KON UNSAON PAGDAOG ANG PAGDUMOT

4 | Daoga Ang Pagdumot Sa Tabang Sa Diyos

Gitudlo sa Bibliya:

“Ang bunga sa espiritu mao ang gugma, kalipay, kalinaw, taas nga pailob, pagkabuotan, pagkamaayo, pagtuo, kalumo, ug pagpugong sa kaugalingon.”—GALACIA 5:22, 23.

Kahulogan:

Madaog lang nato ang pagdumot sa tabang sa Diyos. Ang iyang balaang espiritu makatabang nato sa pag-ugmad sa mga hiyas nga dili nato kayang maugmad sa kaugalingon natong paningkamot. Busa, imbes mosalig lang sa kaugalingon sa pagwala sa pagdumot, mas maayong mosalig ta sa tabang sa Diyos. Kon ato nang himoon, bation sab nato ang gibati ni apostol Pablo nga misulat: “Naa koy kusog sa pag-atubang sa tanang butang tungod kaniya nga naghatag nakog gahom.” (Filipos 4:13) Ug makaingon gyod ta: ‘Ang akong tabang naggikan kang Jehova.’—Salmo 121:2.

Ang Imong Mahimo:

“Gibag-o ko ni Jehova gikan sa [pagkabayolente] ngadto sa pagkamakigdaiton.”—WALDO

Pag-ampo kang Jehova ug sinserong pangayoa ang iyang balaang espiritu. (Lucas 11:13) Hangyoa siya nga tabangan ka sa pagpakitag diyosnong mga hiyas. Tun-i ang giingon sa Bibliya bahin sa mga hiyas nga makawala sa pagdumot, sama sa gugma, kalinaw, pailob, ug pagpugong sa kaugalingon. Pangitag mga paagi nga maugmad ang maong mga hiyas. Ug pakig-uban niadtong mga naningkamot sa pagpakita niana nga mga hiyas. Sila makadasig nimo “sa pagpakitag gugma ug sa paghimog maayong mga buhat.”—Hebreohanon 10:24.

Tinuod nga Eksperyensiya—WALDO

Nahunong Niya ang Pagkabayolente

Tungod sa dili maayong eksperyensiya ni Waldo samtang nagdako, napuno siyag pagdumot. Siya miingon: “Kanunay nakong maengkuwentro ang mga tigbaligyag droga . . . Dihay higayon nga ang among kaaway nga gang migamit ug hired killer sa pagpatay nako, apan igo lang kong nadunggaban.”

Dihang nag-Bible study ang iyang asawa uban sa mga Saksi ni Jehova, wala malipay si Waldo. Siya miingon: “Maglagot ko sa mga Saksi, ug daghang higayon nga balikason nako sila. Apan kalmado ra gihapon sila.”

Sa ulahi, nagpa-Bible study pod si Waldo. Siya miingon: “Nalisdan ko pagpadapat sa akong nakat-onan. Para nako, dili gyod nako makontrolar ang akong [pagkabayolente].” Pero naa siyay nakat-onan sa Bibliya nga nakatabang gyod niya.

Si Waldo miingon: “Usa ka adlaw niana, gipabasa ko ni Alejandro, ang nagtuon nako sa Bibliya, sa Galacia 5:22, 23. . . . Gipatin-aw ni Alejandro nga dili nako maugmad ang maong mga hiyas sa kaugalingon nakong kusog kondili pinaagi sa balaang espiritu sa Diyos. Ang maong kamatuoran bug-os nga nakapausab sa akong panglantaw.”

Pinaagi sa pagsalig sa tabang sa Diyos, nadaog ni Waldo ang pagdumot. Siya miingon: “Ang akong mga paryente ug kanhing mga higala dili makatuo sa akong kausaban.” Siya midugang: “Gibag-o ko ni Jehova gikan sa [pagkabayolente] ngadto sa pagkamakigdaiton.”