Padayon sa Paglakaw Pinaagi sa Pagtuo

1. Nganong nakaingon si apostol Pablo nga natagbaw gyod siya sa iyang kinabuhi?

SA USA ka higayon, nahibalo si apostol Pablo nga hapit na siyang patyon. Pero imbes maguol, malipayon hinuon siya. Sa dihang gipamalandong niya ang iyang mga naeksperyensiyahan, mibati siyang tagbaw sa iyang kinabuhi. Gani nakaingon siya: “Natapos na nako ang lumba, nasunod na nako ang pagtuo.” (2 Tim. 4:6-8) Si Pablo mihimog maalamong desisyon nga gamiton ang iyang kinabuhi sa pag-alagad kang Jehova, ug segurado siya nga nalipay si Jehova niya. Gusto pod natong mohimo ug maayong mga desisyon aron mapalipay nato si Jehova. Unsaon nato na paghimo?

2. Unsay gipasabot sa paglakaw pinaagi sa pagtuo?

² Si Pablo miingon bahin kaniya ug sa ubang matinumanong Kristohanon: “Kita nagalakaw pinaagi sa pagtuo, dili pinaagi sa makita.” (2 Cor. 5:7) Unsay gipasabot ni Pablo? Sa Bibliya, ang paglakaw magtumong usahay sa paagi sa pagkinabuhi sa usa ka tawo. Ang tawo nga nagalakaw “pinaagi sa makita” nagahimog mga desisyon base lang sa iyang makita, madungog, ug gibati. Sa laing bahin, ang tawo nga nagalakaw “pinaagi sa pagtuo” nagahimog mga desisyon base sa iyang pagtuo kang Jehova nga Diyos. Makita diha sa iyang mga desisyon nga kombinsido siya nga gantihan siya sa Diyos, ug nga makabenepisyo siya kon iyang sundon ang tambag ni Jehova diha sa Bibliya.—Sal. 119:66; Heb. 11:6.

3. Unsay mga kaayohan sa paglakaw pinaagi sa pagtuo? (2 Corinto 4:18)

³ Siyempre, naay mga butang nga puwedeng desisyonan base sa atong makita, madungog, ug gibati. Pero hinumdomi nga dili ni kanunayng sakto. Maong kon kana ray atong basehan sa dihang mohimog importanteng mga desisyon, posibleng magkaproblema ta. Basin makahimo hinuon tag mga desisyon nga supak sa kabubut-on o tambag sa Diyos. (Eccl. 11:9; Mat. 24:37-39) Pero kon molakaw ta pinaagi sa pagtuo, mas makahimo tag mga desisyon nga “dalawaton sa Ginoo.” (Efe. 5:10) Ang pagsunod sa tambag sa Diyos makahatag natog kalinaw sa hunahuna ug tinuod nga kalipay. (Sal. 16:8, 9; Isa. 48:17, 18) Ug kon padayon tang molakaw pinaagi sa pagtuo, makabaton tag kinabuhing walay kataposan.—Basaha ang 2 Corinto 4:18.

4. Unsaon pagkahibalo sa usa kon nagalakaw ba siya pinaagi sa pagtuo o pinaagi sa iyang makita?

⁴ Unsaon nato pagkahibalo kon nagalakaw ba ta pinaagi sa pagtuo o pinaagi sa atong makita? Kinahanglan natong pangutan-on ang atong kaugalingon: ‘Unsa may akong basehanan sa dihang mohimo kog mga desisyon? Nagbase ra ba ko sa mga butang nga akong makita? O nagpagiya ba ko sa tambag ni Jehova ug nagsalig niya?’ Atong konsiderahon ang tulo ka importanteng bahin sa atong kinabuhi: sa dihang magpilig trabaho, magpilig minyoan, ug sa dihang makadawat ug direksiyon gikan sa organisasyon. Niining tulo ka bahin, atong hisgotan kon unsay angay natong konsiderahon aron makahimo tag maayong mga desisyon ug makapadayon sa paglakaw pinaagi sa pagtuo.

SA DIHANG MAGPILIG TRABAHO

5. Unsay angay natong konsiderahon sa dihang mamilig trabaho?

⁵ Siyempre, gusto natong matagan-an ang atong panginahanglan ug ang panginahanglan sa atong pamilya. (Eccl. 7:12; 1 Tim. 5:8) Ang ubang trabaho dakog suweldo, nga makasapar sa adlaw-adlaw nga panginahanglan sa trabahante, ug gawas pa ana, makatigom pa siyag kuwarta. Pero ang ubang trabaho gamay rag suweldo, nga igoigo ra gyod sa panginahanglan sa pamilya. Sa dili pa dawaton ang trabaho, siyempre hunahunaon sa usa kon pilay iyang madawat nga suweldo. Natural lang na. Pero kon kana ray iyang basehan sa pagdesisyon, posibleng nagpakita na nga nagalakaw siya pinaagi sa iyang makita.

6. Sa dihang mopilig trabaho, sa unsang paagi mapakita nato nga naglakaw ta pinaagi sa pagtuo? (Hebreohanon 13:5)

⁶ Sa dihang mopilig trabaho, mapakita nato nga naglakaw ta pinaagi sa pagtuo kon konsiderahon nato kon unsa poy epekto niini sa atong relasyon kang Jehova. Puwede natong pangutan-on ang atong kaugalingon: ‘Kon dawaton nako ni nga trabaho, mapugos ba ko sa paghimog mga butang nga gidumtan ni Jehova?’ (Prov. 6:16-19) ‘Makabalda ba ni sa akong pag-alagad ug makapalayo nako sa akong pamilya sa taastaas nga panahon?’ (Filip. 1:10) Kon oo, dili gyod maayo nga dawaton ang maong trabaho, bisan pag lisod mangitag trabaho. Kon naglakaw ta pinaagi sa pagtuo, mohimo tag mga desisyon nga nagpakita sa atong dakong pagsalig nga atimanon ni Jehova ang atong panginahanglan.—Mat. 6:33; basaha ang Hebreohanon 13:5.

7-8. Giunsa pagpakita sa usa ka brader sa South America nga naglakaw siya pinaagi sa pagtuo? (Tan-awa sab ang hulagway.)

⁷ Matikdi ang eksperyensiya ni Javier,a usa ka brader nga taga-South America. Iyang nakita kon unsa ka importante ang paglakaw pinaagi sa pagtuo. Siya miingon: “Ganahan kaayo ko sa akong giaplayan nga posisyon, ug doble pa gyod ang suweldo kon ikompara sa akong trabaho niadtong panahona.” Pero gusto kaayo ni Javier nga magpayunir. Siya miingon: “Gieskedyul ko nga interbiyohon sa among national manager. Sa wala pa ang interbiyo, nag-ampo ko para sa tabang ni Jehova, kay kombinsido ko nga nahibalo siya kon unsay pinakamaayo para nako. Gusto kog trabaho nga taas ug posisyon ug dakog suweldo, pero dili nako ni dawaton kon makababag ni sa akong espirituwal nga mga tumong.”

⁸ Si Javier miingon: “Dihang giinterbiyo ko, giingnan ko sa manager nga kinahanglan kong mag-overtime pirme. Ako siyang giingnan nga dili nako ni mahimo tungod sa akong espirituwal nga mga kalihokan.” Oo, wala dawata ni Javier ang gitanyag kaniya nga posisyon. Paglabay sa duha ka semana, misugod siya sa pagpayunir. Human sa pipila ka bulan, nakakita siyag part-time nga trabaho. Siya miingon: “Gidungog ni Jehova ang akong pag-ampo nga hatagan kog trabaho nga haom sa akong eskedyul sa pagpayunir. Lipay kaayo ko kay naa koy trabaho nga naghatag nakog dugang panahon sa pag-alagad kang Jehova ug sa mga igsoon.”

9. Unsay imong nakat-onan sa eksperyensiya ni Trésor?

⁹ Komosta kon makita nato nga ang atong trabaho karon dili maayog epekto sa atong espirituwalidad? Matikdi ang eksperyensiya ni Trésor, nga taga-Congo. Siya miingon: “Dugay na gyod kong nangandoy aning akong bag-ong trabaho. Dako kaayo kog suweldo; katulohon ni sa akong suweldo sa miagi. Tinahod pa gyod ko sa mga tawo.” Pero panagsa na lang makatambong sa tigom si Trésor kay nagsigeg overtime. Ginapresyur pod siya nga tabonan ang dili maayong ginahimo sa kompaniya. Gusto na siyang moresayn, pero nahadlok siya nga basig wala na siyay makitang trabaho. Unsay nakatabang kang Trésor? Siya miingon: “Ang Habacuc 3:17-19 nagpasalig nako nga bisag mawad-an kog trabaho, atimanon ko ni Jehova. Maong miresayn ko.” Siya miingon: “Daghang boss o employer ang naghunahuna nga isakripisyo sa usa ang bisan unsa, apil ang panahon sa pamilya ug sa espirituwal nga mga kalihokan, para sa trabaho nga dakog suweldo. Nalipay ko kay naprotektahan nako ang akong relasyon kang Jehova. Paglabayg usa ka tuig, gitabangan ko ni Jehova nga makakitag trabaho nga makasapar sa akong panginahanglan ug makahatag nakog dugang panahon sa espirituwal nga kalihokan. Kon unahon nato si Jehova, posibleng sa primero magkalisod ta sa pinansiyal. Pero atimanon gyod ta ni Jehova.” Oo, kon mosalig ta sa tambag ug sa mga saad ni Jehova, makapadayon ta sa paglakaw pinaagi sa pagtuo ug panalanginan ta niya.

SA DIHANG MAGPILIG MINYOAN

10. Sa dihang magpilig minyoan, unsay nagpakita nga ang usa naglakaw pinaagi sa iyang makita?

¹⁰ Ang kaminyoon regalo gikan kang Jehova, ug normal lang nga gusto tang magminyo. Sa dili pa modesisyon nga makigminyo, konsiderahon tingali sa sister ang kinaiya, hitsura, reputasyon, mga responsibilidad sa pamilya, ug kahimtang sa pinansiyal sa usa ka brader. Tingali obserbahan pod niya kon unsay pagtratar sa brader kaniya.b Importante nga hunahunaon niya kining mga butanga. Pero kon kini ray iyang konsiderahon, basin naglakaw na siya pinaagi sa iyang makita.

11. Unsaon nato pagpakita nga naglakaw ta pinaagi sa pagtuo dihang magpilig minyoan? (1 Corinto 7:39)

¹¹ Seguradong nalipay gyod si Jehova sa iyang mga alagad nga nagsunod sa iyang tambag kon bahin sa pagpilig minyoan. Pananglitan, gisunod nila ang tambag nga maghulat nga molapas na sila sa “pagbuswak sa pagkabatan-on” ayha sila makigtrato. (1 Cor. 7:36) Konsiderahon nila ang potensiyal nga kapikas base sa mga hiyas nga giingon ni Jehova bahin sa maayong bana o asawa. (Prov. 31:10-13, 26-28; Efe. 5:33; 1 Tim. 5:8) Kon naay dili Saksi nga magpakitag interes nila, mosalig sila sa tambag nga magminyo “diha lang sa Ginoo,” sumala sa 1 Corinto 7:39. (Basaha.) Sila padayong naglakaw pinaagi sa pagtuo, kay naa silay pagsalig nga walay lain nga mas makaatiman sa ilang emosyonal nga panginahanglan gawas kang Jehova.—Sal. 55:22.

12. Unsay imong makat-onan sa kasinatian ni Rosa?

¹² Konsideraha ang kasinatian ni Rosa, usa ka payunir sa Colombia. Nagtudlo siya online, ug naa siyay estudyante nga dili Saksi nga nakagusto niya. Ug nakagusto pod si Rosa niya. Si Rosa miingon: “Morag maayo man siya nga tawo. Nagatabang siya sa mga tawo sa ilang lugar, ug wala pod siyay bisyo. Buotan kaayo siya nako. Naa niya ang tanan nga akong gipangita sa usa ka bana; ang nakaapan lang kay dili siya Saksi.” Siya nagpadayon: “Lisod kaayo siyang balibaran kay nakagusto pod ko niya. Niadtong panahona, gusto na gyod kong magminyo, pero wala koy naangayan nga brader.” Pero wala nagpokus si Rosa sa iya lang nakita. Iyang gipamalandong kon sa unsang paagi ang iyang desisyon makaapektar sa iyang relasyon kang Jehova. Mao nga giundang niya ang iyang komunikasyon sa lalaki ug nagpokus sa iyang pag-alagad kang Jehova. Wala madugay, nakadawat siyag imbitasyon nga moeskuwela sa School for Kingdom Evangelizers, ug karon nag-alagad siya ingong espesyal payunir. Si Rosa miingon: “Gitabangan gyod ko ni Jehova nga magmalipayon.” Usahay dili sayon ang pagsunod sa mga sugo ni Jehova, ilabina kon lahi ang gusto sa atong kasingkasing. Pero kon padayon tang molakaw pinaagi sa pagtuo, makabenepisyo gyod ta.

SA DIHANG MAKADAWAT UG DIREKSIYON GIKAN SA ORGANISASYON

13. Sa dihang makadawat tag direksiyon gikan sa organisasyon, unsay nagpakita nga naglakaw ta pinaagi sa atong makita?

¹³ Sagad makadawat tag direksiyon gikan sa organisasyon—gikan sa mga ansiyano, tigdumala sa sirkito, sangang buhatan, o Nagamandong Lawas—nga mogiya nato sa atong pag-alagad kang Jehova. Pero komosta kon naay mga direksiyon nga wala nato masabti ang rason? Basin maghunahuna ta nga dili ni praktikal. Basin gani magpokus na lang ta sa pagkadili-hingpit sa mga brader nga naghatag sa direksiyon.

14. Unsay makatabang nato nga molakaw pinaagi sa pagtuo sa dihang makadawat tag direksiyon gikan sa organisasyon? (Hebreohanon 13:17)

¹⁴ Kon naglakaw ta pinaagi sa pagtuo, naa tay pagsalig nga si Jehova ang naggiya sa iyang organisasyon ug nahibalo siya sa atong kahimtang. Tungod ana, andam dayon tang mosunod sa mga direksiyon nga atong madawat. (Basaha ang Hebreohanon 13:17.) Nahibalo ta nga ang atong pagkamasinugtanon makaamot sa panaghiusa sa kongregasyon. (Efe. 4:2, 3) Bisag dili hingpit ang mga brader nga nanguna, masaligon ta nga panalanginan ni Jehova ang atong pagkamasinugtanon. (1 Sam. 15:22) Sa iyang hustong panahon, tul-iron niya ang mga butang nga kinahanglang tul-iron.—Miq. 7:7.

15-16. Unsay nakatabang sa usa ka brader nga molakaw pinaagi sa pagtuo bisag naa siyay mga pagduhaduha bahin sa gihatag nga direksiyon? (Tan-awa sab ang hulagway.)

¹⁵ Tagda ang usa ka eksperyensiya nga nagpakita sa kaayohan sa paglakaw pinaagi sa pagtuo. Sa Peru, bisag ang kadaghanan nagsultig Spanish, daghan gihapon ang nagsultig lumad nga mga pinulongan. Usa niini ang Quechua. Sa daghang tuig, ang mga igsoon nga nagsultig Quechua mangitag mga tawo nga nagsulti niini nga pinulongan sa ilang teritoryo. Pero aron masunod ang balaod sa gobyerno didto, naay gihimong kausaban aron maabot ug masangyawan ang mga tawo. (Roma 13:1) Ang ubang igsoon naghunahuna kon praktikal ba ang maong kausaban. Pero dihang gisunod nila ang direksiyon, ilang nakita nga gipanalanginan ni Jehova ang ilang paningkamot nga makakitag daghang tawo nga nagsultig Quechua.

¹⁶ Usa sa mga igsoon nga nagduhaduha sa maong direksiyon mao si Kevin, nga ansiyano sa usa ka Quechua nga kongregasyon. Siya miingon: “Naghunahuna ko, ‘Makakita pa kaha mig mga tawo nga nagsultig Quechua?’” Unsay gihimo ni Kevin? Siya miingon: “Nahinumdom ko sa giingon sa Proverbio 3:5. Ug nakahunahuna ko kang Moises. Gisugo siya ni Jehova nga dad-on ang mga Israelinhon gikan sa Ehipto ngadto sa Pulang Dagat, diin morag wala na silay kaikyasan gikan sa mga Ehiptohanon nga naggukod nila. Pero misunod gihapon si Moises, ug gipanalanginan ni Jehova ang iyang pagkamasinugtanon pinaagi sa pagluwas nila sa milagrosong paagi.” (Ex. 14:1, 2, 9-11, 21, 22) Si Kevin andam nga mosunod sa bag-ong kahikayan sa pagsangyaw. Unsay resulta? Siya miingon: “Nakita gyod nako kon giunsa mi pagpanalangin ni Jehova. Sa una magsige ra mig baktas, pero usahay usa o duha ray among makita nga nagsultig Quechua. Pero karon nga nagpokus na mi sa mga teritoryo diin daghan ang nagsultig Quechua, mas daghan na mig maestorya, ug mas nanaghan ang among mga balikduaw ug Bible study. Mas midaghan pod ang among attendance sa tigom.” Oo, kon molakaw ta pinaagi sa pagtuo, panalanginan gyod ta ni Jehova.

17. Unsay imong nakat-onan niini nga artikulo?

¹⁷ Atong nahisgotan ang tulo ka bahin sa atong kinabuhi diin importante nga padayon tang molakaw pinaagi sa pagtuo. Pero angay tang mohimog mga desisyon nga makapalipay kang Jehova sa tanang bahin sa atong kinabuhi, sama pananglitan kon unsang kalingawan ang atong pilion, kon mokuha ba tag taas nga edukasyon, o kon unsaon pagpadako ang atong mga anak. Sa tanang desisyon nga atong himoon, kinahanglan tang magpokus dili lang sa atong makita, kondili sa atong relasyon kang Jehova, sa iyang tambag, ug sa iyang saad nga atimanon ta niya. Kon ato nang himoon, makapadayon ta sa ‘paglakaw sa ngalan ni Jehova nga atong Diyos hangtod sa kahangtoran.’—Miq. 4:5.