba kay wala ko mahigugma ninyo? Nahibalo ang Diyos nga gihigugma mo nako. 12 Apan dihay pipila nga nanghambog ug nag-ingon nga mga apostoles sila sama namo. Busa ipadayon nako ang akong ginabuhat aron dili sila makabaton ug bisan unsang rason sa pagpanghambog. 13 Kay ang maong mga tawo bakak nga mga apostoles, nga nanglimbong sa uban ug nagpakaaron-ingnong mga apostoles sa Kristo. 14 Ug dili kini ikatingala, kay si Satanas kanunayng nagpakaaron-ingnong anghel sa kahayag. 15 Busa dili ikatingala kon ang iyang mga ministro usab kanunayng magpakaaron-ingnong ministro sa pagkamatarong. Apan ang ilang kataposan maoy sumala unya sa ilang binuhatan.
Mayo 27–Hunyo 2
BAHANDI GIKAN SA PULONG SA DIYOS | GALACIA 1-3
“Giprangkahan Nako Siya”
(Galacia 2:11-13) Apan dihang miadto si Cefas sa Antioquia, giprangkahan nako siya, kay klaro nga sayop siya. 12 Kay sa wala pa moabot ang mga tawo nga gipadala ni Santiago, siya mikaon uban sa mga tawo sa kanasoran; apan pag-abot nila, siya wala na makig-uban nila ug nagpalayo, kay nahadlok sa mga tinuli. 13 Ang ubang Hudiyo misunod sab niya sa pagpakaaron-ingnon, mao nga bisan si Bernabe nadala sa ilang pagpakaaron-ingnon.
Ang Imo Bang Panglantaw sa Hustisya Sama Nianang Kang Jehova?
16 Basaha ang Galacia 2:11-14. Si Pedro nagpadaog sa kahadlok sa tawo. (Prov. 29:25) Bisag nahibalo siya mismo sa panghunahuna ni Jehova, nahadlok si Pedro sa opinyon sa tinuling mga Hudiyo nga membro sa kongregasyon sa Jerusalem. Si apostol Pablo, nga presente sab sa miting sa Jerusalem niadtong 49 C.E., nagbadlong kang Pedro didto sa Antioquia tungod sa pagkasalingkapaw niini. (Buh. 15:12; Gal. 2:13) Unsay buhaton sa Kristohanong mga Hentil nga direktang naapektohan sa nahimong inhustisya ni Pedro? Mapandol ba sila? Matangtangan bag pribilehiyo si Pedro tungod sa maong sayop?
(Galacia 2:14) Apan dihang nakita nako nga sila wala maglakaw subay sa kamatuoran sa maayong balita, gisultihan nako si Cefas atubangan nilang tanan: “Kon ikaw, bisan tuod Hudiyo, nagkinabuhi nga sama sa kanasoran ug dili sama sa mga Hudiyo, nganong pugson man nimo ang mga tawo sa kanasoran nga magkinabuhi sumala sa nabatasan sa mga Hudiyo?”
“Walay Kapandolan” sa mga Nahigugma Kang Jehova
12 Si Pedro nagpadaog sa kahadlok sa tawo, ug dihay mga higayon nga grabe ang iyang pagkapandol. Apan padayon siyang nagmaunongon kang Jesus ug kang Jehova. Pananglitan, iyang gilimod ang iyang Agalon dili lang kausa, apan tulo ka beses. (Luc. 22:54-62) Sa laing higayon, si Pedro wala mogawi ingong Kristohanon. Iyang gitratar ang mga Hentil nga Kristohanon nga daw mas ubos sa tinuling mga Hudiyo nga Kristohanon. Apan nakita ni Pablo nga kini maoy pagpihigpihig, ug dili angayng mahitabo sulod sa kongregasyon. Sayop ang tinamdan ni Pedro. Aron dili makadaot sa panag-igsoonay, gibadlong ni Pablo si Pedro. (Gal. 2:11-14) Natandog ba ang garbo ni Pedro ug miundang sa lumba alang sa kinabuhi? Wala. Iyang gipamalandong ang tambag ni Pablo, gipadapat kini, ug nagpadayon sa lumba.
Pagpangitag Espirituwal nga Bahandi
(Galacia 2:20) Ako gilansang sa estaka uban sa Kristo. Dili na ako ang nagkinabuhi, kondili ang Kristo na ang nagkinabuhi nga nahiusa kanako. Busa karon ako nagkinabuhi sumala sa akong pagtuo sa Anak sa Diyos, kinsa nahigugma nako ug nagtugyan sa iyang kaugalingon alang kanako.
Magmaunongon sa Diyos Bisan pa sa “Daghang Kasakitan”
20 Komosta ang bahin sa dili direktang mga pag-atake? Pananglitan, sa unsang paagi nato mabuntog ang pagkaluya sa buot? Ang usa sa labing epektibong paagi sa pagbuntog niana mao ang pagpamalandong sa lukat. Mao kanay gihimo ni apostol Pablo. Usahay mibati siyang alaot. Apan nahibalo siya nga si Kristo namatay, dili alang sa hingpit nga mga tawo, kondili alang sa mga makasasala nga sama kaniya. Siya misulat: ‘Nagkinabuhi ako pinaagi sa pagtuo sa Anak sa Diyos, kinsa nahigugma kanako ug nagtugyan sa iyang kaugalingon alang kanako.’ (Gal. 2:20) Oo, gidawat ni Pablo ang lukat. Iyang giila nga ang lukat mapadapat kaniya.
21 Ang susamang panglantaw—ang pag-isip sa lukat ingong personal nga gasa gikan kang Jehova—makatabang gayod kanimo. Wala kini magpasabot nga mawala dayon ang pagkaluya sa buot. Gani, ang pipila kanato kinahanglan tingaling makigbisog niining dili direktang pag-atake hangtod sa bag-ong kalibotan. Apan hinumdomi: Ang ganti madawat niadtong dili mosurender. Mas nagkaduol na kita sa mahimayaong adlaw dihang ang Gingharian sa Diyos magpatunghag kalinaw ug magpasig-uli sa tanang matinumanong katawhan ngadto sa kahingpitan. Magmadeterminado nga makasulod niana nga Gingharian—bisan pa sa daghang kasakitan.
(Galacia 3:1) Oh mga taga-Galacia nga kulag pagsabot! Kinsay naglimbong ninyo, bisag tin-aw nang gipasabot kaninyo ang paglansang kang Jesu-Kristo sa estaka?
Galacia, Sulat Ngadto sa Mga Taga-
Ang gipatugbaw ni Pablo nga, “Oh walay salabotan nga mga taga-Galacia,” wala magpamatuod nga siya nagtumong lamang sa usa ka etnikong katawhan nga naggikan sa kaliwat nga Gallic sa amihanang bahin sa Galacia. (Gal 3:1) Hinunoa, si Pablo nagbadlong sa pipila diha sa mga kongregasyon didto tungod kay sila mitugot nga maimpluwensiyahan sa mga magtutuo sa Judaismo sa ilang taliwala, mga Hudiyo nga misulay sa pag-establisar sa ilang kaugalingong pagkamatarong pinaagi sa Moisesnong kahikayan puli sa ‘pagkamatarong tungod sa pagtuo’ nga gitagana sa bag-ong pakigsaad. (2:15–3:14; 4:9, 10) Labot sa rasa, ang “mga kongregasyon sa Galacia” (1:2) nga gisulatan ni Pablo maoy nagkasagol nga mga Hudiyo ug mga dili-Hudiyo, ug ang naulahi maoy tinuli nga mga kinabig ug dili-tinuli nga mga Hentil, ug walay duhaduha nga ang pipila maoy gikan sa kaliwat nga Celtic. (Buh 13:14, 43; 16:1; Gal 5:2) Silang tanan sa katibuk-an, gitawag nga mga Kristohanon sa Galacia tungod kay ang dapit nga ilang gipuy-an gitawag man ug Galacia. Ang katibuk-ang diwa sa sulat nagpakita nga si Pablo nagsulat ngadto sa mga nailhan na niya pag-ayo sa habagatang bahin niini nga Romanhong lalawigan, dili ngadto sa mga dili gayod niya kaila nga nagpuyo sa amihanang bahin, nga dayag wala gayod niya maduaw.
Pagbasa sa Bibliya
(Galacia 2:11-21) Apan dihang miadto si Cefas sa Antioquia, giprangkahan nako siya, kay klaro nga sayop siya. 12 Kay sa wala pa moabot ang mga tawo nga gipadala ni Santiago, siya mikaon uban sa mga tawo sa kanasoran; apan pag-abot nila, siya wala na makig-uban nila ug nagpalayo, kay nahadlok sa mga tinuli. 13 Ang ubang Hudiyo misunod sab niya sa pagpakaaron-ingnon, mao nga bisan si Bernabe nadala sa ilang pagpakaaron-ingnon. 14 Apan dihang nakita nako nga sila wala maglakaw subay sa kamatuoran sa maayong balita, gisultihan nako si Cefas atubangan nilang tanan: “Kon ikaw, bisan tuod Hudiyo, nagkinabuhi nga sama sa kanasoran ug dili sama sa mga Hudiyo, nganong pugson man nimo ang mga tawo sa kanasoran nga magkinabuhi sumala sa nabatasan sa mga Hudiyo?” 15 Kita nga natawong mga Hudiyo, ug dili mga makasasala gikan sa kanasoran, 16 nahibalo nga ang tawo ipahayag nga matarong, dili pinaagi sa pagtuman sa balaod, kondili pinaagi lamang sa pagtuo kang Jesu-Kristo. Busa mituo kita kang Kristo Jesus, aron kita ikapahayag nga matarong pinaagi sa atong pagtuo sa Kristo ug dili pinaagi sa pagtuman sa balaod, kay walay bisan kinsa nga ipahayag nga matarong pinaagi sa pagtuman sa balaod. 17 Karon kon kita nakaplagan nga makasasala tungod sa atong tinguha nga ipahayag nga matarong pinaagi sa Kristo, ang Kristo ba nagdasig nato sa pagpakasala? Wala gayod! 18 Kon tukoron nako pag-usab ang mga butang nga ako nang gitumpag, akong gipakita nga malinapason ko sa balaod. 19 Kay pinaagi sa balaod ako namatay sa balaod, aron mabuhi ko para sa Diyos. 20 Ako gilansang sa estaka uban sa Kristo. Dili na ako ang nagkinabuhi, kondili ang Kristo na ang nagkinabuhi nga nahiusa kanako. Busa karon ako nagkinabuhi sumala sa akong pagtuo sa Anak sa Diyos, kinsa nahigugma nako ug nagtugyan sa iyang kaugalingon alang kanako. 21 Wala nako isalikway ang dili hitupngang pagkamaayo sa Diyos, kay kon pinaagi pa sa balaod nga ang tawo ipahayag nga matarong, walay kapuslanan ang kamatayon sa Kristo.