KON UNSAON PAGDAOG ANG PAGDUMOT

3 | Wad-a Ang Pagdumot Sa Imong Hunahuna

Gitudlo sa Bibliya:

“Pag-usab mo pinaagi sa pagbag-o sa inyong hunahuna, aron mapamatud-an ninyo sa inyong kaugalingon ang maayo ug dalawaton ug hingpit nga kabubut-on sa Diyos.”—ROMA 12:2.

Kahulogan:

Ang atong mga gihunahuna importante sa Diyos. (Jeremias 17:10) Tinuod, kinahanglan natong likayan ang pagsulti o pagbuhat ug bisan unsa nga may pagdumot. Pero dili pa na igo. Ang pagdumot magsugod sa hunahuna ug kasingkasing. Busa, kinahanglan natong wad-on ang bisan gamay nga pagdumot sa atong hunahuna ug pagbati. Nianang paagiha lang nga tinuod tang ‘mabag-o’ ug mahunong ang pagdumot.

Ang Imong Mahimo:

Hunahunaag maayo kon unsay imong panglantaw ug pagbati sa uban—ilabina niadtong lahig rasa o nasyonalidad. Pangutan-a ang kaugalingon: ‘Unsay akong panglantaw nila? Personal ba gyod nako silang nailhan? O ang akong panglantaw naimpluwensiyahan sa pagkamapihigon?’ Likayi ang social media, mga salida, o kalingawan nga nagpasiugdag pagdumot ug kapintasan.

Ang Pulong sa Diyos makatabang nato sa pagwala sa pagdumot sa atong kasingkasing ug hunahuna

Dili sayon ang pagsusi sa atong hunahuna ug pagbati sa matinud-anong paagi. Pero ang Pulong sa Diyos makatabang nato sa ‘pagtugkad sa mga hunahuna ug mga intensiyon sa kasingkasing.’ (Hebreohanon 4:12) Busa padayong tun-i ang Bibliya. Tan-awa kon ang imong panghunahuna nahiuyon ba sa gitudlo niini. Ug paningkamoti nga ang imong panghunahuna kanunayng magiyahan sa gitudlo sa Bibliya. Ang Pulong sa Diyos makatabang nato sa pagtangtang sa pagdumot nga lig-ong nakagamot sa atong hunahuna ug kasingkasing.—2 Corinto 10:4, 5.

Tinuod nga Eksperyensiya—STEPHEN

Nagbag-o sa Iyang Panghunahuna

Si Stephen ug ang iyang pamilya nakaeksperyensiyag pagdumot gikan sa puti nga mga tawo. Ingong resulta, naimpluwensiyahan siya sa politikal nga grupo nga nakig-away alang sa katungod sa mga tawo. Sa ngadtongadto, nalangkit siya sa mga krimen nga gihimo tungod sa pagdumot. Si Stephen miingon: “Kas-a nanan-aw mi sa akong mga higala ug salida bahin sa mga taga-Africa nga giulipon sa United States. Kay nasuko kaayo sa maong mga inhustisya, giatake namo ang mga batan-ong puti didto mismo sa sinehan. Dayon nangadto mig pinuy-anan sa mga puti aron mangita pag dugang kulatahon.”

Nabag-o ang panglantaw ni Stephen dihang nag-Bible study siya uban sa mga Saksi ni Jehova. Siya nahinumdom: “Kay naimpluwensiyahan sa diskriminasyon sa rasa sukad sa bata pa, nakurat ko sa mga Saksi. Pananglitan, dihang mibiyahe sa laing nasod ang usa ka Saksi nga puti, iyang gibilin ang iyang mga anak sa usa ka pamilyang itom. Gipapuyo pod sa usa ka pamilyang puti ang usa ka batan-ong itom sa ilang balay kay kini way kasak-an.” Nakombinsir si Stephen nga ang mga Saksi ni Jehova ang nagpakita sa gugma nga gitagna ni Jesus nga ipakita sa tinuod nga mga Kristohanon.—Juan 13:35.

Unsay nakatabang kang Stephen sa paghunong sa iyang pagkabayolente ug pagdumot sa uban? Ang Roma 12:2 nakatabang niya. Siya miingon: “Nakita nako nga kinahanglang magbag-o ko sa akong panghunahuna. Dili lang kay molihok kong makigdaiton kondili kinahanglang isipon pod kini ingong mao ang labing maayong paagi sa pagkinabuhi.” Si Stephen wala na magdumot ug nagmalipayon siya sa kapig 40 na ka tuig.