Reperensiya Para sa Workbook sa Tigom nga Kinabuhi ug Ministeryo
Disyembre 2-8
BAHANDI GIKAN SA PULONG SA DIYOS | PINADAYAG 7-9
“Dili Maihap nga Dakong Panon Gipanalanginan ni Jehova”
(Pinadayag 7:9) Human niini nakita nako, ug tan-awa! usa ka dakong panon, nga walay tawong makaihap, gikan sa tanang kanasoran ug tribo ug katawhan ug pinulongan, nga nagbarog atubangan sa trono ug atubangan sa Kordero, nga nagsul-ob ug puting tag-as nga mga besti; ug dihay mga palwa sa palma sa ilang mga kamot.
Dakong Panon
Kini magpatungha sa pangutana: Kon ang “dakong panon” maoy mga tawo nga makabatog kaluwasan ug magpabilin sa yuta, sa unsang paagi sila ikaingon nga ‘nagbarog sa atubangan sa trono sa Diyos ug sa atubangan sa Kordero’? (Pin 7:9) Ang posisyon nga ‘pagbarog’ usahay gigamit sa Bibliya aron ipaila ang pagbaton ug pinaboran o inuyonang posisyon sa panan-aw sa usa kansang presensiya nagabarog ang indibiduwal o pundok. (Sal 1:5; 5:5; Pr 22:29, AT; Luc 1:19) Ngani, sa gisundan niini nga kapitulo sa Pinadayag, “ang mga hari sa yuta ug ang mga taas-ug-ranggo ug ang mga komandante militar ug ang mga dato ug ang mga kusgan ug ang tanang ulipon ug ang tanang tawong gawasnon” gihubit nga nanago “gikan sa nawong sa Usa nga naglingkod sa trono ug gikan sa kapungot sa Kordero, tungod kay ang dakong adlaw sa ilang kapungot nahiabot na, ug kinsay arang makabarog?” (Pin 6:15-17; itandi ang Luc 21:36.) Nan mopatim-aw nga ang “dakong panon” naglangkob sa mga tawo nga matipigang buhi nianang panahon sa kapungot ug makahimo sa ‘pagbarog’ ingong inuyonan sa Diyos ug sa Kordero.
(Pinadayag 7:14) Busa miingon dayon ko kaniya: “Akong ginoo, ikaw ang nahibalo.” Ug siya miingon kanako: “Kini sila ang nakalabang sa dakong kasakitan, ug ilang gilabhan ang ilang tag-as nga besti ug gipaputi kini sa dugo sa Kordero.
Kasakitan
Halos tulo ka dekada human malaglag ang Jerusalem, si apostol Juan, sa paghisgot sa usa ka dakong panon sa mga tawo gikan sa tanang kanasoran, mga tribo, ug mga katawhan, gisultihan: “Mao kini sila ang nakalabang sa dakong kasakitan.” (Pin 7:13, 14) Sayo pa niini, si apostol Juan nakakitag “upat ka manulonda” nga nagpugong sa malaglagong mga hangin aron makompleto ang pagtimbre sa 144,000 ka ulipon sa Diyos. Kini nga pagtimbre dayag nga nalangkit sa ‘pagtigom sa mga pinili’ nga gitagna ni Jesus. (Mat 24:31) Busa, ang kataposang malaglagong kasuko sa “dakong kasakitan” moabot gayod human matigom ang mga pinili ug makompleto ang pagtimbre kanila ug sa dihang buhian na sa upat ka manulonda ang upat ka hangin aron mohuyop sa yuta, sa dagat, ug sa mga kahoy. (Pin 7:1-4) Ang kamatuoran nga ang usa ka dakong panon “nakalabang sa dakong kasakitan” nagpakita nga sila nakalingkawas niana. Kini gipamatud-an sa susamang ekspresyon diha sa Buhat 7:9, 10: “Ang Diyos nag-uban [kang Jose], ug siya nagluwas kaniya sa tanan niyang mga kasakitan.” Ang pagkaluwas ni Jose gikan sa tanan niyang mga kasakitan nagkahulogan nga dili lamang siya nakalahutay niini kondili nakalingkawas usab siya sa mga kasakit nga iyang nasinatian.
(Pinadayag 7:15-17) Mao kiniy hinungdan kon nganong anaa sila sa atubangan sa trono sa Diyos, ug sila naghatag kaniyag sagradong pag-alagad adlaw ug gabii diha sa iyang templo; ug ang Usa nga naglingkod sa trono magbuklad sa iyang tolda ibabaw kanila. 16 Sila dili na gyod gutomon o uhawon, ug dili na sila mag-antos tungod sa adlaw o sa bisan unsang makapagbang kainit, 17 kay ang Kordero, nga anaa sa taliwala sa trono, magbantay kanila ug magtultol kanila ngadto sa mga tubod sa mga tubig sa kinabuhi. Ug pahiran sa Diyos ang matag luha sa ilang mga mata.”
Dakong Panon
Ang Ilang Identipikasyon. Ang yawi aron mailhan ang “dakong panon” makaplagan diha sa kahubitan bahin kanila sa Pinadayag kapitulo 7 ug diha sa susamang mga teksto. Gihisgotan sa Pinadayag 7:15-17 nga ang Diyos ‘nagbuklad sa iyang tolda sa ibabaw nila,’ nga sila gitultolan ngadto sa “mga tuboran sa mga tubig sa kinabuhi,” ug nga ang Diyos nagpahid sa “tanang luha gikan sa ilang mga mata.” Sa Pinadayag 21:2-4 atong makaplagan ang susamang mga pahayag: “Ang tolda sa Diyos anaa uban sa mga tawo,” iyang “pagapahiran ang tanang luha gikan sa ilang mga mata,” ug ang “kamatayon mawala na.” Ang panan-awon nga gipresentar niini nga mga teksto maoy mahitungod sa mga tawo nga wala sa langit, diin naggikan ang ‘Bag-ong Jerusalem nga nanaog,’ apan sa mga tawo nga ania sa yuta, taliwala sa katawhan.
Pagpangitag Espirituwal nga Bahandi
(Pinadayag 7:1) Human niini nakakita kog upat ka anghel diha sa upat ka suok sa yuta, nga nagpugong pag-ayo sa upat ka hangin sa yuta, aron walay hanging mohuyop sa yuta o sa dagat o sa bisan unsang kahoy.
Pagtimbre sa Israel sa Diyos
4 Walay duhaduha nga kining upat ka manulonda naghawas sa upat ka grupo sa mga manulonda, nga gigamit ni Jehova sa pagpugong sa paghukom hangtod sa tinudlong panahon. Dako gayod ang mahitabong kalaglagan sa dihang buhian na sa mga manulonda ang mga hangin sa kasuko sa Diyos nga dungang mohuros gikan sa amihanan, habagatan, sidlakan, ug kasadpan. Kini mahimong kaamgid, apan sa dako kaayong gilapdon, sa paggamit ni Jehova sa upat ka hangin sa pagpatibulaag sa karaang mga Elamihanon, sa paglaglag ug pagpatay kanila. (Jeremias 49:36-38) Kini mahimong usa ka dako kaayong bagyo nga labi pang malaglagon kay sa “bagyo” nga gipahinabo ni Jehova sa paglaglag sa nasod sa Ammon. (Amos 1:13-15) Walay bahin sa organisasyon ni Satanas sa yuta ang makabarog sa adlaw sa kasuko ni Jehova, sa dihang bayawon na niya ang iyang pagkasoberano hangtod sa kahangtoran.—Salmo 83:15, 18; Isaias 29:5, 6.
(Pinadayag 9:11) Sila dunay hari, ang anghel sa kahiladman. Sa Hebreohanon ang iyang ngalan Abaddon, apan sa Grego siya ginganlag Apollyon.
Abaddon
Si Abaddon, ang manulonda sa kahiladman—kinsa siya?
Apan, sa Pinadayag 9:11 ang pulong nga “Abaddon” gigamit ingong ngalan sa “manulonda sa kahiladman.” Ang katumbas nga Gregong ngalan nga Apollyon nagkahulogang “Tiglaglag.” Sa ika-19 nga siglo dihay mga pagpaningkamot aron ipakita nga kining tekstoha matagnaong nagtumong sa mga indibiduwal sama kang Emperador Vespasian, Muhammad, ug bisan kang Napoleon, ug kini nga manulonda giisip sa kadaghanan ingong “sataniko.” Apan, angayng matikdan nga sa Pinadayag 20:1-3 ang manulonda nga may “yawi sa kahiladman” gipakita nga maoy hawas sa Diyos gikan sa langit, ug imbes nga “sataniko,” iyang gigapos ug gitambog si Satanas ngadto sa kahiladman. Sa pagkomento sa Pinadayag 9:11, ang The Interpreter’s Bible nag-ingon: “Apan, si Abaddon maoy usa ka manulonda nga dili iya ni Satanas kondili sa Diyos, nga nagbuhat sa iyang buluhaton sa paglaglag sumala sa gisugo sa Diyos.”
Diha sa Hebreohanong mga teksto nga gihisgotan, dayag nga ang ʼavad·dohnʹ gipakasama sa Sheol ug sa kamatayon. Sa Pinadayag 1:18 makita nato nga si Kristo Jesus nag-ingon: “Buhi ako hangtod sa kahangtoran, ug ania kanako ang mga yawi sa kamatayon ug sa Hades.” Ang iyang gahom maylabot sa kahiladman gipakita sa Lucas 8:31. Siya adunay malaglagong gahom, lakip ang gahom sa paglaglag kang Satanas, ug kini dayag nga makita sa Hebreohanon 2:14, nga nag-ingong si Jesus nakig-ambit sa dugo ug unod aron nga “pinaagi sa iyang kamatayon mawagtang niya ang usa nga may gahom sa pagpahinabog kamatayon, nga mao, ang Yawa.” Sa Pinadayag 19:11-16 siya tin-awng gihulagway ingong tinudlo sa Diyos nga Tiglaglag o Tigpahamtang ug silot.—Tan-awa ang APOLLYON.
Pagbasa sa Bibliya
(Pinadayag 7:1-12) Human niini nakakita kog upat ka anghel diha sa upat ka suok sa yuta, nga nagpugong pag-ayo sa upat ka hangin sa yuta, aron walay hanging mohuyop sa yuta o sa dagat o sa bisan unsang kahoy. 2 Ug nakakita kog laing anghel nga mikayab gikan sa silangan sa adlaw, nga dunay selyo sa buhing Diyos; ug siya misinggit ug kusog ngadto sa upat ka anghel nga gitugotan sa pagdaot sa yuta ug sa dagat, 3 nga nag-ingon: “Ayawg daota ang yuta o ang dagat o ang mga kahoy, hangtod nga ang mga ulipon sa atong Diyos amo nang maselyohan diha sa ilang mga agtang.” 4 Ug nadungog nako ang gidaghanon niadtong giselyohan, 144,000, nga gipangselyohan gikan sa matag tribo sa mga anak nga lalaki ni Israel: 5 Gikan sa tribo ni Juda 12,000 ang giselyohan; gikan sa tribo ni Ruben 12,000; gikan sa tribo ni Gad 12,000; 6 gikan sa tribo ni Aser 12,000; gikan sa tribo ni Neptali 12,000; gikan sa tribo ni Manases 12,000; 7 gikan sa tribo ni Simeon 12,000; gikan sa tribo ni Levi 12,000; gikan sa tribo ni Isacar 12,000; 8 gikan sa tribo ni Zabulon 12,000; gikan sa tribo ni Jose 12,000; gikan sa tribo ni Benjamin 12,000 ang giselyohan. 9 Human niini nakita nako, ug tan-awa! usa ka dakong panon, nga walay tawong makaihap, gikan sa tanang kanasoran ug tribo ug katawhan ug pinulongan, nga nagbarog atubangan sa trono ug atubangan sa Kordero, nga nagsul-ob ug puting tag-as nga mga besti; ug dihay mga palwa sa palma sa ilang mga kamot. 10 Ug sila padayong nagsinggit ug kusog, nga nag-ingon: “Ang kaluwasan utang namo sa atong Diyos, nga naglingkod sa trono, ug sa Kordero.” 11 Ang tanang anghel nagbarog libot sa trono ug sa mga ansiyano ug sa upat ka buhing linalang, ug mihapa sila sa atubangan sa trono ug misimba sa Diyos, 12 nga nag-ingon: “Amen! Ang pagdayeg ug ang himaya ug ang kaalam ug ang pagpasalamat ug ang dungog ug ang gahom ug ang kusog maiya sa atong Diyos hangtod sa kahangtoran. Amen.”
Disyembre 9-15
BAHANDI GIKAN SA PULONG SA DIYOS | PINADAYAG 10-12
“‘Duha ka Saksi’ Gipatay ug Gibuhi Pag-usab”
(Pinadayag 11:3) Ipahinabo nako nga ang akong duha ka saksi managna sulod sa 1,260 ka adlaw nga magsul-ob ug sakong panapton.”
Mga Pangutana Gikan sa mga Magbabasa
Kinsa ang duha ka saksi nga gihisgotan sa Pinadayag kapitulo 11?
Ang Pinadayag 11:3 naghisgot ug duha ka saksi nga managna sulod sa 1,260 ka adlaw. Ang asoy nag-ingon nga “dag-on sila ug patyon sila” sa mapintas nga mananap. Apan human sa “tulo ka adlaw ug tunga,” kini nga mga saksi pagabanhawon, nga ikatingala pag-ayo sa mga makakita.—Pin. 11:7, 11.
Kinsa kining duha ka saksi? Aron mailhan sila, susihon nato ang pipila ka detalye sa asoy. Una, giingnan kita nga sila “gisimbolohan sa duha ka kahoyng olibo ug sa duha ka tangkawan.” (Pin. 11:4) Kini magpahinumdom kanato sa tangkawan ug sa duha ka kahoyng olibo nga gihubit sa tagna ni Zacarias. Ang maong mga olibo naghulagway sa “duha ka dinihogan,” si Gobernador Zorobabel ug ang Hataas nga Saserdoteng si Josue, nga “nagabarog tupad sa Ginoo sa tibuok yuta.” (Zac. 4:1-3, 14) Ikaduha, gihubit nga ang duha ka saksi naghimog mga ilhanan nga sama sa gihimo ni Moises ug Elias.—Itandi ang Pinadayag 11:5, 6 sa Numeros 16:1-7, 28-35 ug sa 1 Hari 17:1; 18:41-45.
Unsay kaamgiran niining duha ka paghulagway? Sa matag paghulagway, ang asoy nagtumong sa mga dinihogan sa Diyos kinsa nagapanguna panahon sa pagsulay. Busa ingong katumanan sa Pinadayag 11, ang dinihogang mga igsoon kinsa nagapanguna panahon sa pagkatukod sa Gingharian sa Diyos sa langit niadtong 1914 nagsangyaw nga nagsul-ob ug “sakong panapton” sulod sa tulo ka tuig ug tunga.
Human sa ilang pagsangyaw nga nagsul-ob ug sakong panapton, kini nga mga dinihogan simbolikong gipatay dihang sila gibalhog sa bilanggoan sulod sa mubong panahon, usa ka simbolikong tulo ka adlaw ug tunga. Alang sa mga kaaway sa katawhan sa Diyos, ang buluhaton niini nga mga saksi namatay o nahunong na, mao nga naghugyaw sila.—Pin. 11:8-10.
Apan, ingong katumanan sa tagna, human sa tulo ka adlaw ug tunga, nabanhaw ang duha ka saksi. Ang maong mga dinihogan wala lang gipagawas sa bilanggoan, apan kadtong nagmatinumanon nakadawat ug linaing katungdanan gikan sa Diyos pinaagi sa ilang Ginoo, si Jesu-Kristo. Sa 1919, sila nahilakip niadtong gitudlo ingong “matinumanon ug maalamong ulipon” nga maoy mag-atiman sa espirituwal nga panginahanglan sa katawhan sa Diyos panahon sa kataposang mga adlaw.—Mat. 24:45-47; Pin. 11:11, 12.
Makapaikag nga ang Pinadayag 11:1, 2 naglangkit niini nga mga panghitabo sa usa ka panahon dihang sukdon o susihon ang espirituwal nga templo. Ang Malaquias kapitulo 3 naghisgot ug susamang pagsusi sa espirituwal nga templo, nga sundan ug usa ka panahon sa paghinlo. (Mal. 3:1-4) Unsa ka dugay kining pagsusi ug paghinlo? Nagsugod kini sa 1914 hangtod sa sayong bahin sa 1919. Kini nga yugto sa panahon naglakip sa 1,260 ka adlaw (42 ka bulan) ug sa simbolikong tulo ka adlaw ug tunga nga gihisgotan sa Pinadayag 11.
Malipayon gayod kita nga gihikay ni Jehova kining espirituwal nga pagdalisay sa paghinlo ug usa ka linaing katawhan alang sa maayong mga buhat! (Tito 2:14) Dugang pa, atong gipabilhan ang panig-ingnan sa matinumanong mga dinihogan kinsa nagapanguna panahon sa pagsulay, ug busa sila ang simbolikong duha ka saksi.
(Pinadayag 11:7) Inigkahuman nilag pamatuod, ang pintas nga mananap nga mogula gikan sa kahiladman makiggubat kanila ug dag-on sila ug patyon sila.
(Pinadayag 11:11) Human sa tulo ka adlaw ug tunga, ang espiritu sa kinabuhi gikan sa Diyos misulod kanila, ug sila nanindog, ug kadtong nakakita kanila nangahadlok pag-ayo.
Pagpangitag Espirituwal nga Bahandi
(Pinadayag 10:9, 10) Miadto ko sa anghel ug giingnan nako siya nga ihatag kanako ang gamayng linukot nga basahon. Siya miingon kanako: “Kuhaa kini ug kan-a, ug makapapait kini sa imong tiyan, apan sa imong baba kini tam-is samag dugos.” 10 Gikuha nako ang gamayng linukot nga basahon gikan sa kamot sa anghel ug gikaon kini, ug sa akong baba kini tam-is samag dugos, apan sa nakaon na nako kini, mipait ang akong tiyan.
Linukot nga Basahon
Simbolikong Paggamit. Adunay ubay-ubayng simboliko nga paggamit sa mga pulong nga “linukot nga basahon” diha sa Bibliya. Si Ezequiel ug Zacarias parehong nakakita ug usa ka linukot nga basahon nga may sinulat sa atubangan ug sa luyo. Sanglit ang atubangang bahin lamang sa linukot nga basahon ang sagad nga gamiton, ang pagsulat niini sa atubangan ug sa luyo lagmit nagtumong sa kabug-at, kasangkaron, ug kaseryoso sa mga paghukom nga gisulat diha sa maong mga linukot nga basahon. (Eze 2:9–3:3; Zac 5:1-4) Diha sa panan-awon sa Pinadayag, ang usa nga naglingkod sa trono nagkupot diha sa iyang tuong kamot ug usa ka linukot nga basahon nga may pito ka timbre, aron dili makita ang gisulat hangtod nga buksan kini sa Kordero sa Diyos. (Pin 5:1, 12; 6:1, 12-14) Sa ulahi diha sa panan-awon si Juan mismo gihatagan ug usa ka linukot nga basahon ug gisugo nga kan-on kini. Kini matam-is alang kang Juan apan mapait sa iyang tiyan. Sanglit ang linukot nga basahon bukas ug wala timbrehi, kini usa ka butang nga angayng sabton. “Matam-is” alang kang Juan nga dawaton ang mensahe nga anaa niini apan dayag nga may mapait nga mga butang nga iyang itagna, maingon sa gisugo kaniya nga buhaton. (Pin 10:1-11) Si Ezequiel may susama usab nga kasinatian bahin sa linukot nga basahon nga gihatag kaniya diin diha niana may “mga awit sa pagbangotan ug sa pagdanguyngoy ug sa pagminatay.”—Eze 2:10.
(Pinadayag 12:1-5) Unya dihay dakong ilhanan nga akong nakita didto sa langit: Usa ka babaye nga sinul-oban ug adlaw, ug ang bulan diha sa ilalom sa iyang mga tiil, ug sa iyang ulo may korona nga 12 ka bituon, 2 ug siya mabdos. Ug kay manganakay na siya, nagsiyagit siya tungod sa kasakit ug kaul-ol sa pagpanganak. 3 Dihay laing ilhanan nga akong nakita didto sa langit. Tan-awa! Usa ka dakong dragon nga ang kolor samag kalayo, nga may pito ka ulo ug 10 ka sungay ug diha sa mga ulo niini may pito ka korona; 4 ug ang ikog niini nagbitad sa ikatulong bahin sa mga bituon sa langit, ug sila gitambog niini sa yuta. Ug ang dragon padayong nagbarog atubangan sa babaye nga manganakay na, aron nga sa makapanganak na siya, tukbon niini ang iyang anak. 5 Ug siya nanganak ug usa ka anak, usa ka lalaki, nga magbantay sa tanang kanasoran pinaagi sa bunal nga puthaw. Ug ang iyang anak gisakgaw ngadto sa Diyos ug sa iyang trono.
Kasakit sa Pagbati
Sa panan-awon ni apostol Juan diha sa Pinadayag, iyang nakita ang langitnong babaye nga nagsiyagit “tungod sa iyang kasakit ug sa labihang kaul-ol sa pagpanganak.” Ang bata nga natawo maoy “usa ka anak, usa ka lalaki, nga maoy magabantay sa tanang kanasoran pinaagi sa olisi nga puthaw.” Bisan pa sa mga paningkamot sa dragon sa paglamoy niini, ang “iyang anak gisakgaw ngadto sa Diyos ug sa iyang trono.” (Pin 12:1, 2, 4-6) Ang pagsakgaw sa Diyos sa maong anak nagpasabot nga kini gidawat sa Diyos ingong iyang kaugalingong anak, sama sa nabatasan sa karaang mga panahon sa pagpresentar sa usa ka bag-ong natawo nga bata atubangan sa iyang amahan aron dawaton. (Tan-awa ang PAGPANGANAK.) Nan kini nagpasabot nga ang “babaye” mao ang “asawa” sa Diyos, ang “Jerusalem sa itaas,” ang “inahan” ni Kristo ug sa iyang espirituwal nga mga igsoon.—Gal 4:26; Heb 2:11, 12, 17.
Natural, ang langitnong “babaye” sa Diyos, maoy hingpit, ug ang pagpanganak wala gayoy literal nga kasakitan. Busa, sa simbolikong paagi ang mga kasakit sa pagbati nagpaila nga ang “babaye” nahibalo nga hapit na siyang manganak; siya nagpaabot niini sa dili madugay.—Pin 12:2.
Nan kinsa kining “usa ka anak, usa ka lalaki”? Siya ang “magabantay sa tanang kanasoran pinaagi sa olisi nga puthaw.” Kini ang gitagna bahin sa Mesiyanikong Hari sa Diyos diha sa Salmo 2:6-9. Apan kini nga panan-awon nakita ni Juan dugay na human sa pagkatawo ni Kristo dinhi sa yuta ug sa iyang kamatayon ug pagkabanhaw. Busa ang panan-awon mopatim-awng nagpunting sa pagkatawo sa Mesiyanikong Gingharian diha sa mga kamot sa Anak sa Diyos nga si Jesu-Kristo, kinsa, sa dihang gibanhaw gikan sa mga patay, “milingkod sa tuong kamot sa Diyos, nga sukad niadto nagpaabot hangtod nga ibutang ang iyang mga kaaway ingon nga tumbanan sa iyang mga tiil.”—Heb 10:12, 13; Sal 110:1; Pin 12:10.
Pagbasa sa Bibliya
(Pinadayag 10:1-11) Ug nakakita kog laing kusgang anghel nga mikanaog gikan sa langit, nga naputos ug panganod, ug may balangaw diha sa iyang ulo, ug ang iyang nawong sama sa adlaw, ug ang iyang mga bitiis samag mga haligi nga kalayo, 2 ug diha sa iyang kamot ang usa ka gamayng linukot nga basahon nga binuksan. Ug iyang gitunob ang iyang tuong tiil sa dagat, apan ang iyang wala nga tiil sa yuta, 3 ug siya misinggit ug kusog sama sa leyon nga nagngulob. Ug pagsinggit niya, nadungog nako ang tingog sa pito ka dalugdog. 4 Karon dihang misulti ang pito ka dalugdog, mosulat na unta ko, apan nadungog nako ang usa ka tingog gikan sa langit nga miingon: “Itago ang mga butang nga gisulti sa pito ka dalugdog, ug ayaw kinig isulat.” 5 Ang anghel nga nakita nakong nagbarog sa dagat ug sa yuta miisa sa iyang tuong kamot ngadto sa langit, 6 ug pinaagi sa Usa nga buhi hangtod sa kahangtoran, kinsa naglalang sa langit ug sa mga butang nga anaa niini ug sa yuta ug sa mga butang nga anaa niini ug sa dagat ug sa mga butang nga anaa niini, siya nanumpa: “Wala na gayoy paglangan pa. 7 Apan sa mga adlaw dihang huypon na sa ikapitong anghel ang iyang trompeta, ang sagradong tinago nga gipahayag sa Diyos ingong maayong balita ngadto sa iyang mga ulipon nga mga propeta sa pagkatinuod matuman na.” 8 Ug nadungog nako ang tingog gikan sa langit nga nakigsulti kanako pag-usab: “Lakaw, kuhaa ang binuksan nga linukot nga basahon nga anaa sa kamot sa anghel nga nagbarog sa dagat ug sa yuta.” 9 Miadto ko sa anghel ug giingnan nako siya nga ihatag kanako ang gamayng linukot nga basahon. Siya miingon kanako: “Kuhaa kini ug kan-a, ug makapapait kini sa imong tiyan, apan sa imong baba kini tam-is samag dugos.” 10 Gikuha nako ang gamayng linukot nga basahon gikan sa kamot sa anghel ug gikaon kini, ug sa akong baba kini tam-is samag dugos, apan sa nakaon na nako kini, mipait ang akong tiyan. 11 Ug nakadungog kog tingog nga miingon kanako: “Kinahanglang managna ka pag-usab bahin sa mga katawhan ug kanasoran ug pinulongan ug sa daghang hari.”
Disyembre 16-22
BAHANDI GIKAN SA PULONG SA DIYOS | PINADAYAG 13-16
“Ayaw Kahadloki ang Makahahadlok nga mga Mananap”
(Pinadayag 13:1, 2) Ug kini mibarog diha sa balas sa dagat. Ug nakakita kog pintas nga mananap nga migimaw sa dagat, nga may 10 ka sungay ug pito ka ulo, ug sa mga sungay niini may 10 ka korona, apan sa mga ulo niini may mapasipalahong mga ngalan. 2 Karon ang pintas nga mananap nga akong nakita samag leopardo, apan ang mga tiil niini sama nianang sa oso, ug ang baba niini sama sa baba sa leyon. Ug gihatagan sa dragon ang mananap ug gahom, trono, ug dakong awtoridad.
Si Jehova Maoy “Tigpadayag sa mga Tinago”
6 Sa hinapos sa unang siglo K.P., ang gibanhaw nga si Jesus naghatag kang apostol Juan ug kahibulongang mga panan-awon. (Pin. 1:1) Sa usa niana, nakita ni Juan ang Yawa, nga gisimbolohan sa usa ka dragon, nga nagtindog sa baybayon sa lapad nga kadagatan. (Basaha ang Pinadayag 13:1, 2.) Si Juan nakakita usab ug usa ka mapintas nga mananap nga migimaw sa dagat. Kini may pito ka ulo ug gihatagan sa Yawa ug dakong awtoridad. Sa ulahi, si Juan nakakita na pod ug sanag-pula nga mananap nga may pito usab ka ulo. Kini maoy larawan sa mapintas nga mananap sa Pinadayag 13:1. Gipatin-aw sa usa ka manulonda ngadto kang Juan nga ang pito ka ulo sa sanag-pula nga mananap nagsimbolo sa “pito ka hari,” o kagamhanan. (Pin. 13:14, 15; 17:3, 9, 10) Dihang gisulat kini ni Juan, ang lima niana napukan na, ang usa nagmando pa, ug ang lain “wala pa moabot.” Kinsa ang maong mga kagamhanan, o gahom sa kalibotan? Atong hisgotan ang tagsatagsa ka ulo sa mapintas nga mananap diha sa Pinadayag. Hisgotan usab nato kon sa unsang paagi ang sinulat ni Daniel naghatag ug dugang katin-awan bahin niini nga mga kagamhanan, nga usahay gatosan pa ka tuig una nagmando.
(Pinadayag 13:11) Unya nakakita kog laing pintas nga mananap nga migimaw sa yuta, ug kini may duha ka sungay sama nianang sa nating karnero, apan misugod kinig sulti samag dragon.
(Pinadayag 13:15) Ug gitugotan kini sa paghatag ug gininhawa ngadto sa larawan sa pintas nga mananap, aron nga ang larawan sa pintas nga mananap makasulti ug makamando sa pagpatay sa tanang modumili sa pagsimba sa larawan sa pintas nga mananap.
Pagpakigbisog Batok sa Duha ka Mabangis nga Mananap
26 Unsa ba kini? Ang Anglo-Amerikanhong Gahom sa Kalibotan—nga mao mismo ang ikapitong ulo sa nahaunang mapintas nga mananap apan diha sa lahi nga papel! Ang pagpalain niini diha sa panan-awon ingong separadong mapintas nga mananap motabang kanato aron mas tin-awng masabtan kon sa unsang paagi kini naglihok nga independente diha sa entablado sa kalibotan. Kining masambingayong duhag-sungay nga mapintas nga mananap gilangkoban sa duha ka nagdungan-paglungtad, independente, apan nagkombuyang politikanhong mga gahom. Ang duha ka sungay niini nga “sama sa nating karnero” nagpasabot nga kini nagpakamaaghop ug nagpadayag nga dili makadaot, nga may nalamdagang matang sa kagamhanan nga angayng dangpan sa tibuok kalibotan. Apan kini nagsulti “ingon sa usa ka dragon” sa pagkaagi nga kini mogamit sa pagpamugos ug mga panghulga ug sa dayag nga kapintasan diha sa mga dapit diin ang estilo sa pagmando niini wala dawata. Kini wala magdasig sa pagpasakop sa Gingharian sa Diyos ubos sa pagmando sa Kordero sa Diyos apan, sa intereses hinuon ni Satanas, ang dakong dragon. Kini nagpalambo sa nasyonalistikanhong mga pagkabahinbahin ug mga pagdumot nga maoy pagsimba sa nahaunang mapintas nga mananap.
Pagpakigbisog Batok sa Duha ka Mabangis nga Mananap
30 Ang dagan sa kasaysayan nagpaila nga ang maong larawan mao ang organisasyon nga giduso, gipasiugda, ug gisuportahan sa Britanya ug sa Tinipong Bansa ug sa sinugdan nailhang Liga sa Kanasoran. Sa ulahi, sa Pinadayag kapitulo 17, kini mopatim-aw ubos sa lahi nga simbolo, nga mao ang usa ka buhi, nagaginhawa nga sanag-pulang bulok nga mapintas nga mananap nga independenteng naglungtad. Kining internasyonal nga lawas ‘nagsulti,’ sa pagkaagi nga kini mapasigarbohong nangangkon nga mao lamang ang arang makapatunghag kalinaw ug kasegurohan sa katawhan. Apan sa pagkatinuod kini nahimong usa ka kapunongan sa membrong mga nasod aron magbayloayg binaba nga mga pagsaway ug mga insulto. Gibaharan niini nga ang nasod o katawhan nga dili magpasakop sa awtoridad niini hinginlan o patyon bisag buhi pa. Gihinginlan gayod sa Liga sa Kanasoran ang mga nasod nga wala mosunod sa mga ideolohiya niini. Sa pagsugod sa dakong kasakitan, ang militaristikong ‘mga sungay’ niining larawan sa mapintas nga mananap magtuman sa malaglagong papel niini.—Pinadayag 7:14; 17:8, 16.
31 Sukad sa Gubat sa Kalibotan II, ang larawan sa mapintas nga mananap—nga napadayag karon ingon nga organisasyon sa Hiniusang Kanasoran—nakapatay na sa literal nga paagi. Pananglitan, niadtong 1950 ang kasundalohan sa HK miadto sa natad-panggubatan sa gubat tali sa Amihanang Korea ug sa Habagatang Korea. Ang kasundalohan sa HK, uban sa mga taga-Habagatang Korea, nakapatay sa gibanabanang 1,420,000 ka taga-Amihanang Korea ug mga Insek. Sa susamang paagi, sukad sa 1960 hangtod sa 1964, ang kasundalohan sa Hiniusang Kanasoran aktibo sa Congo (Kinshasa). Dugang pa, ang mga lider sa kalibotan, lakip ang mga papa nga sila si Paulo VI ug Juan Paulo II, nagpadayon sa pagdeklarar nga ang maong larawan mao ang pangataposan ug labing maayong paglaom sa katawhan alang sa kalinaw. Sila miinsistir nga kon ang katawhan mapakyas sa pag-alagad niini, ang tawhanong rasa maglaglag sa kaugalingon. Busa sa masambingayong paagi, sila maoy nakaingon sa pagkamatay sa tanang tawo nga modumili sa pagsunod sa larawan ug sa pagsimba niini.—Deuteronomio 5:8, 9.
(Pinadayag 13:16, 17) Gipugos niini ang tanang tawo—ang timawa ug halangdon, ang dato ug kabos, ang gawasnon ug ulipon—aron sila mamarkahan diha sa ilang tuong kamot o sa ilang agtang, 17 ug aron nga walay si bisan kinsa nga makapalit o makabaligya gawas sa tawong nakabaton sa marka, ang ngalan sa pintas nga mananap o ang numero sa ngalan niini.
Mga Pangunang Punto sa Basahon sa Pinadayag—II
13:16, 17. Bisan pa sa kalisdanan nga atong maatubang diha sa adlaw-adlawng mga kalihokan, sama sa ‘pagpamalit o pagpamaligya,’ dili gayod nato tugotan ang mapintas nga mananap sa pagmando kanato. Ang pagdawat ‘sa marka sa mapintas nga mananap diha sa atong kamot o sa atong agtang’ nagpasabot ug pagtugot niana sa pagkontrolar sa atong mga lihok o pag-impluwensiya sa atong panghunahuna.
Pagpangitag Espirituwal nga Bahandi
(Pinadayag 16:13, 14) Ug nakakita kog tulo ka samag baki nga hugawng mga pahayag sa espiritu nga migula sa baba sa dragon ug sa baba sa pintas nga mananap ug sa baba sa bakak nga propeta. 14 Sa pagkatinuod, kini maoy mga pahayag sa mga demonyo ug kini naghimog mga ilhanan, ug kini nangadto sa mga hari sa tibuok gipuy-ang yuta, aron tigomon sila ngadto sa gubat sa dakong adlaw sa Diyos nga Labing Gamhanan.
Mga Pangunang Punto sa Basahon sa Pinadayag—II
16:13-16. Ang “mahugawng inspirado nga mga pahayag” nagsimbolo sa demonyohanong mga propaganda. Gihimo kini aron matino nga ang mga hari sa yuta dili maimpluwensiyahan sa pagbubo sa pito ka panaksan sa kasuko sa Diyos kondili maaghat hinuon sila sa pagpakig-away kang Jehova.—Mat. 24:42, 44.
(Pinadayag 16:21) Unya dihay dagkong ulan nga yelo, nga ang matag usa may gibug-atong mga usa ka talanton, nga nangahulog gikan sa langit ngadto sa mga tawo, ug ang mga tawo nagpasipala sa Diyos tungod sa hampak nga ulan nga yelo, kay kini nagpahinabog dako kaayong kadaot.
“Ang Inyong Kaluwasan Nagakaduol Na”!
9 Kini dili ang panahon sa pagsangyaw sa “maayong balita sa gingharian.” Natapos na kana. “Ang kataposan” moabot na! (Mat. 24:14) Sa walay duhaduha ang katawhan sa Diyos magmantala ug bug-at nga mensahe sa paghukom. Mahimong maglakip kini ug mensahe nga ang daotang kalibotan ni Satanas hapit nang taposon. Ang Bibliya nagpakasama niini nga mensahe sa ulan nga yelo dihang kini miingon: “Dagkong ulan nga yelo nga ang tinibug-ok niini may gibug-atong mga usa ka talanton nangahulog gikan sa langit nganha sa mga tawo, ug ang mga tawo nagpasipala sa Diyos gumikan sa hampak sa ulan nga yelo, tungod kay ang hampak niini hilabihan kadako.”—Pin. 16:21.
Pagbasa sa Bibliya
(Pinadayag 16:1-16) Ug nakadungog kog kusog nga tingog gikan sa sangtuwaryo nga miingon sa pito ka anghel: “Adto mo ug ibubo sa yuta ang pito ka panaksan sa kasuko sa Diyos.” 2 Ang unang anghel miadto ug gibubo niya sa yuta ang iyang panaksan. Ug dihay ngutngot ug grabeng kabahong nga mitakboy sa mga tawong may marka sa pintas nga mananap ug nagsimba sa larawan niini. 3 Ang ikaduhang anghel mibubo sa iyang panaksan ngadto sa dagat. Ug kini nahimong dugo nga sama nianang sa patayng tawo, ug ang tanang buhing linalang nangamatay, oo, ang mga butang sa dagat. 4 Ang ikatulong anghel mibubo sa iyang panaksan ngadto sa mga suba ug sa mga tubod sa tubig. Ug kini nahimong dugo. 5 Nadungog nako nga ang anghel ibabaw sa katubigan miingon: “Ikaw, ang Usa nga mao ang karon ug ang kaniadto, ang Usa nga maunongon, maoy matarong, kay imong gimando kini nga mga paghukom, 6 kay ilang giula ang dugo sa mga balaan ug sa mga propeta, ug gihatagan nimo silag dugo aron imnon; takos sila niini.” 7 Ug nadungog nako nga miingon ang halaran: “Oo, Jehova nga Diyos, ang Labing Gamhanan, matuod ug matarong ang imong mga hukom.” 8 Ang ikaupat nga anghel mibubo sa iyang panaksan ngadto sa adlaw, ug ang adlaw gitugotan sa pagpagba sa mga tawo. 9 Ug ang mga tawo nangapagba sa grabeng kainit, apan sila nagpasipala sa ngalan sa Diyos, kinsa dunay awtoridad ibabaw niini nga mga hampak, ug sila wala maghinulsol ug maghimaya kaniya. 10 Ang ikalimang anghel mibubo sa iyang panaksan diha sa ibabaw sa trono sa pintas nga mananap. Ug ang gingharian niini mingitngit, ug gipamaak nila ang ilang dila tungod sa ilang kasakit, 11 apan gipasipalahan nila ang Diyos sa langit tungod sa ilang mga kasakit ug kabahong, ug wala sila maghinulsol sa ilang mga buhat. 12 Ang ikaunom nga anghel mibubo sa iyang panaksan ngadto sa dakong suba sa Euprates, ug ang tubig niini gipahubas aron maandam ang dalan para sa mga hari nga gikan sa sidlakan. 13 Ug nakakita kog tulo ka samag baki nga hugawng mga pahayag sa espiritu nga migula sa baba sa dragon ug sa baba sa pintas nga mananap ug sa baba sa bakak nga propeta. 14 Sa pagkatinuod, kini maoy mga pahayag sa mga demonyo ug kini naghimog mga ilhanan, ug kini nangadto sa mga hari sa tibuok gipuy-ang yuta, aron tigomon sila ngadto sa gubat sa dakong adlaw sa Diyos nga Labing Gamhanan. 15 “Tan-awa! Moabot ko nga samag kawatan. Malipayon ang magpabiling nagtukaw ug magbantay sa iyang panggawas nga mga besti, aron dili siya maglakaw nga hubo ug ang mga tawo magtan-aw sa iyang kaulawan.” 16 Ug gitigom sila niini sa dapit nga gitawag sa Hebreohanon ug Armagedon.
Disyembre 23-29
BAHANDI GIKAN SA PULONG SA DIYOS | PINADAYAG 17-19
“Gubat sa Diyos Magtapos sa Tanang Gubat”
(Pinadayag 19:11) Nakita nako nga nabuksan ang langit, ug tan-awa! usa ka puting kabayo. Ug ang nagsakay niini gitawag nga Matinumanon ug Matuod, ug siya naghukom ug nakiggubat diha sa pagkamatarong.
(Pinadayag 19:14-16) Dugang pa, ang mga panon sa langit nagsunod kaniya nga nagsakayg puting mga kabayo, ug sila nagsul-ob ug puti, hinlo, maayong klase nga lino. 15 Ug nagagula sa iyang baba ang hait ug taas nga espada nga iyang gamiton sa paglaglag sa kanasoran, ug iyang bantayan sila pinaagig bunal nga puthaw. Dugang pa, iyang tamaktamakan ang pug-anag bino sa dakong kasuko sa Diyos nga Labing Gamhanan. 16 Sa iyang panggawas nga besti, dapit sa iyang paa, may ngalan siya nga nasulat, Hari sa mga hari ug Ginoo sa mga ginoo.
Armagedon—Gubat sa Diyos nga Magtapos sa Tanang Gubat
Samtang ang mga daotan pa ang magmando, ang mga matarong dili makatagamtam ug kalinaw ug kasegurohan. (Proverbio 29:2; Ecclesiastes 8:9) Sa pagkatinuod, ang kahiwian ug pagkadaotan maoy bahin na sa kinabuhi sa mga tawo nga nagbuhat niana. Busa, mabatonan lamang ang dumalayong kalinaw ug hustisya kon malaglag na ang mga daotan. “Ang daotan maoy lukat alang sa matarong,” misulat si Solomon.—Proverbio 21:18.
Sanglit ang Diyos mao man ang Maghuhukom, makaseguro kita nga sa tanang higayon ang iyang paghukom batok sa mga daotan maoy matarong. “Dili ba mobuhat ang Maghuhukom sa tibuok yuta sa kon unsay matarong?” nangutana si Abraham. Nasayran ni Abraham nga si Jehova kanunayng husto! (Genesis 18:25) Dugang pa, ang Bibliya nagpasalig kanato nga si Jehova dili malipay sa kalaglagan sa mga daotan; buhaton lamang niya kana kon dili gayod sila maghinulsol.—Ezequiel 18:32; 2 Pedro 3:9.
Kabayo
Sa simbolikong panan-awon ni apostol Juan, ang hinimayang si Jesu-Kristo gihulagway nga nagsakay sa usa ka puting kabayo ug uban kaniya ang usa ka panon, nga ang tanan nagsakay ug puting mga kabayo. Kini nga panan-awon gipadayag ngadto kang Juan ingong paghulagway sa pagkamatarong ug hustisya sa gubat nga awayon ni Kristo batok sa tanang kaaway alang sa iyang Diyos ug Amahan, si Jehova. (Pin 19:11, 14) Una pa niana, ang paglihok ni Kristo ingong hari ug ang misunod nga mga katalagman gihulagway pinaagi sa lainlaing mga mangangabayo ug sa ilang gisakyang mga kabayo.—Pin 6:2-8.
(Pinadayag 19:19, 20) Ug nakita nako ang pintas nga mananap ug ang mga hari sa yuta ug ang ilang kasundalohan nga nagkatigom aron makiggubat sa usa nga nagsakay sa kabayo ug sa iyang kasundalohan. 20 Ug nadakpan ang pintas nga mananap ug ang bakak nga propeta nga naghimog mga ilhanan sa atubangan niini aron mapahisalaag ang mga midawat sa marka sa pintas nga mananap ug ang mga nagsimba sa larawan niini. Samtang buhi pa, kini sila gitambog ngadto sa linaw nga kalayo nga nagdilaab uban ang asupre.
Ang Manggugubat-Hari Makadaog sa Armagedon
24 Ang pitog-ulo, napulog-sungay nga mapintas nga mananap nga migula sa dagat, nga naghawas sa politikanhong organisasyon ni Satanas, pagawagtangon apil ang mini nga manalagna, nga ikapitong gahom sa kalibotan. (Pinadayag 13:1, 11-13; 16:13) Samtang “buhi” pa, o samtang naglihok pa sa ilang nahiusang pagsupak sa katawhan sa Diyos sa yuta, sila gitambog ngadto sa “linaw nga kalayo.” Kini ba literal nga linaw nga kalayo? Dili, sama ra nga ang mapintas nga mananap ug ang mini nga manalagna dili literal nga mga mananap. Hinunoa, kini maoy simbolo sa kompleto, pangataposang kalaglagan, nga wala nay kapasig-ulian. Dinhi itambog sa ulahi ang kamatayon ug ang Hades ug ang Yawa mismo. (Pinadayag 20:10, 14) Tino nga dili kini impiyerno sa walay kataposang pagsakit alang sa mga daotan, sanglit ang ideya mismo bahin sa maong dapit dulumtanan kang Jehova.—Jeremias 19:5; 32:35; 1 Juan 4:8, 16.
(Pinadayag 19:21) Apan ang nahibilin gipamatay pinaagi sa taas nga espada nga migula sa baba sa nagsakay sa kabayo. Ug ang tanang langgam nabusog sa ilang unod.
Ang Manggugubat-Hari Makadaog sa Armagedon
25 Ang uban pa nga dili direktang bahin sa kagamhanan apan maoy dili na matul-id nga bahin niining hiwi nga kalibotan ‘patyon [usab] pinaagi sa taas nga espada sa usa nga nagsakay sa kabayo.’ Ipahayag ni Jesus nga sila takos sa kamatayon. Sanglit sa ilang kahimtang wala man hisgoti ang linaw nga kalayo, dahomon ba nato nga sila banhawon? Walay gisulti kanato nga pagabanhawon kadtong pagapatyon sa Maghuhukom ni Jehova nianang panahona. Sama sa giingon ni Jesus mismo, ang tanan nga dili “karnero” moadto sa “kalayo nga walay kataposan nga giandam alang sa Yawa ug sa iyang mga manulonda,” nga mao, “ngadto sa walay kataposang kalaglagan.” (Mateo 25:33, 41, 46) Kini ang sangkoanan sa “adlaw sa paghukom ug sa kalaglagan sa mga tawong dili-diyosnon.”—2 Pedro 3:7; Nahum 1:2, 7-9; Malaquias 4:1.
Pagpangitag Espirituwal nga Bahandi
(Pinadayag 17:8) Ang pintas nga mananap nga imong nakita mao kaniadto, apan dili mao karon, apan hapit nang mogula gikan sa kahiladman, ug kini mopadulong sa kalaglagan. Ug ang mga molupyo sa yuta—kansang mga ngalan wala masulat sa linukot nga basahon sa kinabuhi sukad sa pagkatukod sa kalibotan—matingala dihang ilang makita kon sa unsang paagi ang pintas nga mananap mao kaniadto, apan dili mao karon, apan moabot ra unya.
Usa ka Talagsaong Misteryo Nasulbad
5 “Ang mapintas nga mananap . . . mao kaniadto.” Oo, kini naglungtad ingong Liga sa Kanasoran sukad sa Enero 10, 1920, padayon sa unahan, nga may 63 ka nasod nga misalmot sa lainlaing mga panahon. Apan, nagsunodsunod pagbulag sa Liga ang Hapon, Alemanya, ug Italya, ug ang kanhing Unyon Sobyet gitaktak gikan sa Liga. Niadtong Septiyembre 1939 gisugdan sa Nazi nga diktador sa Alemanya ang Gubat sa Kalibotan II. Tungod kay wala makapatunhay sa kalinaw sa kalibotan, ang Liga sa Kanasoran mitidlom sa kahiladman sa pagkainutil. Pagka-1942 kadto nalawos. Dili una niana o sa ulahing petsa—kondili niadto mismong kritikal nga panahon—nga gipatin-aw ni Jehova ang bug-os nga kahulogan sa panan-awon ngadto sa iyang katawhan! Panahon sa Bag-ong Kalibotan nga Teokratikanhong Asembliya, si N. H. Knorr nagpahayag, nga nahiuyon sa tagna, nga “ang mapintas nga mananap . . . dili mao karon.” Unya siya nangutana, “Magpabilin ba sa gahong ang Liga?” Nga gikutlo ang Pinadayag 17:8, siya mitubag: “Ang kapunongan sa kalibotanong mga nasod mobangon pag-usab.” Kana gayod ang nahitabo—nga nagbayaw sa matagnaong Pulong ni Jehova!
Paggula Gikan sa Kahiladman
6 Ang sanag-pulang bulok nga mapintas nga mananap migula gayod sa kahiladman. Niadtong Hunyo 26, 1945, uban sa masaba nga pasunding sa San Francisco, U.S.A., 50 ka nasod mibotar sa pagdawat sa Karta sa organisasyon sa Hiniusang Kanasoran. Ang tumong sa maong organisasyon mao “ang pagpatunhay sa internasyonal nga kalinaw ug kasegurohan.” Adunay daghang kasamahan ang Liga ug ang HK. Ang The World Book Encyclopedia nag-ingon: “Sa pipila ka paagi, ang HK kaamgid sa Liga sa Kanasoran, nga giorganisar tapos sa Gubat sa Kalibotan I . . . Daghan sa mga nasod nga nagtukod sa HK mao usab ang nagtukod sa Liga. Sama sa Liga, ang HK gitukod aron makatabang sa pagpatunhay sa kalinaw taliwala sa mga nasod. Ang pangunang mga ahensiya sa HK susama kaayo sa iya sa Liga.” Busa, ang HK mao gayod ang nabuhi pag-usab nga sanag-pulang bulok nga mapintas nga mananap. Ang mga membro niini nga mga 190 ka nasod mas daghan kay sa 63 ka membro sa Liga; giabaga usab niini ang mas dagkong mga responsabilidad kay sa organisasyon nga gipulihan niini.
(Pinadayag 17:16, 17) Ug ang 10 ka sungay nga imong nakita ug ang pintas nga mananap, kini sila magdumot sa pampam ug maglaglag ug maghubo kaniya, ug ilang kaonon ang iyang unod ug ugdawon siya sa kalayo. 17 Kay gibutang kini sa Diyos sa ilang kasingkasing aron buhaton ang iyang hunahuna, oo, aron buhaton ang ilang usa ra ka hunahuna pinaagi sa paghatag sa ilang gingharian ngadto sa pintas nga mananap, hangtod nga ang mga pulong sa Diyos matuman na.
Gibutyag ni Jehova Kon Unsay “Mahitabo sa Dili-Madugay”
17 Ang bakak nga relihiyon dili inanay nga mawala. Magpabilin kining impluwensiyado ug maningkamot sa pagkontrolar sa mga hari hangtod nga ibutang sa Diyos ang usa ka ideya diha sa kasingkasing sa mga magmamando. (Basaha ang Pinadayag 17:16, 17.) Sa dili madugay, gamiton ni Jehova ang politikal nga mga elemento sa sistema ni Satanas, nga gisimbolohan sa United Nations, aron atakehon ang bakak nga relihiyon. Ilang hanawon ang impluwensiya ug mga bahandi niini. Daw imposible kanang mahitabo pipila ka dekada kanhi. Apan karon, ang babayeng bigaon hapit nang mahulog sa likod sa sanag-pula nga mapintas nga mananap. Hinuon, dili inanay ang iyang pagkahulog, kondili kalit kining mahitabo.—Pin. 18:7, 8, 15-19.
Pagbasa sa Bibliya
(Pinadayag 17:1-11) Ang usa sa pito ka anghel nga may pito ka panaksan miabot ug miingon kanako: “Dali, akong ipakita kanimo ang paghukom batok sa bantogang pampam nga naglingkod ibabaw sa daghang katubigan, 2 nga kaniya ang mga hari sa yuta naghimog seksuwal nga imoralidad, ug ang mga molupyo sa yuta gihubog sa bino sa iyang seksuwal nga imoralidad.” 3 Ug pinaagi sa gahom sa espiritu, iya kong gidala ngadto sa usa ka kamingawan. Ug nakakita kog babaye nga nagsakay sa hayag-pula nga pintas nga mananap nga punog mapasipalahong ngalan ug may pito ka ulo ug 10 ka sungay. 4 Ang babaye nagsul-ob ug purpura ug hayag-pula nga besti, ug siya may dayandayan nga bulawan ug bililhong mga bato ug perlas, ug nagkupot siyag kopa nga bulawan nga punog dulumtanang butang ug hugawng butang sa iyang paghimog seksuwal nga imoralidad. 5 Sa iyang agtang nasulat ang usa ka ngalan, usa ka misteryo: “Bantogang Babilonya, ang inahan sa mga pampam ug sa dulumtanang mga butang sa yuta.” 6 Ug nakita nako nga ang babaye nahubog sa dugo sa mga balaan ug sa dugo sa mga saksi ni Jesus. Buweno, pagkakita nako niya natingala ko pag-ayo. 7 Busa giingnan ko sa anghel: “Nganong natingala man ka? Akong isulti nimo ang misteryo sa babaye ug sa pintas nga mananap nga iyang gisakyan nga may pito ka ulo ug 10 ka sungay: 8 Ang pintas nga mananap nga imong nakita mao kaniadto, apan dili mao karon, apan hapit nang mogula gikan sa kahiladman, ug kini mopadulong sa kalaglagan. Ug ang mga molupyo sa yuta—kansang mga ngalan wala masulat sa linukot nga basahon sa kinabuhi sukad sa pagkatukod sa kalibotan—matingala dihang ilang makita kon sa unsang paagi ang pintas nga mananap mao kaniadto, apan dili mao karon, apan moabot ra unya. 9 “Nagkinahanglag maalamong hunahuna aron masabtan kini: Ang pito ka ulo mao ang pito ka bukid, diin naglingkod ang babaye. 10 Ug dunay pito ka hari: Ang lima napukan na, ang usa mao siya karon, ug ang lain wala pa moabot; apan dihang moabot na siya, magpabilin siya sulod sa mubong panahon. 11 Ug ang pintas nga mananap nga mao kaniadto apan dili mao karon mao ang ikawalong hari, apan gikan kini sa pito, ug kini mopadulong sa kalaglagan.
Disyembre 30–Enero 5
BAHANDI GIKAN SA PULONG SA DIYOS | PINADAYAG 20-22
“Tan-awa! Ginabag-o Nako ang Tanang Butang”
(Pinadayag 21:1) Ug nakakita kog bag-ong langit ug bag-ong yuta; kay ang unang langit ug ang unang yuta nahanaw na, ug ang dagat wala na.
Usa ka Bag-ong Langit ug Usa ka Bag-ong Yuta
2 Ginatos ka katuigan una pa sa adlaw ni Juan, si Jehova miingon kang Isaias: “Kay ania, ako naglalang ug bag-ong mga langit ug usa ka bag-ong yuta; ug ang unang mga butang dili na pagahinumdoman, ni kini sila motungha pa sa kasingkasing.” (Isaias 65:17; 66:22) Kining tagnaa unang natuman sa dihang ang matinumanong mga Hudiyo nahibalik sa Jerusalem niadtong 537 W.K.P. human sa ilang pagkadestiyero ug 70 ka tuig sa Babilonya. Sa maong pagpasig-uli, sila nahimong usa ka nahinloang katilingban, “usa ka bag-ong yuta,” ubos sa usa ka bag-ong sistema sa kagamhanan, ang “bag-ong mga langit.” Apan gihisgotan ni apostol Pedro ang dugang nga kapadapatan sa tagna, nga nag-ingon: “Apan adunay bag-ong mga langit ug usa ka bag-ong yuta nga atong ginapaabot sumala sa iyang saad, ug niini magpuyo ang pagkamatarong.” (2 Pedro 3:13) Gipakita karon ni Juan nga kining saara matuman sa adlaw sa Ginoo. “Ang unang langit ug ang unang yuta,” ang organisadong sistema sa mga butang ni Satanas uban sa porma sa kagamhanan niini nga impluwensiyado ni Satanas ug sa iyang mga demonyo, mawala na unya. Mawagtang na ang magubot nga “dagat” sa daotan, rebelyosong katawhan. Pulihan unya kinig “usa ka bag-ong langit ug usa ka bag-ong yuta”—nga usa ka bag-o nga yutan-ong katilingban ubos sa usa ka bag-ong kagamhanan, ang Gingharian sa Diyos.—Itandi ang Pinadayag 20:11.
(Pinadayag 21:3, 4) Ug nakadungog kog kusog nga tingog gikan sa trono nga miingon: “Tan-awa! Ang tolda sa Diyos anaa uban sa mga tawo, ug siya mopuyo uban kanila, ug sila mahimong iyang katawhan. Ug ang Diyos makig-uban kanila. 4 Ug iyang pahiran ang matag luha sa ilang mga mata, ug ang kamatayon mawala na, ug wala na unyay pagbangotan, pagtiyabaw, ug kasakit. Ang unang mga butang nangagi na.”
“Tan-awa! Ginabag-o Ko ang Tanang Butang”
“Pagapahiran [sa Diyos] ang tanang luha gikan sa ilang mga mata.” (Pinadayag 21:4) Unsang matanga sa luha ang iyang pagapahiran? Dili ang luha sa kalipay ni ang luha nga maghatag ug proteksiyon sa atong mata. Ang saad sa Diyos nagtumong sa luha nga gipahinabo sa pag-antos ug kagul-anan. Dili lang basta pahiran sa Diyos ang maong mga luha kondili bug-os niyang wagtangon ang mga hinungdan niini—ang pag-antos ug kagul-anan.
“Ang kamatayon mawala na.” (Pinadayag 21:4) Duna pa bay mas labawng hinungdan sa paghilak kay sa kamatayon? Ipahigawas ni Jehova ang masinugtanong katawhan gikan sa gapos sa kamatayon. Sa unsang paagi? Pinaagi sa pagwagtang sa tinuod nga hinungdan sa kamatayon: ang sala nga napanunod kang Adan. (Roma 5:12) Pagahingpiton ni Jehova ang masinugtanong katawhan pinasukad sa halad lukat ni Jesus. Dayon ang kataposang kaaway, ang kamatayon, “pagawagtangon.” (1 Corinto 15:26) Ang matinumanong katawhan mabuhi sumala sa katuyoan sa Diyos alang kanila—sa walay kataposan ug sa hingpit nga panglawas.
“Ni may . . . kasakit pa.” (Pinadayag 21:4) Unsang matanga sa kasakit ang pagahanawon? Pagahanawon ang tanang mental, emosyonal, ug pisikal nga kasakit nga resulta sa sala ug pagkadili-hingpit ug naghimong miserable sa kinabuhi sa minilyon.
(Pinadayag 21:5) Ug ang Usa nga naglingkod sa trono miingon: “Tan-awa! Ginabag-o nako ang tanang butang.” Siya usab miingon: “Isulat kini, kay kining mga pulonga kasaligan ug matuod.”
Si Jehova, ang Diyos sa Kamatuoran
14 Kinahanglang isipon natong seryoso ang gisulti ni Jehova diha sa iyang Pulong. Siya mao ang giingon niya kon kinsa siya, ug buhaton niya ang iyang gisulti nga iyang buhaton. Duna gayod kitay katarongan nga mosalig sa Diyos. Makatuo kita sa dihang si Jehova nag-ingon nga siya “manimalos kanilang wala makaila sa Diyos ug kanilang wala magsunod sa maayong balita bahin sa atong Ginoong Jesus.” (2 Tesalonica 1:8) Makatuo usab kita kang Jehova sa dihang siya nag-ingon nga siya nahigugma niadtong nagsubay sa pagkamatarong, sa dihang siya nag-ingon nga siya magahatag ug walay-kataposang kinabuhi ngadto niadtong nagpasundayag ug pagtuo, ug sa dihang siya nag-ingon nga iyang wagtangon ang kasakit, pagminatay, ug bisan ang kamatayon. Gipasiugda ni Jehova ang pagkakasaligan niining ulahing saad pinaagi sa paghatag niining maong instruksiyon ngadto kang apostol Juan: “Isulat kini, tungod kay kining mga pulonga kasaligan ug matuod.”—Pinadayag 21:4, 5; Proverbio 15:9; Juan 3:36.
Pagpangitag Espirituwal nga Bahandi
(Pinadayag 20:5) (Ang uban sa mga patay wala mabuhi hangtod nga natapos ang 1,000 ka tuig.) Kini ang unang pagkabanhaw.
Kinabuhi
Diha sa iyang sugo kang Adan, ang Diyos nagpaila nga kon si Adan nagmasinugtanon pa, dili unta siya mamatay. (Gen 2:17) Mao man usab ang masinugtanong katawhan, sa dihang ang kataposang kaaway sa tawo, ang kamatayon, pagawagtangon, wala na unyay kasal-anan nga magagahom sa ilang mga lawas nga magdalag kamatayon. Hangtod sa panahong walay tino sila dili na gayod mamatay. (1Co 15:26) Kining pagwagtang sa kamatayon mahitabo sa kataposan sa paghari ni Kristo, nga sumala sa gipakita sa basahon sa Pinadayag may gidugayong 1,000 ka tuig. Dinhi giingon maylabot niadtong mahimong mga hari ug mga saserdote kauban ni Kristo nga sila “nangabuhi ug nagmando ingong mga hari uban kang Kristo sulod sa usa ka libo ka tuig.” “Ang uban sa mga patay” nga wala mangabuhi “hangtod nga ang usa ka libo ka tuig matapos” mao gayod kadtong buhi sa kataposan sa usa ka libo ka tuig, apan kini maoy sa dili pa buhian si Satanas gikan sa kahiladman ug mohatag ug mahukmanong pagsulay sa katawhan. Sa kataposan sa usa ka libo ka tuig, ang katawhan sa yuta makakab-ot na sa tawhanong kahingpitan, sama sa kahimtang ni Adan ug Eva sa wala pa sila makasala. Niining panahona sila makabaton na unya ug tinuod nga kinabuhi diha sa kahingpitan. Human niana, kadtong makalabang sa pagsulay sa dihang si Satanas pagabuhian sa hamubo nga panahon gikan sa kahiladman makatagamtam niana nga kinabuhi sa walay kataposan.—Pin 20:4-10.
(Pinadayag 20:14, 15) Ug ang kamatayon ug ang Lubnganan gitambog ngadto sa linaw nga kalayo. Kini ang ikaduhang kamatayon, ang linaw nga kalayo. 15 Dugang pa, si bisan kinsa nga wala masulat sa basahon sa kinabuhi gitambog ngadto sa linaw nga kalayo.
Linaw nga Kalayo
Kini nga ekspresyon makita lamang diha sa basahon sa Pinadayag ug dayag nga kini simboliko. Ang Bibliya naghatag sa kaugalingon niining pagpatin-aw ug paghubit sa simbolo pinaagi sa pag-ingon: “Mao kini ang ikaduhang kamatayon, ang linaw nga kalayo.”—Pin 20:14; 21:8.
Ang simbolikong kinaiyahan sa linaw nga kalayo dugang madayag gikan sa konteksto sa mga paghisgot niini diha sa basahon sa Pinadayag. Ang kamatayon giingong igatambog ngadto niining linaw nga kalayo. (Pin 19:20; 20:14) Dayag nga ang kamatayon dili masunog sa literal. Dugang pa, ang Yawa, usa ka dili-makitang espiritung linalang, igatambog ngadto sa linaw. Kay espiritu, siya dili masakitan sa literal nga kalayo.—Pin 20:10; itandi ang Ex 3:2 ug Huk 13:20.
Sanglit ang linaw nga kalayo naghawas sa “ikaduhang kamatayon” ug sanglit ang Pinadayag 20:14 nag-ingon nga “ang kamatayon ug ang Hades” igatambog ngadto niini, dayag nga ang linaw dili mahimong maghawas sa kamatayon nga napanunod sa tawo gikan kang Adan (Rom 5:12), ni kini nagtumong sa Hades (Sheol). Busa, kini nagsimbolo gayod sa laing matang sa kamatayon, usa nga dili na mabakwi, kay ang rekord wala gayod maghisgot nga ang “linaw” nagtugyan niadtong diha niini, ingon sa gibuhat sa Adanikong kamatayon ug sa Hades (Sheol). (Pin 20:13) Tungod niana, kadtong wala mahisulat diha sa “basahon sa kinabuhi,” ang dili-mahinulsolong mga magsusupak sa pagkasoberano sa Diyos, gitambog ngadto sa linaw nga kalayo, nga nagkahulogan sa walay kataposang kalaglagan, o sa ikaduhang kamatayon.—Pin 20:15.
Pagbasa sa Bibliya
(Pinadayag 20:1-15) Ug nakakita kog anghel nga nanaog gikan sa langit nga may yawi sa kahiladman ug may dakong kadena diha sa iyang kamot. 2 Iyang gidakop ang dragon, ang orihinal nga halas, nga mao ang Yawa ug Satanas, ug gigapos siya sulod sa 1,000 ka tuig. 3 Ug iyang gitambog siya sa kahiladman ug gisirhan kini ug giselyohan, aron dili na siya makapahisalaag pa sa kanasoran hangtod nga matapos ang 1,000 ka tuig. Human niini buhian siya sa makadiyot. 4 Ug nakakita kog mga trono, ug kadtong nanglingkod niini gihatagag awtoridad sa paghukom. Oo, nakita nako ang mga kalag niadtong gipamatay tungod sa ilang pagpamatuod bahin kang Jesus ug sa pagsulti bahin sa Diyos, oo, niadtong mga wala mosimba sa pintas nga mananap o sa larawan niini ug wala magpamarka sa marka niini sa ilang agtang ug sa ilang kamot. Ug sila nabuhi ug nagmando ingong hari uban sa Kristo sulod sa 1,000 ka tuig. 5 (Ang uban sa mga patay wala mabuhi hangtod nga natapos ang 1,000 ka tuig.) Kini ang unang pagkabanhaw. 6 Malipayon ug balaan si bisan kinsa nga dunay bahin sa unang pagkabanhaw; walay awtoridad kanila ang ikaduhang kamatayon, apan sila mahimong saserdote sa Diyos ug sa Kristo, ug sila magmando ingong mga hari uban kaniya sulod sa 1,000 ka tuig. 7 Karon dihang matapos na ang 1,000 ka tuig, si Satanas buhian gikan sa iyang bilanggoan, 8 ug mogula siya sa pagpahisalaag sa kanasoran sa upat ka suok sa yuta, ang Gog ug Magog, sa pagtigom kanila alang sa gubat. Ang ilang gidaghanon sama sa balas sa dagat. 9 Ug gisulong nila ang tibuok yuta ug gilibotan ang kampo sa mga balaan ug ang hinigugmang siyudad. Apan dihay kalayo nga nanaog gikan sa langit ug milamoy kanila. 10 Ug ang Yawa nga nagpahisalaag kanila gitambog ngadto sa linaw nga kalayo ug asupre, diin atua na ang pintas nga mananap ug ang bakak nga propeta; ug sila sakiton adlaw ug gabii hangtod sa kahangtoran. 11 Ug nakakita kog trono nga dako ug puti, ug nakita nako ang Usa nga naglingkod niini. Gikan sa iyang atubangan ang yuta ug ang langit nangalagiw, ug wala na sila makaplagi. 12 Ug nakita nako ang mga patay, mga halangdon ug mga timawa, nga nagbarog sa atubangan sa trono, ug dihay gibuksan nga mga linukot nga basahon. Apan dihay laing linukot nga basahon nga gibuksan; kini ang linukot nga basahon sa kinabuhi. Ang mga patay gihukman base sa mga nasulat sa mga linukot nga basahon sumala sa ilang binuhatan. 13 Ug ang dagat mitugyan sa mga patay nga diha niini, ug ang kamatayon ug ang Lubnganan mitugyan sa mga patay nga diha kanila, ug ang matag usa gihukman sumala sa ilang binuhatan. 14 Ug ang kamatayon ug ang Lubnganan gitambog ngadto sa linaw nga kalayo. Kini ang ikaduhang kamatayon, ang linaw nga kalayo. 15 Dugang pa, si bisan kinsa nga wala masulat sa basahon sa kinabuhi gitambog ngadto sa linaw nga kalayo.