KON UNSAON PAGDAOG ANG PAGDUMOT
2 | Ayawg Panimalos
Gitudlo sa Bibliya:
“Ayawg balos ug daotan. . . . Kon posible, kutob sa mahimo, pakigdait mo sa tanang tawo. Ayaw mog panimalos, . . . kay nahisulat: ‘“Akoa ang panimalos; baslan nako sila,” nag-ingon si Jehova.’”—ROMA 12:17-19.
Kahulogan:
Normal lang nga masuko kon himoan tag dili maayo. Pero dili gusto sa Diyos nga manimalos ta. Gidasig ta niya nga maghulat kaniya kay hapit na niyang tul-iron ang tanang inhustisya.—Salmo 37:7, 10.
Ang Imong Mahimo:
Dihang manimalos ang dili hingpit nga mga tawo, mosamot ang pagdumtanay. Mao nga kon naay nakapasuko o nakapasakit nimo, ayawg balos. Kalma lang dihang makig-estorya ug pugngi ang imong kaugalingon. Sa ubang kahimtang, mas maayong palabyon na lang nimo ang nahitabo. (Proverbio 19:11) Siyempre, naay mga kahimtang nga kinahanglan tingali nimong ireport ang nahitabo. Pananglitan, kon biktima ka sa usa ka krimen, modesisyon tingali ka nga ireport kini sa mga polis o sa ubang awtoridad.
Makadaot sa kaugalingon ang pagpanimalos
Komosta kon morag dili masulbad ang problema sa malinawong paagi? O kaha gihimo na nimo ang tanan sa pagsulbad niini sa malinawong paagi? Ayawg panimalos aron dili mograbe ang situwasyon. Wad-a gyod ang pagdumot. Makasalig ka sa paagi sa Diyos sa pagsulbad sa problema. “Salig kaniya, ug siya molihok alang kanimo.”—Salmo 37:3-5.