Reperensiya Para sa Workbook sa Tigom nga Kinabuhi ug Ministeryo
Marso 1-7
BAHANDI GIKAN SA PULONG SA DIYOS | NUMEROS 7-8
“Mga Leksiyon sa Kampo sa Israel”
Kongregasyon
Sa Israel ang responsableng mga tawo maoy molihok sa paghawas sa katawhan. (Esd 10:14) Busa, ang “mga pangulo sa mga tribo” naghalad human ipatindog ang tabernakulo. (Num 7:1-11) Dugang pa, ang mga saserdote, mga Levihanon, ug “ang mga pangulo sa katawhan” mao ang naghawas sa pagpamatuod pinaagi sa timbre sa “kasaligang kontrata” sa adlaw ni Nehemias. (Neh 9:38–10:27) Sa panahon sa pagpanaw sa Israel didto sa kamingawan, dihay “mga pangulo sa katigoman, mga tinawag sa panagkatigom, mga tawong bantogan,” nga ang 250 kanila miduyog kang Kore, Datan, Abiram, ug On sa paghiusa batok kang Moises ug Aaron. (Num 16:1-3) Sa pagsunod sa sugo sa Diyos, gipili ni Moises ang 70 ka ansiyano sa Israel kinsa maoy mga opisyal aron tabangan siya sa pagpas-an “sa luwan sa katawhan” nga dili niya mahimo sa pagpas-an nga mag-inusara. (Num 11:16, 17, 24, 25) Ang Levitico 4:15 naghisgot sa “mga ansiyano sa katigoman,” ug mopatim-aw nga ang mga hawas sa katawhan mao ang mga ansiyano sa nasod, ang mga pangulo niini, ang mga maghuhukom niini, ug ang mga opisyal niini.—Num 1:4, 16; Jos 23:2; 24:1.
Ruben
Sa kampo sa Israel ang mga Rubenhon, nga tapad sa mga kaliwat ni Simeon ug Gad, nahimutang sa H nga bahin sa tabernakulo. Kon magmartsa, kining tulo-ka-tribo nga dibisyon nga gipangunahan ni Ruben mosunod sa tulo-ka-tribo nga dibisyon ni Juda, Isacar, ug Zabulon. (Num 2:10-16; 10:14-20) Ingon usab niini ang han-ay sa dihang ang mga tribo mitanyag sa ilang mga halad panahon sa inagurasyon sa tabernakulo.—Num 7:1, 2, 10-47.
Pangunang mga Punto Gikan sa Basahon sa Numeros
8:25, 26. Ang edaran nga mga lalaki gisugo sa pagretiro sa pinugos nga pag-alagad agig konsiderasyon sa ilang edad ug aron matino nga ang may-katakos nga mga lalaki maoy matudlo sa Levihanon nga pag-alagad. Apan, sila makahimo sa pagboluntaryo sa pagtabang sa ubang mga Levihanon. Bisag walay pagretiro sa pagkahimong magwawali sa Gingharian karon, ang prinsipyo niining balaora nagtudlo ug bililhong leksiyon. Kon tungod sa pagkatigulang ang usa ka Kristohanon dili na makahimo sa pipila ka mga obligasyon, siya mahimong makigbahin sa usa ka matang sa pag-alagad nga iya pang maarangan.
Espirituwal nga mga Bahandi
Panganay
Sanglit ang panganay nga mga anak nga lalaki sa mga Israelinhon mao ang mahimong mga pangulo sa nagkalainlaing mga panimalay, sila naghawas sa tibuok nasod. Ngani, si Jehova naghisgot sa tibuok nasod ingong iyang “panganay,” kini iyang panganay nga nasod tungod sa Abrahamikong pakigsaad. (Ex 4:22) Tungod sa iyang pagtipig sa ilang mga kinabuhi, si Jehova nagsugo nga “ang matag panganay nga lalaki nga nagabukas sa matag tagoangkan taliwala sa mga anak sa Israel, taliwala sa mga tawo ug sa mga mananap,” pagabalaanon alang kaniya. (Ex 13:2) Busa, ang panganay nga mga anak nga lalaki gipahinungod ngadto sa Diyos.
Marso 8-14
BAHANDI GIKAN SA PULONG SA DIYOS | NUMEROS 9-10
“Kon Giunsa Paggiya ni Jehova ang Iyang Katawhan”
Kampo
Ang pagbalhin niining dakong kampo ngadto sa nagkalainlaing dapit (mga 40 ka pagkampo ang gihisgotan ni Moises diha sa Numeros 33) maoy usa ka katingalahang pagpasundayag usab sa pag-organisar. Samtang ang panganod magpabilin ibabaw sa tabernakulo, ang kampo magpabilin sa nahimutangan niini. Sa dihang ang panganod mobiya, ang kampo mobiya. “Sa sugo ni Jehova sila magkampo, ug sa sugo ni Jehova sila mobiya.” (Num 9:15-23) Kini nga mga sugo ni Jehova ipadangat ngadto sa kampo sa katibuk-an pinaagi sa duha ka sinalsal nga mga trompetang plata. (Num 10:2, 5, 6) Ang linaing palubadlubad nga mga tunog magtimaan sa paggikan sa kampo. Kini unang nahitabo “sa ikaduhang tuig [1512 W.K.P.], sa ikaduhang bulan, sa ikakawhaan nga adlaw.” Ang arka sa pakigsaad nag-una, dayon misunod ang unang tulo-ka-tribo nga dibisyon nga gipangunahan sa Juda ug gisundan sa Isacar ug dayon sa Zabulon. Gisundan sila sa mga Gersonhon ug sa mga Merarihanon nga nagpas-an sa giasayn kanila nga mga bahin sa tabernakulo. Dayon misunod ang tulo-ka-tribo nga dibisyon nga gipangunahan sa Ruben ug gisundan sa Simeon ug sa Gad. Sunod kanila ang mga Kohatnon uban sa sangtuwaryo, dayon ang ikatulong tulo-ka-tribo nga dibisyon, ang Epraim, nga gisundan sa Manases ug sa Benjamin. Sa kataposan, ingong bantay sa luyo mao ang dibisyon nga gipangunahan sa Dan ug inubanan sa Aser ug sa Neptali. Busa ang duha ka labing daghan ug gamhanan nga mga dibisyon mao ang gipapuwesto ingong bantay sa unahan ug sa luyo.—Num 10:11-28.
Giila Mo ba ang Ebidensiya sa Paggiya sa Diyos?
Sa unsang paagi nato ikapakita nga atong gipabilhan ang giya sa Diyos? Si apostol Pablo miingon: “Magmasinugtanon kamo sa mga nagapanguna kaninyo ug magmapinasakopon.” (Heb. 13:17) Dili kanunayng sayon ang pagbuhat niana. Sa pag-ilustrar: Ibutang ta nga ikaw Israelinhon sa panahon ni Moises. Human sa dugaydugay nga pagbaktas, ang panganod mipondo. Unsa ka dugay ang pagpondo? Usa ka adlaw? Usa ka semana? Daghang bulan? Maghunahuna ka tingali, ‘Habwaon ba nako ang tanan nakong gamit?’ Una, ipagawas ra tingali nimo ang kinahanglanong mga butang. Apan paglabay sa pipila ka adlaw, kay gikapoy na sa pagpangukay sa imong mga butang, imo nang habwaon ang tanan. Apan sa hapit ka nang mahuman niana, imong nakita nga mipataas ang haligi—ug kinahanglang manghipos ka na sab! Dili kana sayon. Bisan pa niana, ang mga Israelinhon kinahanglang “mobiya dayon.”—Num. 9:17-22.
Nan, unsay atong reaksiyon sa dihang makadawat kitag instruksiyon gikan sa Diyos? Maningkamot ba ta nga ipadapat “dayon” kana? O magpadayon sa pagbuhat sa atong naandan? Pamilyar ba ta sa bag-ong instruksiyon bahin sa pagdumalag pagtuon sa Bibliya, pagsangyaw sa mga tawong langyaw ug pinulongan, regular nga pagpakig-ambit sa pamilyahanong pagsimba, pagkooperar sa Hospital Liaison Committee, ug sa hustong panggawi panahon sa kombensiyon? Gipabilhan usab nato ang paggiya sa Diyos kon modawat kitag tambag. Sa paghimog importanteng mga desisyon, dili kita mosalig sa kaugalingong kaalam kondili modangop kita kang Jehova ug sa iyang organisasyon alang sa giya. Ug sama sa usa ka bata nga mangitag proteksiyon sa iyang ginikanan panahon sa bagyo, kita usab mangitag proteksiyon sa organisasyon ni Jehova sa dihang ang samag-bagyong mga problema mohapak kanato.
Espirituwal nga mga Bahandi
Katigoman, Panagkatigom
Ang Kahinungdanon sa Pagpakigtigom. Ang kahinungdanon sa bug-os nga pagpahimulos sa mga tagana ni Jehova sa pagtambong sa panagkatigom aron sa pagbaton ug espirituwal nga mga kaayohan gipasiugda maylabot sa tinuig nga pagsaulog sa Paskuwa. Si bisan kinsa nga lalaki nga hinlo ug wala sa panaw apan wala magpakabana sa pagsaulog sa Paskuwa pagapatyon. (Num 9:9-14) Sa dihang gipatawag ni Haring Ezequias ang mga molupyo sa Juda ug Israel sa pag-adto sa Jerusalem alang sa usa ka pagsaulog sa Paskuwa, sa bahin, ang iyang mensahe mao: “Kamong mga anak sa Israel, balik kang Jehova . . . ayaw patikiga ang inyong liog ingon sa gibuhat sa inyong mga katigulangan. Hatagig dapit si Jehova ug pangadto sa iyang sangtuwaryo nga iyang gibalaan hangtod sa panahong walay tino ug alagara si Jehova nga inyong Diyos, aron ang iyang nagasilaob nga kasuko motalikod gikan kaninyo. . . . Si Jehova nga inyong Diyos mapuangoron ug maluluy-on, ug dili niya ilingiw ang iyang nawong gikan kaninyo kon kamo mobalik kaniya.” (2Cr 30:6-9) Ang tinuyong dili pagtambong dayag nga nagpaila sa pagtalikod gikan sa Diyos. Ug, bisan tuod ang maong mga pista sama sa Paskuwa wala sauloga sa mga Kristohanon, si Pablo haom nga nag-awhag kanila nga dili biyaan ang regular nga mga panagkatigom sa katawhan sa Diyos, nga nag-ingon: “Magmahunahunaon kita sa usag usa aron sa pagdasig ngadto sa paghigugma ug sa maayong mga buhat, nga dili talikdan ang atong mga panagkatigom, sama sa nabatasan sa pipila, apan magdinasigay sa usag usa, ug ilabina gayod samtang makita ninyo nga ang adlaw nagkaduol na.”—Heb 10:24, 25; tan-awa ang KONGREGASYON.
Marso 15-21
BAHANDI GIKAN SA PULONG SA DIYOS | NUMEROS 11-12
“Nganong Angayng Likayan ang Pagkareklamador?”
Ayaw Pagkahimong Malimtanong mga Tigpaminaw
20 Ang kinabag-an sa mga Kristohanon wala gayod magpadaog sa seksuwal nga imoralidad. Apan, kinahanglang magbantay kita nga dili nato tugotan ang atong kaugalingon nga mosubay sa dalan nga motultol sa kanunayng pagbagulbol nga moresulta sa pagkawala sa pag-uyon sa Diyos. Gipahimangnoan kita ni Pablo: “Ni ibutang nato si Jehova sa pagsulay, ingon sa pipila [sa mga Israelinhon nga] nagbutang kaniya sa pagsulay, aron lamang mangalaglag pinaagi sa mga halas. Ni mahimong mga bagulbolan, ingon sa pipila kanilang nagbagulbol, aron lamang mangalaglag pinaagi sa tiglaglag.” (1 Corinto 10:9, 10) Ang mga Israelinhon nagbagulbol batok kang Moises ug Aaron—oo, batok gani sa Diyos mismo—nga nagreklamo bahin sa mana nga gitagana sa milagrosong paagi. (Numeros 16:41; 21:5) Menos ba ang kasuko si Jehova sa ilang pagbagulbol kay sa ilang pagpakighilawas? Ang asoy sa Bibliya nagpakita nga daghang bagulbolan ang gipamatay sa mga bitin. (Numeros 21:6) Sayosayo pa, kapin sa 14,700 ka rebelyosong mga bagulbolan ang gipanglaglag. (Numeros 16:49) Busa dili nato ibutang sa pagsulay ang pailob ni Jehova pinaagi sa dili pagtahod sa iyang mga tagana.
‘Likayi ang Pagbagulbol’
7 Pagkadako ang kausaban sa tinamdan sa Israel! Sa sinugdan, ilang gipahayag ang ilang pagkamapasalamaton tungod sa ilang pagkagawas gikan sa Ehipto ug pagkaluwas latas sa Pulang Dagat pinaagi sa pag-awit ug mga pagdayeg kang Jehova. (Exodo 15:1-21) Ugaling lang, sa dihang nakasinati silag mga kalisdanan sa kamingawan ug kay nahadlok sa mga Canaanhon, ang pagkamapasalamaton sa katawhan sa Diyos napulihan ug dili-matagbawon nga tinamdan. Imbes magpasalamat sa Diyos tungod sa ilang kagawasan, ilang gibasol siya tungod sa butang nga sa kasayop giisip nila ingong kawalad-on. Busa ang pagbagulbol maoy kapahayagan sa kakulang sa angay nga pagpabili sa mga tagana ni Jehova. Dili katingad-ang siya miingon: “Hangtod kanus-a nga kining daotang katigoman magbagulbol batok kanako?”—Numeros 14:27; 21:5.
Away
Pagbagulbol. Ang pagbagulbol makawala sa kadasig ug makapahugno. Ang mga Israelinhon, nga dili pa dugayng nakagawas sa Ehipto, nagbagulbol batok kang Jehova, nga nangitag sayop sa pagpanguna nga iyang gitagana pinaagi sa iyang mga alagad nga si Moises ug Aaron. (Ex 16:2, 7) Sa ulahi ang ilang mga pagbagulbol nakapaluya gayod kang Moises nga tungod niana siya mihangyo na lamang nga mamatay. (Num 11:13-15) Ang pagbagulbol mahimong usa ka makamatayng kapeligrohan sa usa nga bagulbolan. Giisip ni Jehova ang mga butang nga gisulti sa mga bagulbolan batok kang Moises ingong rebelyosong pagreklamo batok sa Iyang kaugalingong balaang pagpanguna. (Num 14:26-30) Daghan ang nangamatay ingong resulta sa pagpangitag sayop.
Espirituwal nga mga Bahandi
Mana
Kahubitan. Ang mana maoy “puti sama sa liso sa kulantro” ug ang “dagway” niini sama sa tagok sa bedelio, nga samag-talo ug sihag nga substansiya nga kaamgid ug porma sa perlas. Ang lami niini maoy sama sa “lagpad nga tinapay nga may dugos” o sa “tam-is nga tinapay nga may lana.” Human sa paggaling niini diha sa galingan nga demano o sa paglubok niini diha sa lusong, ang mana lung-agon o himoong mga tinapay ug lutoon.—Ex 16:23, 31; Num 11:7, 8.
Marso 22-28
BAHANDI GIKAN SA PULONG SA DIYOS | NUMEROS 13-14
“Ang Pagtuo Makahatag Natog Kaisog”
Maisogon Tungod sa Pagtuo ug Diyosnong Kahadlok
5 Apan duha sa mga espiya, si Josue ug Caleb, naghinamhinam sa pagsulod sa Yutang Saad. Ang mga Canaanhon “maoy tinapay alang kanato,” sila miingon. “Ang ilang salipdanan nagpahilayo na gikan sa ibabaw nila, ug si Jehova nagauban kanato. Ayaw sila kahadloki.” (Numeros 14:9) Aduna bay pasikaranan ang pagkamalaomon ni Josue ug Caleb? Aduna! Duyog sa tibuok nasod, ilang nakita nga gipakaulawan ni Jehova ang gamhanang Ehipto ug ang mga diyos niini pinaagi sa Napulo ka Hampak. Unya ilang nakita si Paraon ug ang iyang militaryong puwersa nga nangalumos diha sa Pulang Dagat pinaagi sa gahom ni Jehova. (Salmo 136:15) Klaro nga ang kahadlok nga gipakita sa napulo ka espiya ug niadtong naimpluwensiyahan nila dili makataronganon. “Hangtod kanus-a ba nga sila dili magbutang ug pagtuo kanako bisan pa sa tanang ilhanan nga akong gihimo sa ilang taliwala?” miingon si Jehova, sa pagpakita nga siya nasakitan pag-ayo.—Numeros 14:11.
6 Gisulti ni Jehova ang gamot sa problema—ang pagkatalawan sa mga tawo nagpaila sa ilang kakulang ug pagtuo. Oo, ang pagtuo ug kaisog dakog kalabotan, dako kaayo nga si apostol Juan nakasulat mahitungod sa Kristohanong kongregasyon ug sa espirituwal nga pagpakiggubat niini: “Kini ang pagdaog nga nakadaog sa kalibotan, ang atong pagtuo.” (1 Juan 5:4) Karon, tungod sa patuo nga sama nianang kang Josue ug Caleb, ang maayong balita sa Gingharian ginawali na sa tibuok kalibotan sa kapin sa unom ka milyong Saksi ni Jehova, bata ug tigulang, lagsik ug maluyahon. Walay kaaway nga nakapahilom niining gamhanan, maisogon nga pundok.—Roma 8:31.
Espirituwal nga mga Bahandi
it-1 740
Ang Yuta nga Gihatag sa Diyos Ngadto sa Israel
ANG yuta nga gihatag sa Diyos ngadto sa Israel maoy usa gayod ka maayong yuta. Sa dihang si Moises nagpadalag mga espiya nga nag-una sa nasod aron suhiron ang Yutang Saad ug aron makakuhag pipila gikan sa mga abot niini, sila mipauli nga nagdalag mga igos, mga granada, ug usa ka bugway sa ubas nga dako kaayo mao nga duha ka tawo ang nagpas-an niini pinaagig yayongan! Bisan tuod sa kahadlok sila miatras gumikan sa kakulang ug pagtuo, sila mitaho: Ang yuta “sa pagkatinuod nagaagay sa gatas ug dugos.”—Num 13:23, 27.
Marso 29–Abril 4
BAHANDI GIKAN SA PULONG SA DIYOS | NUMEROS 15-16
“Likayi ang Garbo ug Sobrang Pagsalig sa Kaugalingon”
Nailhan Ka ba ni Jehova?
12 Apan samtang nagpaingon sa Yutang Saad, si Kore naghunahuna nga may sayop sa kahikayan sa Diyos. Dayon may 250 ka ubang pangulo sa nasod nga midapig kaniya aron sa paghimog kausaban. Nagtuo sila nga giila ug giuyonan sila ni Jehova. Giingnan nila si Moises: “Igo na kanang inyo, sanglit ang tibuok katigoman balaan ang tanan ug si Jehova anaa sa ilang taliwala.” (Num. 16:1-3) Pagkasobra ka masaligon sa kaugalingon ug pagkamagarbohon! Sila giingnan ni Moises: “Ipahibalo ni Jehova kon kinsa ang iya.” (Basaha ang Numeros 16:5.) Pagkasunod adlaw, si Kore ug ang tanang midapig kaniya nangamatay.—Num. 16:31-35.
Nailhan Ka ba ni Jehova?
11 Si Moises ug Kore magkalahi gayod kon bahin sa pagtahod sa kahikayan ni Jehova ug sa iyang mga desisyon. Ang ilang reaksiyon nakaapektar sa kon unsay pag-isip ni Jehova kanila. Si Kore maoy Levihanon sa banay ni Kohat ug daghag pribilehiyo. Lagmit siya nakakita nga ang nasod giluwas latas sa Pulang Dagat. Siya misuportar sa hukom ni Jehova batok sa masukihong mga Israelinhon sa Bukid sa Sinai ug may katungdanan sa pagbalhin sa arka sa pakigsaad. (Ex. 32:26-29; Num. 3:30, 31) Gipaila niini nga siya maunongon kang Jehova sa daghang katuigan ug busa daghan ang nagtahod kaniya sa Israel.
Espirituwal nga mga Bahandi
Seguroa nga Unahon ang mga Butang nga Angayng Unahon!
Mas ugdang ang pag-isip ni Jehova sa maong kaso. “Ngadtongadto,” ang Bibliya nag-ingon, “si Jehova miingon kang Moises: ‘Ang maong tawo kinahanglang pagapatyon gayod.’” (Numeros 15:35) Nganong nasuko kaayo si Jehova sa gibuhat sa maong tawo?
Ang mga tawo may unom ka adlaw sa pagpangahoy maingon man sa pag-atiman sa ilang mga panginahanglan maylabot sa pagkaon, pamesti, ug puy-anan. Ang ikapitong adlaw kinahanglang ideboto sa ilang espirituwal nga mga panginahanglan. Bisan tuod dili sayop ang pagpangahoy, sayop ang paggamit sa panahon nga angay untang igahin sa pagsimba kang Jehova sa paghimo niana. Bisan tuod ang mga Kristohanon wala mailalom sa Moisesnong Balaod, dili ba kining maong hitabo nagtudlo kanato ug leksiyon sa hustong paghikay sa atong mga prioridad karong adlawa?—Filipos 1:10.
Abril 5-11
BAHANDI GIKAN SA PULONG SA DIYOS | NUMEROS 17-19
“Ako . . . ang Imong Panulondon”
Gihimo Mo ba si Jehova nga Imong Bahin?
9 Hunahunaa ang mga Levihanon nga walay napanunod nga yuta. Kay giuna nila ang putling pagsimba, kinahanglan silang mosalig kang Jehova alang sa ilang materyal nga panginahanglan, kinsa miingon: ‘Ako mao ang inyong bahin.’ (Num. 18:20) Bisag wala kita mag-alagad sa literal nga templo sama sa mga saserdote ug Levihanon, kita usab makasalig nga si Jehova motagana kanato. Samtang nagkaduol ang kataposan, mas hinungdanon nga mosalig kita sa gahom sa Diyos sa pagtagana kanato.—Pin. 13:17.
Si Jehova ang Akong Bahin
4 Unsay kahulogan sa maong asaynment alang sa mga Levihanon? Inay hatagag yutang panulondon, si Jehova naghatag kanilag bililhong pribilehiyo sa pag-alagad. Ang “pagkasaserdote kang Jehova” mao ang ilang panulondon, o bahin. (Jos. 18:7) Ang konteksto sa Numeros 18:20 nagpakita nga sila dili makulangan sa materyal. (Basaha ang Numeros 18:19, 21, 24.) Ang mga Levihanon hatagan sa “matag ikapulong bahin sa Israel ingon nga panulondon nga baylo sa ilang pag-alagad.” Sila makadawat ug diyes porsiyento sa abot sa Israel ug sa mga liwat sa kahayopan. Sa baylo, ang mga Levihanon moamot sa ikapulong bahin sa ilang madawat, ang “kinamaayohan gayod niana,” alang sa panginahanglan sa mga saserdote. (Num. 18:25-29) Ang mga saserdote hatagan usab sa “tanang balaan nga mga amot” nga gidala sa mga Israelinhon diha sa dapit sa pagsimba. Busa ang mga saserdote makasalig gayod nga si Jehova magtagana kanila.
Espirituwal nga mga Bahandi
Asin—Usa ka Mapuslanon Kaayong Produkto
Ang asin nahimo usab nga simbolo sa kalig-on ug pagkamalungtaron. Busa, diha sa Bibliya ang usa ka pakigsaad nga dili-mausab gitawag ug “usa ka pakigsaad sa asin,” diin ang mga hingtungdan sagad magdungan ug pangaon, nga may asin, sa paglig-on sa pakigsaad. (Numeros 18:19) Ilalom sa Moisesnong Balaod, kinahanglang dugangan ug asin ang mga halad nga itanyag diha sa halaran, nga sa walay duhaduha nagpasabot ug pagkadili-madunot o pagkadili-madugta.
Abril 12-18
BAHANDI GIKAN SA PULONG SA DIYOS | NUMEROS 20-21
“Padayong Ipakita ang Kalumo Bisag Gipresyur”
Magmaaghop Aron Malipay si Jehova
19 Makalikay ta sa paghimog sayop. Hunahunaa pag-usab si Moises. Sa daghang tuig, iyang gipakita ang kaaghop ug napalipay si Jehova. Dayon, sa hapit nang matapos ang 40 ka tuig nga lisod nga panaw sa kamingawan, napakyas si Moises sa pagpakitag kaaghop. Ang iyang igsoong babaye, nga lagmit nakaluwas sa iyang kinabuhi didto sa Ehipto, bag-o pang namatay ug gilubong sa Kades. Ug sa makausa pa, ang mga Israelinhon nag-ingon nga wala sila maatiman pag-ayo. Niining panahona, “nakiglalis [sila] kang Moises” kay walay tubig. Bisan pa sa tanang milagro nga gihimo ni Jehova pinaagi kang Moises ug sa taas nga rekord ni Moises sa mahigugmaong pagpanguna, ang mga tawo nagreklamo gihapon. Nagreklamo sila dili lang tungod sa kakulag tubig kondili bahin sab kang Moises, nga morag siyay hinungdan niana.—Num. 20:1-5, 9-11.
Magmaaghop Aron Malipay si Jehova
20 Tungod sa iyang kasuko, nawala ang kaaghop ni Moises. Imbes sultihan ang bato, sumala sa gisugo ni Jehova, gikasab-an ni Moises ang mga tawo ug giingnan nga maghimo siyag milagro. Dayon, gihapak niyag kaduha ang bato ug migawas ang tubig. Nahimo niya kadtong seryosong sayop tungod sa garbo ug kasuko. (Sal. 106:32, 33) Tungod sa temporaryong pagkawala sa iyang kaaghop, wala tugoti si Moises nga mosulod sa Yutang Saad.—Num. 20:12.
21 Niining hitaboa, makakat-on tag importanteng mga leksiyon. Una, kinahanglang kanunay natong ugmaron ug mentinahon ang kaaghop. Kon mohunong ta sa pagpakita niini bisag kadiyot lang, dali ra tang mahimong garboso ug kita makasulti ug makabuhat ug mga butang nga dili maayo. Ikaduha, ang stress makapaluya nato, busa angay tang maningkamot nga magmaaghop, bisag presyuron.
Ang Diyos Maghukom Sumala sa Kon Unsay Husto
Una, ang Diyos wala magsugo kang Moises nga makigsulti sa mga tawo, ug wala usab siya magsugo nga hukman sila. Ikaduha, wala pasidunggi ni Moises ug Aaron ang Diyos. ‘Kamo wala magbalaan kanako,’ ang Diyos miingon. (Bersikulo 12) Sa dihang si Moises ug Aaron miingon, “kami magpagula ug tubig,” ilang giangkon nga sila, dili ang Diyos, ang nagpatunghag tubig sa milagrosong paagi. Ikatulo, ang hukom sa Diyos kang Moises ug Aaron parehas sa iyang hukom sa mga rebelde kaniadto. Ang Diyos mihukom sa mga rebelde kaniadto nga sila dili makasulod sa Canaan, ug mao usab kanay Iyang hukom kang Moises ug Aaron. (Numeros 14:22, 23) Ikaupat, sila maoy mga lider sa Israel. Kadtong gitugyanan ug bug-at nga mga responsabilidad mas dakog tulubagon sa Diyos.—Lucas 12:48.
Espirituwal nga mga Bahandi
Ang Imo Bang Panglantaw sa Kahuyangan Sama sa Panglantaw ni Jehova?
12 Sa matag usa sa maong mga situwasyon, puwede untang silotan dayon ni Jehova si Aaron. Apan Iyang nakita nga si Aaron dili daotan. Mopatim-aw nga si Aaron napugos lang tungod sa mga sirkumstansiya o naimpluwensiyahan sa uban. Apan, dihang gisultihan siya sa iyang sayop, giangkon dayon niya kini ug gidawat ang hukom ni Jehova. (Ex. 32:26; Num. 12:11; 20:23-27) Ang gihatagag pagtagad ni Jehova mao ang pagtuo ug pagkamahinulsolon ni Aaron. Kasiglohan sa ulahi, si Aaron ug ang iyang mga kaliwat nahinumdoman gihapon ingong matinumanong mga alagad ni Jehova.—Sal. 115:10-12; 135:19, 20.
Abril 19-25
BAHANDI GIKAN SA PULONG SA DIYOS | NUMEROS 22-24
“Gihimo ni Jehova ang Tunglo Ingong Panalangin”
bt 53 ¶5
Pagpahayag sa “Maayong Balita Bahin Kang Jesus”
5 Karon, sama sa unang siglo, ang paglutos sa katawhan sa Diyos wala makapahunong sa ilang pagsangyaw. Subsob nga napugos ang mga Kristohanon pagbalhin sa lainlaing prisohan o nasod, apan kana nakatabang hinuon sa pagkasabwag sa mensahe sa Gingharian diha sa ilang bag-ong dapit. Pananglitan, niadtong Gubat sa Kalibotan II, ang mga Saksi ni Jehova nakahimo sa pagsangyaw didto sa mga kampo konsentrasyon sa Nazi. Usa ka Hudiyo nga nakahimamat ug mga Saksi didto miingon: “Ang kalig-on sa nabilanggong mga Saksi ni Jehova nakakombinsir kanako nga ang ilang pagtuo gipasukad sa Kasulatan—busa na-Saksi sab ko.”
Pagkabuang, Kapungot
Kabuangan sa Pagsupak Kang Jehova. Ang manalagna nga si Balaam sa kabuang buot managna batok sa Israel aron makadawat ug salapi gikan kang Haring Balak sa mga Moabihanon, apan gipugngan kini ni Jehova ug gipakyas ang iyang mga paningkamot. Si apostol Pedro misulat labot kang Balaam nga ang “usa ka amang nga mananap nga luwanan, nga namulong sa tingog sa usa ka tawo, ang nagbabag sa binuang nga dalan sa manalagna.” Maylabot sa kabuangan ni Balaam gigamit sa apostol ang Gregong pulong nga pa·ra·phro·niʹa, nga may ideya sa “pagkanawad-an ug maayong pangisip.”—2Pe 2:15, 16; Num 22:26-31.
Espirituwal nga mga Bahandi
Pangunang mga Punto Gikan sa Basahon sa Numeros
22:20-22—Nganong misilaob ang kasuko ni Jehova batok kang Balaam? Gisultihan ni Jehova si manalagnang Balaam nga dili niya angayng tunglohon ang mga Israelinhon. (Numeros 22:12) Apan, ang manalagna mikuyog sa mga sundalo ni Balak nga ang tuyo mao ang pagtunglo sa Israel. Gusto ni Balaam nga pahimut-an ang Moabihanon nga hari ug makadawat ug ganti gikan kaniya. (2 Pedro 2:15, 16; Judas 11) Bisan sa panahon nga napugos si Balaam sa pagpanalangin imbes sa pagtunglo sa Israel, buot niyang pahimut-an ang hari pinaagi sa pagsugyot nga ipatental sa mga babaye nga nagsimba kang Baal ang Israelinhong mga lalaki. (Numeros 31:15, 16) Busa, ang hinungdan sa kasuko sa Diyos batok kang Balaam mao ang kahakog sa manalagna.
Abril 26–Mayo 2
BAHANDI GIKAN SA PULONG SA DIYOS | NUMEROS 25-26
“Duna bay Epekto ang Mahimo sa Usa ka Tawo?”
“Kalagiw Gikan sa Seksuwal nga Imoralidad!”
ANG usa ka mangingisda miadto sa dapit diin didto makuha ang klase sa isda nga gusto niyang mabingwit. Namili siyag paon ug giitsa sa tubig ang pasol. Naghulat siya, ug dihang mikubit ang isda, iya kining gibitad.
2 Sa susama, puwede pong makubit ang mga tawo. Pananglitan, ang mga Israelinhon hapit nang makaabot sa Yutang Saad dihang nagkampo sila sa Kapatagan sa Moab. Ang hari sa Moab misaad nga hatagan si Balaam ug daghang kuwarta kon tunglohon niya ang Israel. Sa ulahi, nakakitag paagi si Balaam aron mahimong tinunglo ang mga Israelinhon. Gipili niyag maayo ang paon. Iyang gipaadtoan ug batan-on nga mga babayeng Moabihanon ang mga Israelinhon aron tentalon ang mga lalaki.—Numeros 22:1-7; 31:15, 16; Pinadayag 2:14.
“Kalagiw Gikan sa Seksuwal nga Imoralidad!”
4 Nganong daghan kaayong Israelinhon ang nabitik sa plano ni Balaam? Kaugalingong kalipay lang ang ilang gihunahuna, ug nakalimot sila sa tanang gihimo ni Jehova para nila. Daghan unta silag rason nga magmaunongon sa Diyos. Iyang gipahigawas sila gikan sa pagkaulipon sa Ehipto, gipakaon didto sa kamingawan, ug gipanalipdan sila hangtod sa utlanan sa Yutang Saad. (Hebreohanon 3:12) Bisan pa niana, natental sila sa seksuwal nga imoralidad. Si apostol Pablo misulat: “[Dili ta] maghimog seksuwal nga imoralidad, sama sa gihimo sa pipila kanila, mao nga [sila] nangapukan.”—1 Corinto 10:8.
Espirituwal nga mga Bahandi
Utlanan
Busa mopatim-aw nga ang pag-apod-apod sa yuta taliwala sa mga tribo gipasukad sa duha ka butang: ang resulta sa pagripa, ug ang gidak-on sa tribo. Ang ripa tingali nagtino lamang sa gibanabanang lokasyon nga maangkon sa matag tribo, sa ingon nagtudlo ug panulondon diha sa usa ka seksiyon o sa laing seksiyon sa maong yuta, sama pananglitan sa dapit sa A o H, S o K, ubay sa kapatagan daplin sa baybayon, o sa bukirong rehiyon. Ang desisyon sa pagripa naggikan kang Jehova ug busa kini magpanalipod batok sa pangabugho o panag-away taliwala sa mga tribo. (Pr 16:33) Pinaagi niini magiyahan usab sa Diyos ang mga butang aron ang situwasyon sa matag tribo mahiuyon sa inspiradong tagna ni Jacob sa hapit na siyang mamatay nga natala diha sa Genesis 49:1-33.
Human matino ang geograpikanhong dapit sa matag tribo pinaagi sa pagripa, kinahanglang tinoon usab ang gidak-on sa teritoryo niini pinasukad sa ikaduhang butang: ang gidak-on segun sa gidaghanon niini. “Inyong bahinbahinon ang yuta alang kaninyo nga panag-iyahon pinaagig ripa sumala sa inyong mga banay. Ngadto sa daghag-molupyo dugangan ninyo ang iyang panulondon, ug ngadto sa diyutay kunhoran ninyo ang iyang panulondon. Kon asa matunong ang ripa alang kaniya, kana maiyaha.” (Num 33:54) Dili na mahimong bag-ohon ang resulta sa pagripa bahin sa pangunang geograpikanhong dapit, apan mahimong dugangan o kunhoran ang gidak-on sa panulondon. Busa, sa dihang ang teritoryo sa Juda nakaplagang dako ra kaayo, ang gidak-on sa yuta niini gikunhoran pinaagi sa pagpahat sa pipila ka bahin niini ngadto sa tribo ni Simeon.—Jos 19:9.