Reperensiya Para sa Workbook sa Tigom nga Kinabuhi ug Ministeryo
Oktubre 7-13
BAHANDI GIKAN SA PULONG SA DIYOS | SANTIAGO 3-5
“Ipakita ang Kaalam nga Gikan sa Diyos”
(Santiago 3:17) Apan ang kaalam nga gikan sa langit maoy una sa tanan putli, unya makigdaiton, makataronganon, andam mosunod, puno sa kaluoy ug maayong mga bunga, dili mapihigon, dili salingkapaw.
Apektado ba ang Imong Kinabuhi sa “Kaalam nga Gikan sa Itaas”?
9 “Una sa tanan putli.” Ang pagkaputli nagpasabot nga lunsay ug wala mahugawi dili lamang sa panggawas kondili sa kahiladman. Ang Bibliya naglangkit sa kaalam uban sa kasingkasing, apan ang langitnong kaalam dili makasulod sa kasingkasing nga nahugawan sa daotang mga hunahuna, mga tinguha, ug mga motibo. (Proverbio 2:10; Mateo 15:19, 20) Bisan pa niana, kon putli ang atong kasingkasing—nga mao, kutob sa posible alang sa dili-hingpit nga mga tawo—kita ‘mopahilayo sa daotan ug mobuhat sa maayo.’ (Salmo 37:27; Proverbio 3:7) Dili ba haom nga ang kaputli mao ang unang hiyas sa kaalam nga nahitala? Kon buot sabton, kon kita dili mahinlo sa moral ug sa espirituwal, sa unsang paagi kita tinuod nga makasumbalik-silaw sa ubang mga hiyas sa kaalam gikan sa itaas?
10 “Unya makigdaiton.” Ang langitnong kaalam motukmod kanato sa pagpangagpas sa pakigdait, nga maoy usa ka bunga sa espiritu sa Diyos. (Galacia 5:22) Maningkamot kita sa paglikay sa pagbungkag sa “bugkos sa pakigdait” nga maghiusa sa katawhan ni Jehova. (Efeso 4:3) Maningkamot usab kita nga mapasig-uli ang pakigdait sa dihang matugaw kini. Nganong hinungdanon man kini? Ang Bibliya nag-ingon: “Magpadayon . . . sa pagpuyo nga madaiton; ug ang Diyos sa gugma ug sa kalinaw magauban kaninyo.” (2 Corinto 13:11) Busa samtang kita magpadayon sa pagpuyo nga makigdaiton, ang Diyos sa kalinaw magauban kanato. Ang atong tinagdan sa mga isigkamagsisimba adunay direktang kalabotan sa atong relasyon kang Jehova. Sa unsang paagi makapamatuod kita nga makigdaiton? Tagda ang usa ka pananglitan.
(Santiago 3:17) Apan ang kaalam nga gikan sa langit maoy una sa tanan putli, unya makigdaiton, makataronganon, andam mosunod, puno sa kaluoy ug maayong mga bunga, dili mapihigon, dili salingkapaw.
Apektado ba ang Imong Kinabuhi sa “Kaalam nga Gikan sa Itaas”?
12 “Makataronganon.” Unsay kahulogan nga mahimong makataronganon? Sumala sa mga eskolar, ang orihinal nga Gregong pulong nga gihubad “makataronganon” sa Santiago 3:17 lisod hubaron. Gigamit sa mga maghuhubad ang mga pulong sama sa “malumo,” “mapugnganon,” ug “may-konsiderasyon.” Ang literal nga kahulogan sa Gregong pulong maoy “mapahiuyonon.” Sa unsang paagi ikapasundayag nato nga apektado kita sa maong kinaiyahan sa kaalam gikan sa itaas?
Apektado ba ang Imong Kinabuhi sa “Kaalam nga Gikan sa Itaas”?
14 “Andam mosunod.” Ang Gregong pulong nga gihubad “andam mosunod” dili makita sa ubang bahin sa Kristohanon Gregong Kasulatan. Sumala sa usa ka eskolar, kining pulonga “sagad gamiton bahin sa militaryong disiplina.” Kini naghatag sa ideya nga “dali nga danihon” ug “mapinasakopon.” Ang usa nga gimandoan sa kaalam gikan sa itaas mosunod dayon sa ginaingon sa Kasulatan. Siya dili ilado ingong tawo nga modesisyon ug unya dili maapektahan sa bisan unsang mga impormasyon nga mosumpaki kaniya. Hinunoa, siya daling mag-usab sa dihang ipadayag kaniya ang tin-awng ebidensiya sa Kasulatan nga siya nakahimog sayop nga baroganan o sayop nga mga konklusyon. Kana ba ang imong dungog?
“Tugob sa Kaluoy ug Maayong mga Bunga”
15 “Tugob sa kaluoy ug maayong mga bunga.” Ang kaluoy maoy hinungdanong bahin sa kaalam gikan sa itaas, kay ang maong kaalam giingon man nga “tugob sa kaluoy.” Matikdi nga ang “kaluoy” ug “maayong mga bunga” gidungan paghisgot. Haom kini, kay diha sa Bibliya, ang kaluoy kasagaran kaayong nagtumong sa aktibong pagkabalaka alang sa uban, kahangawa nga mopatunghag daghang malulotong mga binuhatan. Ang usa ka reperensiya nagbatbat sa kaluoy ingong “pagbati sa kasubo tungod sa daotang kahimtang sa usa ka tawo ug pagtinguha nga mahupayan kana.” Busa, ang kaalam sa Diyos dili ingong way-kadasig, way-pagbati, o pagkadaghag kahibalo lamang. Hinunoa, kini madasigon, dulot sa kasingkasing, ug sensitibo. Sa unsang paagi ikapakita nato nga kita tugob sa kaluoy?
(Santiago 3:17) Apan ang kaalam nga gikan sa langit maoy una sa tanan putli, unya makigdaiton, makataronganon, andam mosunod, puno sa kaluoy ug maayong mga bunga, dili mapihigon, dili salingkapaw.
Apektado ba ang Imong Kinabuhi sa “Kaalam nga Gikan sa Itaas”?
18 “Dili mapihigpihigon.” Ang kaalam sa Diyos dili maapektahan sa rasanhong pagkamapihigon ug sa nasodnong garbo. Kon kita gigiyahan sa maong kaalam, kita maningkamot sa paglangkat sa bisan unsang kiling sa pagpadayag sa paboritismo gikan sa atong mga kasingkasing. (Santiago 2:9) Dili nato palabihon pagtagad ang uban tungod sa ilang pagkaedukado, pagkadato, o pagkamay-responsabilidad sa kongregasyon; ni tamayon nato si bisan kinsa sa atong mga isigkamagtutuo, bisan kon unsa sila ka timawa nga tan-awon. Kon si Jehova naghimo kanila nga mga dumadawat sa iyang gugma, angay gayong isipon nato sila ingong takos sa atong gugma.
19 “Dili salingkapaw.” Ang Gregong pulong alang sa “salingkapaw” mahimong mopunting sa “usa ka aktor nga nagdulag usa ka papel.” Sa karaang kapanahonan, ang Grego ug Romanong mga aktor nagsul-ob ug dagkong mga maskara sa dihang magapasundayag. Busa, ang Gregong pulong alang sa “salingkapaw” napadapat sa usa ka tawo nga nagpakaaron-ingnon, o sa tawong nagtakoban. Kining kinaiyahan sa kaalam sa Diyos angayng mag-apektar dili lamang kon giunsa nato pagtagad ang isigkamagsisimba kondili kon unsa usab ang atong pagbati bahin kanila.
Pagpangitag Espirituwal nga Bahandi
(Santiago 4:5) O naghunahuna ba mo nga wala ray katuyoan ang pag-ingon sa kasulatan: “Ang espiritu nga nagpuyo sulod kanato padayong nangandoy uban ang kasina”?
Mga Pangunang Punto Gikan sa mga Sulat ni Santiago ug Pedro
4:5—Unsang tekstoha ang gikutlo dinhi ni Santiago? Wala magkutlo si Santiago ug espesipikong teksto. Apan, kining maong inspiradong mga pulong posibleng gipasukad sa diwa sa Genesis 6:5; 8:21; Proverbio 21:10; ug Galacia 5:17.
(Santiago 4:11, 12) Mga igsoon, hunong na sa pagsulti batok sa usag usa. Bisan kinsa nga mosulti batok sa usa ka igsoon o maghukom sa iyang igsoon nagsulti batok sa balaod ug naghukom sa balaod. Karon kon hukman nimo ang balaod, dili ka magtutuman sa balaod kondili maghuhukom. 12 Usa lang ang Tighatag ug Balaod ug Maghuhukom, ang usa nga makaluwas ug makalaglag. Apan ikaw, kinsa ba ka nga maghukom sa imong isigkatawo?
Ang Pagtuo Maghimo Kanatong Mapailobon ug Mainampoon
8 Usa ka sala ang pagsultig batok sa kaubang magtutuo. (Santiago 4:11, 12) Bisan pa niana ang pipila hinawayon sa kaubang mga Kristohanon, tingali ingong resulta sa ilang kaugalingong pagpakamatarong sa kaugalingon nga tinamdan o tungod kay buot nilang ituboy ang ilang kaugalingon pinaagi sa pagpaubos sa uban. (Salmo 50:20; Proverbio 3:29) Ang Gregong pulong nga gihubad ug “pagpamulong batok” nagkahulogan ug pagkamabatokon ug nagsugyot ug paghimog hinobra o bakak nga sumbong. Sama ra kini nga grabeng gihukman ang igsoon. Sa unsang paagi katumbas kini sa ‘pagpamulong batok ug paghukom sa balaod sa Diyos’? Aw, ang mga eskriba ug mga Pariseo ‘maalistohong naghiklin sa sugo sa Diyos’ ug naghukom sumala sa ilang kaugalingong mga sukdanan. (Marcos 7:1-13) Sa susama, kon atong gihusgahan ang usa ka igsoon nga wala husgahi ni Jehova, dili ba kita ‘nagahukom sa balaod sa Diyos’ ug sad-ang nagsugyot nga kana nakulangan? Ug pinaagi sa dili-makataronganong pagsaway sa atong igsoon, wala nato tumana ang balaod sa gugma.—Roma 13:8-10.
Pagbasa sa Bibliya
(Santiago 3:1-18) Mga igsoon ko, dili tanan kaninyo ang angayng mahimong mga magtutudlo, kay nahibalo nga kita makadawat ug mas bug-at nga paghukom. 2 Kay kitang tanan mapandol sa makadaghan. Kon dunay dili mapandol sa pulong, hingpit siya nga tawo, nga makahimo usab sa pagrenda sa iyang tibuok lawas. 3 Kon rendahan nato ang baba sa mga kabayo aron mosunod sila kanato, makontrolar usab nato ang ilang tibuok lawas. 4 Tan-awa usab ang mga barko: Bisag dagko kaayo kini ug ginaduso sa kusog nga hangin, gikontrolar kini sa usa ka gamay kaayong timon bisan asa kini iliso sa timonil. 5 Sa susama, ang dila maoy gamay kaayong parte sa lawas, apan kini grabeng makapanghambog. Gamay ra gyod kaayong kalayo ang gikinahanglan sa pagsunog sa dako kaayong lasang! 6 Ang dila sama usab sa kalayo. Sa tanang parte sa atong lawas, ang dila ang punog pagkadaotan, kay ginahugawan niini ang tibuok lawas ug ginapadilaab niini ang tibuok kinabuhi, ug kini gipadilaab sa Gehenna. 7 Kay ang tanang matang sa ihalas nga mananap, langgam, reptilya, ug linalang sa dagat ginamanso ug namanso sa mga tawo. 8 Apan walay tawong makamanso sa dila. Kini makadaot ug dili makontrolar, nga punog makamatayng hilo. 9 Pinaagi niini ginadayeg nato si Jehova, ang Amahan, apan pinaagi usab niini ginatunglo nato ang mga tawo nga gibuhat “nga kaamgid sa Diyos.” 10 Gikan sa mao rang baba nagagula ang pagdayeg ug pagtunglo. Mga igsoon ko, dili angayng mahitabo kining mga butanga. 11 Dili ba ang presko nga tubig ug ang pait nga tubig wala maggikan sa usa lang ka tuboran? 12 Mga igsoon ko, dili ba ang kahoyng igos dili makapamungag mga olibo, o ang punoan sa ubas makapamungag igos? Ang parat nga tubig dili usab makapatunghag preskong tubig. 13 Kinsay dunay kaalam ug pagsabot taliwala kaninyo? Ipakita niya kana pinaagi sa maayong panggawi, pinaagi sa binuhatan nga gihimo uban ang kalumo nga nagsumikad sa kaalam. 14 Apan kon ang inyong kasingkasing naghambin ug grabeng pagselos ug dunay tinguha nga makigtigi, ayaw panghambog ug pamakak batok sa kamatuoran. 15 Dili kini ang kaalam nga gikan sa langit; kini yutan-on, mananapon, demonyohanon. 16 Kay kon anaa ang pagselos ug pagkamatigion, anaa usab ang kasamok ug ang tanang daotang butang. 17 Apan ang kaalam nga gikan sa langit maoy una sa tanan putli, unya makigdaiton, makataronganon, andam mosunod, puno sa kaluoy ug maayong mga bunga, dili mapihigon, dili salingkapaw. 18 Dugang pa, ang bunga sa pagkamatarong gipugas diha sa malinawong mga kahimtang alang niadtong mga nagapakigdait.
OKTUBRE 14-20
BAHANDI GIKAN SA PULONG SA DIYOS | 1 PEDRO 1-2
“Magmabalaan Mo”
(1 Pedro 1:14, 15) Ingong masinugtanong mga anak, ayaw na mog pahiuyon sa inyong kanhing mga tinguha dihang wala pa moy kahibalo, 15 apan sama sa Balaang Usa nga nagtawag kaninyo, magmabalaan kamo sa tanan ninyong panggawi,
Ang Lukat—“Hingpit nga Regalo” Gikan sa Amahan
5 Unsaon nato pagpakita nga gimahal nato ang ngalan ni Jehova? Ikapakita nato kana pinaagi sa atong panggawi. Si Jehova nagsugo nga kita magmabalaan. (Basaha ang 1 Pedro 1:15, 16.) Nagkahulogan kini nga si Jehova lang ang atong simbahon ug bug-os kasingkasing tang motuman kaniya. Bisag mag-atubang ug pagsulay, buhaton nato ang tanan sa pagkinabuhi subay sa iyang matarong nga mga prinsipyo ug balaod. Pinaagi sa matarong nga mga buhat, gipasidlak nato ang atong kahayag ug sa ingon naghimaya sa ngalan ni Jehova. (Mat. 5:14-16) Ingong balaang katawhan, atong gipamatud-an sa atong pagkinabuhi nga maayo ang mga balaod ni Jehova ug bakak ang mga akusasyon ni Satanas. Kay dili hingpit, kitang tanan masayop. Kon mahitabo kana, kinasingkasing tang maghinulsol ug mobiya sa mga binuhatan nga magpasipala kang Jehova.—Sal. 79:9.
(1 Pedro 1:16) kay nasulat: “Magmabalaan mo, kay ako balaan.”
Kon Unsaon Pagpili sa Atong Kalingawan
6 Giingnan ta ni Jehova: “Magmabalaan mo, kay ako balaan.” (1 Pedro 1:14-16; 2 Pedro 3:11) Dawaton lang ni Jehova ang atong pagsimba kon kini balaan, o hinlo. (Deuteronomio 15:21) Dili hinlo ang atong pagsimba kon duna tay ginahimo nga gidumtan ni Jehova, sama sa mga buhat nga imoral, bayolente, o konektado sa demonismo. (Roma 6:12-14; 8:13) Dili sab malipay si Jehova kon tugotan nato nga malingaw ta niini. Kini makapahimo sa atong pagsimba nga hugaw ug dili dalawaton kang Jehova ug makadaot sa atong relasyon kaniya.
Pagpangitag Espirituwal nga Bahandi
(1 Pedro 1:10-12) Bahin niini nga kaluwasan, ang mga propeta, nga nanagna bahin sa dili hitupngang pagkamaayo sa Diyos para kaninyo, makugihong nagpakisayod ug nagsusig maayo. 11 Nagsige silag susi kon kanus-a o kon unsang panahona matuman ang mga butang bahin sa Kristo nga gitagna sa balaang espiritu nga naa kanila, kay kini abanteng nagtagna bahin sa pag-antos sa Kristo ug sa himaya nga mosunod. 12 Gipadayag sa Diyos kanila nga sila nag-alagad, dili para sa ilang kaugalingon, kondili kaninyo. Gisulat nila ang mga butang nga gipahibalo kaninyo, ug nadungog ninyo kini gikan sa mga nagpahayag sa maayong balita sa tabang sa balaang espiritu nga gikan sa langit. Bisan ang mga anghel gusto kaayong mahibalo bahin niini.
Mga Pangunang Punto Gikan sa mga Sulat ni Santiago ug Pedro
1:10-12. Ang mga manulonda nangandoy sa pagsud-ong ug pagsabot sa lawom nga mga kamatuoran nga gisulat sa mga manalagna sa Diyos sa kakaraanan maylabot sa kongregasyon sa dinihogang mga Kristohanon. Apan, kining mga butanga nadayag lamang sa dihang si Jehova misugod sa pagpakiglabot sa kongregasyon. (Efe. 3:10) Dili ba angay natong sundon ang panig-ingnan sa mga manulonda ug maningkamot sa pagsusi sa “lawom nga mga butang sa Diyos”?—1 Cor. 2:10.
(1 Pedro 2:25) Kay kamo samag mga karnero nga nasaag, apan karon kamo namalik sa magbalantay ug tig-atiman sa inyong kinabuhi.
Magtatan-aw
Ang Kinalabwang Magtatan-aw. Dayag nga gikutlo sa 1 Pedro 2:25 ang Isaias 53:6 maylabot niadtong mga tawo nga “sama sa mga karnero nga nangahisalaag,” ug dayon si Pedro miingon: “Apan karon kamo namalik sa magbalantay ug magtatan-aw sa inyong mga kalag.” Ang gitumong dinhi mao gayod si Jehova nga Diyos, sanglit kadtong gisulatan ni Pedro wala man mahisalaag gikan kang Kristo Jesus apan, hinunoa, pinaagi kaniya giagak sila pabalik ngadto kang Jehova nga Diyos, nga mao ang Dakong Magbalantay sa iyang katawhan. (Sal 23:1; 80:1; Jer 23:3; Eze 34:12) Si Jehova maoy usa usab ka magtatan-aw, ang usa nga nagsusi. (Sal 17:3) Ang pagsusi (Gr., e·pi·sko·peʹ) mahimong magpasabot sa iyang pagpahamtang ug dili-paborableng paghukom, sama sa nahitabo sa Jerusalem niadtong unang siglo K.P., nga wala mahibalo sa panahon sa ‘pagsusi [Gr., e·pi·sko·pesʹ] kaniya.’ (Luc 19:44) O kini mahimong makahatag ug paborableng epekto ug mga kaayohan, sama sa kahimtang niadtong naghimaya sa Diyos sa adlaw “sa iyang pagsusi [Gr., e·pi·sko·pesʹ].”—1Pe 2:12.
Pagbasa sa Bibliya
(1 Pedro 1:1-16) Gikan kang Pedro, nga apostol ni Jesu-Kristo, ngadto sa temporaryong mga residente nga naa sa Ponto, Galacia, Capadocia, Asia, ug Bitinia, kamo nga gipili 2 sumala sa kahibalo nga nabatonan nang daan sa Diyos nga Amahan, nga gibalaan sa balaang espiritu aron mahimong masinugtanon ug mawisikan sa dugo ni Jesu-Kristo: Hinaot ang dili hitupngang pagkamaayo ug ang kalinaw sa Diyos modagaya kaninyo. 3 Dayegon ang Diyos ug Amahan sa atong Ginoong Jesu-Kristo, kay tungod sa iyang dakong kaluoy gipahinabo niya nga ipanganak ta pag-usab aron makabatog buhi nga paglaom pinaagi sa pagkabanhaw ni Jesu-Kristo, 4 ug madawat ang dili madunot ug wala mahugawi ug dili mawala nga panulondon. Giandam kini sa langit para kaninyo, 5 kinsa gipanalipdan sa gahom sa Diyos tungod sa inyong pagtuo para sa kaluwasan nga ipadayag panahon sa kataposan. 6 Tungod niini kamo naglipay pag-ayo, bisan tuod kinahanglan mong mag-antos kadiyot tungod sa lainlaing pagsulay, 7 aron nga pinaagi sa sinulayang kalidad sa inyong pagtuo, nga mas bililhon pa kay sa bulawan nga mawala ra bisag gidalisay sa kalayo, madawat ninyo ang kadayeganan, himaya, ug dungog dihang ipadayag na si Jesu-Kristo. 8 Bisag wala mo makakita niya, gihigugma ninyo siya. Bisag wala mo makakita niya karon, nagpakita mog pagtuo kaniya ug nalipay gyod mo pag-ayo, 9 kay segurado mo nga ang inyong pagtuo moresulta sa inyong kaluwasan. 10 Bahin niini nga kaluwasan, ang mga propeta, nga nanagna bahin sa dili hitupngang pagkamaayo sa Diyos para kaninyo, makugihong nagpakisayod ug nagsusig maayo. 11 Nagsige silag susi kon kanus-a o kon unsang panahona matuman ang mga butang bahin sa Kristo nga gitagna sa balaang espiritu nga naa kanila, kay kini abanteng nagtagna bahin sa pag-antos sa Kristo ug sa himaya nga mosunod. 12 Gipadayag sa Diyos kanila nga sila nag-alagad, dili para sa ilang kaugalingon, kondili kaninyo. Gisulat nila ang mga butang nga gipahibalo kaninyo, ug nadungog ninyo kini gikan sa mga nagpahayag sa maayong balita sa tabang sa balaang espiritu nga gikan sa langit. Bisan ang mga anghel gusto kaayong mahibalo bahin niini. 13 Busa andama ang inyong hunahuna para sa buluhaton; hupti ang inyong maayong panghunahuna; ibase ang inyong paglaom sa dili hitupngang pagkamaayo nga ipakita kaninyo inigpadayag kang Jesu-Kristo. 14 Ingong masinugtanong mga anak, ayaw na mog pahiuyon sa inyong kanhing mga tinguha dihang wala pa moy kahibalo, 15 apan sama sa Balaang Usa nga nagtawag kaninyo, magmabalaan kamo sa tanan ninyong panggawi, 16 kay nasulat: “Magmabalaan mo, kay ako balaan.”
OKTUBRE 21-27
BAHANDI GIKAN SA PULONG SA DIYOS | 1 PEDRO 3-5
“Ang Kataposan sa Tanang Butang Duol Na”
(1 Pedro 4:7) Apan ang kataposan sa tanang butang duol na. Busa batoni ang maayong panghunahuna, ug alisto kanunay sa pag-ampo.
“Magmabinantayon Labot sa mga Pag-ampo”
“ANG kinalisdang oras nga magpabiling nagmata maoy sa dili pa ang kadlawon,” matod sa usa nga panggabii ang trabaho kaniadto. Seguradong mouyon niini kadtong kinahanglang magpulaw sa gabii. Susama usab niini ang kahimtang sa mga Kristohanon karon kay ania na kita sa labing ngiob nga panahon sa daotang sistema ni Satanas. (Roma 13:12) Peligroso gayod nga makatulog kita niining panahona! Busa angay kitang ‘magbaton ug maayong panghunahuna’ ug sundon ang tambag sa Bibliya nga “magmabinantayon labot sa mga pag-ampo.”—1 Ped. 4:7.
(1 Pedro 4:8) Labaw sa tanan, batoni ang init nga gugma sa usag usa, kay ang gugma magtabon sa daghang sala.
Kon Unsaon Pag-ila ug Pagbuntog sa Bisan Unsang Espirituwal nga Kahuyangan
Sa kataposan, hupting lig-on sa hunahuna ang mahigugmaong pahimangno ni apostol Pedro: “Ang kataposan sa tanang butang duol na. Busa, magmabuot kamo sa hunahuna, ug magmabinantayon nga tuyo ang mga pag-ampo. Labaw sa tanang butang, paghupot ug mainit nga gugma alang sa usag usa, kay ang gugma nagatabon ug daghang kasal-anan.” (1 Pedro 4:7, 8) Sayon ra kaayong tugotan ang tawhanong mga pagkadili-hingpit—sa ubang tawo ug atoa mismo—nga motuhop sa atong mga kasingkasing ug hunahuna ug mahimong mga kababagan, mga kapandolan. Nasayod gayod si Satanas niining maong tawhanong kahuyangan. Ang pagbungkag ug pagpangdaog mao ang usa sa iyang malipotong mga taktika. Busa, kinahanglang tabonan dayon nato ang maong mga kasal-anan sa mainitong gugma alang sa usag usa ug dili “maghatag ug luna alang sa Yawa.”—Efeso 4:25-27.
(1 Pedro 4:9) Abiabiha ang usag usa nga walay pagbagulbol.
Pagkamaabiabihon—Importante Kaayo!
2 Si Pedro nagdasig sab sa iyang mga igsoon: “Magmaabiabihon sa usag usa.” (1 Ped. 4:9) Ang Gregong pulong sa “pagkamaabiabihon” sa literal nagkahulogang “kahinangop alang sa, o pagpakitag kaayo alang sa mga estranyo.” Pero matikdi nga si Pedro nagdasig sa iyang mga igsoon nga magmaabiabihon “sa usag usa,” niadtong ila nang nailhan ug nakauban. Sa unsang paagi makatabang nila ang pagkamaabiabihon?
3 Kana makapasuod nila. Hunahunaa ang imong eksperyensiya. Naimbitar na ba ka sa usa ka igsoon sa iyang balay? Di ba malipay kang handomon ang maong okasyon? Dihang nangimbitar ka sa pipila ka igsoon sa inyong kongregasyon, dili ba nagkasuod mo? Pinaagi sa pagpangimbitar, mas mailhan nato ang atong mga igsoon kay sa ubang situwasyon nga kauban nato sila. Ang mga Kristohanon sa adlaw ni Pedro kinahanglang mas magkasuod samtang nagkagrabe ang kahimtang. Mao man usab ang mga Kristohanon niining “kataposang mga adlaw.”—2 Tim. 3:1.
Pagpangitag Espirituwal nga Bahandi
(1 Pedro 3:19, 20) Ug niini nga kahimtang siya miadto ug miwali sa mga espiritu nga gibilanggo, 20 nga kaniadto wala magmasinugtanon dihang ang Diyos mapailobong nagpaabot sa panahon ni Noe, samtang gitukod ang arka, nga pinaagi niana walo lang ka tawo ang naluwas latas sa tubig.
Mga Pangutana Gikan sa mga Magbabasa
Ang Bibliya nag-ingon nga si Jesus “miwali sa mga espiritu nga anaa sa bilanggoan.” (1 Ped. 3:19) Unsay buot ipasabot niini?
▪ Si apostol Pedro miingon nga ang maong mga espiritu “wala magmasinugtanon sa dihang ang pailob sa Diyos nagpaabot sa mga adlaw ni Noe.” (1 Ped. 3:20) Tin-aw nga ang gitumong ni Pedro mao ang mga espiritung linalang nga miduyog kang Satanas sa pagrebelde. Si Judas naghisgot bahin sa mga manulonda nga “wala magpadayon sa paghupot sa ilang orihinal nga pagkabutang apan mitalikod sa ilang nahiangay nga puloy-anang dapit,” ug nag-ingon nga ang Diyos ‘nagtagana [kanila] uban ang walay kataposang mga gapos ilalom sa naglugitom nga kangitngit alang sa paghukom sa dakong adlaw.’—Jud. 6.
Sa unsang paagi ang espiritung mga linalang wala nagmasinugtanon sa adlaw ni Noe? Sa wala pa ang Lunop, kining daotang mga espiritu nagmateryalisar ingong mga tawo, nga wala isugo ni Jehova kanila. (Gen. 6:2, 4) Dugang pa, ang maong mga manulonda nakigsekso sa mga babaye, ug kini dili kinaiyanhon. Ang Diyos wala maglalang kanila aron makigsekso. (Gen. 5:2) Kining daotan ug dili masinugtanong mga manulonda laglagon sa gitakdang panahon sa Diyos. Sa pagkakaron, sumala sa giingon ni Judas, sila anaa sa “naglugitom nga kangitngit”—sa ato pa, sa espirituwal nga bilanggoan.
Kanus-a ug sa unsang paagi si Jesus nagwali sa “mga espiritu nga anaa sa bilanggoan”? Si Pedro misulat nga nahitabo kini human nga si Jesus “gibuhi diha sa espiritu.” (1 Ped. 3:18, 19) Matikdi usab nga si Pedro miingon nga si Jesus “miwali.” Ang pulong “miwali” nagpaila nga ang pagwali nahuman na sa wala pa isulat ni Pedro ang iyang unang sulat. Busa gipakita niini nga human sa pagkabanhaw ni Jesus, iyang gipahayag ngadto sa daotang mga espiritu nga sila makaagom ug bug-os ug makataronganong paghukom. Dili kadto pagwali nga maghatag ug paglaom kanila. Kadto maoy pagwali sa paghukom. (Jon. 1:1, 2) Human si Jesus nagmatinumanon ug nagmaunongon hangtod sa kamatayon ug dayon gibanhaw—pamatuod nga wala gayoy gahom ang Yawa kaniya—may basehanan na si Jesus sa pagpahayag sa maong paghukom.—Juan 14:30; 16:8-11.
Sa umaabot, si Jesus maggapos ug magtambog kang Satanas ug sa maong mga manulonda ngadto sa kahiladman. (Luc. 8:30, 31; Pin. 20:1-3) Sa pagkakaron, kining dili masinugtanong mga espiritu anaa sa naglugitom nga espirituwal nga kangitngit, ug ang ilang kalaglagan segurado.—Pin. 20:7-10.
(1 Pedro 4:6) Gani, kini ang hinungdan nga ang maayong balita gipahayag sab ngadto sa mga patay, aron nga bisag gihukman sila base sa kon unsay makita sumala sa panglantaw sa tawo, sila mabuhi pinaagi sa paggiya sa espiritu sumala sa panglantaw sa Diyos.
Mga Pangunang Punto Gikan sa mga Sulat ni Santiago ug Pedro
4:6—Kinsa ang “mga patay” nga kanila “ang maayong balita gipahayag”? Sila mao ang kanhing mga ‘patay diha sa ilang kalapasan ug mga sala,’ o mga patay sa espirituwal, sa wala pa sila makadungog sa maayong balita. (Efe. 2:1) Apan human magpasundayag ug pagtuo sa maayong balita, sila ‘nabuhi’ sa espirituwal nga paagi.
Pagbasa sa Bibliya
(1 Pedro 3:8-22) Sa kataposan, kamong tanan kinahanglang magkahiusa sa hunahuna ug magpakitag simpatiya, inigsoong pagmahal, kaluoy, ug pagkamapainubsanon. 9 Ayaw balosig kadaot ang kadaot o balosig insulto ang insulto. Hinuon, balosi kinig panalangin, kay gitawag mo aron inyong panalanginan ang uban, aron kamo sab panalanginan sa Diyos. 10 Kay “kadtong nagmahal sa kinabuhi ug gustong magkinabuhi nga malipayon kinahanglang magbantay sa iyang dila batok sa pagsultig daotan ug sa iyang ngabil batok sa pagsultig limbong. 11 Kinahanglang magpalayo siya sa daotan ug mobuhat ug maayo; kinahanglang tinguhaon niya ang pakigdait ug huptan kini. 12 Kay ang mga mata ni Jehova anaa sa mga matarong, ug ang iyang mga dalunggan mamati sa ilang mga hangyo, apan isalikway ni Jehova ang mga nagbuhat ug daotan.” 13 Sa pagkatinuod, kinsay mohimog kadaot ninyo kon dasig mo sa paghimog maayo? 14 Apan bisan pag mag-antos mo tungod sa pagkamatarong, kamo malipayon. Ayaw kahadloki ang ilang gikahadlokan ug ayawg kabalaka. 15 Apan balaana ang Kristo ingong Ginoo diha sa inyong kasingkasing, nga andam kanunay sa pagdepensa atubangan sa tanan nga mangayog katarongan sa inyong paglaom, apan buhata kana nga may kalumo ug lawom nga pagtahod. 16 Mentinaha ang maayong konsensiya, aron nga bisag sultihan mog daotan, kadtong mosulti batok kaninyo maulawan tungod sa inyong maayong panggawi ingong mga sumusunod sa Kristo. 17 Kay mas maayo pang mag-antos tungod sa pagbuhat ug maayo, kon itugot kini sa Diyos, kay sa mag-antos tungod sa pagbuhat ug daotan. 18 Kay ang Kristo namatay kausa alang sa tanang panahon para sa mga sala, usa ka matarong nga tawo alang sa mga dili matarong, aron giyahan mo ngadto sa Diyos. Siya gipatay ingong tawo ug gibanhaw ingong espiritu. 19 Ug niini nga kahimtang siya miadto ug miwali sa mga espiritu nga gibilanggo, 20 nga kaniadto wala magmasinugtanon dihang ang Diyos mapailobong nagpaabot sa panahon ni Noe, samtang gitukod ang arka, nga pinaagi niana walo lang ka tawo ang naluwas latas sa tubig. 21 Ang bawtismo, nga maoy katumbas niini, nagaluwas sab kaninyo karon (dili pinaagi sa pagkuha sa kahugawan sa unod, kondili pinaagi sa paghangyo sa Diyos ug maayong konsensiya), pinaagi sa pagkabanhaw ni Jesu-Kristo. 22 Siya naa sa tuong kamot sa Diyos, kay miadto siya sa langit, ug gipasakop kaniya ang mga anghel, mga awtoridad, ug mga gahom.
OKTUBRE 28–NOBYEMBRE 3
BAHANDI GIKAN SA PULONG SA DIYOS | 2 PEDRO 1-3
“Hunahunaa Kanunay ang Adlaw ni Jehova”
(2 Pedro 3:9, 10) Si Jehova dili langayan sa pagtuman sa iyang saad, sama sa gihunahuna sa ubang tawo, apan nagpailob siya ninyo kay dili niya gusto nga naay malaglag kondili gusto niya nga ang tanan maghinulsol. 10 Apan ang adlaw ni Jehova moabot nga samag kawatan, diin ang mga langit mahanaw uban ang kusog nga dahunog, apan ang mga elemento mangatunaw sa grabeng kainit, ug ang yuta ug ang mga buhat diha niini madayag.
‘Ipatuman ni Jehova ang Hustisya’
11 Apan, unsay kahulogan sa pasalig ni Jesus nga ipatuman ni Jehova ang hustisya “sa madali”? Gipakita sa Pulong sa Diyos nga “bisan tuod [si Jehova] adunay hataas-nga-pailob,” ipahamtang niya sa madali ang hustisya sa takdang panahon. (Lucas 18:7, 8; 2 Pedro 3:9, 10) Sa panahon ni Noe, sa dihang miabot ang Lunop, ang mga daotan gilaglag nga walay langan. Sa samang paagi, sa adlaw ni Lot, sa dihang nag-ulan ug kalayo gikan sa langit, ang mga daotan nangalaglag. Si Jesus miingon: “Maingon usab unya niini sa adlaw nga igapadayag ang Anak sa tawo.” (Lucas 17:27-30) Sa makausa pa, ang mga daotan makaagom ug “kalit nga kalaglagan.” (1 Tesalonica 5:2, 3) Sa pagkatinuod, bug-os kitang makasalig nga dili tugotan ni Jehova nga molapas ug usa ka adlaw ang paglungtad sa kalibotan ni Satanas kon moabot na ang gitakdang panahon sa pagpatuman sa hustisya.
(2 Pedro 3:11, 12) Sanglit kining tanang butang tunawon man niining paagiha, tagda kon unsay angay ninyong buhaton maylabot sa balaang panggawi ug mga buhat nga nagpakitag debosyon sa Diyos, 12 samtang nagpaabot ug naghunahuna kanunay sa presensiya sa adlaw ni Jehova, nga pinaagi niana ang mga langit malaglag sa kalayo ug ang mga elemento mangatunaw sa grabeng kainit!
“Ang Dakong Adlaw ni Jehova Haduol Na”
18 Mao diay nga si apostol Pedro nagpasidaan kanato sa pagbutang kanunay sa hunahuna “sa presensiya sa adlaw ni Jehova”! Sa unsang paagi mahimo nato kini? Ang usa ka paagi mao ang pagpakigbahin “sa balaang mga buhat sa panggawi ug mga buhat sa diyosnong pagkamahinalaron.” (2 Pedro 3:11, 12) Ang pagkapuliki sa maong mga kalihokan motabang kanato sa pagpaabot nga mahinamon sa “adlaw ni Jehova.” Ang Gregong pulong nga gihubad ‘pagbutang kanunay sa hunahuna’ sa literal nagkahulogang “pagpadali.” Dili nato aktuwal nga mapadali ang panahon nga nahibilin hangtod sa pag-abot sa adlaw ni Jehova. Bisan pa niana, samtang nagpaabot kita nianang adlawa, ang panahon morag dali ra kaayong molabay kon kita puliki diha sa pag-alagad sa Diyos.—1 Corinto 15:58.
Pagpangitag Espirituwal nga Bahandi
(2 Pedro 1:19) Busa mas kombinsido ta nga ang tanang tagna matuman gayod, ug maayo ang inyong ginahimo nga inyo kining gihatagag pagtagad nga samag lampara nga nagsiga sa ngitngit nga dapit (hangtod mobanagbanag na ug ang bituon sa buntag mosubang) sa inyong kasingkasing.
Mga Pangunang Punto Gikan sa mga Sulat ni Santiago ug Pedro
1:19—Kinsa ang “bituon sa adlaw,” o kabugason, kanus-a siya mosubang, ug sa unsang paagi kita nahibalo niini? Ang “bituon sa adlaw” mao si Jesu-Kristo human siya nahimong Hari sa Gingharian sa Diyos. (Pin. 22:16) Niadtong 1914, si Jesus misubang, ingnon ta, ingong Mesiyanikong Hari, nga nagpaila sa pagbanagbanag sa laing adlaw. Ang transpigurasyon, o pagkausab sa dagway ni Jesus, nagpakita sa iyang umaabot nga himaya ug gahom diha sa Gingharian, nga nagpasiugda sa pagkakasaligan sa mga tagna sa Diyos. Ang paghatag ug pagtagad niana maglamdag sa atong kasingkasing, sa ingon atong makita nga misubang na ang bituon sa adlaw o Kabugason.
(2 Pedro 2:4) Ang Diyos wala gyod magpugong sa pagsilot sa mga anghel nga nakasala. Hinuon, iyang gitambog sila sa Tartaro ug gikadenahan sa grabeng kangitngit aron igahin sa paghukom.
Mga Pangunang Punto Gikan sa mga Sulat ni Santiago ug Pedro
2:4—Unsa ang “Tartaro,” ug kanus-a gitambog didto ang rebelyosong mga manulonda? Ang Tartaro maoy usa ka samag-prisohan nga kahimtang diin ang espiritung mga linalang lamang—dili mga tawo—ang itambog didto. Ang anaa niining kahimtang sa naglugitom nga espirituwal nga kangitngit dili makakita sa kahayag sa Diyos ni makasabot sa iyang katuyoan. Ang gitambog sa Tartaro wala nay paglaom. Ang Diyos nagtambog niining masinupakong mga manulonda sa adlaw ni Noe, ug sila magpabilin nianang gipaubos nga kahimtang hangtod nga sila laglagon.
Pagbasa sa Bibliya
(2 Pedro 1:1-15) Gikan kang Simon Pedro, ulipon ug apostol ni Jesu-Kristo, ngadto kanila nga nakabaton ug pagtuo nga sama ka bililhon sa among pagtuo pinaagi sa pagkamatarong sa atong Diyos ug sa Manluluwas nga si Jesu-Kristo: 2 Hinaot ang dili hitupngang pagkamaayo ug kalinaw modagaya pa kaninyo pinaagi sa tukmang kahibalo sa Diyos ug kang Jesus nga atong Ginoo, 3 kay ang gahom sa Diyos naghatag kanato sa tanang butang nga atong gikinahanglan para sa kinabuhi ug sa atong debosyon sa Diyos pinaagi sa tukmang kahibalo sa Usa nga nagtawag kanato pinaagi sa iyang himaya ug pagkamaayo. 4 Pinaagi niining mga butanga gihatagan ta niyag bililhon ug nindot kaayong mga saad, aron nga pinaagi niini kamo makaambit sa himaya sa Diyos ingong espiritung mga linalang, kay nakaikyas na mo sa pagkadunot sa kalibotan nga resulta sa daotang tinguha. 5 Busa tungod niini, paningkamoti pag-ayo nga idugang sa inyong pagtuo ang pagkamaayo, sa inyong pagkamaayo ang kahibalo, 6 sa inyong kahibalo ang pagpugong sa kaugalingon, sa inyong pagpugong sa kaugalingon ang paglahutay, sa inyong paglahutay ang debosyon sa Diyos, 7 sa inyong debosyon sa Diyos ang inigsoong pagmahal, sa inyong inigsoong pagmahal ang gugma. 8 Kay kon kining mga hiyasa naa ninyo ug nagaawas, kini magpugong ninyo sa pagkahimong dili aktibo o dili mabungahon maylabot sa tukmang kahibalo bahin sa atong Ginoong Jesu-Kristo. 9 Kay kadtong wala niining mga hiyasa buta, nagpiyong sa iyang mga mata sa kahayag, ug nalimot nga nahinloan na siya sa iyang kanhing mga sala. 10 Busa, mga igsoon, pagkugi pa gyod mo aron maseguro ninyo ang inyong pagkatinawag ug pagkapinili, kay kon padayon mong mohimo niini dili gyod mo mapakyas. 11 Sa pagkatinuod, pinaagi niini panalanginan mo pag-ayo ug makasulod sa walay kataposang Gingharian sa atong Ginoo ug Manluluwas nga si Jesu-Kristo. 12 Busa andam ko kanunay nga pahinumdoman mo bahin niini, bisag nahibalo na mo niini ug lig-on na sa kamatuoran nga naa kaninyo. 13 Apan giisip nako nga hustong awhagon mo pinaagig mga pahinumdom, samtang nia pa ko niini nga tabernakulo, 14 kay nahibalo ko nga hapit na nakong biyaan kini nga tabernakulo, sumala sab sa gipatin-aw kanako sa atong Ginoong Jesu-Kristo. 15 Himoon nako kanunay ang akong maarangan aron inigbiya nako, mahinumdom mo niining mga butanga.