Reperensiya Para sa Workbook sa Tigom nga Kinabuhi ug Ministeryo
Nobyembre 4-10
BAHANDI GIKAN SA PULONG SA DIYOS | 1 JUAN 1-5
“Ayaw Higugmaa ang Kalibotan o ang mga Butang sa Kalibotan”
(1 Juan 2:15, 16) Ayaw higugmaa ang kalibotan o ang mga butang sa kalibotan. Kon ang usa nahigugma sa kalibotan, ang gugma sa Amahan wala kaniya; 16 kay ang tanang naa sa kalibotan—ang tinguha sa unod, ang tinguha sa mga mata, ug ang mapasigarbohong pagpakita sa mga nabatonan sa usa—wala maggikan sa Amahan, apan naggikan sa kalibotan.
Pagpabilin Diha sa Sumbanan nga Gihatag ni Jesus
13 Ang uban mangatarongan tingali nga dili tanan niining kalibotana daotan. Bisan pa niana, ang kalibotan ug ang mga pangdani niini dali rang makalinga kanato gikan sa pag-alagad kang Jehova. Ug walay gitanyag ang kalibotan nga gilaraw aron makapasuod kanato sa Diyos. Busa, kon atong maugmad ang gugma sa mga butang sa kalibotan, bisan sa mga butang nga dili tingali daotan, kita nameligro. (1 Timoteo 6:9, 10) Gawas pa niana, kadaghanang butang diha sa kalibotan daotan kaayo ug makadaot kanato. Kon kita magtan-aw ug sine o mga programa sa telebisyon nga nagpasiugda sa kapintasan, materyalismo, o seksuwal nga imoralidad, kanang mga butanga mahimong dalawaton—ug dayon makapatental. Kon kita makig-uban sa mga tawo kansang pangunang interes anaa sa pagpaarang-arang sa ilang estilo sa kinabuhi o pag-ugmad ug mga kahigayonan sa negosyo, kanang mga butanga mahimong labawng hinungdanon usab kanato.—Mateo 6:24; 1 Corinto 15:33.
(1 Juan 2:17) Dugang pa, ang kalibotan nagakahanaw ug ang mga tinguha niini, apan siya nga nagabuhat sa kabubut-on sa Diyos magpabilin hangtod sa hangtod.
Hunahunaa Kon Unsay Angay Nimong Pagkatawo
18 Ang laing butang nga makatabang kanato sa pagsalikway sa “mga butang nga anaa sa kalibotan” mao ang paghinumdom sa mga pulong ni Juan: “Ang kalibotan nagakahanaw ingon man ang tinguha niini, apan siya nga nagabuhat sa kabubut-on sa Diyos magpabilin hangtod sa kahangtoran.” (1 Juan 2:17) Ang sistema ni Satanas daw permanente, apan moabot ra ang adlaw nga kini matapos. Walay butang sa kalibotan ni Satanas ang magpabilin. Ang paghinumdom niana nga kamatuoran makatabang kanato nga dili mahaylo sa mga tentasyon sa Yawa.
Pagpangitag Espirituwal nga Bahandi
(1 Juan 2:7, 8) Mga minahal, ang akong gisulat kaninyo dili bag-ong sugo, kondili daang sugo nga nabatonan ninyo sukad pa sa sinugdan. Kining daang sugo mao ang pulong nga inyong nadungog. 8 Bisan pa niana, kining sugo nga akong gihisgotan kaninyo maoy bag-ong sugo, nga gisunod niya ug ginasunod pod ninyo, tungod kay ang kangitngit nagakahanaw ug ang tinuod nga kahayag nagsidlak na.
Kasaligan ang mga Pahinumdom ni Jehova
14 Ang Kristohanon Gregong Kasulatan dunay daghang pahinumdom nga nagdasig kanato sa pagpakitag gugma sa usag usa. Si Jesus miingon nga ang ikaduhang kinadak-ang sugo mao nga “higugmaon mo ang imong silingan sama sa imong kaugalingon.” (Mat. 22:39) Sa susama, ang igsoon ni Jesus nga si Santiago nagtawag sa gugma ingong “harianong balaod.” (Sant. 2:8) Si apostol Juan misulat: “Mga hinigugma, ako nagsulat kaninyo, dili sa usa ka bag-ong sugo, kondili sa usa ka daang sugo nga nabatonan na ninyo sukad pa sa sinugdan.” (1 Juan 2:7, 8) Unsay gitumong ni Juan nga “daang sugo”? Siya nagtumong sa sugo nga magpakitag gugma. Kini ‘daan’ sa diwa nga gihatag kini ni Jesus mga dekada na kanhi, “sukad pa sa sinugdan.” Apan ‘bag-o’ usab kini kay ang mga tinun-an kinahanglang magpakitag nagsakripisyo sa kaugalingon nga gugma dihang mag-atubang ug bag-ong mga situwasyon. Ingong mga tinun-an ni Kristo, mapasalamaton ba kita sa mga pasidaan nga nakatabang kanatong dili maugmad ang hakog nga tinamdan, nga komon karon sa kalibotan ug makawala sa atong gugma sa isigkatawo?
(1 Juan 5:16, 17) Kon ang usa makakita sa iyang igsoon nga nakahimog sala nga dili makamatay, siya mag-ampo para kaniya, ug ang Diyos maghatag ug kinabuhi kaniya. Mapadapat ni niadtong wala makahimog sala nga makamatay. Oo, naay sala nga makamatay. Bahin nianang klaseha sa sala, dili nako siya sultihan nga mag-ampo. 17 Ang tanang pagkadili-matarong maoy sala, apan dunay sala nga dili makamatay.
Pasaylo, Pagpasaylo
Husto nga moampo sa Diyos nga pasayloon ang uban, bisan ang tibuok nga kongregasyon. Gihimo kini ni Moises maylabot sa nasod sa Israel, nga nagsugid sa sala sa nasod ug nangayog kapasayloan, ug siya gidungog nga may pag-uyon ni Jehova. (Num 14:19, 20) Dugang pa, si Solomon, panahon sa pagpahinungod sa templo, nag-ampo nga si Jehova magapasaylo unta sa iyang katawhan sa dihang sila makasala ug dayon mobiya sa ilang sayop nga dalan. (1Ha 8:30, 33-40, 46-52) Si Esdras naghawas sa publikong pagsugid sa mga sala sa nahibalik nga mga Hudiyo. Tungod sa iyang kinasingkasing nga pag-ampo ug pag-awhag ang katawhan milihok aron makadawat sa pagpasaylo ni Jehova. (Esd 9:13–10:4, 10-19, 44) Si Santiago nagdasig sa usa nga masakiton sa espirituwal nga ipatawag ang mga ansiyano sa kongregasyon aron sa pag-ampo alang kaniya, ug “kon siya nakasala, siya pagapasayloon.” (San 5:14-16) Hinunoa, adunay “sala nga makamatay,” ang sala batok sa balaang espiritu, usa ka tinuyong pagpakasala nga wala nay pagpasaylo. Dili gayod iampo sa usa ka Kristohanon kadtong nagapakasala niini nga paagi.—1Ju 5:16; Mat 12:31; Heb 10:26, 27; tan-awa ang SALA; ESPIRITU.
Pagbasa sa Bibliya
(1 Juan 1:1–2:6) Kami nagsulat ninyo maylabot sa pulong sa kinabuhi, nga naglungtad sukad pa sa sinugdan, nga amo mismong nadungog, nakita, naobserbahan, ug nahikap 2 (oo, ang kinabuhi gipadayag, ug kami nakakita ug nagpamatuod ug nagsulti kaninyo sa kinabuhing walay kataposan nga gikan sa Amahan ug gipadayag kanamo). 3 Among gisulti kaninyo ang among nakita ug nadungog aron kamo sab makauban namo. Ug niining atong panag-ubanay, kauban nato ang Amahan ug ang iyang Anak nga si Jesu-Kristo. 4 Ug gisulat namo kining mga butanga aron mabug-os ang atong kalipay. 5 Kini ang mensahe nga among nadungog gikan kaniya ug among ipahibalo kaninyo: Ang Diyos kahayag ug wala gayoy kangitngit kaniya. 6 Kon kita moingon, “Nakig-uban ta kaniya,” apan padayon tang naglakaw sa kangitngit, kita namakak ug wala magkinabuhi subay sa kamatuoran. 7 Apan kon naglakaw ta sa kahayag sama nga ang Diyos naa sa kahayag, mag-uban tang tanan, ug ang dugo ni Jesus nga iyang Anak maghinlo kanato gikan sa tanang sala. 8 Kon kita moingon, “Kita walay sala,” atong gilimbongan ang atong kaugalingon ug ang kamatuoran wala kanato. 9 Ang Diyos kasaligan ug matarong, mao nga kon atong itug-an ang atong mga sala, iya tang pasayloon ug hinloan sa tanang pagkadili-matarong. 10 Kon kita moingon, “Kita wala makasala,” gihimo nato siyang bakakon, ug ang iyang pulong wala kanato.
2 Mga anak, ako nagsulat kaninyo niining mga butanga aron dili mo makasala. Apan kon dunay makasala, duna tay magtatabang ngadto sa Amahan, si Jesu-Kristo, ang usa nga matarong. 2 Ug siya maoy halad pasig-uli para sa atong mga sala, apan dili lang sa atoa kondili para sab sa tibuok kalibotan. 3 Ug kon kita padayong motuman sa iyang mga sugo, kini nagpakita nga nakaila ta niya. 4 Kadtong moingon, “Nakaila ko niya,” apan wala magtuman sa iyang mga sugo bakakon, ug ang kamatuoran wala niining tawhana. 5 Apan kon ang usa nagtuman sa iyang pulong, nahingpit gayod niining tawhana ang iyang gugma sa Diyos. Pinaagi niini kita nahibalo nga kita nahiusa kaniya. 6 Kadtong moingon nga siya nahiusa kaniya obligadong magpadayon sa paglakaw sama sa iyang paglakaw.
Nobyembre 11-17
BAHANDI GIKAN SA PULONG SA DIYOS | 2 JUAN 1–JUDAS
“Kinahanglan Tang Makigbugno Aron Makapabilin sa Kamatuoran”
(Judas 3) Mga hinigugma, bisag naningkamot ko pag-ayo sa pagsulat kaninyo bahin sa kaluwasan nga gihuptan natong tanan, nakita nako nga kinahanglan mo nakong sulatan sa pag-awhag kaninyo nga makigbugno pag-ayo alang sa pagtuo nga gitugyan kausa alang sa tanang panahon ngadto sa mga balaan.
“Magpadayon sa Pagbaton ug Gahom Diha sa Ginoo”
8 Kita dili kay walay alamag sa mga laraw ni Satanas tungod kay ang Kasulatan nagpadayag sa iyang paninugdang mga taktika. (2 Corinto 2:11) Batok sa matarong nga tawong si Job, ang Yawa migamit ug grabeng kalisod sa panalapi, kamatayon sa mga minahal, pagsupak sa pamilya, pisikal nga pag-antos, ug walay-pasikaranan nga pagpanaway gikan sa mini nga mga higala. Si Job naguol pag-ayo ug mibati nga gitalikdan na siya sa Diyos. (Job 10:1, 2) Bisan tuod si Satanas dili tingali direktang nagpahinabo niining mga problemaha karon, ang maong mga kalisdanan nag-apektar gayod sa daghang Kristohanon, ug ang Yawa makagamit niana aron siya makabentaha.
9 Ang espirituwal nga mga kapeligrohan midagsang niining panahon sa kataposan. Kita nagkinabuhi sa kalibotan diin ang espirituwal nga mga tumong nasapawan sa materyal nga mga pangagpas. Ang media kanunayng naghulagway sa gidili nga sekso ingong tuboran sa kalipay inay kay sa kagul-anan. Ug ang kadaghanan nahimong “mga mahigugmaon sa kalipayan inay nga mga mahigugmaon sa Diyos.” (2 Timoteo 3:1-5) Kini nga panghunahuna makapameligro sa atong espirituwal nga panimbang gawas kon kita “kusganong makigbugno alang sa pagtuo.”—Judas 3.
Pagpangitag Espirituwal nga Bahandi
(Judas 4) Ang akong katarongan mao nga dihay nakasulod sa inyong taliwala nga dugay nang gitagna sa Balaang Kasulatan alang niini nga paghukom; sila mga tawong dili diyosnon nga naghimo sa dili hitupngang pagkamaayo sa atong Diyos ingong pasangil sa walay kaulaw nga paggawi ug nagpanghimakak sa atong bugtong nga tag-iya ug Ginoo, si Jesu-Kristo.
(Judas 12) Sila ang mga bato nga natago ilalom sa tubig diha sa inyong mga kombira sa gugma samtang sila nakigkombira kaninyo, mga magbalantay nga nagpakaon sa ilang kaugalingon nga walay kahadlok; mga panganod nga walay tubig nga gipadpad ngadto-nganhi sa hangin; walay bunga nga mga kahoy sa hinapos sa tinglarag, nga kaduha namatay ug nangaibot na;
Kombira sa Gugma
Ang Bibliya wala maghubit niini nga mga kombira sa gugma ni nagpaila kon unsa ka subsob kini gihimo. (Jud 12) Wala kini isugo ni Ginoong Jesu-Kristo o sa iyang mga apostoles, ug dayag nga kini dili pagaisipon nga obligadong sundon o permanente. Ang pipila nag-ingon nga kini maoy mga okasyon sa dihang ang adunahan nga mga Kristohanon nag-andam ug mga bangkete diin gidapit ang ilang kabos nga mga isigkamagtutuo. Sa tingob, ang mga ilo-sa-amahan, mga babayeng balo, mga adunahan, ug ang mga kabos nag-ambitay sa usa ka dagayang lamesa diha sa espiritu sa panag-igsoonay.
Bato
Ang laing Gregong pulong nga spi·lasʹ dayag nga nagtumong sa usa ka bato o kagaangan nga anaa sa ilalom sa tubig. Gigamit kini ni Judas sa pag-ilustrar sa pipila ka tawo nga miyuhot sa Kristohanong kongregasyon nga may daotang mga motibo. Sama sa natagong mga bato nga nagpameligro sa mga barko, mao man usab, kini nga mga tawo nahimong usa ka dakong kapeligrohan ngadto sa uban sulod sa kongregasyon. Siya miingon bahin sa maong mga tawo: “Kini mao ang mga bato nga natago ilalom sa tubig diha sa inyong mga kombira sa gugma samtang sila nangombira uban kaninyo.”—Jud 12.
(Judas 14, 15) Oo, si Enoc, ang ikapito sa linya sa kaliwatan gikan kang Adan, nagtagna usab bahin kanila dihang siya miingon: “Tan-awa! Si Jehova miabot uban sa iyang balaang mga panon 15 aron hukman ang tanan, ug aron hukmang sad-an ang tanang dili diyosnon maylabot sa tanan nilang dili diyosnong binuhatan nga ilang gibuhat sa dili diyosnong paagi, ug maylabot sa tanang makalilisang nga mga butang nga gisulti batok kaniya sa dili diyosnong mga makasasala.”
Siya Nakapahimuot Pag-ayo sa Diyos
Unsa ang tagna ni Enoc? Mao kini: “Tan-awa! Si Jehova miabot uban sa iyang balaang mga tinagpulo ka libo, aron ipahamtang ang paghukom batok sa tanan, ug aron hukmang sad-an ang tanang dili-diyosnon labot sa tanan nilang dili-diyosnong binuhatan nga ilang gibuhat sa dili-diyosnong paagi, ug labot sa tanang makalilisang nga mga butang nga gisulti sa dili-diyosnong mga makasasala batok kaniya.” (Judas 14, 15) Tingali mamatikdan nimo nga si Enoc nagsulti nga daw nahuman na ang hitabo, nga daw gituman na sa Diyos ang tagna. Ingon usab niana ang daghang tagna. Kini ang punto: Ang propeta nagsultig butang nga seguradong mahitabo nga mahimong ikaingon nga daw kini natuman na!—Isaias 46:10.
Siya Nakapahimuot Pag-ayo sa Diyos
Ang pagtuo ni Enoc makaaghat nato sa pagpangutana sa kaugalingon kon ang atong panglantaw sa kalibotan sama ba sa panglantaw sa Diyos. Ang paghukom nga maisogong gipahayag ni Enoc aplikado sa atong panahon sama sa panahon ni Enoc. Ingon sa gipasidaan ni Enoc, gipahinabo ni Jehova ang dakong Lunop batok sa maong dili diyosnong kalibotan sa panahon ni Noe. Apan kana nga kalaglagan maoy sumbanan sa mas dakong kalaglagan nga mahitabo sa umaabot. (Mateo 24:38, 39; 2 Pedro 2:4-6) Sama kaniadto, ang Diyos karon andam na uban sa iyang balaang mga anghel sa pagpahamtang ug matarong nga paghukom batok sa dili diyosnong kalibotan. Kitang tanan kinahanglang mamati sa pasidaan ni Enoc ug ipadayag kini ngadto sa uban. Tingali ang atong pamilya ug mga higala mosupak nato. Lagmit mobati kita nga nag-inusara. Pero wala biyai ni Jehova si Enoc; ug labaw nang dili niya biyaan ang iyang matinumanong mga alagad karon!
Pagbasa sa Bibliya
(2 Juan 1-13) Gikan sa tigulang nga lalaki ngadto sa piniling babaye ug sa iyang mga anak, nga gihigugma nako pag-ayo, ug dili lang ako kondili ang tanan sab nga nahibalo sa kamatuoran, 2 tungod sa kamatuoran nga nagpabilin kanato ug naa kanato hangtod sa hangtod. 3 Mabatonan unya nato ang dili hitupngang pagkamaayo, kaluoy, ug kalinaw gikan sa Diyos nga Amahan ug kang Jesu-Kristo, nga Anak sa Amahan, uban ang kamatuoran ug gugma. 4 Nalipay ko pag-ayo kay nahibaloan nako nga pipila sa imong mga anak nagsubay sa kamatuoran, sumala sa sugo nga nadawat nato gikan sa Amahan. 5 Busa karon ako naghangyo kanimo, pinili nga babaye, nga higugmaon nato ang usag usa. (Kining akong gisulat dili bag-ong sugo. Sugo kini nga nabatonan nato sukad pa sa sinugdan.) 6 Ug kini ang kahulogan sa gugma, nga padayon kitang maglakaw sumala sa iyang mga sugo. Mao kini ang sugo nga inyong nadungog sukad pa sa sinugdan, nga kamo padayong maglakaw niini. 7 Kay daghang maglilimbong ang nanungha sa kalibotan, kadtong dili moila nga si Jesu-Kristo mianhi ingong tawo. Mao kini ang maglilimbong ug ang antikristo. 8 Bantayi ang inyong kaugalingon, aron dili ninyo mawala ang mga butang nga among gihagoan, kondili madawat ninyo ang kompleto nga ganti. 9 Kadtong mosimang ug dili magpabilin sa pagtulon-an sa Kristo walay pag-uyon sa Diyos. Kadtong nagpabilin niini nga pagtulon-an mao ang may pag-uyon sa Amahan ug sa Anak. 10 Kon dunay moanha ninyo nga wala magdala niini nga pagtulon-an, ayaw siya pasak-a sa inyong balay o komostaha. 11 Kay ang mangomosta niya makaambit sa iyang daotang mga buhat. 12 Daghan pa kog isulti ninyo, pero dili nako gustong isulat kini, kay naglaom ko nga makaanha ninyo ug maestorya mo sa personal, aron mabug-os ang inyong kalipay. 13 Ang mga anak sa imong igsoong babaye, ang pinili, nangomosta nimo.
Nobyembre 18-24
BAHANDI GIKAN SA PULONG SA DIYOS | PINADAYAG 1-3
“Nahibalo Ko sa Imong mga Buhat”
(Pinadayag 1:20) Kon bahin sa sagradong tinago sa pito ka bituon nga imong nakita sa akong tuong kamot ug sa pito ka tangkawan nga bulawan: Ang pito ka bituon mao ang mga anghel sa pito ka kongregasyon, ug ang pito ka tangkawan mao ang pito ka kongregasyon.
Unsang Espiritu ang Imong Ginapakita?
8 Aron malikayan ang maong tinamdan, hinumdoman nato nga ang Bibliya nag-ingon nga may ‘pito ka bituon sa tuong kamot’ ni Jesus. Ang mga “bituon” nagsimbolo sa dinihogang mga ansiyano ug nagtumong usab sa tanang ansiyano sa kongregasyon. Si Jesus makahimo sa paggiya sa mga “bituon” sa iyang kamot sa paagi nga gusto niya. (Pin. 1:16, 20) Busa ingong Ulo sa kongregasyon, nahibalo gayod si Jesus kon unsay nagakahitabo tali sa mga ansiyano. “Ang iyang mga mata ingon sa nagdilaab nga kalayo” ug makita niya ang tanang butang. Busa kon dunay ansiyano nga kinahanglan gyong tul-iron, paneguroon ni Jesus nga matul-id siya sa hustong panahon ug sa hustong paagi. (Pin. 1:14) Samtang dili pa molihok si Jesus, padayon natong tahoron ang mga brader nga gitudlo pinaagi sa balaang espiritu, kay si Pablo misulat: “Magmasinugtanon kamo sa mga nagapanguna kaninyo ug magmapinasakopon, kay sila nagabantay sa inyong mga kalag ingon nga sila maoy maghatag ug husay; aron buhaton nila kini uban ang kalipay ug dili uban ang pagpanghupaw, kay kini makadaot kaninyo.”—Heb. 13:17.
(Pinadayag 2:1, 2) “Isulat kini ngadto sa anghel sa kongregasyon sa Efeso: Kini ang mga butang nga ginaingon sa usa nga nagkupot sa pito ka bituon diha sa iyang tuong kamot ug nagalakaw taliwala sa pito ka tangkawan nga bulawan: 2 ‘Nahibalo ko sa imong mga buhat, ug sa imong paghago ug paglahutay, ug nga dili nimo konsentihon ang daotang mga tawo, ug nga gisulayan nimo kadtong mga nag-ingon nga sila mga apostoles, apan dili diay, ug nahibaloan nimo nga sila bakakon.
Kita Gipanalipdan ni Jehova Alang sa Kaluwasan
11 Sa panan-awon nga narekord sa Pinadayag kapitulo 2 ug 3, gisusi sa hinimayang Jesu-Kristo ang pito ka kongregasyon sa Asia Minor. Gibutyag diha sa panan-awon nga nakita ni Kristo dili lang ang katibuk-ang kahimtang sa mga kongregasyon kondili ang espesipikong mga situwasyon niini. Dunay mga higayon nga naghisgot pa gani siyag mga indibiduwal, ug sa matag kahimtang, naghatag siyag nahiangayng pagdayeg o tambag. Unsay gipasabot niini? Ang pito ka kongregasyon naghulagway sa mga dinihogan human sa 1914, ug ang tambag nga gihatag kanila mapadapat usab sa tanang kongregasyon sa katawhan sa Diyos karon. Busa makaingon kita nga gigiyahan ni Jehova ang iyang katawhan karon pinaagi sa iyang Anak. Sa unsang paagi kita makabenepisyo niana?
Nunot sa Organisasyon ni Jehova
20 Ang pagnunot sa inanayng nagauswag nga organisasyon ni Jehova nagkinahanglan nga atong ilhon ang tinudlo-sa-Diyos nga papel ni Jesu-Kristo ingong “ulo sa kongregasyon.” (Efeso 5:22, 23) Takos tagdon, usab, ang Isaias 55:4, diin giingnan kita: “Tan-awa! Ingong saksi ngadto sa nasodnong mga pundok akong [Jehova] gihatag siya, ingong pangulo ug komandante ngadto sa nasodnong mga pundok.” Tinong nahibalo si Jesus kon unsaon pagpanguna. Nakaila usab siya sa iyang mga karnero ug sa ilang mga buhat. Sa pagkatinuod, sa dihang gisusi niya ang pito ka kongregasyon sa Asia Minor, lima ka beses siyang miingon: “Nahibalo ako sa imong mga buhat.” (Pinadayag 2:2, 19; 3:1, 8, 15) Nahibalo usab si Jesus sa atong mga panginahanglan, sama sa iyang Amahan, si Jehova. Sa wala pa ihatag ang Modelong Pag-ampo, si Jesus nag-ingon: “Ang Diyos nga inyong Amahan nahibalo sa mga butang nga inyong gikinahanglan sa wala pa gani kamo mangayo kaniya.”—Mateo 6:8-13.
Pagpangitag Espirituwal nga Bahandi
(Pinadayag 1:7) Tan-awa! Siya moabot uban sa mga panganod, ug ang tanang mata makakita kaniya, bisan kadtong nagduslak kaniya; ug ang tanang tribo sa yuta magpukpok sa ilang dughan sa kaguol tungod kaniya. Oo, Amen.
Pagalaglagon ang mga Kaaway sa Gingharian sa Diyos
10 Pagpahayag sa hukom. Ang tanang kaaway sa Gingharian sa Diyos mapugos pagsaksig usa ka hitabo nga makadugang sa ilang kasakit. Si Jesus miingon: “Ilang makita ang Anak sa tawo nga moanhi diha sa mga panganod uban ang dakong gahom ug himaya.” (Mar. 13:26) Kining talagsaon kaayong pagpasundayag sa gahom magpaila nga miabot na si Jesus sa pagpahayag sa hukom. Sa laing bahin niini mismong tagnaa, si Jesus mihatag ug dugang detalye bahin sa hukom nga ipahayag nianang panahona. Kana nga impormasyon makita sa ilustrasyon sa mga karnero ug mga kanding. (Basaha ang Mateo 25:31-33, 46.) Ang maunongong mga tigsuportar sa Gingharian sa Diyos pagahukmang “mga karnero” ug ‘mohangad sa [ilang] mga ulo,’ kay nahibalo nga ang ilang “kaluwasan nagakaduol na.” (Luc. 21:28) Pero ang mga magsusupak sa Gingharian pagahukmang “mga kanding” ug “magapukpok sa ilang kaugalingon sa pagminatay,” kay nahibalo nga “walay kataposang kalaglagan” ang modangat kanila.—Mat. 24:30; Pin. 1:7.
(Pinadayag 2:7) Kadtong makadungog, paminaw pag-ayo sa ginaingon sa espiritu ngadto sa mga kongregasyon: Ang usa nga magmadaogon tugotan nakong mokaon sa kahoy sa kinabuhi, nga anaa sa paraiso sa Diyos.’
Mga Pangunang Punto sa Basahon sa Pinadayag—I
2:7—Unsa ang “paraiso sa Diyos”? Sanglit kining mga pulonga gitumong man sa dinihogang mga Kristohanon, ang paraiso dinhi lagmit nagpasabot sa samag paraiso nga kahimtang sa langit—ang presensiya mismo sa Diyos. Ang matinumanong dinihogan makapribilehiyo sa pagkaon sa “kahoy sa kinabuhi.” Sila makadawat sa pagkawalay-kamatayon.—1 Cor. 15:53.
Pagbasa sa Bibliya
(Pinadayag 1:1-11) Usa kini ka pinadayag pinaagi ni Jesu-Kristo, nga gihatag sa Diyos kaniya, aron ipakita sa iyang mga ulipon ang mga butang nga kinahanglang mahitabo sa dili madugay. Ug gipadala niya ang iyang anghel aron ipakita kini pinaagig mga ilhanan ngadto sa iyang ulipon nga si Juan, 2 kinsa nagpamatuod sa pulong nga gihatag sa Diyos ug sa pamatuod nga gihatag ni Jesu-Kristo, oo, sa tanang butang nga iyang nakita. 3 Malipayon ang usa nga nagabasag kusog ug kadtong mga nagapatalinghog sa mga pulong niining tagnaa ug nagatuman sa mga butang nga nasulat niini, kay ang gitakdang panahon duol na. 4 Si Juan, ngadto sa pito ka kongregasyon nga naa sa probinsiya sa Asia: Hinaot nga maanaa kaninyo ang dili hitupngang pagkamaayo ug kalinaw gikan sa “Usa nga mao ang karon ug ang kaniadto ug ang moabot,” ug gikan sa pito ka espiritu nga anaa sa atubangan sa iyang trono, 5 ug gikan kang Jesu-Kristo, “ang Matinumanong Saksi,” “ang panganay gikan sa mga patay,” ug “ang Magmamando sa mga hari sa yuta.” Kaniya nga nahigugma nato ug nagpahigawas nato gikan sa atong mga sala pinaagi sa iyang dugo— 6 ug kita iyang gihimong usa ka gingharian, mga saserdote sa iyang Diyos ug Amahan—oo, ngadto kaniya ang himaya ug ang gahom hangtod sa hangtod. Amen. 7 Tan-awa! Siya moabot uban sa mga panganod, ug ang tanang mata makakita kaniya, bisan kadtong nagduslak kaniya; ug ang tanang tribo sa yuta magpukpok sa ilang dughan sa kaguol tungod kaniya. Oo, Amen. 8 “Ako ang Alfa ug ang Omega,” miingon si Jehova nga Diyos, “ang Usa nga mao ang karon ug ang kaniadto ug ang moabot, ang Labing Gamhanan.” 9 Ako si Juan, ang inyong igsoon ug mag-aambit uban ninyo sa kasakitan ug sa gingharian ug sa paglahutay tungod sa pagpakig-uban kang Jesus, nga nakaabot sa isla nga gitawag ug Patmos sa pagsulti bahin sa Diyos ug sa pagpamatuod bahin kang Jesus. 10 Pinaagi sa balaang espiritu nakaabot ko sa adlaw sa Ginoo, ug sa akong luyo nakadungog kog kusog nga tingog nga sama nianang sa trompeta, 11 nga miingon: “Ang imong makita isulat sa usa ka linukot nga basahon ug ipadala kini ngadto sa pito ka kongregasyon: sa Efeso, Smirna, Pergamo, Tiatira, Sardis, Filadelfia, ug Laodicea.”
Nobyembre 25–Disyembre 1
BAHANDI GIKAN SA PULONG SA DIYOS | PINADAYAG 4-6
“Ang Pag-asdang sa Upat ka Mangangabayo”
(Pinadayag 6:2) Ug nakita nako, ug tan-awa! usa ka puting kabayo, ug ang nagsakay niini may pana; ug gihatag kaniya ang usa ka korona, ug siya miasdang nga nagapangdaog ug aron bug-oson ang iyang pagpangdaog.
Kinsa ang Upat ka Mangangabayo?
Kinsa ang nagsakay sa puting kabayo? Makita nato ang tubag sa basahon sa Bibliya nga Pinadayag, nga naghisgot niining langitnong mangangabayo ingong “Ang Pulong sa Diyos.” (Pinadayag 19:11-13) Kana nga titulo, Ang Pulong, nagtumong kang Jesu-Kristo, kay siya ang tigpamaba sa Diyos. (Juan 1:1, 14) Siya gitawag sab ug “Hari sa mga hari ug Ginoo sa mga ginoo” ug gilarawan ingong “Matinumanon ug Matuod.” (Pinadayag 19:16) Klaro nga siya dunay awtoridad aron mahimong manggugubat nga hari, ug dili niya gamiton ang iyang gahom sa paghimog daotan. Pero naay mga pangutanang motungha.
Kinsa ang Upat ka Mangangabayo?
Kanus-a misugod pag-abante ang upat ka mangangabayo? Hinumdomi nga ang unang mangangabayo, si Jesus, misugod pag-abante dihang siya nahimong hari. (Pinadayag 6:2) Kanus-a nahimong Hari si Jesus sa langit? Wala dayon siya nahimong hari pagbalik niya sa langit human siya gibanhaw, kay ang Bibliya nag-ingon nga kinahanglan pang maghulat ug pipila ka panahon. (Hebreohanon 10:12, 13) Gihatagan ni Jesus ang iyang mga sumusunod ug ilhanan kon kanus-a matapos ang maong paghulat ug ang sinugdanan sa iyang paghari sa langit. Siya nag-ingon nga dihang magsugod siya pagmando, mosamot ka grabe ang mga panghitabo sa kalibotan. Duna unyay mga gubat, kanihit sa pagkaon, ug kamatay. (Mateo 24:3, 7; Lucas 21:10, 11) Wala madugay human mahitabo ang Gubat Kalibotan I niadtong 1914, naklaro nga nagsugod na ang makuyaw nga yugto sa panahon nga gitawag sa Bibliya ug “kataposang mga adlaw.”—2 Timoteo 3:1-5.
(Pinadayag 6:4-6) Dihay laing migula, usa ka kabayo nga ang kolor samag kalayo, ug ang nagsakay niini gitugotan sa pagkuha sa pakigdait gikan sa yuta aron magpinatyanay ang mga tawo, ug siya gihatagan ug dakong espada. 5 Dihang gibuksan niya ang ikatulong selyo, nadungog nako ang ikatulong buhing linalang nga nag-ingon: “Dali!” Ug nakita nako, ug tan-awa! usa ka itom nga kabayo, ug ang nagsakay niini naggunit ug timbangan. 6 Nakadungog kog tingog nga daw naggikan sa taliwala sa upat ka buhing linalang nga nag-ingon: “Usa ka quart nga trigo alang sa usa ka denario, ug tulo ka quart nga sebada alang sa usa ka denario; ug ayawg unsaa ang lana sa olibo ug ang bino.”
Kinsa ang Upat ka Mangangabayo?
Ang nagsakay sa pulang kabayo nagsimbolo sa gubat. Matikdi nga iyang gikuha ang kalinaw dili lang sa pipila ka nasod kondili sa tibuok kalibotan. Niadtong 1914, sa unang higayon sa kasaysayan, nahitabo ang tibuok kalibotang gubat. Nasundan kini ug ikaduhang gubat sa kalibotan, nga mas daghan ang namatay. Gibanabana sa uban nga ang total nga gidaghanon sa mga nangamatay sa gubat sukad sa 1914 miabot ug kapig 100 ka milyon! Daghan sab kaayo ang grabeng naangol.
Kinsa ang Upat ka Mangangabayo?
“Nakita ko, ug, tan-awa! usa ka itom nga kabayo; ug ang nagsakay niini may timbangan diha sa iyang kamot. Ug nadungog ko ang usa ka tingog nga maorag diha sa taliwala sa upat ka buhing linalang nga nag-ingon: ‘Usa ka litrong trigo alang sa usa ka denario, ug tulo ka litrong sebada alang sa usa ka denario; ug ayaw unsaa ang lana sa olibo ug ang bino.’”—Pinadayag 6:5, 6.
Ang nagsakay sa itom nga kabayo nagsimbolo sa kanihit sa pagkaon. Grabe kaayo ang kanihit kay gihisgotan nga ang usa ka litrong trigo nagkantidad ug usa ka denario, nga usa ka adlawng suweldo niadtong unang siglo! (Mateo 20:2) Ang usa ka denario makapalit sab ug tulo ka litrong sebada, nga ubos ug kalidad kay sa trigo. Kana dali rang mahurot sa usa ka dakong pamilya. Gipasidan-an sab ang mga tawo niadtong panahona nga magdaginot bisan sa ilang adlaw-adlawng konsumo sa pangunang pagkaon sama sa lana sa olibo ug bino.
(Pinadayag 6:8) Ug nakita nako, ug tan-awa! usa ka luspad nga kabayo, ug ang nagsakay niini ginganlag Kamatayon. Ug ang Lubnganan nagsunod sa iyang luyo. Ug gihatagan silag awtoridad ibabaw sa ikaupat nga bahin sa yuta, sa pagpamatay pinaagig taas nga espada ug kanihit sa pagkaon ug makamatayng hampak ug pinaagi sa bangis nga mga mananap sa yuta.
Kinsa ang Upat ka Mangangabayo?
Ang ikaupat nga mangangabayo nagsimbolo sa kamatayon tungod sa epidemya ug sa ubang hinungdan. Wala madugay human sa 1914, ang trangkaso Espanyola nakapatay ug milyonmilyong tawo. Posible nga mga 500 ka milyong tawo ang nataptan, halos usa sa matag tulo ka tawo nga nabuhi niadtong panahona!
Dili ra trangkaso Espanyola ang nakapatay ug minilyong tawo. Gibanabana sa mga eksperto nga ginatos ka milyon ang namatay tungod sa buti sa ika-20 nga siglo. Karon, minilyon sab ang namatay tungod sa AIDS, tuberkulosis, ug malarya, bisan pa sa grabeng pag-research nga gihimo sa medisina.
Tungod sa gubat, kanihit sa pagkaon, ug epidemya daghan kaayong tawo ang nangamatay. Ang Hades walay hunong ug walay kaluoy sa pagpanigom sa mga biktima.
Pagpangitag Espirituwal nga Bahandi
(Pinadayag 4:4) Sa palibot sa trono dihay 24 ka trono, ug niini nga mga trono nakita nako nga naglingkod ang 24 ka ansiyano nga nagsul-ob ug puting mga besti, ug diha sa ilang ulo may mga koronang bulawan.
(Pinadayag 4:6) Atubangan sa trono dihay morag dagat nga bildo, nga samag kristal. Sa taliwala sa trono ug libot sa trono dihay upat ka buhing linalang nga nalukop ug mga mata sa atubangan ug likod.
Ang Mahimayaon nga Langitnong Trono ni Jehova
8 Si Juan nahibalo nga ang mga saserdote gitudlo sa pag-alagad diha sa karaang tabernakulo. Lagmit natingala siya sa pagkakita sa sunod niyang gihubit: “Ug ang trono gilibotan sa kawhaag-upat ka trono, ug diha niini nga mga trono akong nakita nga naglingkod ang kawhaag-upat ka ansiyano nga nagsul-ob ug maputing panggawas nga mga besti, ug diha sa ilang ulo may mga koronang bulawan.” (Pinadayag 4:4) Oo, imbes mga saserdote, dihay 24 ka ansiyano nga naglingkod sa trono ug may mga korona sama sa mga hari. Kinsa man kini nga mga ansiyano? Walay lain kondili ang mga dinihogan sa Kristohanong kongregasyon, nga gibanhaw ug naglingkod na sa langitnong katungdanan nga gisaad ni Jehova kanila. Sa unsang paagi nahibalo kita niana?
Ang Mahimayaon nga Langitnong Trono ni Jehova
19 Unsay gihulagwayan niining maong mga linalang? Ang usa ka panan-awon nga gitaho sa laing manalagna, si Ezequiel, motabang kanato aron mahibaloan ang tubag. Nakita ni Ezequiel si Jehova nga naglingkod sa trono sakay sa usa ka langitnong karo, nga inubanan sa buhing mga linalang nga adunay mga kinaiyahan sama niadtong gihubit ni Juan. (Ezequiel 1:5-11, 22-28) Sa ulahi, nakita pag-usab ni Ezequiel ang maong trono nga karo nga giubanan sa buhing mga linalang. Apan, niining higayona, iyang gipaila ang buhing mga linalang ingong mga kerubin. (Ezequiel 10:9-15) Ang upat ka buhing mga linalang nga nakita ni Juan naghawas gayod sa daghang kerubin sa Diyos—mga linalang nga taas ug ranggo diha sa Iyang espirituhanong organisasyon. Dili talagsaon kang Juan ang pagkakita ug mga kerubin nga haduol kaayo kang Jehova, tungod kay sa kahikayan sa karaang tabernakulo, dihay duha ka kerubin nga bulawan diha sa ibabaw sa tabon sa arka sa pakigsaad, nga naghawas sa trono ni Jehova. Gikan sa taliwala niining mga kerubin madungog ang tingog ni Jehova nga naghatag ug mga sugo ngadto sa nasod.—Exodo 25:22; Salmo 80:1.
(Pinadayag 5:5) Apan ang usa sa mga ansiyano miingon kanako: “Hunong nag hilak. Tan-awa! Ang Leyon sa tribo ni Juda, ang gamot ni David, nakadaog mao nga takos siya sa pagbukas sa linukot nga basahon ug sa pagtangtang sa pito ka selyo niini.”
“Tan-awa! Ang Leyon nga Gikan sa Tribo ni Juda”
5 Ang leyon kasagarang gilangkit sa kaisog. Nakaatubang ka na ba sukad ug hingkod ug dako nga laking leyon? Kon nakaatubang ka na, lagmit gayod nga wala ka mameligro kay may koral nga nag-ulang sa mananap ug kanimo diha sa zoo. Bisan pa niana, mahimong makalilisang ang maong kasinatian. Samtang imong gitutokan kining dako ug kusgang hayop ug kini misud-ong kanimo nga way-pagpamilok, dili ka gayod makahunahuna nga ang leyon mokalagiw kay may gikahadlokan. Ang Bibliya naghisgot bahin sa “leyon, nga mao ang labing gamhanan taliwala sa mga mananap ug dili motalikod sa atubangan ni bisan kinsa.” (Proverbio 30:30) Ingon niana ang kaisog ni Kristo.
6 Atong hisgotan kon giunsa pagpasundayag ni Jesus ang samag-leyon nga kaisog sa tulo ka paagi: sa pagbarog dapig sa kamatuoran, sa pagtuboy sa hustisya, ug sa pag-atubang sa pagsupak. Masabtan usab nato nga kitang tanan—bisan kon kinaiyanhong maisogon o dili—makasundog kang Jesus sa pagpakitag kaisog.
Pagbasa sa Bibliya
(Pinadayag 4:1-11) Human niini nakakita kog bukas nga pultahan sa langit, ug ang unang tingog nga akong nadungog nga nakigsulti kanako maoy samag trompeta, nga nag-ingon: “Saka diri, ug akong ipakita nimo ang mga butang nga kinahanglang mahitabo.” 2 Human niini kalit nga midangat kanako ang balaang espiritu, ug tan-awa! nakakita kog trono nga nahimutang sa langit, ug dihay naglingkod sa trono. 3 Ug ang Usa nga naglingkod may panagway nga samag batong haspe ug batong sardio, ug ang trono gilibotan sa usa ka balangaw nga samag esmeralda tan-awon. 4 Sa palibot sa trono dihay 24 ka trono, ug niini nga mga trono nakita nako nga naglingkod ang 24 ka ansiyano nga nagsul-ob ug puting mga besti, ug diha sa ilang ulo may mga koronang bulawan. 5 Dihay mga kilat ug mga tingog ug mga dalugdog nga nagagikan sa trono; ug dihay pito ka lampara sa kalayo nga nagdilaab atubangan sa trono, ug kini ang pito ka espiritu sa Diyos. 6 Atubangan sa trono dihay morag dagat nga bildo, nga samag kristal. Sa taliwala sa trono ug libot sa trono dihay upat ka buhing linalang nga nalukop ug mga mata sa atubangan ug likod. 7 Ang unang buhing linalang samag leyon, ug ang ikaduhang buhing linalang samag toreyong baka, ug ang ikatulong buhing linalang may nawong nga sama sa tawo, ug ang ikaupat nga buhing linalang samag naglupad nga agila. 8 Kon bahin sa upat ka buhing linalang, ang matag usa kanila may unom ka pako; nalukop silag mata sa palibot ug sa ilalom. Ug sa adlaw ug gabii padayon silang nagaingon: “Balaan, balaan, balaan si Jehova nga Diyos, ang Labing Gamhanan, nga mao ang kaniadto ug ang karon ug ang moabot.” 9 Sa matag higayon nga ang buhing mga linalang maghatag ug himaya ug dungog ug pagpasalamat ngadto sa Usa nga naglingkod sa trono, ang Usa nga buhi hangtod sa kahangtoran, 10 ang 24 ka ansiyano manghapa atubangan sa Usa nga naglingkod sa trono ug mosimba sa Usa nga buhi hangtod sa kahangtoran, ug iitsa nila ang ilang mga korona atubangan sa trono, nga magaingon: 11 “Takos ka, Jehova nga among Diyos, nga modawat sa himaya ug sa dungog ug sa gahom, kay gilalang nimo ang tanang butang, ug tungod sa imong kabubut-on sila milungtad ug nalalang.”