Reperensiya Para sa Workbook sa Tigom nga Kinabuhi ug Ministeryo
Hulyo 1-7
BAHANDI GIKAN SA PULONG SA DIYOS | COLOSAS 1-4
“Hukasa ang Daan, ug Isul-ob Ninyo ang Bag-o”
(Colosas 3:5-9) Busa, patya ang mga parte sa inyong lawas maylabot sa seksuwal nga imoralidad, kahugawan, pagpatuyang sa gana sa sekso, makadaot nga tinguha, ug kahakog, nga maoy idolatriya. 6 Tungod sa maong mga butang moabot ang kasuko sa Diyos. 7 Kaniadto mao sab nay inyong pagkinabuhi. 8 Apan karon kinahanglang isalikway ninyo kining tanan: kapungot, kasuko, pagkadaotan, sakit nga sinultihan, ug law-ayng sinultihan sa inyong baba. 9 Ayaw mo pamakak sa usag usa. Hukasa ang daang personalidad apil ang mga buhat niini,
Dawata ang Espiritu sa Diyos, Dili ang sa Kalibotan
12 Unsang espiritu ang akong gipasundayag? (Basaha ang Colosas 3:8-10, 13.) Ang espiritu sa kalibotan nagdasig sa mga buhat sa unod. (Gal. 5:19-21) Masayran kon unsang espiritu ang nag-impluwensiya kanato sa dihang motungha ang dili maayong kahimtang—kon ang usa ka igsoon sa pagtuo dili managad, makapasuko, o makasala kanato. Dugang pa, sulod sa atong panimalay, mahimong madayag kon unsang espiritu ang nag-impluwensiya kanato. Mahimong susihon nato ang atong kaugalingon, ‘Sa miaging unom ka bulan, mas nasundog ba nako ang personalidad ni Kristo o nahibalik ba ang akong ngil-ad nga sinultihan ug panggawi?’
13 Ang espiritu sa Diyos makatabang kanato sa ‘paghukas sa daang pagkatawo uban ang mga buhat niini’ ug pagsul-ob sa “bag-ong pagkatawo.” Kana motabang kanato nga mahimong mas mahigugmaon ug maluloton. Kita mahimong mapinasayloon sa usag usa, bisag may katarongan kitang moreklamo. Bisan pa sa mga inhustisya, dili na mosilaob ang atong “mapangdaot nga kayugot ug kasuko ug kapungot ug sininggitay ug mapasipalahong sinultihan.” Hinunoa, maningkamot kita nga “magmalumo uban ang pagkamabination.”—Efe. 4:31, 32.
(Colosas 3:10-14) ug isul-ob ang bag-ong personalidad, nga pinaagi sa tukmang kahibalo ginabag-o sumala sa larawan sa Diyos nga naghimo niini, 11 diin walay Grego o Hudiyo, tinuli o dili tinuli, langyaw, Sityanhon, ulipon, o gawasnon; hinunoa ang Kristo mao ang tanan ug naa sa tanan. 12 Busa ingong mga pinili sa Diyos, balaan ug hinigugma, isul-ob ninyo ang mabinationg pagmahal, pagkamaayo, pagkamapaubsanon, kalumo, ug pailob. 13 Padayon sa pagpailob sa usag usa ug kinasingkasing nga magpinasayloay kon ang usa dunay reklamo batok sa lain. Sama nga si Jehova kinasingkasing nga nagpasaylo kaninyo, kinahanglang buhaton sab ninyo kana. 14 Apan gawas niining tanan, isul-ob ang gugma, kay kini ang hingpit nga bugkos sa panaghiusa.
Nausab Ka Na Ba?
18 Kon buot natong mausab pinaagi sa Pulong sa Diyos, dili igo ang regular nga pagbasa ug pagtuon niana. Daghan ang nagabasag Bibliya ug busa pamilyar na niini. Lagmit sa imong pagministeryo, nakahibalag kag mga tawong ingon niana. Ang uban nakamemorya pa ganig mga teksto. Apan sagad wala kini makausab sa ilang panghunahuna ug pagkinabuhi. Ngano? Kay ang Pulong sa Diyos makaimpluwensiya ug makausab lang sa usa ka tawo kon tugotan niya kanang matisok sa iyang kasingkasing. (Gal. 6:6) Busa kinahanglan natong palandongon ang atong nakat-onan. Maayong pangutan-on ang kaugalingon: ‘Kombinsido ba ko nga dili lang ni basta usa ka relihiyosong pagtulon-an? Nasabtan ba nako nga kini mao ang kamatuoran? Dugang pa, andam ba nakong ipadapat ang akong nakat-onan ug dili lang basta magtudlo niini sa uban? Gibati ba nako nga si Jehova personal nga nakig-estorya kanako?’ Kon palandongon nato kining mga pangutanaha, kini magpalalom sa atong gugma kang Jehova. Dihang matandog ang atong kasingkasing, mapalihok kita sa paghimog positibong mga kausaban sa atong kinabuhi.—Prov. 4:23; Luc. 6:45.
19 Ang regular nga pagbasa ug pagpamalandong sa Pulong sa Diyos magdasig kanato nga padayong himoon ang giingon ni Pablo: “Hukasa ang daang pagkatawo uban ang mga buhat niini, ug isul-ob ang bag-ong pagkatawo, nga pinaagi sa tukmang kahibalo gibag-o.” (Col. 3:9, 10) Oo, makapadayon kita sa pagbuhat niana kon atong masabtan pag-ayo ang gitudlo sa Bibliya ug ipadapat kana. Ingong resulta, ang bag-ong Kristohanong personalidad makapanalipod kanato batok sa mga bitik ni Satanas.
Pagpangitag Espirituwal nga Bahandi
(Colosas 1:13, 14) Iya tang giluwas gikan sa awtoridad sa kangitngit ug gibalhin sa gingharian sa iyang minahal nga Anak, 14 nga pinaagi kaniya nabatonan nato ang kagawasan pinaagi sa lukat, ang kapasayloan sa atong mga sala.
Gingharian sa Diyos
Ang “Gingharian sa Anak nga Iyang Gihigugma.” Napulo ka adlaw human sa pagkayab ni Jesus ngadto sa langit, niadtong Pentekostes sa 33 K.P., ang iyang mga tinun-an nakabaton ug pamatuod nga siya ‘gibayaw ngadto sa tuong kamot sa Diyos’ sa dihang gibubo ni Jesus ang balaang espiritu ibabaw kanila. (Buh 1:8, 9; 2:1-4, 29-33) Busa ang “bag-ong pakigsaad” miepekto na diha kanila, ug nahimo silang kinauyokan sa usa ka bag-ong “balaang nasod,” ang espirituwal nga Israel.—Heb 12:22-24; 1Pe 2:9, 10; Gal 6:16.
Si Kristo naglingkod na karon sa tuong kamot sa iyang Amahan ug mao ang Ulo niini nga kongregasyon. (Efe 5:23; Heb 1:3; Flp 2:9-11) Ang Kasulatan nagpakita nga sukad sa Pentekostes 33 K.P., ang usa ka espirituwal nga gingharian natukod na ibabaw sa iyang mga tinun-an. Sa dihang misulat sa unang-siglong mga Kristohanon sa Colosas, gihisgotan ni apostol Pablo si Jesu-Kristo ingong nakabaton na ug gingharian: “[Ang Diyos] nagpagawas kanato gikan sa awtoridad sa kangitngit ug nagbalhin kanato ngadto sa gingharian sa Anak nga iyang gihigugma.”—Col 1:13; itandi ang Buh 17:6, 7.
Ang gingharian ni Kristo sukad sa Pentekostes sa 33 K.P. maoy usa ka espirituwal nga gingharian nga nagmando ibabaw sa espirituwal nga Israel, ang mga Kristohanon nga gianak sa espiritu sa Diyos aron mahimong espirituwal nga mga anak sa Diyos. (Ju 3:3, 5, 6) Sa dihang kini nga inanak-sa-espiritung mga Kristohanon makadawat sa ilang langitnong ganti, sila dili na yutan-ong mga sakop sa espirituwal nga gingharian ni Kristo, kondili sila mahimong mga hari kauban ni Kristo didto sa langit.—Pin 5:9, 10.
(Colosas 2:8) Pagbantay nga dili mo malit-agan sa uban pinaagi sa pilosopiya ug sayop nga mga pangatarongan nga gibase sa tradisyon sa mga tawo, nga gibase sa kalibotanong mga ideya ug dili sa Kristo;
Mga Pangunang Punto sa mga Sulat Ngadto sa mga Taga-Galacia, Efeso, Filipos, ug Colosas
2:8—Unsa ang “paninugdang mga butang sa kalibotan” nga gipasidaan ni Pablo? Kini ang mga elemento sa kalibotan ni Satanas—paninugdang mga butang o prinsipyo nga nagmugna, naggiya, o nagpalihok niini. (1 Juan 2:16) Lakip niini ang pilosopiya, materyalismo, ug bakak nga mga relihiyon niining kalibotana.
Pagbasa sa Bibliya
(Colosas 1:1-20) Gikan kang Pablo, nga apostol ni Kristo Jesus pinaagi sa kabubut-on sa Diyos, ug kang Timoteo nga atong igsoon, 2 ngadto sa mga balaan sa Colosas ug matinumanong mga igsoon nga nahiusa sa Kristo: Hinaot maanaa kaninyo ang dili hitupngang pagkamaayo ug ang kalinaw gikan sa Diyos nga atong Amahan. 3 Kanunay ming magpasalamat sa Diyos nga Amahan sa atong Ginoong Jesu-Kristo dihang mag-ampo mi para ninyo, 4 kay nadunggan namo ang inyong pagtuo kang Kristo Jesus ug ang inyong gugma para sa tanang balaan 5 tungod sa paglaom nga giandam alang kaninyo sa langit. Kamo nakadungog kaniadto bahin niini nga paglaom pinaagi sa mensahe sa kamatuoran sa maayong balita 6 nga nakaabot kaninyo. Sama nga ang maayong balita namunga ug nag-uswag sa tibuok kalibotan, kini sab namunga ug nag-uswag kaninyo sukad sa adlaw nga inyong nadunggan ug tukmang nahibaloan ang kamatuoran bahin sa dili hitupngang pagkamaayo sa Diyos. 7 Mao nay inyong nakat-onan kang Epafras nga atong minahal nga isigkaulipon, nga matinumanong ministro sa Kristo alang kanato. 8 Gipahibalo sab niya kanamo ang inyong gugma sa espirituwal nga paagi. 9 Busa sukad nga nadunggan namo kini, wala mi mohunong sa pag-ampo para kaninyo ug sa paghangyo nga mapuno unta mo sa tukmang kahibalo sa iyang kabubut-on, nga makabaton sa tanang kaalam ug espirituwal nga pagsabot, 10 sa ingon magkinabuhi mo nga takos sa ngalan ni Jehova aron bug-os ninyo siyang mapalipay samtang padayon mong mamunga sa tanang maayong buhat ug mouswag sa tukmang kahibalo sa Diyos; 11 ug hinaot nga ang dakong gahom sa Diyos maglig-on kaninyo aron makalahutay mo sa tanang butang uban ang pailob ug kalipay, 12 nga magpasalamat sa Amahan, kinsa naghimo ninyong kuwalipikado nga makigbahin sa panulondon sa mga balaan nga naa sa kahayag. 13 Iya tang giluwas gikan sa awtoridad sa kangitngit ug gibalhin sa gingharian sa iyang minahal nga Anak, 14 nga pinaagi kaniya nabatonan nato ang kagawasan pinaagi sa lukat, ang kapasayloan sa atong mga sala. 15 Siya ang larawan sa dili makita nga Diyos, ang panganay sa tanang kalalangan; 16 kay pinaagi kaniya gihimo ang tanang ubang butang sa langit ug sa yuta, ang mga butang nga makita ug ang mga butang nga dili makita, kini man mga trono o gahom sa pagmando o gobyerno o awtoridad. Ang tanang ubang butang gihimo pinaagi kaniya ug alang kaniya. 17 Dugang pa, siya ang una sa tanang ubang butang, ug pinaagi kaniya ang tanang ubang butang gihimo, 18 ug siya ang ulo sa lawas, ang kongregasyon. Siya ang sinugdan, ang panganay gikan sa mga patay, aron siya mahimong una sa tanang butang; 19 kay ang Diyos nalipay nga kompleto siya sa tanang butang, 20 ug pinaagi sa Kristo ipasig-uli sa Diyos sa iyang kaugalingon ang tanang ubang butang pinaagi sa pagpakigdait pinaagi sa dugo sa Kristo nga gipatulo diha sa estaka sa pagsakit, kini man mga butang sa yuta o mga butang sa langit.
Hulyo 8-14
BAHANDI GIKAN SA PULONG SA DIYOS | 1 TESALONICA 1-5
“Padayon Mong Magdinasigay ug Maglig-onay”
(1 Tesalonica 5:11-13) Busa padayon mong magdinasigay ug maglig-onay, sama sa inyo nang ginabuhat. 12 Karon kami naghangyo ninyo, mga igsoon, nga tahoron silang naghago taliwala kaninyo ug nagdumala kaninyo diha sa Ginoo ug nagtambag kaninyo; 13 ug pakitaan silag labaw nga konsiderasyon ug higugmaon tungod sa ilang ginabuhat. Pakigdait mo sa usag usa.
“Tamdon Ninyo Silang Naghago Taliwala Kaninyo”
12 Ang ‘pagdumala’ sa kongregasyon wala lamang maglangkit sa pagtudlo. Kana nga ekspresyon gigamit usab sa 1 Timoteo 3:4. Si Pablo miingon nga ang magtatan-aw angay nga “usa ka tawo nga nagdumala sa iyang kaugalingong panimalay sa maayong paagi, nga may mga anak nga nagpasakop uban ang bug-os nga kaugdang.” Ang ekspresyong “nagdumala” dayag nga naglakip dili lamang sa pagtudlo sa iyang mga anak kondili sa pagpanguna usab sa iyang pamilya ug nga siya “may mga anak nga nagpasakop.” Oo, ang mga ansiyano ang manguna sa kongregasyon, nga magtabang sa tanan nga magpasakop kang Jehova.—1 Tim. 3:5.
“Tamdon Ninyo Silang Naghago Taliwala Kaninyo”
19 Unsay imong buhaton kon makadawat kag espesyal nga regalo? Pabilhan mo ba kana pinaagi sa paggamit niana? Ang “mga gasa nga mga lalaki” mao ang gitagana ni Jehova kanimo pinaagi ni Jesu-Kristo. Imong ikapakita ang imong pagpabili niini nga mga gasa pinaagi sa pagpamati pag-ayo sa pakigpulong sa mga ansiyano ug sa pagpadapat sa mga punto nga gipasiugda. Makapakita ka usab ug pagpabili pinaagi sa paghatag ug makapadasig nga mga komento panahon sa tigom. Suportahi ang mga buluhaton nga gipangunhan sa mga ansiyano, sama sa pagsangyaw. Kon nakabenepisyo ka sa tambag sa usa ka ansiyano, dili ba nimo siya pasalamatan? Gawas pa, mahimo sab nimong pasalamatan ang mga pamilya sa mga ansiyano. Hinumdomi, ang paghago sa usa ka ansiyano nagpasabot nga gisakripisyo sa iyang pamilya ang panahon nga sila unta magkauban.
(1 Tesalonica 5:14) Sa laing bahin, kami nag-awhag ninyo, mga igsoon, nga pasidan-an ang mga badlonganon, hupayon ang mga naguol, tabangan ang mga luya, ug magpailob sa tanan.
“Maghigugmaay . . . sa Buhat ug sa Kamatuoran”
13 Suportahi ang maluya. Masulayan ang katinuod sa atong gugma pinaagi sa pagsunod sa sugo nga ‘buligi ang mga maluya ug magpailob sa tanan.’ (1 Tes. 5:14) Bisag daghang maluya ang nalig-on ra sa ulahi, ang uban nagkinahanglan sa atong pailob ug padayong pagsuportar. Makatabang ta pinaagi sa pagdasig kanila gamit ang Bibliya, pagpakigpartner nila sa pagsangyaw, o pagpaminaw kanila. Dugang pa, imbes maghunahuna nga ang igsoon “lig-on” o kaha “maluya,” angayng hinumdoman nga kitang tanan may kalig-on ug kaluyahon. Bisag si apostol Pablo miangkon nga siya may mga kaluyahon. (2 Cor. 12:9, 10) Busa, makabenepisyo tang tanan sa tabang sa atong mga igsoon sa pagtuo.
Sundoga ang Pagkamapainubsanon ug Kalumo ni Jesus
16 Atong malumong mga pulong. Ang atong malumong pagmahal alang sa uban magtukmod kanato sa ‘paghupay sa magul-anong mga kalag.’ (1 Tes. 5:14) Unsay mahimo natong isulti sa pagdasig kanila? Mahimo nato silang sultian nga nahingawa kita kanila. Makahatag kitag sinserong komendasyon aron matabangan sila nga makita ang ilang maayong mga hiyas ug katakos. Mahimo nato silang pahinumdoman nga si Jehova nagkabig kanila ngadto sa kamatuoran, busa bililhon gayod sila sa iyang mga mata. (Juan 6:44) Mahimo nato silang pasaligan nga si Jehova nahingawa gayod sa iyang mga alagad nga “dugmok ug kasingkasing” o “nahugno sa espiritu.” (Sal. 34:18) Ang atong malumong mga pulong makahupay niadtong nagmagul-anon.—Prov. 16:24.
Pagpangitag Espirituwal nga Bahandi
(1 Tesalonica 4:3-6) Kay kini ang kabubut-on sa Diyos, nga kamo kinahanglang balaan ug maglikay sa seksuwal nga imoralidad. 4 Ang matag usa ninyo kinahanglang mahibalo kon unsaon pagkontrolar sa iyang lawas aron magpabilin kining balaan ug dungganon. 5 Ayawg sundoga ang mga tawo sa kanasoran nga wala makaila sa Diyos, kay sila hakog ug walay pagpugong sa ilang gana sa sekso. 6 Kinahanglang walay usa nga molapas sa limitasyon sa moral ug mamentaha sa iyang igsoon niining butanga, kay silotan ni Jehova ang nagahimo niini, sama sa gisulti na namo kaninyo ug sa gihatag namong bug-at nga pasidaan.
Pakighilawas
Ang pakighilawas maoy usa ka sala nga tungod niana ang usa ka tawo mahimong ipalagpot gikan sa Kristohanong kongregasyon. (1Co 5:9-13; Heb 12:15, 16) Gipatin-aw sa apostol nga ang usa ka Kristohanon nga nakighilawas nakasala batok sa iyang kaugalingong lawas, nga naggamit sa mga sangkap sa pagsanay alang sa sayop nga katuyoan. Siya apektado kaayo sa espirituwal sa mapait nga paagi, nga nagdalag kahugawan nganha sa kongregasyon sa Diyos, ug nagladlad sa iyang kaugalingon sa kapeligrohan sa makamatay nga mga sakit nga gipasa sa pagpakigsekso. (1Co 6:18, 19) Siya naglapas sa mga katungod sa iyang Kristohanong mga igsoon (1Te 4:3-7) pinaagi sa (1) pagdalag kahugawan ug makauulaw nga kabuangan, lakip ang pagpakaulaw, nganha sa kongregasyon (Heb 12:15, 16), (2) paghikaw sa usa nga iyang gipakighilawasan sa mahinlong moral nga baroganan ug, kon siya dili-minyo, sa pagkahinlo inigsulod sa kaminyoon, (3) paghikaw sa iyang pamilya sa usa ka mahinlong moral nga rekord, ingon man (4) pagdaot sa mga ginikanan, sa bana, o sa pamanhonon sa usa nga iyang gipakighilawasan. Iyang gibalewala ang Diyos, kinsa magpahamtang ug silot tungod sa iyang sala, ug dili ang tawo, kansang mga balaod niini tingali nagkonsentir o tingali nagkondenar sa pakighilawas.—1Te 4:8.
(1 Tesalonica 4:15-17) Kay kini ang among isulti kaninyo pinaagi sa pulong ni Jehova, nga kita nga buhi pa panahon sa presensiya sa Ginoo dili gayod mag-una niadtong nangatulog sa kamatayon; 16 kay ang Ginoo manaog gikan sa langit ug mohatag ug sugo, ug ang iyang tingog ingong arkanghel madungog uban ang tingog sa trompeta sa Diyos, ug kadtong nangamatay nga nahiusa sa Kristo maoy unang mabanhaw. 17 Dayon kita nga mga buhi pa mosaka sa mga panganod aron makauban sila ug sugaton ang Ginoo diha sa kahanginan; ug makauban na nato kanunay ang Ginoo.
“Ang Inyong Kaluwasan Nagakaduol Na”!
14 Unsay mahitabo dihang ang Gog sa Magog moatake na sa katawhan sa Diyos? Si Mateo ug Marcos nagrekord sa maong panghitabo: “Ipadala [sa Anak sa tawo] ang mga manulonda ug pagatigomon ang iyang mga pinili gikan sa upat ka hangin, gikan sa kinatumyan sa yuta hangtod sa kinatumyan sa langit.” (Mar. 13:27; Mat. 24:31) Kining buluhatong pagpanigom wala magtumong sa unang pagtimbre sa mga dinihogan; ni nagtumong sa kataposang pagtimbre sa nahibilin sa mga dinihogan. (Mat. 13:37, 38) Ang maong pagtimbre mahitabo sa dili pa magsugod ang dakong kasakitan. (Pin. 7:1-4) Busa, unsa man kining buluhatong pagpanigom nga gihisgotan ni Jesus? Panahon kini dihang ang nahibilin sa 144,000 makadawat sa ilang langitnong ganti. (1 Tes. 4:15-17; Pin. 14:1) Kini mahitabo sa usa ka yugto human ang Gog sa Magog magsugod sa pag-atake. (Ezeq. 38:11) Dayon matuman na kining mga pulonga ni Jesus: “Niana nga panahon ang mga matarong mosidlak ingon nga kahayag sa adlaw diha sa gingharian sa ilang Amahan.”—Mat. 13:43.
15 Nagpasabot ba kini nga adunay “rapture” o pagsakgaw sa mga dinihogan? Daghan diha sa Kakristiyanohan ang nagtuo niini nga pagtulon-an nga kuno ang mga Kristohanon dad-on sa langit sa tawhanong lawas. Unya, nagdahom sila nga ilang makita si Jesus nga mobalik aron magmando sa yuta. Apan, ang Bibliya tin-awng nagpakita nga “ang ilhanan sa Anak sa tawo” makita didto sa langit ug si Jesus moanhi “diha sa mga panganod sa langit.” (Mat. 24:30) Ang maong mga ekspresyon nagpaila ug pagkadili-makita. Dugang pa, ang “unod ug dugo dili makapanunod sa gingharian sa Diyos.” Busa kadtong dad-on sa langit kinahanglan unang “mangausab, sa daklit, sa pagpamilok sa mata, sa panahon sa kataposan nga trompeta.” (Basaha ang 1 Corinto 15:50-53.) Busa, bisan tuod dili kita mogamit dinhi sa terminong “rapture” tungod sa sayop nga kahulogan niini, ang nahibiling matinumanon nga mga dinihogan pagatigomon sa usa ka pagpamilok.
Pagbasa sa Bibliya
(1 Tesalonica 3:1-13) Busa dihang dili na namo kini maantos, naghunahuna mi nga mas maayong magpabilin sa Atenas; 2 ug gipadala namo si Timoteo, nga atong igsoon ug ministro sa Diyos sa maayong balita bahin sa Kristo, aron palig-onon ug hupayon mo maylabot sa inyong pagtuo, 3 aron walay maluya kaninyo sa mga kasakitan. Kay nahibalo gyod mo nga dili ta makalikay niining mga butanga. 4 Kay dihang kauban mi ninyo, giingnan mo namo daan nga makasinati tag kasakitan, ug nahitabo kana, sama sa inyong nahibaloan. 5 Busa sa dihang dili na ko makaantos, gipadala nako siya kaninyo aron makabalita ko sa inyong pagkamatinumanon, kay basig natental mo sa Maninental ug nasayang ang among paghago. 6 Apan mao pay pag-abot ni Timoteo gikan diha nga nagdalag maayong balita bahin sa inyong pagkamatinumanon ug gugma, nga kanunay mong nahinumdom sa atong malipayong pag-ubanay, ug nga gimingaw mo namo sama nga gimingaw mi ninyo. 7 Tungod niini, mga igsoon, sa tanan namong kalisdanan ug kasakit nahupayan mi tungod ninyo ug sa inyong pagkamatinumanon. 8 Madasig gyod mi kon lig-on mong mobarog sa Ginoo. 9 Tungod ninyo mapasalamaton kaayo mi sa Diyos kay nakahatag mo namog dakong kalipay. 10 Adlaw ug gabii, kami kinasingkasing nga nagaampo nga unta makita mo namo ug among mahatag kon unsay kulang sa inyong pagtuo. 11 Hinaot ang atong Diyos ug Amahan ug ang atong Ginoong Jesus maghimog paagi nga makaanha mi kaninyo. 12 Dugang pa, hinaot ang Ginoo magpauswag, oo, magpadagaya sa inyong gugma sa usag usa ug sa tanan, sama sa among gugma kaninyo, 13 aron ang inyong kasingkasing himoon niyang lig-on, dili salawayon, ug balaan atubangan sa atong Diyos ug Amahan panahon sa presensiya sa atong Ginoong Jesus uban sa tanan niyang balaan.
Hulyo 15-21
BAHANDI GIKAN SA PULONG SA DIYOS | 2 TESALONICA 1-3
“Ang Pagpadayag sa Tawo sa Kalapasan”
(2 Tesalonica 2:6-8) Ug karon nahibalo na mo kon kinsay nakapugong sa tawo sa kalapasan, aron madayag siya sa panahon nga gitakda kaniya. 7 Tinuod, ang misteryo niini nga kalapasan naglihok na, apan magpabilin lang kining misteryo hangtod nga mawala ang nakapugong kaniya. 8 Unya ang tawo sa kalapasan ipadayag, kinsa laglagon ni Ginoong Jesus pinaagi sa espiritu sa iyang baba ug wagtangon dihang ipadayag ang iyang presensiya.
Diyosnong Pagkamahinalaron
Dinhi makaplagan ang laing misteryo, nga bug-os kabatok sa “sagradong tinago” ni Jehova. Kini mao “ang misteryo niini nga kalapasan.” Kini usa ka misteryo alang sa matuod nga mga Kristohanon tungod kay sa adlaw ni apostol Pablo ang ilhanan sa “tawo sa kalapasan” wala pa sa tino maugmad ug wala pa mailhi sa dayag. Bisan human motungha ang maong “tawo,” ang iyang ilhanan magpadayon nga misteryoso alang sa kadaghanan tungod kay ang iyang pagkadaotan pagahimoon ubos sa pagtakoban ug diha sa ngalan sa diyosnong pagkamahinalaron. Sa pagkatinuod, usa kini ka apostasya gikan sa tinuod nga diyosnong pagkamahinalaron. Si Pablo miingon nga “ang misteryo niini nga kalapasan” nagalihok na sa iyang adlaw, tungod kay dihay daotang impluwensiya sa Kristohanong kongregasyon nga sa ulahi mosangpot sa pagtungha niining apostatang matang. Sa kataposan, kini pagahanawon ni Jesu-Kristo inigpadayag sa iyang presensiya. Kini nga apostata, ang “tawo” nga gipalihok ni Satanas, magtuboy sa iyang kaugalingon “ibabaw sa tanang gitawag nga ‘diyos’ o sa usa nga ginasimba” (Gr., seʹba·sma). Busa, ingong instrumento ni Satanas, kining dakong magsusupak sa Diyos hilabihan ka malimbongon ug magpahinabog kalaglagan niadtong nagasunod sa mga buhat niini. Epektibo ang paglihok sa “tawo sa kalapasan” tungod kay ang iyang pagkadaotan gisul-oban kunohay ug diyosnong pagkamahinalaron.—2Te 2:3-12; itandi ang Mat 7:15, 21-23.
(2 Tesalonica 2:9-12) Apan ang tawo sa kalapasan motungha pinaagi sa impluwensiya ni Satanas, ug maghimo siyag gamhanang mga buhat, bakak nga mga ilhanan, mga buhat nga katingalahan, 10 ug tanang pagkadili-matarong ug panglimbong para niadtong laglagonon. Laglagon sila ingong silot kay wala nila dawata ug higugmaa ang kamatuoran. Kon gibuhat nila kini, maluwas unta sila. 11 Mao nga gitugot sa Diyos nga malimbongan sila aron motuo sila sa bakak, 12 aron silang tanan mahukman tungod kay wala sila motuo sa kamatuoran apan nalipay hinuon sa pagkadili-matarong.
Bakak
Gitugot ni Jehova nga Diyos nga “masayop” ang mga tawo nga nagpalabi sa kabakakan “aron sila managpanuo sa bakak” inay sa maayong balita bahin kang Jesu-Kristo. (2Te 2:9-12) Kini nga prinsipyo giilustrar sa kon unsay nahitabo mga kasiglohan una pa niana maylabot sa Israelinhon nga si Haring Ahab. Ang namakak nga mga manalagna nagpasalig kang Ahab sa kalamposan sa gubat batok sa Ramot-gilead, samtang ang manalagna ni Jehova nga si Micaias nagtagna ug katalagman. Ingon sa gipadayag sa panan-awon ngadto kang Micaias, gitugotan ni Jehova ang usa ka espiritung linalang nga mahimong “usa ka malimbongong espiritu” diha sa baba sa mga manalagna ni Ahab. Sa ato pa, kini nga espiritung linalang migamit sa iyang gahom nganha kanila aron sila mamulong, dili sa kamatuoran, kondili sa kon unsay buot nilang isulti ug kon unsay buot ni Ahab nga madungog gikan kanila. Bisan pag gipasidan-an na, si Ahab mipalabi nga malimbongan sa ilang mga pagpamakak ug gibugtian kini sa iyang kinabuhi.—1Ha 22:1-38; 2Cr 18.
Pagpangitag Espirituwal nga Bahandi
(2 Tesalonica 1:7, 8) Apan kamo nga nag-antos ug kasakitan hatagag kahupayan uban kanamo dihang ipadayag na si Ginoong Jesus gikan sa langit uban sa iyang gamhanang mga anghel 8 sa nagdilaab nga kalayo, dihang siya manimalos kanilang wala makaila sa Diyos ug kanilang wala magsunod sa maayong balita bahin sa atong Ginoong Jesus.
Kalayo
Si Pedro misulat nga “ang mga langit ug ang yuta nga naglungtad karon gitagana alang sa kalayo.” Pinasukad sa konteksto ug sa diwa sa ubang mga kasulatan, dayag nga kini dili usa ka literal nga kalayo kondili nagpasabot sa walay-kataposang kalaglagan. Maingon nga ang Lunop sa adlaw ni Noe wala maglaglag sa literal nga mga langit ug yuta, apan sa dili-diyosnong mga tawo lamang, mao man usab ang pagpadayag ni Jesu-Kristo uban sa iyang gamhanang mga manulonda diha sa nagdilaab nga kalayo moresulta sa permanenteng kalaglagan sa mga dili-diyosnon lamang ug sa daotang sistema sa mga butang diin sila maoy bahin niini.—2Pe 3:5-7, 10-13; 2Te 1:6-10; itandi ang Isa 66:15, 16, 22, 24.
(2 Tesalonica 2:2) nga dili unta mo daling maglibog o matarantar tungod sa mensahe nga daw gikan sa Diyos o sa isulti kaninyo o sa sulat nga daw gikan kanamo, nga nag-ingon nga nia na ang adlaw ni Jehova.
Pagdasig, Pag-inspirar
“Inspiradong mga Pahayag”—Matuod ug Bakak. Ang Gregong pulong nga pneuʹma (espiritu) gigamit sa linaing paagi sa pipila ka sinulat sa mga apostoles. Pananglitan, diha sa 2 Tesalonica 2:2 si apostol Pablo nag-awhag sa iyang mga igsoon sa Tesalonica nga dili makuratan o matay-og sa ilang pangatarongan gumikan “sa usa ka inspiradong pahayag [sa literal, “espiritu”] o sa usa ka binaba nga mensahe o sa usa ka sulat nga daw gikan kanamo, nga nag-ingong ang adlaw ni Jehova ania na.” Tataw nga gigamit ni Pablo ang pulong nga pneuʹma (espiritu) maylabot sa paagi sa pagkomunikar, sama sa “binaba nga mensahe” o “sulat.” Tungod niini ang Commentary on the Holy Scriptures ni Lange (p. 126) nag-ingon bahin niini nga teksto: “Pinaagi niini ang Apostol nagtumong sa usa ka espirituwal nga opinyon, pagpanagna kunohay, pamulong sa usa ka manalagna.” (Gihubad ug giedit ni P. Schaff, 1976) Ang Word Studies in the New Testament ni Vincent nag-ingon: “Pinaagi sa espiritu. Pinaagig matagnaong mga pamulong sa mga indibiduwal diha sa Kristohanong mga panagkatigom, nga nangangkong may awtoridad sa mga pagpadayag gikan sa Diyos.” (1957, Tomo IV, p. 63) Busa, samtang ang ubang mga hubad naghubad lamang sa pneuʹma niining tekstoha ug sa susamang mga teksto ingong “espiritu,” ang ubang mga hubad naghubad nga “mensahe sa Espiritu” (AT), “panagna” (JB), “pagdasig” (D’Ostervald; Segond [Pranses]), “inspiradong pahayag” (NW).
Pagbasa sa Bibliya
(2 Tesalonica 1:1-12) Gikan kang Pablo, Silvano, ug Timoteo, ngadto sa kongregasyon sa mga taga-Tesalonica nga nahiusa sa Diyos nga atong Amahan ug kang Ginoong Jesu-Kristo: 2 Hinaot maanaa kaninyo ang dili hitupngang pagkamaayo ug ang kalinaw gikan sa Diyos nga Amahan ug ni Ginoong Jesu-Kristo. 3 Kami obligado nga magpasalamat kanunay sa Diyos tungod ninyo, mga igsoon. Angay kini kay dako kaayo ang pag-uswag sa inyong pagtuo ug nagkadako sab ang inyong gugma sa usag usa. 4 Busa kami nagpasigarbo kaninyo sa mga kongregasyon sa Diyos tungod sa inyong pagtuo ug paglahutay sa tanang paglutos ug kalisdanan nga inyong giantos. 5 Pamatuod kini sa matarong nga paghukom sa Diyos, nga tungod niini isipon mong takos sa Gingharian sa Diyos, nga alang niini nag-antos gyod mo. 6 Kay matarong man ang Diyos, silotan niya kadtong nagpaantos kaninyo. 7 Apan kamo nga nag-antos ug kasakitan hatagag kahupayan uban kanamo dihang ipadayag na si Ginoong Jesus gikan sa langit uban sa iyang gamhanang mga anghel 8 sa nagdilaab nga kalayo, dihang siya manimalos kanilang wala makaila sa Diyos ug kanilang wala magsunod sa maayong balita bahin sa atong Ginoong Jesus. 9 Kini sila sentensiyahan ug kalaglagan nga hangtod sa hangtod ug mahanaw sa atubangan sa Ginoo ug dili na makakita sa iyang mahimayaong gahom. 10 Mahitabo kini sa panahon nga siya himayaon uban sa iyang mga balaan, ug nianang adlawa ang tanang dunay pagtuo mahingangha kaniya. Ug kay mituo mo sa gihatag namong pamatuod, kamo sab dunay bahin niini. 11 Tungod niana kanunay mo namong giampo nga unta isipon mo sa atong Diyos nga takos sa iyang pagtawag, ug pinaagi sa iyang gahom iyang mahimo ang tanang maayong butang nga gusto niyang himoon kaninyo ug molampos ang inyong mga buhat sa pagtuo. 12 Nianang paagiha ang ngalan sa atong Ginoong Jesus mahimaya pinaagi kaninyo ug kamo mahimaya tungod kaniya, sumala sa dili hitupngang pagkamaayo sa atong Diyos ug ni Ginoong Jesu-Kristo.
Hulyo 22-28
BAHANDI GIKAN SA PULONG SA DIYOS | 1 TIMOTEO 1-3
“Pangab-ot Alang sa Maayong Buhat”
(1 Timoteo 3:1) Kasaligan kini nga pamulong: Kon dunay mangab-ot sa pagkahimong tigdumala, siya nagtinguhag maayong buhat.
Nganong Kinahanglan Kang Mouswag sa Espirituwal?
3 Basaha ang 1 Timoteo 3:1. Ang Gregong pulong nga gihubad ug “magapangab-ot” nagkahulogan ug pagpaningkamot nga makab-ot ang usa ka butang. Sa paggamit sa maong pulong, gipasiugda ni Pablo nga gikinahanglan ang pagpaningkamot aron mouswag sa espirituwal. Hunahunaa ang usa ka brader nga namalandong sa iyang kaugmaon diha sa kongregasyon. Lagmit dili pa siya ministeryal nga alagad, pero iyang naamgohan nga kinahanglan niyang pauswagon ang iyang espirituwal nga mga katakos. Una, maningkamot siyang mokuwalipikar ingong ministeryal nga alagad. Ngadtongadto, naglaom siya nga mokuwalipikar ingong ansiyano. Sa maong mga kahimtang, maningkamot siya nga makab-ot ang mga kuwalipikasyon nga gikinahanglan sa pag-abaga ug dugang responsabilidad sa kongregasyon.
(1 Timoteo 3:13) Kay ang mga lalaki nga nag-alagad sa maayong paagi dunay maayong reputasyon ug dakong kagawasan sa pagsulti diha sa pagtuo maylabot kang Kristo Jesus.
km 11/78 8 ¶7
Silang ‘Nakapanag-iya sa Maayong Baroganan’
7 Nan, masabtan dayon kon nganong si Pablo miingon nga ang maong mga lalaki “nagapanag-iya sa maayong baroganan.” Dili kini, sama sa gipasabot sa pipila, nga pag-uswag diha sa hirarkiya sa iglesya. Hinunoa, silang “nagaalagad nga maayo” makaangkon gayod ug mga panalangin gikan kang Jehova ug Jesus, ug sila makahupot sa pagtahod ug pagpaluyo sa tibuok kongregasyon.
Pagpangitag Espirituwal nga Bahandi
(1 Timoteo 1:4) dili magtagad sa bakak nga mga estorya, ug dili magsubay sa mga kagikan. Kay wala kanay kapuslanan, apan moresulta lag mga estorya nga walay pamatuod imbes makahatag ug bisan unsa gikan sa Diyos nga makapalig-on sa pagtuo.
Talaan sa Kagikan
Ang pagtuon ug ang pagpakiglantugi bahin nianang mga butanga walay kapuslanan, ug ilabina gayod sa panahon sa pagsulat ni Pablo kang Timoteo. Dili na hinungdanon ang pagsusi sa mga talaan sa kagikan aron kapamatud-an ang kagikan sa usa, sanglit ang Diyos wala na mohimog kalainan tali sa Hudiyo ug Hentil sulod sa Kristohanong kongregasyon. (Gal 3:28) Ug napamatud-an na sa mga talaan sa kagikan nga si Kristo naggikan sa linya ni David. Dugang pa, wala madugay human isulat ni Pablo kining tambaga ang Jerusalem gilaglag, ug lakip niini ang Hudiyohanong mga rekord. Ang Diyos wala magtipig niini. Busa, si Pablo nabalaka basin unya si Timoteo ug ang mga kongregasyon malinga pinaagi sa paggugol ug panahon sa pagpanukiduki ug sa mga kontrobersiya bahin sa kaugalingong kagikan, nga dili mapuslanon sa Kristohanong pagtuo. Ang talaan sa kagikan nga gihatag sa Bibliya igo nang magpamatuod sa pagka-Mesiyas ni Kristo, ang talaan nga labing hinungdanon alang sa mga Kristohanon. Ang ubang Biblikanhong mga talaan sa kagikan nagsilbing pamatuod sa pagkatinuod sa Kasulatanhong rekord, nga tin-awng nagpakita nga kini maoy usa ka tinuod nga asoy sa kasaysayan.
(1 Timoteo 1:17) Karon, ngadto sa Hari nga walay kataposan, walay kamatayon, dili makita, ang bugtong nga Diyos, iya ang dungog ug himaya hangtod sa kahangtoran. Amen.
“Tan-awa! Kini Mao ang Atong Diyos”
15 Ang laing titulo nga ikapadapat lamang kang Jehova maoy “Hari nga walay kataposan.” (1 Timoteo 1:17; Pinadayag 15:3) Unsay kahulogan niini? Lisod masabtan sa atong limitadong mga kaisipan, apan si Jehova maoy walay kataposan sa duha ka direksiyon—ang nangagi ug ang umaabot. Ang Salmo 90:2 nag-ingon: “Bisan gikan sa panahong walay tino hangtod sa panahong walay tino ikaw mao ang Diyos.” Busa si Jehova wala gayoy sinugdan; siya naglungtad sa tanang panahon. Tukma nga siya gitawag nga “ang Karaan sa mga Adlaw”—siya naglungtad sa panahong walay kataposan sa wala pa maglungtad si bisan kinsa o bisan unsa sa uniberso! (Daniel 7:9, 13, 22) Kinsay makataronganong makalalis sa iyang katungod sa pagka-Soberanong Ginoo?
Pagbasa sa Bibliya
(1 Timoteo 2:1-15) Busa una sa tanan, ako nag-awhag nga ang mga pangamuyo, pag-ampo, paghangyo, ug pagpasalamat himoon para sa tanang matang sa tawo, 2 sa mga hari ug sa tanan nga taas ug katungdanan, aron padayon kitang magkinabuhi nga malinawon uban ang bug-os nga debosyon sa Diyos ug pagkaseryoso. 3 Kini maayo ug makapalipay sa atong Manluluwas, ang Diyos, 4 kansang kabubut-on nga ang tanang matang sa tawo maluwas ug makakat-on sa tukmang kahibalo sa kamatuoran. 5 Kay dunay usa ka Diyos, ug usa ka tigpataliwala sa Diyos ug sa mga tawo, si Kristo Jesus. Siya ang tawo 6 nga naghatag sa iyang kaugalingon ingong katugbang nga lukat para sa tanan—mao kini ang ipahayag sa gitakdang panahon niini. 7 Alang niini nga pagpamatuod nga ako gitudlo sa Diyos ingong magwawali ug apostol—nagsulti kog tinuod, wala ko mamakak—usa ka magtutudlo sa mga nasod bahin sa pagtuo ug kamatuoran. 8 Busa nanghinaot ko nga sa tanang lugar ang mga lalaki magpadayon sa pag-ampo, nga magbayaw sa ilang maunongong mga kamot, nga walay kasuko ug panaglalis. 9 Ang mga babaye sab angayng magpatahom pinaagi sa pagsul-ob ug desente nga sinina, uban ang pagtahod sa kaugalingon ug sa uban ug maayong panghunahuna, dili pinaagig mga estilo sa pagsalapid sa buhok ug bulawan o mga perlas o mahalon kaayong sinina, 10 kondili sa paagi nga angay sa mga babaye nga nagpaila nga may debosyon sa Diyos, sa ato pa, pinaagi sa maayong mga buhat. 11 Ang babaye maghilom ug bug-os nga magpasakop samtang ginatudloan. 12 Dili ko motugot nga ang babaye magtudlo o magbuot sa lalaki, kondili maghilom siya. 13 Kay si Adan ang unang gibuhat, dayon si Eva. 14 Dugang pa, si Adan wala malimbongi, apan ang babaye ang bug-os nga nalimbongan ug nakasala. 15 Apan ang babaye magpabiling luwas pinaagi sa pagkahimong inahan, basta siya magpadayon diha sa pagtuo, gugma, ug pagkabalaan uban ang maayong panghunahuna.
Hulyo 29–Agosto 4
BAHANDI GIKAN SA PULONG SA DIYOS | 1 TIMOTEO 4-6
“Debosyon sa Diyos Kontra Bahandi”
(1 Timoteo 6:6-8) Ang tinuod, naay dakong kaayohan kon ang usa dunay debosyon sa Diyos ug kontento. 7 Kay dihang natawo ta sa kalibotan wala tay gidala, ug inigkamatay nato wala pod tay madala. 8 Busa kon duna tay makaon ug masul-ob, kita magmakontento na niini.
Pagkakat-on sa Sekreto sa Pagkakontento
Ang usa ka hinungdanong butang nga nakaamot sa kalipay ug katagbawan ni Pablo mao ang iyang pagkakontento. Apan, unsa may kahulogan sa pagkakontento? Sa yanong pagkasulti, kini nagkahulogan ug pagkakontento sa pangunang mga butang. Maylabot niini, giingnan ni Pablo si Timoteo, nga iyang kauban diha sa ministeryo: “Sa pagkatinuod, kini maoy usa ka paagi nga makaganansiyag dako, kining diyosnong pagkamahinalaron inubanan sa pagkakontento. Kay kita walay gidalang bisan unsa nganhi sa kalibotan, ug kita walay madala nga bisan unsa sa atong paggawas niini. Busa, kon kita adunay makaon ug ikabesti, kita magmakontento na niining mga butanga.”—1 Timoteo 6:6-8.
Matikdi nga gilangkit ni Pablo ang pagkakontento sa diyosnong pagkamahinalaron. Giila niya nga ang tinuod nga kalipay maggikan sa diyosnong pagkamahinalaron, nga mao, ang pag-una sa atong pag-alagad sa Diyos, ug dili sa materyal nga mga kabtangan o bahandi. Ang ‘pagkaon ug besti’ maoy kasangkapan lamang aron siya makapadayon sa pagpangagpas sa diyosnong pagkamahinalaron. Busa alang kang Pablo, ang sekreto sa pagkakontento mao ang pagsalig kang Jehova, bisag unsa pay kahimtang.
(1 Timoteo 6:9) Apan kadtong determinadong madato mangahulog sa tentasyon ug sa lit-ag ug sa daghang binuang ug makadaot nga tinguha, nga moresulta sa ilang ikadaot ug kalaglagan.
Pagpangamas nga Madato—Ang Epekto Niini Kanimo
Hinuon, ang kadaghanang tawo dili mamatay tungod sa pagpangagpas nga masapian. Ugaling lang, wala sila makamatikod nga daghan na ang panahong nausik tungod kay puliki sila sa pagpangagpas ug materyal nga bahandi. Unya ang kalidad usab sa ilang kinabuhi madaot tungod kay ang presyur sa trabaho o problema sa kuwarta mahimong hinungdan sa sakit nga nerbiyos, pagkadili-makatulog, pagkalabdonon ug ulo, o ulser—mga sakit nga makapamubo sa kinabuhi. Ug basin ulahi na ang tanan sa dihang ang usa makaamgo nga siya kinahanglang mag-usab sa iyang panglantaw kon unsay angay niyang unahon sa kinabuhi. Tingalig nawad-an nag pagsalig kaniya ang iyang kapikas, basin nadaot na ang emosyon sa iyang mga anak, ug mahimong dili na maayo ang iyang panglawas. Tingali maremedyohan pa ang ubang kadaot, apan magkinahanglan kini ug dako kaayong paningkamot. Sa pagkatinuod, sila “nagtusaktusak sa ilang kaugalingon sa daghang kasakitan.”—1 Timoteo 6:10.
(1 Timoteo 6:10) Kay ang gugma sa kuwarta maoy gamot sa tanang klase sa makadaot nga butang, ug sa pagpaningkamot nga tagbawon kini nga gugma, ang uban mibiya sa pagtuo ug nag-antos sa daghang kasakitan.
Unom ka Paagi Aron Magmalamposon
Sumala sa gipakita sa unang artikulo niini nga serye, ang mga tawo nga nagtuong malamposon sila kay daghan silag kuwarta, sa pagkatinuod, morag naggukod lang ug hangin. Gawas nga mahigawad lang sila, matusak-tusak usab sila ug daghang kasakitan. Pananglitan, samtang nangamas taman sa ginhawa aron madato, kasagarang isakripisyo sa mga tawo ang ilang pamilya ug mga higala. Ang uban kulag tulog—tingali tungod sa trabaho o kaha sa kabalaka. “Matam-is ang pagkatulog sa tawo nga nagkugi, diyutay man o daghan ang iyang kaonon; apan ang bahandi sa dato dili magpakatulog kaniya,” nag-ingon ang Ecclesiastes 5:12.—Hebrew Names Version.
Ang salapi maoy mapintas ug malimbongon nga agalon. Si Jesu-Kristo naghisgot bahin sa “malimbongong gahom sa mga bahandi.” (Marcos 4:19) Sa laing pagkasulti, ang bahandi morag makahatag ug kalipay, apan ang tinuod dili diay. Busa kini makapukaw sa usa sa pagpangitag mas daghan pang kuwarta. “Walay igong salapi ang makatagbaw sa tawo nga mahigugmaon ug salapi,” nag-ingon ang Ecclesiastes 5:10.—The New English Bible.
Sa ato pa, ang pagkamahigugmaon ug salapi moresulta lang sa ulahi ug kaguol, kahigawad, o kaha krimen. (Proverbio 28:20) Ang tawo malipayon ug malamposon kon siya mahinatagon, mapinasayloon, maayog moralidad, mahigugmaon, ug may maayong relasyon sa Diyos.
Pagpangitag Espirituwal nga Bahandi
(1 Timoteo 4:2) Tungod kini sa mga bakak nga gisulti sa mga salingkapaw, kansang konsensiya dili na mobati samag panit nga gipaso sa nagbaga nga puthaw.
Maayong Konsensiya Atubangan sa Diyos
17 Si apostol Pedro misulat: “Mentinaha ang maayong konsensiya.” (1 Pedro 3:16) Ikasubo, kon kanunayng ibalewala sa mga tawo ang mga prinsipyo ni Jehova, sa ngadtongadto dili na sila pasidan-an sa ilang konsensiya. Si Pablo miingon nga ang maong konsensiya “dili na mobati samag panit nga gipaso sa nagbaga nga puthaw.” (1 Timoteo 4:2) Nakasulay na ba ka nga grabe kang napaso? Kini magbilin ug baga kaayong ulat nga kon hikapon wala na kay mabati. Kon ang usa ka tawo magpadayon sa paghimog sayop, ang iyang konsensiya “dili na mobati” ug sa ngadtongadto dili na molihok.
(1 Timoteo 4:13) Padayon sa pagkugi sa publikong pagbasa, sa pagpanambag, sa pagpanudlo, hangtod nga moabot ko.
Publikong Pagbasa
Sa Kristohanong Kongregasyon. Sa unang siglo, pipila lamang ang adunay mga kopya sa daghang linukot nga basahon sa Bibliya, nga tungod niana gikinahanglan ang publikong pagbasa. Si apostol Pablo nagsugo nga ang iyang mga sulat basahon sa publiko diha sa mga panagkatigom sa Kristohanong mga kongregasyon ug nagsugo nga kini ibaylo sa iyang mga sulat ngadto sa ubang mga kongregasyon aron kini usab mabasa. (Col 4:16; 1Te 5:27) Gitambagan ni Pablo ang batan-on nga Kristohanong magtatan-aw nga si Timoteo nga magmakugihon “sa publikong pagbasa, sa pagpanambag, sa pagpanudlo.”—1Ti 4:13.
Ang publikong pagbasa angayng himoon uban ang pagkalarino. (Hab 2:2) Sanglit ang publikong pagbasa maoy aron maedukar ang uban, ang usa ka publikong magbabasa kinahanglang bug-os nga nakasabot sa iyang gibasa ug tin-awng nakasabot sa intensiyon sa magsusulat, nga mag-amping sa pagbasa aron malikayan nga makahatag ug sayop nga ideya o impresyon ngadto sa mga mamiminaw. Sumala sa Pinadayag 1:3, kadtong nagabasa sa makusog sa maong tagna, ingon man usab kadtong nagapatalinghog sa mga pulong ug nagatuman niini, magmalipayon.
Pagbasa sa Bibliya
(1 Timoteo 4:1-16) Apan ang inspiradong pulong klarong nag-ingon nga sa ulahing mga panahon ang uban mobiya sa pagtuo, nga maminaw sa malimbongon nga inspiradong mga mensahe ug sa mga pagtulon-an sa mga demonyo. 2 Tungod kini sa mga bakak nga gisulti sa mga salingkapaw, kansang konsensiya dili na mobati samag panit nga gipaso sa nagbaga nga puthaw. 3 Gidid-an nila ang mga tawo sa pagminyo ug sa pagkaon sa pipila ka pagkaon, apan kini nga mga pagkaon gibuhat sa Diyos aron kaonon uban ang pagpasalamat niadtong dunay pagtuo ug tukmang kahibalo sa kamatuoran. 4 Kay ang tanang gibuhat sa Diyos maayo, ug walay angayng isalikway kon kini gidawat uban ang pagpasalamat, 5 kay kini gibalaan pinaagi sa pulong sa Diyos ug sa pag-ampo. 6 Pinaagi sa paghatag niini nga tambag ngadto sa mga igsoon, ikaw mahimong maayo nga ministro ni Kristo Jesus nga natudloan sa mga pulong sa pagtuo ug sa maayong pagtulon-an nga imong gisunod pag-ayo. 7 Apan isalikway ang bakak nga mga estorya nga nagpasipala sa Diyos, sama sa ginasulti sa tigulang nga mga babaye. Sa laing bahin, bansaya ang imong kaugalingon nga ang tumong mao ang pagpakitag debosyon sa Diyos. 8 Kay ang pagbansay sa lawas naay gamayng kaayohan, apan ang debosyon ngadto sa Diyos mapuslanon sa tanang butang, kay nalangkit niini ang saad sa kinabuhi karon ug sa umaabot. 9 Kana nga pamulong kasaligan ug angay gyong tuohan. 10 Tungod niini kita naghago ug naningkamot pag-ayo, kay kita naglaom sa buhi nga Diyos, ang Manluluwas sa tanang matang sa tawo, ilabina sa mga matinumanon. 11 Padayon sa paghatag niining mga sugoa ug sa pagtudlo niini. 12 Ayawg tugoti nga may motamay sa imong pagkabatan-on. Hinuon magpakita kag maayong ehemplo sa mga matinumanon diha sa sinultihan, panggawi, gugma, pagtuo, ug moral nga kahinlo. 13 Padayon sa pagkugi sa publikong pagbasa, sa pagpanambag, sa pagpanudlo, hangtod nga moabot ko. 14 Ayaw pasagdi ang gasa nga naa nimo, nga gihatag pinaagi sa tagna dihang gipatong kanimo sa mga ansiyano ang ilang mga kamot. 15 Palandonga kining mga butanga; hatagi kinig bug-os nga pagtagad, aron ang imong pag-uswag klarong makita sa tanan. 16 Tagda kanunay ang imong kaugalingon ug ang imong pagpanudlo. Padayon niining mga butanga, kay sa pagbuhat niini maluwas nimo ang imong kaugalingon ug kadtong maminaw nimo.