Reperensiya Para sa Workbook sa Tigom nga Kinabuhi ug Ministeryo
Agosto 5-11
BAHANDI GIKAN SA PULONG SA DIYOS | 2 TIMOTEO 1-4
“Ang Espiritu nga Gihatag sa Diyos Kanato Wala Maghimo Kanato nga Talawan”
(2 Timoteo 1:7) Kay ang espiritu nga gihatag sa Diyos kanato wala maghimo kanato nga talawan, kondili kini naghatag kanatog gahom ug gugma ug maayong panghunahuna.
Mga Batan-on—Ipadayag ang Inyong Pag-uswag
9 Aron tabangan si Timoteo, si Pablo sa ulahi nagpahinumdom kaniya: “Kita wala hatagi sa Diyos ug espiritu sa katalaw, kondili sa gahom ug sa gugma ug sa maayong panghunahuna.” (2 Tim. 1:7) Ang “maayong panghunahuna” naglangkit sa katakos sa paghunahuna ug pagpangatarongan sa maalamong paagi. Naglakip kana sa katakos nga makaantos sa bisan unsang kahimtang. Ang pipila ka batan-on nga dili pa hamtong sa espirituwal nagpadayag sa espiritu sa katalaw ug naningkamot sa pag-ikyas sa mga suliran pinaagi sa sobrang pagkatulog ug pagtan-awg TV, pag-abuso sa droga o alkoholikong ilimnon, kanunayng pagparti, o seksuwal nga imoralidad. Ang mga Kristohanon gitambagan sa “pagsalikway sa pagkadili-diyosnon ug sa kalibotanong mga tinguha ug sa pagkinabuhi uban ang maayong panghunahuna ug pagkamatarong ug diyosnong pagkamahinalaron taliwala niini nga sistema sa mga butang.”—Tito 2:12.
(2 Timoteo 1:8) Busa ayawg ikaulaw ang pagpamatuod bahin sa atong Ginoo, ug ayaw pod kog ikaulaw nga nabilanggo tungod niya, apan kinahanglang andam kang moantos sa kalisdanan tungod sa maayong balita pinaagi sa pagsalig sa gahom sa Diyos.
‘Magmaisogon ug Magmakusganon Kamo!’
7 Si Pablo, sa pagsulat kang Timoteo, miingon: “Kita wala hatagi sa Diyos ug espiritu sa katalaw, kondili sa gahom . . . Busa ayaw ikaulaw ang pagpamatuod bahin sa atong Ginoo.” (2 Timoteo 1:7, 8; Marcos 8:38) Kay nakabasa nianang mga pulonga, kita makasukna sa atong kaugalingon: ‘Ikaulaw ko ba ang akong relihiyosong mga tinuohan, o maisogon ba ako? Sa akong trabahoan (o eskuylahan), gipahibalo ko ba ang akong mga kauban nga ako Saksi ni Jehova, o gitinguha ko ba nga itago kana? Maulaw ba ako nga mahimong lahi sa uban, o magarbohon ako nga mailhang lahi tungod sa akong relasyon uban kang Jehova?’ Kon ang usa mahadlokon sa pagsangyaw sa maayong balita o pagbaton ug dili-popular nga baroganan, ipahinumdom kaniya ang tambag ni Jehova kang Josue: “Magmaisogon ug magmakusganon ka.” Ayaw gayod kalimti, ang opinyon sa atong mga kauban sa trabaho o mga kasaring dili mao ang hinungdanon kondili kon unsa ang hunahuna ni Jehova ug ni Jesu-Kristo.—Galacia 1:10.
Pagpangitag Espirituwal nga Bahandi
(2 Timoteo 2:3, 4) Ingong maayong sundalo ni Kristo Jesus, kinahanglang andam kang moantos sa kalisdanan. 4 Walay tawo nga nagserbisyo ingong sundalo ang mosulod ug mga negosyo, aron uyonan siya sa nagdawat niya ingong sundalo.
Pagpangitag Tinuod nga Bahandi
13 Si Timoteo may pagtuo usab. Human siya tawga ingong “maayong sundalo ni Kristo Jesus,” giingnan siya ni Pablo: “Walay tawo nga nagserbisyo ingong sundalo ang magpalambigit sa iyang kaugalingon sa mga pamatigayon sa kinabuhi, aron nga mabatonan niya ang pag-uyon sa usa nga nagtala kaniya ingon nga sundalo.” (2 Tim. 2:3, 4) Ang mga sumusunod ni Jesus karon, apil ang kapig usa ka milyong bug-os panahong ministro, naningkamot sa pagpadapat sa tambag ni Pablo. Ilang gisuklan ang pagpangdani sa mga advertisement ug sa kalibotan kay sila nahinumdom sa prinsipyo: “Ang manghuhulam maoy sulugoon sa tawo nga nagapahulam.” (Prov. 22:7) Gusto gyod ni Satanas nga mahurot ang atong panahon ug kusog alang sa iyang sistema sa negosyo. Kon dili ta magbantay, maulipon ta sa utang sulod sa daghang katuigan. Ang dagkong bayranan sa giutang nga balay ug sakyanan, loan sa pagpaeskuyla, ug bisan gani ang engrandeng kasal moresultag grabeng kalisod sa pinansiyal. Gipakita nato ang praktikal nga kaalam dihang atong pasimplehon ang atong kinabuhi ug menosan ang pagpangutang ug paggasto. Pinaagi niini, may kagawasan ta sa pag-alagad sa Diyos imbes maulipon sa sistema sa negosyo.—1 Tim. 6:10.
(2 Timoteo 2:23) Isalikway sab ang binuang ug way pulos nga mga debate, kay nahibalo ka nga moresulta kinig mga away.
Ang Katawhan ni Jehova ‘Mibiya sa Pagkadili-Matarong’
10 Karon, dili kaayo daghan ang apostata sa kongregasyon. Bisan pa niana, dihang motungha ang dili kasulatanhong pagtulon-an, bisan asa pa kini naggikan, kinahanglang isalikway dayon nato kini. Dili maalamon nga makigkomunikar sa mga apostata, sa personal man, sa Internet, o sa ubang matang sa komunikasyon. Bisag ang tumong nato mao ang pagtabang sa usa ka apostata, ang pagpakigkomunikar kaniya maoy supak sa teksto nga bag-o lang natong gihisgotan. Hinunoa, ingong katawhan ni Jehova, atong isalikway, oo bug-os likayan, ang apostasya.
Pagbasa sa Bibliya
(2 Timoteo 1:1-18) Gikan kang Pablo, nga apostol ni Kristo Jesus pinaagi sa kabubut-on sa Diyos sumala sa saad sa kinabuhi pinaagi kang Kristo Jesus, 2 ngadto kang Timoteo, nga minahal nga anak: Hinaot maanaa kanimo ang dili hitupngang pagkamaayo, kaluoy, ug kalinaw gikan sa Diyos nga Amahan ug ni Kristo Jesus nga atong Ginoo. 3 Mapasalamaton ko sa Diyos, nga maoy gihatagan nakog sagradong pag-alagad sama sa gibuhat sa akong mga katigulangan, ug uban sa hinlong konsensiya, wala gyod ti ka kalimti sa akong mga pangamuyo adlaw ug gabii. 4 Dihang mahinumdom ko sa imong mga luha, nangandoy ko nga makita ka, aron malipay ko pag-ayo. 5 Kay nahinumdom ko sa imong pagtuo nga dili pakaaron-ingnon, nga una nakong nakita sa imong lola nga si Loida ug sa imong inahang si Eunice, ug segurado ko nga kini naa gihapon kanimo. 6 Tungod niini pahinumdoman ti ka nga dili pasagdan ang gasa sa Diyos nga imong nadawat dihang gipatong nako ang akong mga kamot kanimo. 7 Kay ang espiritu nga gihatag sa Diyos kanato wala maghimo kanato nga talawan, kondili kini naghatag kanatog gahom ug gugma ug maayong panghunahuna. 8 Busa ayawg ikaulaw ang pagpamatuod bahin sa atong Ginoo, ug ayaw pod kog ikaulaw nga nabilanggo tungod niya, apan kinahanglang andam kang moantos sa kalisdanan tungod sa maayong balita pinaagi sa pagsalig sa gahom sa Diyos. 9 Iya tang giluwas ug gitawag nga mahimong mga balaan, dili tungod sa atong mga buhat, kondili tungod sa iya mismong katuyoan ug dili hitupngang pagkamaayo. Kini gihatag kanato pinaagi kang Kristo Jesus sa dugay na kaayong panahon, 10 apan karon kini tin-awng gipakita pinaagi sa pagpadayag sa atong Manluluwas, si Kristo Jesus, nga nagwala sa kamatayon ug nagpadayag kanato pinaagi sa maayong balita kon unsaon pagbaton ug kinabuhi ug lawas nga dili madunot, 11 nga para niini ako gitudlo ingong magwawali ug apostol ug magtutudlo. 12 Tungod niini ako nag-antos sab niining mga butanga, apan wala ko maulaw. Kay nakaila ko sa Diyos nga akong gituohan, ug segurado ko nga siya makahimo sa pagbantay sa akong gisalig kaniya hangtod sa adlaw sa paghukom. 13 Padayong sunda ang sukdanan sa maayong mga pulong nga imong nadungog kanako, ug padayong ipakita ang pagtuo ug gugma ingong tawo nga nahiusa kang Kristo Jesus. 14 Bantayi kining bililhong butang nga gisalig kanimo pinaagi sa balaang espiritu nga naa kanato. 15 Nahibalo ka nga ang tanang tawo sa probinsiya sa Asia mibiya kanako, apil si Figelo ug si Hermogenes. 16 Hinaot kaluy-an sa Ginoo ang panimalay ni Onesiforo, kay pirme ko niyang gidasig, ug wala niya ikaulaw ang akong mga kadena. 17 Hinuon, dihang dinhi siya sa Roma, gipangita gyod ko niya ug nakit-an ko niya. 18 Hinaot ang Ginoong Jehova magpakitag kaluoy kaniya sa adlaw sa paghukom. Ug nahibalo ka pag-ayo sa tanang pag-alagad nga gihimo niya kanako sa Efeso.
Agosto 12-18
BAHANDI GIKAN SA PULONG SA DIYOS | TITO 1–FILEMON
“Pagtudlog mga Ansiyano”
(Tito 1:5-9) Gibilin ka nako sa Creta aron sa pagtul-id sa mga butang nga kinahanglang tul-iron ug sa pagtudlog mga ansiyano sa matag siyudad, sumala niining akong instruksiyon kanimo: 6 ang ansiyano kinahanglang wala akusahig bisan unsa, usa ray asawa, may mga anak nga magtutuo nga wala akusahig dili maayong pagkinabuhi o pagkarebelyoso. 7 Kay ingong piniyalan sa Diyos, ang tigdumala kinahanglang wala akusahig bisan unsa, dili mabuotbuoton, dili daling masuko, dili palahubog, dili bayolente, dili magtinguha nga mamentaha, 8 kondili maabiabihon, mahigugmaon sa pagkamaayo, maayog panghunahuna, matarong, maunongon, may pagpugong sa kaugalingon, 9 nga nangupot pag-ayo sa kasaligang mensahe kon bahin sa iyang paagi sa pagpanudlo, aron makapalig-on siya pinaagi sa maayong pagtulon-an ug makabadlong niadtong mosulti batok niini.
Mga Pangutana Gikan sa mga Magbabasa
Bisag wala idetalye sa Kasulatan kon sa unsang paagi gihimo ang matag pagtudlo kaniadto, may pipila ka indikasyon kon sa unsang paagi nila kini gihimo. Ang rekord nag-ingon nga sa dihang namauli na si Pablo ug Bernabe gikan sa ilang unang misyonaryong panaw, “nagtudlo silag mga ansiyano alang kanila diha sa matag kongregasyon ug, nga nag-ampo uban ang mga pagpuasa, ilang gipiyal sila ngadto kang Jehova nga kaniya sila nahimong mga magtutuo.” (Buh. 14:23) Pipila ka tuig sa ulahi, gisulatan ni Pablo ang kauban niya kanhi sa panaw nga si Tito, nga nag-ingon: “Ako nagbilin kanimo sa Creta, aron ikaw magtul-id sa mga butang nga depektoso ug magtudlo ug mga ansiyano sa matag siyudad, sumala sa akong gisugo kanimo.” (Tito 1:5) Si Timoteo, nga kanunayng nagapanaw uban kang Pablo, dayag nga gihatagan usab ug susamang awtoridad. (1 Tim. 5:22) Nan, dayag nga ang maong mga pagtudlo ginahimo sa nagapanawng mga magtatan-aw, dili sa mga apostoles ug ansiyano sa Jerusalem.
Uyon niini nga sumbanan sa Bibliya, ang Nagamandong Lawas sa mga Saksi ni Jehova mihimog kausaban bahin sa pagtudlog mga ansiyano ug ministeryal nga mga alagad. Sugod sa Septiyembre 1, 2014, ang pagtudlo himoon sumala sa mosunod: Ang matag circuit overseer mainampingong magrepaso sa mga rekomendasyon nga gihimo diha sa iyang sirkito. Inigduaw niya sa mga kongregasyon, paningkamotan niyang mailhan ang mga girekomendar, ug makig-uban kanila diha sa ministeryo kon posible. Human mahisgoti ang mga rekomendasyon uban sa lawas sa mga ansiyano, responsabilidad sa circuit overseer ang pagtudlog mga ansiyano ug ministeryal nga mga alagad sa mga kongregasyon sa iyang sirkito. Pinaagi niini nga kahikayan, mas nasunod nato ang sumbanan sa unang siglo.
Kinsa ang nalangkit niini nga proseso? Sama sa naandan, ang “matinumanon ug maalamong ulipon” mao ang may pangunang responsabilidad sa pagpakaon sa mga sulugoon sa panimalay. (Mat. 24:45-47) Naglakip kini sa pagsusi sa Kasulatan, sa tabang sa balaang espiritu, aron makahatag ug instruksiyon kon unsaon pagpadapat ang mga prinsipyo sa Bibliya maylabot sa pag-organisar sa tibuok kalibotang kongregasyon. Ang matinumanong ulipon usab maoy magtudlo sa tanang circuit overseer ug membro sa Branch Committee. Sa baylo, ang matag branch office motabang sa pagpatuman sa mga instruksiyon nga gikan sa matinumanong ulipon. Ang matag lawas sa mga ansiyano may seryosong responsabilidad sa pagrepaso pag-ayo sa Kasulatanhong mga kuwalipikasyon sa mga brader nga ilang irekomendar nga itudlo diha sa kongregasyon. Ang matag circuit overseer may seryosong responsabilidad sa pagrepaso pag-ayo sa mga rekomendasyon nga gihimo sa mga ansiyano ug dayon sa pagtudlo sa kuwalipikadong mga brader.
Pagpangitag Espirituwal nga Bahandi
(Tito 1:12) Usa kanila, nga ila mismong propeta, miingon: “Ang mga Cretanhon bakakon, pintas kaayo nga mga mananap, mga tapolan, hangol ug pagkaon.”
Mga Pangutana Gikan sa mga Magbabasa
Tino nga wala siya mouyon sa masangkaron rasanhon o etnikong pagdaot batok sa mga taga Creta. Makapaneguro kita niana, kay si Pablo nahibalo nga dunay maayong mga Kristohanon kinsa aprobado sa Diyos ug gidihogan sa Iyang balaang espiritu. (Buhat 2:5, 11, 33) Dihay igong debotadong mga Kristohanon sa paglangkob sa mga kongregasyon sa “matag siyudad.” Samtang ang maong mga Kristohanon dili hingpit nga mga tawo, makapaneguro kita nga sila dili mga bakakon ug mga walay-trabahong dagkog-kaon; kay kon mao sila dili padayong makabaton sa pag-uyon ni Jehova. (Filipos 3:18, 19; Pinadayag 21:8) Sama sa atong makita karon diha sa tanang mga nasod, dayag nga dunay matinuorog-kasingkasing nga mga tawo sa Creta kinsa nasubo sa ubos moral nga mga sukdanan libot kanila ug andam sa pagsanong sa Kristohanong mensahe.—Ezekiel 9:4; itandi ang Buhat 13:48.
(Filemon 15, 16) Tingali kini ang hinungdan nga mikalagiw siya kadiyot, aron mahibalik siya kanimo hangtod sa hangtod, 16 dili na ingong ulipon, kondili labaw pa sa usa ka ulipon, ingong hinigugmang igsoon, ilabina kanako, apan labi na gyod kanimo, diha sa unod ug sa Ginoo.
Mga Pangunang Punto sa mga Sulat Ngadto Kang Tito, Filemon, ug sa mga Hebreohanon
15, 16—Nganong wala sugoa ni Pablo si Filemon nga hatagag kagawasan si Onesimo? Si Pablo dili gustong mabalda sa iyang buluhaton sa ‘pagwali sa gingharian sa Diyos ug sa pagtudlo sa mga butang mahitungod sa Ginoong Jesu-Kristo.’ Busa, gilikayan niya nga malangkit sa mga isyu sa katilingban, sama sa isyu sa pagkaulipon.—Buh. 28:31.
Pagbasa sa Bibliya
(Tito 3:1-15) Padayon silang pahinumdomi nga magpasakop ug magmasinugtanon sa mga gobyerno ug mga awtoridad, andam sa matag maayong buhat, 2 dili magsultig daotan kang bisan kinsa, dili palaaway, kondili makataronganon, nga kanunayng magpakitag kalumo sa tanang tawo. 3 Kay bisan gani kita kaniadto dili maayog panghunahuna, dili masinugtanon, nalimbongan, ulipon sa lainlaing tinguha ug kalipayan, nagkinabuhi nga daotan ug masinahon, dulumtanan, ug nagdumtanay. 4 Apan dihang gipadayag sa Diyos, nga atong Manluluwas, ang iyang pagkamaayo ug gugma para sa katawhan 5 (dili tungod sa matarong nga mga buhat nga atong nahimo, kondili tungod sa iyang kaluoy), kita iyang giluwas pinaagi sa tubig nga naghatag kanatog kinabuhi ug pinaagi sa pagbag-o kanato pinaagi sa balaang espiritu. 6 Kini nga espiritu dagaya niyang gibubo kanato pinaagi ni Jesu-Kristo nga atong Manluluwas, 7 aron dihang mapahayag na ta nga matarong tungod sa iyang dili hitupngang pagkamaayo, kita mahimong mga manununod sumala sa paglaom nga kinabuhing walay kataposan. 8 Kasaligan kining mga pulonga, ug gusto nako nga padayon nimo kining ipasiugda, aron kadtong nagtuo sa Diyos kanunayng magpokus sa ilang hunahuna sa paghimog maayong mga buhat. Kining mga butanga maayo ug mapuslanon sa mga tawo. 9 Apan likayi ang binuang nga mga argumento, ang pagsusi sa mga kagikan, ug ang panaglalis ug panag-away bahin sa Balaod, kay kini walay kaayohan ug walay pulos. 10 Bahin sa tawo nga nagpasiugdag sekta, likayi siya human mapasidan-ig kaduha, 11 kay ang maong tawo mitipas sa dalan sa kamatuoran ug nagpakasala ug naghimo sa iyang kaugalingon nga hinukman. 12 Dihang mapadala na nako si Artemas o si Tiquico diha kanimo, paningkamoti nga makaadto ka nako sa Nicopolis, kay nakadesisyon ko nga didto magpalabay sa tingtugnaw. 13 Paneguroa nga mahatag kang Zenas, nga batid sa Balaod, ug kang Apolos ang ilang mga gikinahanglan sa panaw aron dili sila makulangag bisan unsa. 14 Apan ang atong mga igsoon sab kinahanglang makakat-on nga padayong maghimog maayong mga buhat aron makatabang sila kon naay dinaliang mga panginahanglan, aron malikayan nga mahimo silang dili mabungahon. 15 Ang tanan nakong kauban nangomosta nimo. Ikomosta ko sa mga igsoon sa pagtuo nga nagmahal kanamo. Hinaot ang dili hitupngang pagkamaayo maanaa kaninyong tanan.
Agosto 19-25
BAHANDI GIKAN SA PULONG SA DIYOS | HEBREOHANON 1-3
“Higugmaa ang Pagkamatarong ug Dumti ang Paglapas sa Balaod”
(Hebreohanon 1:8) Apan bahin sa Anak, siya miingon: “Ang Diyos maoy imong trono hangtod sa kahangtoran, ug ang setro sa imong Gingharian mao ang setro sa pagkamatarong.
Dayega si Kristo, ang Mahimayaong Hari!
8 Niadtong 1914, gientrono ni Jehova ang iyang Anak ingong Mesiyanikong Hari sa langit. ‘Ang setro sa iyang pagkahari maoy setro sa katul-id,’ busa seguradong matarong ug walay pagpihig ang iyang pagmando. Legal ang iyang awtoridad kay ang ‘Diyos ang iyang trono.’ Sa ato pa, si Jehova ang pundasyon sa iyang pagkahari. Ang trono usab ni Jesus magpabilin “sa panahong walay tino, bisan hangtod sa kahangtoran.” Dili ba dakong kadungganan nga mag-alagad kang Jehova ilalom sa maong gamhanan ug tinudlong Hari?
(Hebreohanon 1:9) Gihigugma nimo ang pagkamatarong, ug gidumtan nimo ang paglapas sa balaod. Mao nga ang Diyos, ang imong Diyos, nagdihog kanimo sa lana sa kasadya labaw kay sa imong mga kauban.”
Dayega si Kristo, ang Mahimayaong Hari!
7 Basaha ang Salmo 45:6, 7. Tungod sa dakong gugma ni Jesus sa pagkamatarong ug pagdumot sa bisan unsa nga dili makapasidungog sa iyang Amahan, siya gidihogan ni Jehova ingong Hari sa Mesiyanikong Gingharian. Si Jesus gidihogan sa “lana sa kasadya” nga labaw pa kay sa iyang “mga kauban,” ang mga hari sa Juda nga kaliwat ni David. Sa unsang paagi? Si Jehova mismo ang nagdihog kang Jesus. Gidihogan usab siya ni Jehova ingong Hari ug Hataas nga Saserdote. (Sal. 2:2; Heb. 5:5, 6) Dugang pa, si Jesus wala dihogi pinaagig lana, kondili sa balaang espiritu. Ug ang iyang pagmando maggikan sa langit, dili sa yuta.
Pagpangitag Espirituwal nga Bahandi
(Hebreohanon 1:3) Hingpit niyang gipakita ang himaya sa Diyos ug siya ang eksaktong larawan sa Diyos, ug gipahinabo niya nga padayong maglungtad ang tanang butang pinaagi sa iyang gamhanang pulong. Ug human niya hinloi ang atong mga sala, siya milingkod sa tuong kamot sa Halangdong Diyos sa kahitas-an.
Larawan
Kanunay bang gipabanaag ni Jesus ang dagway sa iyang Amahan sa samang paagi?
Ang panganayng Anak sa Diyos, nga sa ulahi nahimong tawo nga si Jesus, maoy sama sa larawan sa iyang Amahan. (2Co 4:4) Tungod kay ang maong Anak dayag nga mao ang usa nga gisultihan sa Diyos sa dihang miingon, “Buhaton nato ang tawo sumala sa atong larawan,” kining pagkaamgid sa Anak sa dagway sa iyang Amahan, ang Maglalalang, naglungtad na sukad nga gilalang ang Anak. (Gen 1:26; Ju 1:1-3; Col 1:15, 16) Sa dinhi pa sa yuta ingong usa ka hingpit nga tawo, siya nagpabanaag sa mga hiyas ug personalidad sa iyang Amahan kutob sa iyang maarangan ingong tawo, busa siya nakaingon nga “siya nga nakakita kanako nakakita usab sa Amahan.” (Ju 14:9; 5:17, 19, 30, 36; 8:28, 38, 42) Apan, kini nga pagkaamgid misamot pa gayod sa pagkabanhaw ni Jesus ngadto sa espirituhanong kinabuhi ug sa dihang gitugyanan siya sa “tanang awtoridad . . . sa langit ug sa yuta” pinaagi sa iyang Amahan, si Jehova nga Diyos. (1Pe 3:18; Mat 28:18) Sanglit nianang panahona ang Diyos nagbayaw kang Jesus ngadto sa “usa ka labaw nga katungdanan,” ang Anak sa Diyos karon nagpabanaag sa himaya sa iyang Amahan sa labaw pa gayod nga paagi kay sa iyang pagpabanaag niini sa wala pa siya mobiya sa langit aron moanhi sa yuta. (Flp 2:9; Heb 2:9) Siya sa pagkakaron mao ‘ang tukma nga larawan sa pagkamao sa Diyos.’—Heb 1:2-4.
(Hebreohanon 1:10-12) Ug: “Sa sinugdan, Oh Ginoo, gipahimutang nimo ang mga pundasyon sa yuta, ug ang kalangitan maoy mga buhat sa imong mga kamot. 11 Kini mangahanaw, apan ikaw magpabilin; ug samag besti kining tanan madunot, 12 ug imong hiposon kini samag kupo, samag besti, ug kini ilisan. Apan ikaw mao ra gihapon, ug ang imong katuigan dili gyod matapos.”
Langit
Ang mga pulong sa Salmo 102:25, 26 mapadapat ngadto kang Jehova nga Diyos, apan si apostol Pablo nagkutlo niini nga nagtumong kang Jesu-Kristo. Kini tungod kay ang bugtong Anak sa Diyos mao ang personal nga Ahente sa Diyos nga gigamit sa paglalang sa pisikal nga uniberso. Gitandi ni Pablo ang pagkapermanente sa Anak nianang sa pisikal nga kalalangan, nga kon katuyoan pa sa Diyos, siya makahimo sa ‘paghipos niini sama sa kupo’ ug sa pagtago niini.—Heb 1:1, 2, 8, 10-12; itandi ang 1Pe 2:3, ftn sa Rbi8.
Pagbasa sa Bibliya
(Hebreohanon 1:1-14) Dugay na kanhi ang Diyos nakigsulti sa atong mga katigulangan pinaagi sa mga propeta sa daghang higayon ug sa daghang paagi. 2 Niining panahona siya misulti kanato pinaagi sa iyang Anak, nga iyang gitudlo nga manununod sa tanang butang, ug pinaagi niya gibuhat Niya ang mga sistema sa mga butang. 3 Hingpit niyang gipakita ang himaya sa Diyos ug siya ang eksaktong larawan sa Diyos, ug gipahinabo niya nga padayong maglungtad ang tanang butang pinaagi sa iyang gamhanang pulong. Ug human niya hinloi ang atong mga sala, siya milingkod sa tuong kamot sa Halangdong Diyos sa kahitas-an. 4 Busa siya nahimong labaw pa kay sa mga anghel kay siya nakapanunod ug ngalan nga mas labaw kay kanila. 5 Pananglitan, kinsa ba sa mga anghel ang giingnan sa Diyos: “Ikaw ang akong anak; karong adlawa, ako nahimong imong amahan”? Ug usab: “Ako mahimong iyang amahan, ug siya mahimong akong anak”? 6 Apan bahin sa panahon dihang iyang ipadala pag-usab sa yuta ang iyang Panganay, siya miingon: “Ug mangyukbo kaniya ang tanang anghel sa Diyos.” 7 Dugang pa, siya miingon bahin sa mga anghel: “Gihimo niyang gamhanan ang iyang mga anghel, ug gihimo niyang nagdilaab nga kalayo ang iyang mga alagad.” 8 Apan bahin sa Anak, siya miingon: “Ang Diyos maoy imong trono hangtod sa kahangtoran, ug ang setro sa imong Gingharian mao ang setro sa pagkamatarong. 9 Gihigugma nimo ang pagkamatarong, ug gidumtan nimo ang paglapas sa balaod. Mao nga ang Diyos, ang imong Diyos, nagdihog kanimo sa lana sa kasadya labaw kay sa imong mga kauban.” 10 Ug: “Sa sinugdan, Oh Ginoo, gipahimutang nimo ang mga pundasyon sa yuta, ug ang kalangitan maoy mga buhat sa imong mga kamot. 11 Kini mangahanaw, apan ikaw magpabilin; ug samag besti kining tanan madunot, 12 ug imong hiposon kini samag kupo, samag besti, ug kini ilisan. Apan ikaw mao ra gihapon, ug ang imong katuigan dili gyod matapos.” 13 Apan kinsa ba sa mga anghel ang iyang giingnan: “Lingkod sa akong tuong kamot, hangtod nga ibutang nako ang imong mga kaaway ingong tumbanan sa imong mga tiil”? 14 Dili ba silang tanan mga espiritu para sa balaang pag-alagad, nga gipadala aron mag-alagad niadtong manunod sa kaluwasan?
Agosto 26–Septiyembre 1
BAHANDI GIKAN SA PULONG SA DIYOS | HEBREOHANON 4-6
“Himoa ang Imong Maarangan nga Makasulod sa Kapahulayan sa Diyos”
(Hebreohanon 4:1) Kay ang Diyos nagsaad nga puwede pang makasulod sa iyang kapahulayan, magbantay ta aron walay usa nato nga isipong dili takos niana.
(Hebreohanon 4:4) Kay sa usa ka bahin sa Kasulatan, siya miingon bahin sa ikapitong adlaw: “Ug ang Diyos mipahulay sa ikapitong adlaw gikan sa tanan niyang buhat,”
Kapahulayan sa Diyos—Unsa Kini?
3 Dunay duha ka katarongan kon nganong makaingon kita nga ang ikapitong adlaw nagpadayon gihapon sa unang siglo K.P. Una, tagda ang gitubag ni Jesus sa iyang mga magsusupak nga nagsaway kaniya tungod sa pagpang-ayo sa adlaw sa Igpapahulay, nga giisip nilang usa ka buluhaton. Ang Ginoo miingon kanila: “Ang akong Amahan nagpadayon sa pagbuhat hangtod karon, ug ako nagpadayon sa pagbuhat.” (Juan 5:16, 17) Unsay iyang gipasabot? Sama ra nga siya miingon: ‘Ako ug ang akong Amahan managsamag buluhaton. Sanglit ang akong Amahan nagpadayon sa pagbuhat sulod sa iyang Igpapahulay, nga mikabat nag libolibo ka katuigan, puwede ra sab kong makatrabaho bisan sa Igpapahulay.’ Busa, gipasabot ni Jesus nga maylabot sa yuta, ang dakong adlaw nga Igpapahulay sa Diyos nga mao ang ikapitong adlaw wala pa matapos sa panahon ni Jesus.
4 Ang ikaduhang rason gihatag ni apostol Pablo. Sa pagkutlo sa Genesis 2:2 bahin sa kapahulayan sa Diyos, si Pablo misulat: “Kita nga nagpasundayag ug pagtuo mosulod niana nga kapahulayan.” (Heb. 4:3, 4, 6, 9) Busa ang ikapitong adlaw nagpadayon gihapon sa adlaw ni Pablo. Kanus-a matapos ang ikapitong adlaw?
5 Aron matubag kana, angay natong hinumdoman ang katuyoan sa ikapitong adlaw. Ang Genesis 2:3 nagpatin-aw: “Ang Diyos nagpanalangin sa ikapitong adlaw ug naghimo niining sagrado.” Ang maong adlaw ‘gihimong sagrado’—gibalaan, o gilain ni Jehova—aron bug-os matuman ang iyang katuyoan. Ang katuyoan maoy aron ang yuta puy-an sa masinugtanong katawhan nga mag-atiman niini ug sa tanang buhing linalang diha niini. (Gen. 1:28) Kanay hinungdan nga si Jehova nga Diyos ug si Jesu-Kristo, ang “Ginoo sa igpapahulay,” “nagpadayon sa pagbuhat hangtod karon.” (Mat. 12:8) Ang adlaw sa kapahulayan sa Diyos magpadayon hangtod bug-os matuman ang iyang katuyoan. Kini matapos human sa Usa ka Libo ka Tuig nga Pagmando ni Kristo.
(Hebreohanon 4:6) Busa, kay ang uban puwede pang makasulod niini, ug kadtong unang nakadungog sa maayong balita wala makasulod tungod sa pagkadili-masinugtanon,
Kapahulayan sa Diyos—Unsa Kini?
6 Ang katuyoan sa Diyos tin-awng gisaysay kang Adan ug Eva, apan sila milihok nga sukwahi niana. Human kang Adan ug Eva, minilyon sa katawhan ang nahimong dili masinugtanon. Bisan ang piniling katawhan sa Diyos, ang Israel, nahulog ngadto sa balikbalik nga pagkadili-masinugtanon. Si Pablo nagpasidaan sa unang-siglong mga Kristohanon nga bisan ang pipila kanila mahimong dili-masinugtanon sama sa mga Israelinhon. Siya misulat: “Busa buhaton nato ang kutob sa atong maarangan nga makasulod niana nga kapahulayan, kay basin may usa nga mahulog sa samang sumbanan sa pagkadili-masinugtanon.” (Heb. 4:11) Matikdi nga gipakita ni Pablo nga ang mga dili-masinugtanon dili makasulod sa kapahulayan sa Diyos. Unsay kahulogan niana kanato? Kana ba nagpasabot nga kon kita molihok nga supak sa katuyoan sa Diyos, dili kita makasulod sa kapahulayan sa Diyos? Ang tubag niana hinungdanon kaayo kanato, ug dugang nato kanang hisgotan. Apan, hisgotan una nato ang daotang panig-ingnan sa mga Israelinhon ug kon nganong wala sila makasulod sa kapahulayan sa Diyos.
(Hebreohanon 4:9-11) Busa duna pay nagpabiling igpapahulay para sa katawhan sa Diyos. 10 Kay ang tawo nga nakasulod sa kapahulayan sa Diyos mipahulay sab sa iyang kaugalingong mga buhat, sama nga mipahulay ang Diyos sa iyang mga buhat. 11 Busa himoon nato ang atong maarangan nga makasulod niana nga kapahulayan, aron walay usa nga mosundog niana nga pagkadili-masinugtanon.
Kapahulayan sa Diyos—Unsa Kini?
16 May pipila ka Kristohanon karon ang moinsistir nga kinahanglang sundon ang pipila ka bahin sa Moisesnong Balaod aron maluwas. Ang inspiradong mga pulong ni Pablo sa mga taga-Efeso tin-aw kaayo: “Pinaagi niining dili-takos nga kalulot, sa pagkatinuod, kamo giluwas pinaagi sa pagtuo; ug kini dili tungod kaninyo, kini gasa sa Diyos. Dili, kini dili tungod sa mga buhat, aron walay tawo nga may pasukaranan sa pagpanghambog.” (Efe. 2:8, 9) Nan, sa unsang paagi ang mga Kristohanon makasulod sa kapahulayan sa Diyos? Gipili ni Jehova ang ikapitong adlaw—iyang adlaw sa kapahulayan—aron bug-os nga matuman ang iyang katuyoan bahin sa yuta. Kita makasulod sa kapahulayan ni Jehova—o moduyog sa iyang pagpahulay—pinaagi sa pagbuhat uyon sa iyang katuyoan nga gipadayag kanato pinaagi sa iyang organisasyon.
17 Sa laing bahin, kon dili nato pabilhan ang binase-sa-Bibliya nga tambag sa matinumanon ug maalamong ulipon, ug mag-independente, kita nagasupak sa katuyoan sa Diyos. Kini makadaot sa atong malinawong relasyon kang Jehova. Sa sunod artikulo, hisgotan ang pipila ka kahimtang diin atong ikapakita ang pagkamasinugtanon ngadto sa Diyos. Ang mga desisyon nga atong himoon magpakita kon kita ba nakasulod sa kapahulayan sa Diyos.
Pagpangitag Espirituwal nga Bahandi
(Hebreohanon 4:12) Kay ang pulong sa Diyos buhi ug gamhanan ug mas hait kay sa espada nga duhay sulab ug modulot bisan hangtod sa pagbahin sa kalag ug sa espiritu, ug sa mga lutahan ug sa utok sa bukog, ug makatugkad sa mga hunahuna ug mga intensiyon sa kasingkasing.
Mga Pangutana Gikan sa mga Magbabasa
Unsa ang “pulong sa Diyos” nga giingon sa Hebreohanon 4:12 nga “buhi ug gamhanan”?
▪ Gipakita sa konteksto nga si apostol Pablo nagtumong sa mensahe, o sa gipahayag nga katuyoan sa Diyos, sama nianang makita nato sa Bibliya.
Ang Hebreohanon 4:12 sagad hisgotan diha sa atong mga publikasyon sa pagpakita nga ang Bibliya dunay gahom sa pagbag-o sa kinabuhi, ug haom kaayo kana nga kapadapatan. Hinunoa, makatabang usab kon atong tan-awon ang Hebreohanon 4:12 sa katibuk-ang konteksto niini. Gidasig ni Pablo ang Hebreohanong mga Kristohanon sa pagpahiuyon sa mga katuyoan sa Diyos. Daghan niana ang anaa sa balaang mga sinulat. Gigamit ni Pablo ingong pananglitan ang mga Israelinhon nga naluwas gikan sa Ehipto. May paglaom sila nga makasulod sa gisaad nga yuta “nga nagaagay sa gatas ug dugos,” diin matagamtam nila ang tinuod nga kapahulayan.—Ex. 3:8; Deut. 12:9, 10.
Kana mao ang gipahayag nga katuyoan sa Diyos. Pero, sa ulahi nahimong tig-a ang kasingkasing sa mga Israelinhon ug wala sila magpasundayag ug pagtuo, busa kadaghanan kanila wala makasulod niana nga kapahulayan. (Num. 14:30; Jos. 14:6-10) Hinunoa, si Pablo midugang nga nagpabilin “ang saad labot sa pagsulod sa . . . kapahulayan [sa Diyos].” (Heb. 3:16-19; 4:1) Tin-aw nga kana nga “saad” maoy bahin sa gipahayag nga katuyoan sa Diyos. Sama sa gibuhat sa Hebreohanong mga Kristohanon, kita makakat-on ug makapahiuyon niana nga katuyoan. Sa pagpasiugda nga kining saara gibase sa Kasulatan, si Pablo mikutlog mga pulong sa Genesis 2:2 ug Salmo 95:11.
Oo, kini angayng makapaamgo kanato nga “nagpabilin ang saad labot sa pagsulod sa . . . kapahulayan [sa Diyos].” Misalig ta nga ang binase sa Bibliya nga paglaom sa pagsulod sa kapahulayan sa Diyos posible gayod, ug nakahimo na ta ug mga tikang sa pagsulod. Wala nato na himoa pinaagi sa pagsunod sa Moisesnong Balaod o pagbaton sa pag-uyon ni Jehova pinaagi sa ubang buhat. Kondili, pinaagi sa pagtuo malipayon tang nagpahiuyon ug padayong nagpahiuyon sa gipadayag nga katuyoan sa Diyos. Dugang pa, sa nahisgotan na, ang “pulong sa Diyos” sa Hebreohanon 4:12 mahimong mapadapat sab sa Bibliya. Linibo sa tibuok kalibotan ang misugod pagtuon sa Bibliya ug nakakat-on sa gipahayag nga katuyoan sa Diyos. Daghan kanila ang napalihok sa pagbag-o sa ilang kinabuhi, pagpasundayag ug pagtuo, ug pagpabawtismo. Ang ilang pagbag-o maoy tin-awng ebidensiya nga “ang pulong sa Diyos buhi ug gamhanan.” Ang gipahayag nga katuyoan sa Diyos, nga gihisgotan sa Bibliya, nakaimpluwensiya na kanato, ug padayon kining maghatag ug gahom sa atong kinabuhi.
(Hebreohanon 6:17, 18) Sa susama, dihang ang Diyos midesisyon nga ipakita nga mas tin-aw pa ngadto sa mga manununod sa saad nga dili gayod mausab ang iyang katuyoan, gigarantiyahan niya kini pinaagig panumpa. 18 Kining duha ka butang nga gihimo sa Diyos dili gayod mausab, ug ang Diyos dili gayod mamakak; ug kining mga butanga makadasig kanato, kinsa mikalagiw ngadto sa dangpanan, nga panguptan pag-ayo ang paglaom nga gibutang sa atong atubangan.
Paglaom
Kini nga paglaom sa kinabuhing walay kataposan ug pagkadili-madunoton alang niadtong “mga mag-aambit sa langitnong pagtawag” (Heb 3:1) adunay lig-on nga pasukaranan ug kasaligan gayod. Kini gipaluyohan sa duha ka butang nga niini dili gayod mahimo nga mamakak ang Diyos, nga mao, ang iyang saad ug ang iyang panumpa, ug ang paglaom diha kang Kristo, kinsa karon imortal na didto sa kalangitan. Busa kini nga paglaom gihisgotan ingong “angkla sa kalag, nga seguro ug malig-on, ug kini makasulod ngadto sa kinasuloran sa kortina [maingon nga ang hataas nga saserdote mosulod sa Labing Balaan sa Adlaw sa Pagtabon-sa-Sala], diin ang usa ka mag-uuna nakasulod alang kanato, si Jesus, nga nahimong hataas nga saserdote sa paagi nga sama kang Melquisedek hangtod sa kahangtoran.”—Heb 6:17-20.
Pagbasa sa Bibliya
(Hebreohanon 5:1-14) Ang matag tawo nga gitudlo ingong hataas nga saserdote nag-alagad sa mga tawo maylabot sa ilang pagsimba sa Diyos, aron siya makatanyag ug mga gasa ug mga halad para sa mga sala. 2 Siya makapakitag kaluoy niadtong walay kahibalo ug niadtong nakasala, kay nahibalo sab siya sa iyang mga kahuyangan, 3 ug tungod niana kinahanglan siyang maghalad para sa iyang mga sala sama sa iyang ginahimo para sa mga tawo. 4 Dili maangkon sa usa ka tawo kining dungganong posisyon sa iyang kaugalingong pagbuot, gawas lang kon tawgon siya sa Diyos, sama kang Aaron kaniadto. 5 Sa susama, dili ang Kristo ang naghimaya sa iyang kaugalingon ingong hataas nga saserdote, kondili ang Diyos, kinsa miingon kaniya: “Ikaw ang akong anak; karong adlawa, ako nahimong imong amahan.” 6 Sama sab sa iyang gisulti sa laing bahin sa Kasulatan, “Ikaw usa ka saserdote hangtod sa hangtod sa paagi nga sama kang Melquisedek.” 7 Sa dinhi pa siya sa yuta, ang Kristo nangamuyo ug naghangyo sab sa kusog nga tingog nga inubanag mga luha ngadto sa Usa nga makahimo sa pagluwas kaniya sa kamatayon, ug gidungog siya tungod sa iyang kahadlok sa Diyos. 8 Bisan tuod anak siya, nakat-onan niya ang pagkamasinugtanon gikan sa mga butang nga iyang giantos. 9 Ug sa nahingpit na siya, ang tanang mosunod kaniya makadawat ug kaluwasan hangtod sa hangtod pinaagi kaniya, 10 kay gitudlo siya sa Diyos ingong hataas nga saserdote sa paagi nga sama kang Melquisedek. 11 Daghan pa mig ikasulti bahin niya, ug lisod kining ipatin-aw, kay nahabol man ang inyong pandungog. 12 Kay karon, mga magtutudlo na unta mo, apan kinahanglan na sab mong tudloan sa simpleng mga butang bahin sa sagradong mga pahayag sa Diyos, ug nagkinahanglan na sab mog gatas, dili sa gahing pagkaon. 13 Kay kadtong padayong nag-inom ug gatas wala mahibalo sa pulong sa pagkamatarong, kay bata pa siya. 14 Apan ang gahing pagkaon maoy para sa mga tawong hamtong, nga pinaagi sa paggamit sa ilang mga katakos sa panghunahuna, sila nahibalo kon unsaon pag-ila ang maayo ug ang daotan.