KON UNSAON PAGDAOG ANG PAGDUMOT

1 | Ayaw Pagpihigpihig

Gitudlo sa Bibliya:

“Ang Diyos dili mapihigon, apan sa matag nasod [ang tanan] nga may kahadlok kaniya ug mobuhat kon unsay matarong dalawaton kaniya.”—BUHAT 10:34, 35.

Kahulogan:

Si Jehovaa nga Diyos dili maghukom nato base sa atong nasod, rasa, kolor sa panit, o kultura. Nagpokus siya sa kon unsa gyoy importante—kon unsay naa sa atong hunahuna ug kasingkasing. Sa pagkatinuod, ang Bibliya nag-ingon nga “ang tawo nagatan-aw kon unsay makita sa mga mata, apan si Jehova nagatan-aw sa kasingkasing.”—1 Samuel 16:7.

Ang Imong Mahimo:

Bisag dili ta makabasag kasingkasing, masundog nato ang Diyos nga dili magpihigpihig sa uban. Lantawa ang mga tawo ingong indibiduwal, dili ingong grupo. Kon nakamatikod ka nga negatibo kag pagbati sa uban—tungod tingali kay lahi silag rasa o nasyonalidad—pag-ampo sa Diyos nga tabangan ka niya nga wad-on ang maong pagbati. (Salmo 139:23, 24) Kon sinsero kang mohangyo kang Jehova nga tabangan ka nga dili magpihigpihig, makaseguro ka nga maminaw siya sa imong pag-ampo ug iya kang tabangan.—1 Pedro 3:12.

a Jehova ang personal nga ngalan sa Diyos.—Salmo 83:18.

“Wala pa ko makasulay nga ako malinawong nakig-uban sa usa ka puting tawo . . . Karon ako bahin na sa usa ka internasyonal nga organisasyon nga nagpakitag tinuod nga panag-igsoonay.”—TITUS

Tinuod nga Eksperyensiya—TITUS

Nadaog Niya ang Pagdumot

Si Titus membro sa bayolenteng gang nga nasuko pag-ayo sa mga balaod nga nagbahin sa itom ug puti nga mga tawo. Siya miingon: “Moadto mi sa mga hotel, bar, ug uban pang mga dapit diha sa lungsod diin gipihig ang itom nga mga tawo aron mangitag away.” Miangkon si Titus nga grabe kaayo ang iyang pagdumot, ug siya miingon: “Kon duna koy makalalis, lalaki man o babaye, ako dayong sumbagon.”

Nagsugod pagbag-o si Titus dihang nag-Bible study siya uban sa mga Saksi ni Jehova. Dihang nagbasa siyag Bibliya, dako kaayo nig epekto niya. Natandog kaayo siya sa saad nga sa umaabot, “ang kamatayon mawala na, ug wala na unyay pagbangotan, pagtiyabaw, ug kasakit.”—Pinadayag 21:3, 4.

Sa primero, naglisod si Titus sa pagwala sa iyang pagdumot sa uban. “Lisod kaayong bag-ohon ang akong paagi sa pagkinabuhi,” siya miingon. Pero nakatabang niya ang Buhat 10:34, 35, nga naghisgot nga ang Diyos dili mapihigon.

Unsay resulta? Si Titus miingon: “Ako nakombinsir nga ang mga Saksi ni Jehova mao gayod ang matuod nga relihiyon kay akong nakita nga sila nagpakitag gugma sa usag usa, bisan pag lainlain ang ilang rasa o kolor. Sa wala pa ko mabawtismohi ingong Saksi, dihay usa ka puti nga membro sa kongregasyon nga nagdapit kanako sa pagpangaon didto sa ilang balay. Daw dili ko makatuo niana. Wala pa ko makasulay nga ako malinawong nakig-uban sa usa ka puting tawo, ilabina sa pagpangaon kauban niya sa ilang balay. Karon ako bahin na sa usa ka internasyonal nga organisasyon nga nagpakitag tinuod nga panag-igsoonay.”