Reperensiya Para sa Workbook sa Tigom nga Kinabuhi ug Ministeryo
Septiyembre 2-8
BAHANDI GIKAN SA PULONG SA DIYOS | HEBREOHANON 7-8
“Usa ka Saserdote Hangtod sa Hangtod sa Paagi nga Sama Kang Melquisedek”
(Hebreohanon 7:1, 2) Kay kini si Melquisedek, nga hari sa Salem ug saserdote sa Labing Hataas nga Diyos, misugat kang Abraham pag-uli niini gikan sa pagpamatay sa mga hari ug iyang gipanalanginan si Abraham, 2 ug gihatagan siya ni Abraham ug ikapulo sa tanang butang. Ang iyang ngalan gihubad nga “Hari sa Pagkamatarong,” ug hari sab siya sa Salem, nga nagpasabot, “Hari sa Pakigdait.”
Melquisedek
Hari sa karaang Salem ug “saserdote sa Labing Hataas nga Diyos,” si Jehova. (Gen 14:18, 22) Siya ang unang saserdote nga gihisgotan sa Kasulatan; siya naghupot niana nga posisyon sa wala pa ang 1933 W.K.P. Ingon nga hari sa Salem, nga nagkahulogang “Pakigdait,” si Melquisedek gipaila ni apostol Pablo ingong “Hari sa Pakigdait” ug, pinasukad sa iyang ngalan, ingong “Hari sa Pagkamatarong.” (Heb 7:1, 2) Ang karaang Salem gituohan nga mao ang sentro sa ulahing siyudad sa Jerusalem, ug ang ngalan niini gilangkit sa Jerusalem, nga usahay gihisgotan nga “Salem.”—Sal 76:2.
Human mapildi ni Abram (Abraham) si Kedorlaomer ug ang iyang kaabin nga mga hari, ang patriarka miadto sa Ubos nga Patag sa Saveh o “ang Ubos nga Patag sa hari.” Didto si Melquisedek “nagdalag tinapay ug bino” ug nagpanalangin kang Abraham, nga nag-ingon: “Dalayegon si Abram sa Labing Hataas nga Diyos, Magmumugna sa langit ug sa yuta; ug dalayegon ang Labing Hataas nga Diyos, kinsa nagtugyan sa imong mga tigpanglupig nganha sa imong kamot!” Niana si Abraham naghatag sa hari-saserdote ug “ikapulo sa tanang butang,” nga mao, sa “labing maayong mga inagaw sa gubat” nga iyang nabatonan sa iyang malamposong pakiggubat batok sa magkaalyadong mga hari.—Gen 14:17-20; Heb 7:4.
(Hebreohanon 7:3) Wala mahibaloi kon kinsay iyang amahan ug inahan, ug walay rekord sa iyang kagikan ug kon kanus-a siya natawo ug namatay, apan kay gihimo siya nga sama sa Anak sa Diyos, siya magpabiling saserdote hangtod sa hangtod.
Melquisedek
Sa unsang paagi si Melquisedek ‘walay sinugdanan sa mga adlaw ni kataposan sa kinabuhi’?
Gipunting ni Pablo ang talagsaong kamatuoran labot kang Melquisedek, sa pag-ingon bahin kaniya: “Kay siya walay amahan, walay inahan, walay talaan sa kagikan, walay sinugdan sa mga adlaw ni kataposan sa kinabuhi, apan gihimong sama sa Anak sa Diyos, siya magpabilin nga saserdote hangtod sa kahangtoran.” (Heb 7:3) Sama sa ubang mga tawo, si Melquisedek natawo ug namatay. Hinunoa, ang mga ngalan sa iyang amahan ug inahan wala hisgoti, ang iyang kagikan ug mga kaliwat wala ibutyag, ug ang Kasulatan walay impormasyon bahin sa sinugdanan sa iyang mga adlaw o sa kataposan sa iyang kinabuhi. Busa, si Melquisedek haom nga maglandong kang Jesu-Kristo, nga nagbaton sa walay kataposang pagkasaserdote. Sama kang Melquisedek nga walay gitala nga gisundan o manununod sa iyang pagkasaserdote, mao man usab walay nauna kang Kristo nga hataas nga saserdote nga sama kaniya, ug ang Bibliya nagpakita nga wala gayoy mosunod puli kaniya. Dugang pa, bisan tuod si Jesus natawo sa tribo ni Juda ug sa harianong linya ni David, ang iyang unodnong kagikan walay kalabotan sa iyang pagkasaserdote, ni tungod sa tawhanong kagikan nga ang mga katungdanan ingong saserdote ug hari giusa diha kaniya. Kining mga butanga maoy resulta sa kaugalingong panumpa ni Jehova kaniya.
(Hebreohanon 7:17) Kay kini ang giingon ingong pamatuod bahin kaniya: “Ikaw usa ka saserdote hangtod sa hangtod sa paagi nga sama kang Melquisedek.”
Melquisedek
Naghulagway sa Pagkasaserdote ni Kristo. Sa usa ka talagsaong tagna labot sa Mesiyas, ang panumpa ni Jehova sa “Ginoo” ni David mao: “Ikaw usa ka saserdote hangtod sa panahong walay tino sa paagi nga sama kang Melquisedek!” (Sal 110:1, 4) Kini nga inspiradong salmo naghatag sa mga Hebreohanon ug katarongan nga ilhon ang gisaad nga Mesiyas ingong ang usa nga diha kaniya usahon ang katungdanan sa pagkasaserdote ug pagkahari. Sa iyang sulat ngadto sa mga Hebreohanon, giwagtang ni apostol Pablo ang bisan unsang pagduhaduha kon kinsa kining gitagna, nga naghisgot kang “Jesus, nga nahimong hataas nga saserdote sa paagi nga sama kang Melquisedek hangtod sa kahangtoran.”—Heb 6:20; 5:10; tan-awa ang PAKIGSAAD.
Pagpangitag Espirituwal nga Bahandi
(Hebreohanon 8:3) Kay ang matag hataas nga saserdote gitudlo aron motanyag ug mga gasa ug mga halad; busa kinahanglan sab nga naa siyay ihalad.
Mga Halad nga Nakapahimuot sa Diyos
11 ‘Ang matag hataas nga saserdote gitudlo aron motanyag ug mga gasa ug mga halad,’ nag-ingon si apostol Pablo. (Hebreohanon 8:3) Matikdi nga gibahin ni Pablo ang mga halad nga gihimo sa hataas nga saserdote sa karaang Israel sa duha ka matang, nga mao, “mga gasa” ug “mga halad alang sa mga sala.” (Hebreohanon 5:1) Ang mga tawo sa kasagaran mohatag ug mga gasa sa pagpasundayag sa gugma ug apresasyon, maingon man pagpalambo sa panaghigalaay, kahimuot, o pag-uyon. (Genesis 32:20; Proverbio 18:16) Sa susama, daghan sa mga halad nga gilatid sa Balaod malantaw ingong “mga gasa” ngadto sa Diyos aron maangkon ang iyang pag-uyon ug kahimuot. Ang mga kalapasan nga nahimo batok sa Balaod kinahanglang ulian, ug aron dunay ikauli, ang “mga halad alang sa mga sala” itanyag. Ang Pentateuch, ilabina ang mga basahon sa Exodo, Levitico, ug Numeros, nagtaganag daghan kaayong impormasyon labot sa nagkalainlaing matang sa mga halad. Bisan tuod maglisod man gayod kita sa pagsabot ug paghinumdom sa tanang detalye, ang pipila ka dagkong mga punto mahitungod sa nagkalainlaing mga matang sa halad angayng hatagan natog pagtagad.
(Hebreohanon 8:13) Sa iyang pag-ingon ug “bag-ong pakigsaad,” iyang gihimo ang una nga karaan na. Ug ang daan ug kinaraan na hapit nang mawala.
Pakigsaad
Sa unsang paagi ang pakigsaad sa Balaod nahimong “karaan na”?
Apan, ang pakigsaad sa Balaod, sa usa ka diwa, nahimong “karaan na” sa dihang gipahibalo sa Diyos pinaagi sa manalagnang si Jeremias nga adunay usa ka bag-ong pakigsaad. (Jer 31:31-34; Heb 8:13) Niadtong 33 K.P. ang pakigsaad sa Balaod gihanaw pinasukad sa kamatayon ni Kristo diha sa estaka sa pagsakit (Col 2:14), ug gipulihan kini sa bag-ong pakigsaad.—Heb 7:12; 9:15; Buh 2:1-4.
Pagbasa sa Bibliya
(Hebreohanon 7:1-17) Kay kini si Melquisedek, nga hari sa Salem ug saserdote sa Labing Hataas nga Diyos, misugat kang Abraham pag-uli niini gikan sa pagpamatay sa mga hari ug iyang gipanalanginan si Abraham, 2 ug gihatagan siya ni Abraham ug ikapulo sa tanang butang. Ang iyang ngalan gihubad nga “Hari sa Pagkamatarong,” ug hari sab siya sa Salem, nga nagpasabot, “Hari sa Pakigdait.” 3 Wala mahibaloi kon kinsay iyang amahan ug inahan, ug walay rekord sa iyang kagikan ug kon kanus-a siya natawo ug namatay, apan kay gihimo siya nga sama sa Anak sa Diyos, siya magpabiling saserdote hangtod sa hangtod. 4 Importante gyod kaayo ning tawhana. Mao nga bisan si Abraham, ang ulo sa banay, naghatag ug ikapulo gikan sa kinamaayohang mga inilog sa gubat. 5 Tinuod, sumala sa Balaod, ang lalaking mga anak ni Levi nga gitudlo ingong mga saserdote gisugo sa pagkolektag ikapulo gikan sa katawhan, nga mao, gikan sa ilang mga igsoon, bisan pag sila mga kaliwat ni Abraham. 6 Apan kining tawhana nga dili kaliwat ni Levi midawat ug ikapulo gikan kang Abraham ug nagpanalangin kaniya kinsa gisaaran sa Diyos. 7 Dili gayod malalis nga ang mas ubos gipanalanginan sa mas labaw. 8 Ang mga Levihanon nga nagdawat ug ikapulo maoy mga tawong mamatay, apan bahin sa usa nga sama kang Melquisedek nga nagdawat ug ikapulo, gipamatud-an sa Kasulatan nga siya buhi. 9 Ug ikaingon sab nga bisan si Levi, nga nagdawat ug ikapulo, nagbayad ug ikapulo pinaagi ni Abraham, 10 kay siya wala pa matawo ingong kaliwat ni Abraham nga iyang katigulangan dihang gisugat ni Melquisedek si Abraham. 11 Busa kon ang pagkahingpit mabatonan pinaagi sa Levihanong pagkasaserdote (kay ang pagkasaserdote nalakip sa Balaod nga gihatag ngadto sa mga tawo), nganong nagkinahanglan pa mag laing saserdote nga giingong sama kang Melquisedek ug dili sama kang Aaron? 12 Kay ang pagkasaserdote ginausab man, kinahanglan sab nga usbon ang Balaod. 13 Kay ang tawo nga gitumong niining mga butanga gikan sa laing tribo, ug niini nga tribo walay nag-alagad sa halaran. 14 Kay klaro nga ang atong Ginoo gikan sa tribo ni Juda, apan walay giingon si Moises nga naay mga saserdote nga maggikan niini nga tribo. 15 Ug mas mitin-aw kini dihang may mitungha nga laing saserdote nga sama kang Melquisedek, 16 nga nag-alagad ingong saserdote, dili sumala sa tribo nga gisugo sa Balaod nga maggikan ang mga saserdote, kondili sumala sa gahom nga naghatag kaniyag dili malaglag nga kinabuhi. 17 Kay kini ang giingon ingong pamatuod bahin kaniya: “Ikaw usa ka saserdote hangtod sa hangtod sa paagi nga sama kang Melquisedek.”
Septiyembre 9-15
BAHANDI GIKAN SA PULONG SA DIYOS | HEBREOHANON 9-10
“Anino sa Maayong mga Butang nga Moabot”
(Hebreohanon 9:12-14) Siya misulod sa balaang dapit kausa alang sa tanang panahon. Iyang gidala, dili ang dugo sa mga kanding ug sa mga toreyong baka, kondili ang iya mismong dugo, ug iya tang giluwas hangtod sa hangtod. 13 Kay kon ang dugo sa mga kanding ug sa mga torong baka ug ang abo sa dumalaga nga baka nga iwisik ngadto sa mga nahugawan makahinlo sa unod, 14 dili ba labaw pa gyod nga ang dugo sa Kristo, kinsa pinaagi sa walay kataposang espiritu naghalad sa iyang kaugalingon nga walay buling ngadto sa Diyos, makahinlo sa atong mga konsensiya gikan sa patay nga mga buhat aron makahimo kitag sagradong pag-alagad sa buhing Diyos?
Pasaylo, Pagpasaylo
Sumala sa balaod sa Diyos nga gihatag ngadto sa nasod sa Israel, aron ang tawong nakasala batok sa Diyos o batok sa iyang isigkatawo makabatog kapasayloan sa iyang mga sala, kinahanglang tul-iron una niya ang iyang kasaypanan sumala sa gilatid sa Balaod ug dayon, sa kadaghanang mga kahimtang, magtanyag ug halad nga dugo ngadto kang Jehova. (Lev 5:5–6:7) Busa, ingon sa prinsipyo nga gipahayag ni Pablo: “Oo, halos ang tanang butang mahinloan pinaagi sa dugo sumala sa Balaod, ug gawas kon igaula ang dugo walay mahitabo nga pagpasaylo.” (Heb 9:22) Apan sa pagkatinuod ang dugo sa gihalad nga mga hayop dili makakuha sa mga sala ug makahatag sa indibiduwal ug usa ka bug-os mahinlong tanlag. (Heb 10:1-4; 9:9, 13, 14) Sa kasukwahi, ang gitagnang bag-ong pakigsaad magpaposible sa tinuod nga kapasayloan, pinasukad sa halad lukat ni Jesu-Kristo. (Jer 31:33, 34; Mat 26:28; 1Co 11:25; Efe 1:7) Bisan sa dinhi pa sa yuta, si Jesus, pinaagi sa pag-ayo sa usa ka paralitiko, nagpasundayag nga siya adunay awtoridad sa pagpasaylo sa mga sala.—Mat 9:2-7.
(Hebreohanon 9:24-26) Kay ang Kristo wala mosulod sa balaang dapit nga hinimo sa kamot sa tawo, nga larawan lang sa tinuod nga balaang dapit, kondili sa langit mismo, mao nga siya karon nakig-atubang sa Diyos para kanato. 25 Dili niya ihalad ang iyang kaugalingon sa makadaghan, sama sa hataas nga saserdote nga kada tuig mosulod sa balaang dapit dala ang dugo nga dili iya. 26 Kay kon mao, kadaghan unta siyang mag-antos sukad sa pagkatukod sa kalibotan. Apan karon sa hinapos sa mga sistema sa mga butang, gipadayag na niya ang iyang kaugalingon kausa alang sa tanang panahon aron wad-on ang sala pinaagi sa paghalad sa iyang kaugalingon.
“Magpadayon sa Pagsunod Kanako”
4 Wala ibutyag sa Kasulatan ang paagi sa pag-abiabi kang Jesus didto sa langit ug ang iyang malipayong pagpakigkita pag-usab sa iyang Amahan. Hinuon, abanteng gibutyag sa Bibliya kon unsay mahitabo sa langit sa pagbalik didto ni Jesus. Abi nimo, ang mga Hudiyo regular nga nakasaksi ug balaang seremonyas sulod sa kapig 15 ka siglo. Usa ka adlaw sa matag tuig, ang hataas nga saserdote mosulod sa Labing Balaan sa templo aron iwisik ang dugo sa mga halad sa Adlaw sa Pagtabon-sa-Sala atubangan sa arka sa pakigsaad. Nianang adlawa, ang hataas nga saserdote naglandong sa Mesiyas. Si Jesus nagtuman kas-a lang sa tanang panahon sa matagnaong kahulogan sa maong seremonyas sa dihang siya mibalik sa langit. Misulod siya sa harianong presensiya ni Jehova sa langit—ang labing balaang dapit sa uniberso—ug gitanyag ang bili sa iyang halad lukat ngadto sa iyang Amahan. (Hebreohanon 9:11, 12, 24) Gidawat ba kadto ni Jehova?
(Hebreohanon 10:1-4) Kay ang Balaod anino lang sa maayong mga butang nga moabot, ug dili ang mismong mga butang, kini dili gayod makahingpit niadtong moduol sa Diyos pinaagi sa samang mga halad nga ginatanyag kada tuig. 2 Kay kon makahingpit ang mga halad, gihunong na unta ang pagtanyag ug mga halad, kay kadtong naghimog sagradong pag-alagad nga nahinloan na dili na mobati nga sad-an tungod sa ilang sala, dili ba? 3 Ang tinuod, kini nga mga halad magpahinumdom sa mga sala tuigtuig, 4 kay ang dugo sa mga torong baka ug mga kanding dili makawagtang sa mga sala.
Pagkahingpit, Kahingpitan
Pagkahingpit sa Moisesnong Balaod. Lakip sa mga probisyon sa Balaod nga gihatag ngadto sa Israel pinaagi kang Moises mao ang pag-establisar sa pagkasaserdote ug ang paghalad sa nagkadaiyang mga halad nga hayop. Bisan tuod gikan sa Diyos, ug maong hingpit, ang Balaod, ang mga saserdote niini, ug ang mga halad wala makahatag ug kahingpitan niadtong ilalom sa Balaod, ingon sa gipakita sa inspiradong apostol. (Heb 7:11, 19; 10:1) Inay nga magdalag kagawasan gikan sa sala ug kamatayon, kini sa pagkatinuod naghimo sa sala nga mas dayag. (Rom 3:20; 7:7-13) Bisan pa niana, kining tanan nga mga probisyon sa Diyos nagsilbi sa katuyoan nga gilatid sa Diyos alang niini; ang Balaod nagsilbing usa ka “magtutudlo” sa pagtultol sa mga tawo ngadto kang Kristo, nga nahimong usa ka hingpit nga ‘landong sa maayong mga butang nga moabot.’ (Gal 3:19-25; Heb 10:1) Busa, sa dihang si Pablo naghisgot bahin sa ‘pagkawalay mahimo sa Balaod, samtang kini mahuyang pa pinaagi sa unod’ (Rom 8:3), siya dayag nga nagtumong sa pagkawalay-katakos sa unodnong Hudiyo nga hataas nga saserdote (kinsa gitudlo sa Balaod nga magdumala sa mga kahikayan sa paghalad ug mosulod sa Labing Balaan nga lawak sa Adlaw sa Pagtabon-sa-Sala nga magdala ug halad nga dugo) sa “pagluwas sa bug-os” niadtong iyang gialagaran, ingon sa gipatin-aw sa Hebreohanon 7:11, 18-28. Bisan tuod nga pinaagi sa pagtanyag ug mga halad pinaagi sa Aaronikong pagkasaserdote ang katawhan nakahupot ug usa ka matarong nga baroganan atubangan sa Diyos, kini wala sa bug-os o sa hingpit nagpahigawas kanila sa kaamgohan sa sala. Ang apostol naghisgot niini sa pag-ingon nga ang mga halad sa pagtabon-sa-sala dili arang “makahingpit niadtong magapanuol,” buot ingnon, kon bahin sa ilang tanlag. (Heb 10:1-4; itandi ang Heb 9:9.) Ang hataas nga saserdote dili makahimo sa pagtagana sa bili sa lukat nga gikinahanglan alang sa tinuod nga pagtubos gikan sa sala. Ang malungtaron nga saserdotehanong pag-alagad ug epektibong halad ni Kristo mao lamang ang makahimo niini.—Heb 9:14; 10:12-22.
Pagpangitag Espirituwal nga Bahandi
(Hebreohanon 9:16, 17) Kay kon dunay pakigsaad, ang tawo nga naghimo sa pakigsaad kinahanglang mamatay, 17 kay ang usa ka pakigsaad mahimong balido human sa kamatayon, sanglit dili kini ikapatuman samtang buhi pa ang tawo nga naghimo sa pakigsaad.
Mga Pangutana Gikan sa mga Magbabasa
Si Pablo naghisgot nga ang kamatayon gikinahanglan aron sa paglig-on sa mga tugon tali sa Diyos ug sa mga tawo. Ang tugon sa Kasugoan usa ka panig-ingnan. Si Moises mao ang tigpataliwala niadto, ang usang nagpatungha sa maong panagsabot tali sa Diyos ug sa kinaiyanhong Israel. Sa ingon si Moises may hinungdanong papel ug mao ang tawo nga nakiglabot sa mga Israelinhon sa dihang sila nagpailalom sa tugon. Sa ingon si Moises maisip nga mao ang tawhanong tighimo sa tugon sa Kasugoan nga naggikan kang Jehova. Apan kinahanglan bang iula ni Moises ang iyang dugo-sa-kinabuhi aron ikapatuman ang tugon sa Kasugoan? Dili. Hinunoa ang mga hayop gihalad, nga ang ilang dugo nagpuli sa dugo ni Moises.—Hebreohanon 9:18-22.
Komosta ang bag-ong tugon tali kang Jehova ug sa nasod sa espirituwal nga Israel? Si Jesu-Kristo nagbaton sa mahimayaong papel sa tigpatunga, ang Tigpataliwala tali kang Jehova ug sa espirituwal nga Israel. Bisan tuod si Jehova ang nagmugna sa maong tugon, kini nasentro kang Jesu-Kristo. Gawas pa sa pagka Tigpataliwala niini, si Jesus may direktang mga pakiglabot diha sa unod niadtong unang pasudlon sa maong tugon. (Lucas 22:20, 28, 29) Dugang pa, siya takos motagana sa halad nga gikinahanglan sa paglig-on sa tugon. Ang maong halad dili lamang sa yanong mga hayop kondili sa hingpit tawhanong kinabuhi. Busa si Pablo nagatumong kang Kristo ingong ang tawong tighimo sa bag-ong tugon. Tapos nga “si Kristo misulod . . . sa langit mismo, aron sa maong panahon moatubang sa Diyos alang kanato,” ang bag-ong tugon nalig-on.—Hebreohanon 9:12-14, 24.
Sa paghisgot kang Moises ug Jesus ingong tawhanong mga tighimo sa tugon, si Pablo wala magpasabot nga bisan hain kanila maoy nagmugna sa tinagsa ka mga tugon, nga sa aktuwal gihimo sa Diyos. Inay, kadtong duha ka tawo suod nga nalangkit ingong mga tigpataliwala sa pagpatungha sa tinagsa ka mga tugon. Ug sa maong kaso, gikinahanglan ang kamatayon—mga hayop nga nagpuli kang Moises, ug paghalad ni Jesus sa iyang kaugalingong dugo-sa-kinabuhi alang niadtong sakop sa bag-ong tugon.
(Hebreohanon 10:5-7) Busa pag-anhi niya sa kalibotan siya miingon: “‘Dili nimo gusto ang halad ug gasa, apan nag-andam kag lawas para kanako. 6 Wala nimo uyoni ang mga tibuok halad nga sinunog ug mga halad sa sala.’ 7 Unya miingon ko: ‘Ania, mianhi ko (nasulat kini bahin kanako sa linukot nga basahon) sa pagbuhat sa imong kabubut-on, Oh Diyos.’”
Bawtismo
Giasoy ni Lucas nga si Jesus nag-ampo sa panahon sa iyang bawtismo. (Luc 3:21) Dugang pa, ang magsusulat sa sulat ngadto sa mga Hebreohanon nag-ingon nga sa dihang si Jesu-Kristo mianhi “sa kalibotan” (sa ato pa, dili sa dihang siya natawo ug dili pa makabasa ug makasulti niining mga pulonga, kondili sa dihang iyang gipresentar ang iyang kaugalingon alang sa bawtismo ug nagsugod sa iyang ministeryo) siya namulong, uyon sa Salmo 40:6-8 (LXX): “Ang halad ug gasa wala nimo tinguhaa, apan ikaw nag-andam ug lawas alang kanako. . . . Tan-awa! Ako mianhi (sa linukot nga basahon kini nahisulat bahin kanako) sa pagbuhat sa imong kabubut-on, Oh Diyos.” (Heb 10:5-9) Si Jesus natawo nga sakop sa Hudiyohanong nasod nga nailalom sa usa ka nasodnong pakigsaad uban sa Diyos, nga mao, ang pakigsaad sa Balaod. (Ex 19:5-8; Gal 4:4) Tungod niini, si Jesus nailalom na sa usa ka pakigsaad kang Jehova nga Diyos sa dihang iyang gipresentar ang iyang kaugalingon ngadto kang Juan aron bawtismohan. Gibuhat ni Jesus didto ang usa ka butang nga labaw pa sa gilatid kaniya ilalom sa Balaod. Iyang gipresentar ang iyang kaugalingon ngadto sa iyang Amahan nga si Jehova aron sa pagbuhat sa “kabubut-on” sa iyang Amahan maylabot sa pagtanyag sa iyang kaugalingong ‘giandam’ nga lawas ug may kalabotan sa paghanaw sa mga halad nga hayop nga gitanyag sumala sa Balaod. Si apostol Pablo mikomento: “Pinaagi sa giingong ‘kabubut-on’ kita nabalaan pinaagi sa paghalad sa lawas ni Jesu-Kristo sa makausa alang sa tanang panahon.” (Heb 10:10) Ang kabubut-on sa Amahan alang kang Jesus naglangkit usab sa buluhaton maylabot sa Gingharian, ug alang usab niini nga pag-alagad gipresentar ni Jesus ang iyang kaugalingon. (Luc 4:43; 17:20, 21) Si Jehova midawat ug miila niini nga pagpresentar sa iyang Anak, nga nagdihog kaniya sa balaang espiritu ug nag-ingon: “Ikaw mao ang akong Anak, ang hinigugma; giuyonan ko ikaw.”—Mar 1:9-11; Luc 3:21-23; Mat 3:13-17.
Pagbasa sa Bibliya
(Hebreohanon 9:1-14) Kon bahin sa unang pakigsaad, kini kaniadto dunay mga balaod bahin sa sagradong pag-alagad ug dunay balaang dapit dinhi sa yuta. 2 Kay gihimo ang unang lawak sa tolda diin gibutang ang tangkawan, ang lamesa, ug ang mga halad nga tinapay; ug gitawag kini nga Balaang Dapit. 3 Apan luyo sa ikaduhang kortina mao ang lawak sa tolda nga gitawag nga Labing Balaan. 4 Naa niini ang bulawang insensaryo ug ang kaban sa pakigsaad nga ang tanang bahin hinaklapag bulawan, diin gibutang ang banga nga bulawan nga gisudlag mana, ang sungkod ni Aaron nga nanalingsing, ug ang mga papan sa pakigsaad; 5 ug sa ibabaw niini naa ang mahimayaong mga kerubin nga naglandong sa tabon sa pagpasig-uli. Apan dili karon ang panahon sa paghisgot nga detalyado bahin niining mga butanga. 6 Human mahimo kining mga butanga niining paagiha, ang mga saserdote mosulod sa unang lawak sa tolda kada adlaw aron maghimog sagradong mga pag-alagad; 7 apan ang hataas nga saserdote lang ang mosulod sa ikaduhang lawak kas-a sa usa ka tuig ug kinahanglang magdala siyag dugo, nga iyang ihalad para sa iyang kaugalingon ug para sa dili tinuyo nga mga sala sa katawhan. 8 Busa giklaro sa balaang espiritu nga ang dalan paingon sa balaang dapit wala pa mapadayag samtang nagbarog pa ang unang tolda. 9 Kini nga tolda naghulagway sa mga butang niining panahona, ug sumala niini nga kahikayan, ang mga gasa ug mga halad ginatanyag. Apan dili kini makahingpit sa konsensiya sa tawo nga naghimog sagradong pag-alagad. 10 Kini may kalabotan lang sa mga pagkaon ug mga ilimnon ug lainlaing seremonyal nga pagpanghinlo. Kini maoy mga kinahanglanon sa balaod maylabot sa lawas ug gipatuman hangtod sa gitakdang panahon sa pagtul-id sa mga butang. 11 Apan pag-anhi sa Kristo, ingong hataas nga saserdote sa maayong mga butang nga nahitabo na karon, siya misulod sa mas labaw ug mas hingpit nga tolda nga dili hinimo sa kamot sa tawo ug wala magbarog dinhi sa yuta. 12 Siya misulod sa balaang dapit kausa alang sa tanang panahon. Iyang gidala, dili ang dugo sa mga kanding ug sa mga toreyong baka, kondili ang iya mismong dugo, ug iya tang giluwas hangtod sa hangtod. 13 Kay kon ang dugo sa mga kanding ug sa mga torong baka ug ang abo sa dumalaga nga baka nga iwisik ngadto sa mga nahugawan makahinlo sa unod, 14 dili ba labaw pa gyod nga ang dugo sa Kristo, kinsa pinaagi sa walay kataposang espiritu naghalad sa iyang kaugalingon nga walay buling ngadto sa Diyos, makahinlo sa atong mga konsensiya gikan sa patay nga mga buhat aron makahimo kitag sagradong pag-alagad sa buhing Diyos?
Septiyembre 16-22
BAHANDI GIKAN SA PULONG SA DIYOS | HEBREOHANON 11
“Ang Kaimportante sa Pagtuo”
(Hebreohanon 11:1) Ang pagtuo mao ang lig-ong pagsalig nga matuman ang gilaoman, ang tin-awng ebidensiya nga tinuod ang gituohan bisag dili kini makita.
Ipasundayag ang Imong Pagtuo sa mga Saad ni Jehova
6 Makita ang kahulogan sa pagtuo diha sa Hebreohanon 11:1. (Basaha.) Ang pagtuo nagpasiugda sa duha ka butang nga dili makita: (1) “Mga butang nga gilaoman”—mahimong maglakip kini sa mga saad sa Diyos sa umaabot, sama sa pagtapos sa tanang pagkadaotan ug sa bag-ong kalibotan. (2) “Mga katinuoran bisan tuod wala makita.” Niining kontekstoha, ang Gregong pulong nga gihubad ug “dayag nga pagpasundayag” nagtumong sa makapakombinsir nga ebidensiya sa dili makita nga katinuoran, sama sa paglungtad ni Jehova nga Diyos, Jesu-Kristo, mga manulonda, ug sa mga buluhaton sa langitnong Gingharian. (Heb. 11:3) Unsaon nato pagpamatuod nga buhi ang atong paglaom ug nagtuo kita sa mga butang nga dili makita nga gihisgotan sa Pulong sa Diyos? Pinaagi sa atong mga pulong ug buhat—nga kon wala kana dili bug-os ang atong pagtuo.
(Hebreohanon 11:6) Dugang pa, kon walay pagtuo imposible nga mapalipay ang Diyos, kay kadtong moduol sa Diyos kinahanglang motuo nga siya buhi ug nga siya maoy tigganti sa mga sinserong nangita kaniya.
‘Ang Tigganti sa mga Matinuorong Nagapangita Kaniya’
Sa unsang paagi nato mapahimut-an si Jehova? “Kon walay pagtuo imposible ang pagpahimuot [sa Diyos],” matod ni Pablo. Matikdi nga si Pablo wala mag-ingon nga lisod ang pagpahimuot sa Diyos kon walay pagtuo. Hinunoa, ang apostol miingon nga imposible kana. Sa ato pa, hinungdanon ang pagtuo aron mapahimut-an ang Diyos.
Unsang matanga sa pagtuo ang makapahimuot kang Jehova? Ang atong pagtuo angayng maglangkit sa duha ka aspekto. Una, kita “angayng motuo nga siya mao.” Ang ubang hubad nag-ingon nga “motuo nga siya tinuod” ug “motuo nga siya naglungtad.” Mapahimut-an ba nato ang Diyos kon nagduhaduha ta sa iyang paglungtad? Apan, labaw pa niana ang nalangkit sa tinuod nga pagtuo, kay bisan gani ang mga demonyo nagtuo nga si Jehova naglungtad. (Santiago 2:19) Ang atong pagtuo nga ang Diyos tinuod angayng magpalihok nato sa pagkinabuhi sa paaging makapahimuot kaniya.—Santiago 2:20, 26.
Ikaduha, kita “angay nga motuo nga” ang Diyos maoy “tigganti.” Ang usa nga may tinuod nga pagtuo kombinsido nga ang iyang mga paningkamot sa pagkinabuhi sa paaging makapahimuot sa Diyos dili gayod makawang. (1 Corinto 15:58) Mapahimut-an ba nato si Jehova kon nagduhaduha ta sa iyang katakos ug tinguha nga moganti kanato? (Santiago 1:17; 1 Pedro 5:7) Ang usa nga mohinapos nga ang Diyos walay pagtagad, walay pagpabili, ug dili mahinatagon wala gayod makaila Kaniya.
Kinsay gantihan ni Jehova? Kadtong “matinuorong nagapangita kaniya,” matod ni Pablo. Ang usa ka reperensiya alang sa mga tighubad sa Bibliya nag-ingon nga ang Gregong pulong nga gihubad ug “matinuorong nagapangita” wala lang magpasabot ug pagpangita o pagkat-on bahin sa Diyos, hinunoa kini nagpasabot ug pagduol sa Diyos “diha sa pagsimba.” Ang laing reperensiya nag-ingon nga kini nga porma sa Gregong berbo nagpasiugdag pagpanglimbasog. Oo, si Jehova magaganti niadtong kansang pagtuo nagtukmod kanila sa pagsimba kaniya uban ang tibuok-kasingkasing nga gugma ug kasibot.—Mateo 22:37.
(Hebreohanon 11:33-38) Tungod sa pagtuo sila nagpildig mga gingharian, nagpasiugda sa pagkamatarong, nakadawat ug mga saad, nagtak-om sa baba sa mga leyon, 34 wala masunog sa kalayo, nakaikyas sa espada, nahimong gamhanan gikan sa luya nga kahimtang, nahimong banggiitan sa gubat, ug nagpildi sa misulong nga mga kasundalohan. 35 Ang namatayng mga minahal sa mga babaye gibanhaw, apan ang ubang lalaki gipaantos tungod kay ang ilang pagtuo wala nila ibaylo sa kagawasan, aron makabaton silag mas maayong pagkabanhaw. 36 Oo, ang uban nakaagom ug pagsulay kay sila giyagayagaan ug gilapdosan, ug gikadenahan pa gani ug gibilanggo. 37 Sila gibato, gisulayan, gigabas, gipamatay pinaagig espada, ug nagsul-ob ug mga panit sa karnero ug mga panit sa kanding. Sila nag-antos sa kawalad-on, sa kasakitan, ug gidaogdaog; 38 ug ang kalibotan dili takos kanila. Sila namuyo sa mga desyerto, sa kabukiran, sa mga langob, ug sa mga lungag.
Palig-ona ang Imong Pagtuo sa Imong Gilaoman
10 Sa Hebreohanon kapitulo 11, gihubit ni apostol Pablo ang mga pagsulay nga naagoman sa daghang wala nganling mga alagad sa Diyos. Pananglitan, gihisgotan sa apostol ang mga babaye sa pagtuo nga namatyag mga anak apan sa ulahi nakauban nila kini pag-usab pinaagi sa pagkabanhaw. Gihisgotan niya ang uban kinsa ‘wala modawat ug kagawasan pinaagi sa lukat, aron makabaton sila ug mas maayong pagkabanhaw.’ (Heb. 11:35) Bisag dili nato maseguro kon kinsay gitumong ni Pablo, ang pipila, sama kang Nabot ug Zacarias, gibato hangtod namatay tungod sa ilang pagsunod sa Diyos ug pagbuhat sa iyang kabubut-on. (1 Hari 21:3, 15; 2 Cron. 24:20, 21) Tin-aw nga si Daniel ug ang iyang mga kauban may kahigayonan nga “modawat ug kagawasan” pinaagi sa pagkompromiso. Imbes buhaton kana, ang ilang pagtuo sa gahom sa Diyos nakatabang nila, ingnon ta, sa ‘pagpatak-om sa baba sa mga leyon’ ug sa ‘pagpahunong sa puwersa sa kalayo.’—Heb. 11:33, 34; Dan. 3:16-18, 20, 28; 6:13, 16, 21-23.
11 Tungod sa ilang pagtuo, ang mga propeta sama kang Micaias ug Jeremias ‘nakaagom ug pagsulay pinaagig mga pagyagayaga ug pagkabilanggo.’ Ang uban, sama kang Elias, “naglatagaw sa mga desyerto ug sa kabukiran ug sa mga langob ug sa mga lungib sa yuta.” Silang tanan nakalahutay tungod kay sila ‘masaligong nagpaabot sa mga butang nga gilaoman.’—Heb. 11:1, 36-38; 1 Hari 18:13; 22:24-27; Jer. 20:1, 2; 28:10, 11; 32:2.
Pagpangitag Espirituwal nga Bahandi
(Hebreohanon 11:4) Tungod sa pagtuo si Abel nagtanyag sa Diyos ug halad nga mas labawg bili kay sa kang Cain, ug pinaagi niini nga pagtuo siya gipamatud-an nga matarong, kay giuyonan sa Diyos ang iyang mga gasa, ug bisag siya namatay, siya nagsulti pa gihapon pinaagi sa iyang pagtuo.
Pagtuo
Karaang mga Panig-ingnan sa Pagtuo. Ang matag usa “sa ingon kabagang panganod sa mga saksi” nga gihisgotan ni Pablo (Heb 12:1) adunay lig-ong pasukaranan sa pagtuo. Pananglitan, si Abel tinong nahibalo bahin sa saad sa Diyos mahitungod sa “binhi” nga magsamad sa ulo “sa halas.” Ug iyang nakita ang dayag nga mga ebidensiya sa katumanan sa silot nga gipahayag ni Jehova batok sa iyang mga ginikanan didto sa Eden. Sa gawas sa Eden, si Adan ug ang iyang pamilya mikaon ug tinapay pinaagi sa singot sa ilang nawong tungod kay ang yuta gitunglo ug, busa, nagpatunghag mga sampinit ug mga kudyapa. Lagmit nga naobserbahan ni Abel nga ang pangandoy ni Eva maoy alang sa iyang bana ug nga gigamhan ni Adan ang iyang asawa. Walay duhaduha nga ang iyang inahan nagmulo bahin sa kasakit sa iyang pagmabdos. Dayon, ang agianan usab paingon sa tanaman sa Eden gibantayan sa mga kerubin ug sa nagdilaab nga sulab sa espada. (Gen 3:14-19, 24) Kining tanan nahimong ‘dayag nga pasundayag,’ nga nagpasalig kang Abel nga ang kaluwasan moabot pinaagi sa ‘sinaad nga binhi.’ Busa, tungod sa pagtuo, siya “naghalad sa Diyos ug usa ka halad,” nga mas dakog bili kay sa kang Cain.—Heb 11:1, 4.
(Hebreohanon 11:5) Tungod sa pagtuo si Enoc gibalhin aron dili makaagom ug sakit nga kamatayon. Ug wala na siya makit-i kay gibalhin siya sa Diyos; kay sa wala pa siya ibalhin nakadawat siyag pamatuod nga nalipay niya pag-ayo ang Diyos.
Siya Nakapahimuot Pag-ayo sa Diyos
Busa, sa unsang paagi “gilalin” si Enoc aron dili siya “makaagom ug kamatayon”? Posible nga mahupayong gibugto ni Jehova ang kinabuhi ni Enoc, aron siya dili makaagom ug sakit nga kamatayon. Apan una pa niana, si Enoc nakadawat ug pamatuod nga siya nakapahimuot sa Diyos. Sa unsang paagi? Sa wala pa mamatay, basin si Enoc nakadawat ug panan-awon gikan sa Diyos, tingali gipakita kaniya ang Yuta ingong paraiso. Sa nakakita nianang klarong pamatuod nga siya nakapahimuot kang Jehova, si Enoc natulog sa kamatayon. Bahin kang Enoc ug sa ubang matinumanong lalaki ug babaye, si apostol Pablo miingon: “Sa pagtuo kini silang tanan nangamatay.” (Hebreohanon 11:13) Human niana, lagmit gipangita sa iyang mga kaaway ang iyang patayng lawas, apan kini ‘wala na hikaplagi,’ tingali kay giwagtang na kini ni Jehova aron dili mapanamastamasan o magamit sa bakak nga pagsimba.
Pagbasa sa Bibliya
(Hebreohanon 11:1-16) Ang pagtuo mao ang lig-ong pagsalig nga matuman ang gilaoman, ang tin-awng ebidensiya nga tinuod ang gituohan bisag dili kini makita. 2 Kay pinaagi niini, ang mga tawo sa karaang panahon nakadawat ug pamatuod nga nalipay ang Diyos kanila. 3 Tungod sa pagtuo atong masabtan nga ang mga sistema sa mga butang giandam pinaagi sa pulong sa Diyos, ug ang mga butang nga makita naggikan sa mga butang nga dili makita. 4 Tungod sa pagtuo si Abel nagtanyag sa Diyos ug halad nga mas labawg bili kay sa kang Cain, ug pinaagi niini nga pagtuo siya gipamatud-an nga matarong, kay giuyonan sa Diyos ang iyang mga gasa, ug bisag siya namatay, siya nagsulti pa gihapon pinaagi sa iyang pagtuo. 5 Tungod sa pagtuo si Enoc gibalhin aron dili makaagom ug sakit nga kamatayon. Ug wala na siya makit-i kay gibalhin siya sa Diyos; kay sa wala pa siya ibalhin nakadawat siyag pamatuod nga nalipay niya pag-ayo ang Diyos. 6 Dugang pa, kon walay pagtuo imposible nga mapalipay ang Diyos, kay kadtong moduol sa Diyos kinahanglang motuo nga siya buhi ug nga siya maoy tigganti sa mga sinserong nangita kaniya. 7 Tungod sa pagtuo si Noe, human hatagi sa Diyos ug pasidaan bahin sa mga butang nga wala pa makita, nagpakitag kahadlok sa Diyos ug nagtukod ug arka aron maluwas ang iyang panimalay; ug pinaagi niini nga pagtuo iyang gihukman ang kalibotan, ug siya nahimong manununod sa pagkamatarong nga resulta sa pagtuo. 8 Tungod sa pagtuo si Abraham, dihang gitawag sa Diyos, misugot nga moadto sa lugar nga iyang madawat ingong panulondon; milakaw siya bisag wala mahibalo kon asa paingon. 9 Tungod sa pagtuo siya mipuyo ingong langyaw sa gisaad nga yuta. Nagpuyo siya sa mga tolda uban ni Isaac ug Jacob, nga kauban niyang mga manununod sa mao ra nga saad. 10 Kay iyang gipaabot ang siyudad nga may tinuod nga mga pundasyon, nga ang tigdisenyo ug magtutukod mao ang Diyos. 11 Tungod sab sa pagtuo si Sara namabdos bisag lapas na sa edad, kay giisip niya nga kasaligan Siya nga nagsaad. 12 Tungod niini, gikan sa usa ka tawo nga samag patay na, dihay natawong mga anak nga sama ka daghan sa mga bituon sa langit ug dili maihap sama sa balas sa baybayon. 13 Silang tanan matinumanon hangtod sa kamatayon, bisag wala nila madawat ang katumanan sa mga saad; apan samag nakita nila kini sa layo ug nalipay sila niini. Ilang gipahayag nga sila mga estranyo ug temporaryong mga residente sa yuta. 14 Kay kadtong nagsulti nianang paagiha nagpamatuod nga nangita gyod silag kaugalingong dapit nga kapuy-an. 15 Apan kon nagsige pa silag hunahuna sa lugar nga ilang gigikanan, may kahigayonan unta sila nga mobalik. 16 Apan karon sila nagtinguhag mas maayong dapit, nga mao ang dapit nga iya sa langit. Busa wala sila ikaulaw sa Diyos, nga tawgon nila siya ingong ilang Diyos, kay siya nag-andam ug siyudad para kanila.
Septiyembre 23-29
BAHANDI GIKAN SA PULONG SA DIYOS | HEBREOHANON 12-13
“Disiplina—Pamatuod sa Gugma ni Jehova”
(Hebreohanon 12:5) Ug nalimot na gyod mo sa tambag nga gihatag sa Diyos kaninyo ingong mga anak: “Anak ko, ayawg pakamenosa ang disiplina ni Jehova, ug ayawg kaluya dihang tul-iron ka niya;
Ayawg Lingi sa “mga Butang nga Anaa sa Luyo”
18 Bug-at nga tambag. Komosta kon magsige kitag hunahuna nga may kayugot sa tambag nga atong nadawat? Kini makapaguol ug makapaluya kanato. (Heb. 12:5) Kon gisalikway dayon nato ang tambag o kaha gidawat nato kini ug sa ulahi mihunong, pareho ra ang resulta. Wala kita makabenepisyo sa tambag. Mas maayo gayod nga sundon ang awhag ni Solomon: “Hawiri ang disiplina; ug ayaw kini buhii. Ampingi kini, kay kini maoy imong kinabuhi.” (Prov. 4:13) Sama sa drayber nga nagsunod sa mga karatula sa karsada, dawaton nato ang tambag, ipadapat kini, ug padayong moalagad.—Prov. 4:26, 27; basaha ang Hebreohanon 12:12, 13.
(Hebreohanon 12:6, 7) kay ang gihigugma ni Jehova iyang ginadisiplina, gani kastigohon niya ang matag usa nga iyang gidawat ingong anak.” 7 Kinahanglan mong molahutay ingong bahin sa inyong disiplina. Gitratar mo sa Diyos ingong mga anak. Kay kinsa ba ang anak nga wala disiplinaha sa iyang amahan?
“Sa Dihang Mag-ampo Kamo, Ingnon Ninyo, ‘Amahan’”
Ang usa ka mahigugmaong amahan magdisiplina sa iyang mga anak, kay hinungdanon kaniya kon unsa silang matanga sa pagkatawo inigkadako nila. (Efeso 6:4) Ang maong amahan estrikto tingali, apan dili gayod siya maghinobra sa pagdisiplina sa iyang mga anak. Sa susama, may mga panahon tingali nga kinahanglan tang disiplinahon sa atong langitnong Amahan. Apan ang Iyang disiplina kanunayng mahigugmaon ug dili gayod mapintason. Sama sa iyang Amahan, si Jesus wala gayod maghinobra sa pagtul-id sa iyang mga tinun-an, bisag may mga panahon nga wala dayon sila mosanong niana.—Mateo 20:20-28; Lucas 22:24-30.
(Hebreohanon 12:11) Tinuod, sa pagkakaron ang disiplina sakit ug dili makapalipay; apan kini mobunga unyag kalinaw ug pagkamatarong niadtong nabansay niini.
“Patalinghog sa Disiplina ug Mahimong Maalamon”
18 Tinuod, sakit tingali ang disiplina, pero dunay mas sakit pa niana—ang kadaot nga moresulta tungod sa pagsalikway sa disiplina. (Heb. 12:11) Tagda ang duha ka pananglitan—si Cain ug Haring Zedekias. Dihang nakita sa Diyos nga nagdumot si Cain kang Abel ug gusto niya ning patyon, ang Diyos nagtambag kang Cain: “Nganong ikaw nanginit sa kasuko ug nganong nagminghoy ang imong panagway? Kon magbuhat ka ug maayo, dili ba adunay pagbayaw? Apan kon dili ka magbuhat ug maayo, adunay sala nga naghupo sa ganghaan, ug ikaw ang gipangandoy niini; ug makabuntog ka ba niini?” (Gen. 4:6, 7) Wala mamati si Cain ug siya nakasala. Giantos niya ang masakit nga epekto niana sa tibuok niyang kinabuhi. (Gen. 4:11, 12) Kana mas sakit kon ikomparar sa pagbadlong ni Jehova.
Pagpangitag Espirituwal nga Bahandi
(Hebreohanon 12:1) Busa, kay gilibotan man tag ingon niana ka bagang panganod sa mga saksi, tangtangon sab nato ang tanang kabug-at ug ang sala nga daling makalambod nato, ug modagan ta nga malahutayon sa lumba nga gibutang sa atong atubangan,
Dagana nga Malahutayon ang Lumba
11 Ang ‘bagang panganod sa mga saksi’ dili lamang mga tumatan-aw sa lumba nga gustong makakita sa ilang paboritong atleta o tem nga makadaog. Hinunoa, sila samag mga magdadagan nga nakatapos sa lumba. Bisag patay na, sila maisip nga hawod nga mga magdadagan nga makapadasig sa mga bag-ohan. Handurawa kon unsay bation sa usa kon siya nahibalo nga ang pipila ka hawod nga magdadagan nagtan-aw kaniya. Dili ba siya modagan taman sa ginhawa? Ang maong karaang mga saksi makapamatuod nga bisag unsa ka hago ang simbolikong lumba, kana mahimong madaog. Busa angayng hinumdoman sa Hebreohanong mga Kristohanon ang panig-ingnan sa “panganod sa mga saksi” kay kana makadasig kanila sa ‘paglahutay sa lumba.’ Mahimo usab nato kana.
(Hebreohanon 13:9) Ayaw mo palimbong sa nagkadaiya ug lahi nga mga pagtulon-an, kay mas maayong palig-onon ang kasingkasing pinaagi sa dili hitupngang pagkamaayo kay sa mga pagkaon, kay kini walay ikahatag nga kaayohan niadtong naghatag ug sobrang importansiya niini.
Pagtanyag ug mga Halad nga Makapahimuot Kang Jehova
10 Busa ang mga Hebreohanon kinahanglang maglikay nga dili “madaldal sa nagkalainlain ug lahi nga mga pagtulon-an” sa mga tigpasiugda sa Hudaismo. (Galacia 5:1-6) Dili pinaagi sa maong mga pagtulon-an kondili ‘pinaagi sa dili-takos nga kalulot sa Diyos nga hatagag kalig-on ang kasingkasing’ aron nga magpabiling malig-on diha sa kamatuoran. Hayan ang pipila naglalis mahitungod sa pagkaon ug sa mga halad, kay si Pablo miingon nga ang kasingkasing wala mapalig-on “pinaagig mga kalan-on, diin walay kaayohang nakuha kadtong nagkinabuhi niana.” Ang espirituwal nga mga kaayohan mosangpot gikan sa diyosnong pagkamahinalaron ug pagpabili alang sa lukat, dili gikan sa walay-hinungdang kabalaka mahitungod sa pagkaon ug mga kalan-on ug sa pagbantay sa partikular nga mga adlaw. (Roma 14:5-9) Dugang pa, ang halad ni Kristo nagpakawalay-bili sa Levitikanhong mga halad.—Hebreohanon 9:9-14; 10:5-10.
Pagbasa sa Bibliya
(Hebreohanon 12:1-17) Busa, kay gilibotan man tag ingon niana ka bagang panganod sa mga saksi, tangtangon sab nato ang tanang kabug-at ug ang sala nga daling makalambod nato, ug modagan ta nga malahutayon sa lumba nga gibutang sa atong atubangan, 2 samtang atong tutokan ang Pangunang Ahente ug Tighingpit sa atong pagtuo, si Jesus. Tungod sa kalipay nga gibutang sa iyang atubangan, nalahutay niya ang kamatayon sa estaka sa pagsakit, nga gibalewala ang kaulaw, ug milingkod sa tuong kamot sa trono sa Diyos. 3 Busa tagda pag-ayo ang usa nga nakalahutay sa pagsupak sa mga makasasala, nga pinaagi niini ilang gihukman ang ilang kaugalingon, aron dili mo kapoyon ug moundang. 4 Sa inyong pagpakigbugno niana nga sala, wala pa gyod mo makabugno hangtod sa kamatayon. 5 Ug nalimot na gyod mo sa tambag nga gihatag sa Diyos kaninyo ingong mga anak: “Anak ko, ayawg pakamenosa ang disiplina ni Jehova, ug ayawg kaluya dihang tul-iron ka niya; 6 kay ang gihigugma ni Jehova iyang ginadisiplina, gani kastigohon niya ang matag usa nga iyang gidawat ingong anak.” 7 Kinahanglan mong molahutay ingong bahin sa inyong disiplina. Gitratar mo sa Diyos ingong mga anak. Kay kinsa ba ang anak nga wala disiplinaha sa iyang amahan? 8 Apan kon wala mo makadawat niana nga disiplina, kamo dili niya tinuod nga mga anak; anak mo sa lain. 9 Dugang pa, kita gidisiplina sa atong tawhanong mga amahan, ug gitahod nato sila. Dili ba mas magpasakop ta sa atong espirituwal nga Amahan aron mabuhi? 10 Kay gidisiplina ta nila sa mubong panahon sumala sa gihunahuna nilang maayo, apan ang Diyos nagdisiplina kanato para sa atong kaayohan aron kita makaambit sa iyang pagkabalaan. 11 Tinuod, sa pagkakaron ang disiplina sakit ug dili makapalipay; apan kini mobunga unyag kalinaw ug pagkamatarong niadtong nabansay niini. 12 Busa palig-ona ang mga kamot ug mga tuhod nga naluya, 13 ug padayong tul-ira ang mga agianan sa inyong tiil, aron ang piang dili mosamot ka piang, kondili maulian hinuon. 14 Tinguhaa ang pagpakigdait sa tanang tawo ug ang pagkabalaan, kay kon wala kini sa usa ka tawo dili niya makita ang Ginoo. 15 Pagbantay pag-ayo nga walay mawad-an sa dili hitupngang pagkamaayo sa Diyos, aron walay makahilong gamot nga motungha ug magpahinabog kasamok ug dili mahugawan ang daghan pinaagi niini; 16 ug pagbantay nga wala kaninyoy nagahimog seksuwal nga imoralidad o wala magpabili sa sagradong mga butang, sama kang Esau, nga gibaylo sa pagkaon ang iyang mga katungod sa pagkapanganay. 17 Kay nahibalo mo nga pagkahuman niadto dihang gusto na niyang mapanunod ang panalangin, siya gisalikway; kay bisag nagpakiluoy siya uban ang mga luha aron mausab ang desisyon sa iyang amahan, wala kini mahitabo.
Septiyembre 30–Oktubre 6
BAHANDI GIKAN SA PULONG SA DIYOS | SANTIAGO 1-2
“Ang Dalan sa Sala ug Kamatayon”
(Santiago 1:14) Apan ang matag usa masulayan dihang siya ginadani ug ginahaylo sa iyang kaugalingong tinguha.
Tentasyon
Ikaw ginatental kon maibog kag usa ka butang—ilabina sa dili maayo. Pananglitan, samtang nag-shopping, duna kay nakit-ang nindot nga baligya. Unya misantop sa imong hunahuna nga makawat nimo ang baligya nga dili ra masakpan. Pero dili mosugot ang imong konsensiya! Busa imo kanang giwala sa imong hunahuna. Nianang higayona, ang tentasyon natapos ug ikaw ang nakadaog.
ANG GIINGON SA BIBLIYA
Kon ginatental ka, wala kana magpasabot nga daotan ka. Ang Bibliya nag-ingon nga kitang tanan makaagig tentasyon. (1 Corinto 10:13) Ang importante maoy kon unsay atong buhaton dihang kita tentalon. Ang uban magsigeg hunahuna bahin sa dili maayong mga pangibog ug sa ulahi magpadala niana. Pero wad-on dayon kini sa uban diha sa ilang hunahuna kay kini daotan.
“Ang matag usa masulayan pinaagi sa pagkaganoy ug pagkahaylo sa iyang kaugalingong tinguha.”—Santiago 1:14.
(Santiago 1:15) Unya ang tinguha, dihang kini manamkon na, manganak ug sala; unya ang sala, dihang kini mabuhat na, manganak ug kamatayon.
Tentasyon
Gipakita sa Bibliya ang mga lakang nga moresultag buhat nga daotan. Ang Santiago 1:15 nag-ingon: “Ang [daotang] tinguha, sa dihang kini makapanamkon na, manganak ug sala.” Busa kon dili nato wad-on diha sa atong hunahuna ang daotang pangibog, moabot ang panahon nga dili na kana kapugngan, sama nga dili kapugngan sa babayeng mabdos ang iyang pagpanganak. Pero, dunay mga paagi aron dili kita maulipon sa daotang mga pangibog. Ato kanang mabuntog.
Pagpangitag Espirituwal nga Bahandi
(Santiago 1:17) Ang matag maayong gasa ug matag hingpit nga regalo naggikan sa itaas, gikan sa Amahan sa langitnong mga kahayag, kinsa dili mausab sama sa landong nga magbalhinbalhin.
Kahayag
Si Jehova mao ang “Amahan sa langitnong mga kahayag.” (San 1:17) Siya dili lamang “Maghahatag sa adlaw sa paghatag ug kahayag sa maadlaw, sa mga lagda sa bulan ug sa mga bituon sa paghatag ug kahayag sa magabii” (Jer 31:35) kondili siya usab ang Tinubdan sa tanang espirituwal nga kahayag o kalamdagan. (2Co 4:6) Ang iyang balaod, hudisyal nga mga hukom, ug ang iyang pulong maoy kahayag alang niadtong magpagiya niini. (Sal 43:3; 119:105; Pr 6:23; Isa 51:4) Ang salmista nagpahayag: “Pinaagi sa kahayag nga gikan kanimo kami makakita ug kahayag.” (Sal 36:9; itandi ang Sal 27:1; 43:3.) Sama sa kahayag sa adlaw nga nag-anam-anam ug kasanag gikan sa pagbanagbanag hangtod sa “pagkahingpit sa adlaw,” mao man usab ang dalan sa mga matarong, nga gilamdagan pinaagi sa diyosnong kaalam, nag-anam-anam ug kadan-ag. (Pr 4:18) Ang paglakaw sa dalan nga gilatid ni Jehova maoy paglakaw diha sa iyang kahayag. (Isa 2:3-5) Sa laing bahin, sa dihang ang usa ka tawo magtan-aw sa mga butang sa dili-putling paagi o uban sa daotang tinguha, siya anaa sa hilabihang espirituwal nga kangitngit. Sumala sa giingon ni Jesus: “Kon daotan ang imong mata, ang imong tibuok lawas mahimong ngitngit. Kon sa pagkatinuod ang kahayag nga anaa kanimo maoy kangitngit, pagkadako gayod niana nga kangitngit!”—Mat 6:23; itandi ang Deu 15:9; 28:54-57; Pr 28:22; 2Pe 2:14.
(Santiago 2:8) Karon, kon gituman ninyo ang harianong balaod sumala sa kasulatan, “Higugmaa ang imong isigkatawo sama sa imong kaugalingon,” maayo ang inyong ginabuhat.
Balaod
“Harianong Balaod.” Ang “harianong balaod” labaw ug mas importante taliwala sa ubang mga balaod maylabot sa tawhanong mga relasyon nga mabatonan sa usa ka hari taliwala sa mga tawo. (San 2:8) Ang diwa sa pakigsaad sa Balaod maoy gugma; ug ang sugo nga “higugmaon mo ang imong silingan sama sa imong kaugalingon” (ang harianong balaod) mao ang ikaduha sa mga sugo nga niini nagsukad ang tibuok Balaod ug ang mga Manalagna. (Mat 22:37-40) Ang mga Kristohanon, bisag dili ilalom sa pakigsaad sa Balaod, maoy sakop sa balaod sa Hari nga si Jehova ug sa iyang Anak, ang Haring Jesu-Kristo, maylabot sa bag-ong pakigsaad.
Pagbasa sa Bibliya
(Santiago 2:10-26) Kay si bisan kinsa nga mosunod sa tibuok Balaod apan makalapas sa usa niini sad-an sa tibuok Balaod. 11 Kay ang usa nga miingon, “Ayawg panapaw,” miingon usab, “Ayaw pagpatay.” Karon, kon dili ka manapaw apan mopatay ka, mahimo kang malinapason sa balaod. 12 Padayon sa pagsulti ug paggawi nga sama niadtong pagahukman sumala sa balaod sa mga tawong may kagawasan. 13 Kay ang usa nga dili magpakitag kaluoy hukman nga walay kaluoy. Ang kaluoy magmadaogon batok sa paghukom. 14 Mga igsoon ko, unsay kapuslanan kon ang usa moingon nga siya dunay pagtuo apan wala siyay binuhatan? Dili ba ang maong pagtuo dili makaluwas kaniya? 15 Kon si bisan kinsang igsoong lalaki o babaye kulag sinina ug walay igong pagkaon sa usa ka adlaw, 16 unya usa kaninyo moingon kanila, “Panglakaw mo nga malinawon; makabaton unta mog mga sinina ug pagkaon sa adlaw-adlaw,” apan wala ninyo sila hatagi sa ilang pisikal nga mga panginahanglan, unsay kapuslanan niini? 17 Busa ingon usab niana ang pagtuo. Patay kini kon walay binuhatan. 18 Apan ang usa moingon: “Ikaw dunay pagtuo, ug ako dunay binuhatan. Ipakita kanako ang imong pagtuo nga walay binuhatan, ug ipakita nako kanimo ang akong pagtuo pinaagi sa akong binuhatan.” 19 Nagtuo ka nga dunay usa ka Diyos, dili ba? Maayo ang imong ginabuhat. Ug gani ang mga demonyo nagtuo man ug nagapangurog. 20 Apan gusto ba nimog pamatuod, Oh tawong kulang ug kahibalo, nga ang pagtuo nga walay binuhatan walay kapuslanan? 21 Dili ba si Abraham nga atong amahan gipahayag nga matarong pinaagi sa binuhatan human niya ihalad si Isaac nga iyang anak diha sa halaran? 22 Nakita nimo nga ang iyang pagtuo nadayag sa iyang binuhatan ug ang iyang pagtuo nahingpit pinaagi sa iyang binuhatan, 23 ug natuman ang kasulatan nga nag-ingon: “Si Abraham nagpakitag pagtuo kang Jehova, ug tungod niana giisip siya nga matarong,” ug siya gitawag nga higala ni Jehova. 24 Nakita ninyo nga ang usa ka tawo ipahayag nga matarong pinaagi sa binuhatan ug dili pinaagi sa pagtuo lamang. 25 Sa samang paagi, dili ba si Rahab nga pampam gipahayag usab nga matarong pinaagi sa binuhatan human niya abiabiha ang mga mensahero ug gipalakaw sila ngadto sa laing agianan? 26 Sa pagkatinuod, sama nga patay ang lawas nga walay gininhawa, patay usab ang pagtuo nga walay binuhatan.