Magmapainubsanon Sama Kang Jehova

1. Nganong makaingon ta nga si Jehova gyod ang pinakamaayong ehemplo sa pagkamapainubsanon?

UNSAY imong naobserbahan sa mga tawo karon nga tag-as ug posisyon? Makaingon ba ka nga mapainubsanon sila? Dili seguro. Pero hunahunaa si Jehova. Bisag siya ang Labing Gamhanan, mapainubsanon kaayo siya. (Sal. 113:​5-8) Mao gyod ni iyang kinaiya, ug wala kay makitang bisag gamayng pagkagarboso kang Jehova. Niining artikuloha, atong hisgotan ang upat ka paagi nga gipakita ni Jehova ang iyang pagkamapainubsanon. Ato pong hisgotan kon giunsa pagsundog ni Jesus kining nindot nga hiyas sa iyang Amahan. Makatabang ni nato nga mas masuod kang Jehova ug mas masundog ang iyang pagkamapainubsanon.

SI JEHOVA DALING DUOLON

2. Unsay atong makat-onan sa Salmo 62:8 bahin kang Jehova? (Tan-awa sab ang hulagway.)

² Kasagaran sa mga tawo nga garboso lisod duolon. Taas kaayo silag panglantaw sa ilang kaugalingon maong dili sila maayog tinagdan sa uban. Tungod ana, ang uban magduhaduhag duol nila o molikay na gyod hinuon nila. Pero lahi kaayo si Jehova. Mapainubsanon gyod ang atong langitnong Amahan, maong gusto niya nga moduol ta niya ug sultihan nato siya sa atong mga gikabalak-an. (Basaha ang Salmo 62:8.) Samag mahigugmaong amahan nga andam maminaw sa iyang mga anak, si Jehova maminaw gyod sa pag-ampo sa iyang mga alagad. Gani, daghang pag-ampo ang iyang gipasulat sa Bibliya. Nagpakita lang na kon unsa ka daling duolon si Jehova. (Jos. 10:​12-14; 1 Sam. 1:​10-18) Pero unsay atong himoon kon mobati ta usahay nga dili ta takos moduol kang Jehova?

3. Nganong makaseguro ka nga gusto ni Jehova nga moampo ka niya pirme?

³ Puwede gihapon tang moduol kang Jehova sa pag-ampo bisan pag mobati ta nga dili takos sa iyang gugma. Nganong makaingon ta ana? Hunahunaa ang ilustrasyon ni Jesus bahin sa milayas nga anak kinsa naghinulsol na pero mibati gihapong dili takos tawgon nga anak sa iyang amahan. Unsay reaksiyon sa amahan dihang mibalik na ang iyang anak? Si Jesus miingon nga dihang nakita sa amahan ang iyang anak, dihadiha, siya “midagan ug migakos sa iyang anak ug mapinanggaong mihalok kaniya.” (Luc. 15:​17-20) Si Jehova sama nianang buotan ug maluluy-ong amahan. Dihang madungog niya ang pag-ampo sa iyang mga alagad nga nabug-atan sa ilang mga kabalaka o naguol pag-ayo tungod sa ilang mga sala, ang iyang pagkamapainubsanon magpalihok niya nga hatagan dayon silag pagtagad. (Lam. 3:​19, 20) Maluoy kaayo si Jehova nila, ug samag modagan siya paingon nila aron hupayon ug pasaligan sila sa iyang gugma. (Isa. 57:15) Sa unsang paagi ta niya ginahupay karon? Pinaagi sa mga ansiyano, sa atong pamilya, ug sa atong mga isigkamagtutuo. (Sant. 5:​14, 15) Iya ning ginahimo kay gusto niya nga masuod ta niya.

4. Unsay nagpakita nga si Jesus daling duolon?

⁴ Gisundog ni Jesus ang iyang Amahan. Sama sa iyang amahan, si Jesus mapainubsanon. Maong dihang dinhi pa siya sa yuta, ang mga tawo komportable rang moduol niya. Wala pod sila mahadlok nga mangutana niya. (Mar. 4:​10, 11) Dihang pasultihon sila ni Jesus sa ilang opinyon, wala sila magduhaduha nga isulti ang ilang gihunahuna. (Mat. 16:​13-16) Ug dihang nakahimo silag mga sayop, wala sila magkurogkurog sa kahadlok kay nahibalo sila nga si Jesus buotan, maluluy-on, ug mapailobon. (Mat. 17:​24-27) Tungod kay gisundog pag-ayo ni Jesus ang iyang Amahan, mas nailhan sa iyang mga sumusunod si Jehova. (Juan 14:9) Nakita nila nga si Jehova dili gyod sama sa ilang relihiyosong mga lider nga walay pakabana nila ug garboso kaayo. Hinuon, si Jehova mapainubsanon ug daling duolon.

5. Nganong mas dali tang duolon kon mapainubsanon ta?

⁵ Unsaon nato pagsundog si Jehova? Ang pagkamapainubsanon motabang nato nga mahimong mas sayon duolon. Kon dili ta mapainubsanon, mas dali tang masina, magdumot, o mahimong garboso, nga tungod ana mopalayo ang mga tawo nato. Pero kon mapainubsanon ta, mahimo tang mas buotan, mapinasayloon, ug pasensiyoso—mga kinaiya nga makapasuod nato sa mga tawo. (Col. 3:​12-14) Ang mga ansiyano ilabinang angay nga maningkamot niining bahina. Gusto nila nga ang uban mobating komportable nga moduol nila. Pero siyempre, aron kaduolan sila, kinahanglang makita sila sa mga igsoon. Sa ato pa, maningkamot sila nga motambong sa mga tigom in person imbes motambong lang online, gawas kon dili kaya sa ilang kahimtang. Maningkamot pod silang makig-uban sa mga igsoon diha sa pagsangyaw. Kon ang mga igsoon mas masuod sa mga ansiyano, mahimo silang mas komportable nga moduol nila kon naa silay mga problema.

SI JEHOVA RASONABLE

6-7. Paghatag ug mga pananglitan diin si Jehova mipahiuyon sa hangyo sa iyang mga alagad.

⁶ Kasagaran sa mga tawong mapahitas-on dili andam mopahiuyon sa uban. Pero lahi si Jehova. Kay mapainubsanon siya, rasonable siya ug andam mopahiuyon bisan pag siya ang pinakalabaw sa tanan. Konsideraha kon giunsa niya ni pagpakita sa igsoon ni Moises nga si Miriam. Si Miriam, apil na si Aaron, nagreklamo batok kang Moises. Pero kay si Moises nagrepresentar man kang Jehova, ang kawalay-pagtahod ni Miriam kang Moises nagpakitag kawalay-pagtahod kang Jehova mismo. Tungod ana, nasuko kaayo si Jehova kang Miriam ug gihampak niya siyag sanla. Pero nagpakiluoy si Aaron para kang Miriam ug gihangyo ni Moises si Jehova nga ayohon ang iyang igsoon. Unsa may gihimo ni Jehova? Imbes nga magmapahitas-on ug barogan gyod ang iyang desisyon, nagmapainubsanon siya ug mipahiuyon sa iyang mga alagad pinaagi sa pag-ayo kang Miriam.—Num. 12:​1-15.

⁷ Hunahunaa pod kon giunsa pagpakita ni Jehova ang iyang pagkamapainubsanon ngadto kang Haring Ezequias. Pinaagi sa iyang propeta, gipahibalo ni Jehova sa hari nga mamatay siya. Puwerteng hangyo ni Ezequias nga ayohon siya ni Jehova. Naluoy kaayo si Jehova sa hari maong gidugangan niyag 15 ka tuig ang iyang kinabuhi. (2 Hari 20:​1, 5, 6) Kini nga asoy nagpakita nga kay mapainubsanon si Jehova, maluluy-on kaayo siya ug andam mopahiuyon.

8. Giunsa pagpakita ni Jesus nga rasonable siya? Paghatag ug mga pananglitan. (Marcos 3:​1-6)

⁸ Gisundog ni Jesus ang iyang Amahan. Dihang dinhi pa si Jesus sa yuta, iyang gitabangan ang mga tawo kutob sa mahimo. Pananglitan, iyang giayo ang mga tawo panahon sa Igpapahulay. Lahi kaayo siya sa gahig kasingkasing nga mga magsusupak kinsa miingon nga dili uyon sa Balaod ang iyang gihimo. (Basaha ang Marcos 3:​1-6.) Karon, wala gihapon mausab si Jesus. Ingong ulo sa Kristohanong kongregasyon, siya rasonable ug makataronganon. Pananglitan, kon naay makahimog seryosong sala, mapailobon siya nila ug naghatag nilag kahigayonan nga magbag-o.—Pin. 2:​2-5.

9. Unsaon nato pagpakita nga balanse ug rasonable ta? (Tan-awa sab ang mga hulagway.)

⁹ Unsaon nato pagsundog si Jehova? Kinahanglang maningkamot ta nga sundogon ang balanseng panghunahuna ni Jehova ug ang iyang makataronganong paagi sa pagtratar sa mga tawo. (Sant. 3:17) Pananglitan, ang rasonableng mga ginikanan dili estrikto pero dili ra pod luag kaayo, ug dili sila taas ug pagdahom sa ilang mga anak. Maayo kaayo nga ehemplo ani si Jacob, sama sa atong mabasa sa Genesis 33:​12-14. Dili pod ikompara sa mga ginikanan ang ilang anak ngadto sa uban. Ang mga ansiyano kinahanglan pong mahimong rasonable o makataronganon. Pananglitan, mapainubsanon silang mosunod sa desisyon sa kadaghanang ansiyano kon wala ray malapas nga mga prinsipyo sa Bibliya. (1 Tim. 3:​2, 3) Ug kitang tanan maningkamot nga masabtan ang panghunahuna sa uban bisag lainlain tag opinyon. (Roma 14:1) Oo, angay natong “ipakita sa tanan ang [atong] pagkamakataronganon.”—Filip. 4:5.

SI JEHOVA MAPAILOBON

10. Giunsa pagpakita ni Jehova ang iyang pailob?

¹⁰ Namatikdan seguro nimo nga ang mga tawong garboso dili ganahan nga pahulaton sila. Kay mapahitas-on sila, wala silay pailob. Pero lahi si Jehova kay mapailobon kaayo siya. Pananglitan, sa panahon ni Noe, si Jehova miingon nga mohulat una siyag 120 ka tuig ayha niya laglagon ang mga daotan. (Gen. 6:3) Tungod ana, napadako pa ni Noe ang iyang mga anak ug nakatabang sila sa pagtukod sa arka. Sa ulahi, ang anghel ni Jehova nagpailob pod dihang balikbalik siyang gipangutana ni Abraham bahin sa kalaglagan sa Sodoma ug Gomora. Kon garboso pa ang anghel, tingali moingon siya, ‘Wala kay katungod nga mangutana nako!’ Pero kay gisundog man niya si Jehova, gipailoban niya si Abraham.—Gen. 18:​20-33.

11. Base sa 2 Pedro 3:​9, nganong nagpakita si Jehova ug pailob sa mga tawo karon?

¹¹ Si Jehova nagpakitag pailob sa mga tawo karon. Naghulat siya sa iyang gitakdang panahon aron taposon ang pagkadaotan. Nganong nagpailob man siya? “Kay dili niya gusto nga naay malaglag kondili gusto niya nga ang tanan maghinulsol.” (Basaha ang 2 Pedro 3:9.) Naa bay kaayohan ang pagpailob ni Jehova? Oo! Minilyong mga tawo nga sinserog kasingkasing ang mialagad kang Jehova, ug naglaom ta nga minilyon pa gyod ang mohimo ana. Pero dili ta makadahom nga magpailob na lang gyod pirme si Jehova. Bisag gimahal ni Jehova ang mga tawo, dili niya tugotan nga magpadayon hangtod sa hangtod ang pagkadaotan.—Hab. 2:3.

12. Giunsa pagsundog ni Jesus ang pailob ni Jehova?

¹² Gisundog ni Jesus ang iyang Amahan. Gisundog ni Jesus ang pailob ni Jehova sulod na sa libolibo ka tuig. Nakita ni Jesus kon giunsa pagdaot ni Satanas ang reputasyon ni Jehova ug sa matinumanong mga tawo. (Gen. 3:​4, 5; Job 1:11; Pin. 12:10) Nakita pod ni Jesus kon unsa ka grabe ang pag-antos sa katawhan. Seguradong gusto na gyod kaayo niyang “gub-on ang mga buhat sa Yawa.” (1 Juan 3:8) Pero nganong mapailobon mang naghulat si Jesus sa gitakdang panahon ni Jehova nga taposon ang mga buhat sa Yawa? Tungod kay mapainubsanon siya. Nahibalo siya nga si Jehova lang ang naay katungod nga modesisyon bahin ani.—Buh. 1:7.

13. Giunsa pagpakita ni Jesus nga mapailobon siya sa iyang mga apostoles, ug nganong iya nang gihimo?

¹³ Si Jesus mapailobon pod sa iyang mga apostoles sa dinhi pa siya sa yuta. Pananglitan, bisag balikbalik silang naglalis kon kinsa nila ang kinalabwan, wala mawad-ig paglaom si Jesus nila. Hinuon, padayon niya silang gipailoban. (Luc. 9:46; 22:​24-27) Misalig siya nga moabot ra gyod ang panahon nga magbag-o sila. Sama sa mga apostoles, balikbalik pod ba kang nakahimog mao ra gihapon nga sayop? Kon mao, seguradong mapasalamaton ka nga ang atong Hari mapainubsanon ug mapailobon kaayo!

14. Unsay makatabang nato nga mahimong mas mapailobon?

¹⁴ Unsaon nato pagsundog si Jehova? Masundog nato ang panghunahuna ni Jehova ug ang iyang paagi sa pagtratar sa mga tawo kon sundogon nato ang “panghunahuna sa Kristo.” (1 Cor. 2:16) Unsay makatabang aron mas masabtan nato ang panghunahuna sa Kristo? Ang usa sa pinakamaayong paagi mao ang pagbasa sa mga Ebanghelyo. Dayon sa atong nabasa, pamalandongon nato kon unsay gihimo ni Jesus ug kon nganong iya tong gihimo. Siyempre, hangyoon pod nato si Jehova nga tabangan ta nga mahimong mapainubsanon ug mapailobon, sama kang Jesus. Kon maningkamot ta nga masundog ang panghunahuna sa Kristo, mas masundog nato ang Diyos ug mas makapakita tag pailob sa atong kaugalingon ug sa mga igsoon.—Mat. 18:​26-30, 35.

GIPASIDUNGGAN NI JEHOVA ANG MGA MAPAINUBSANON

15. Nganong makaingon ta nga tinuod ang giingon sa Salmo 138:6 bahin kang Jehova?

¹⁵ Basaha ang Salmo 138:6. Dako kaayong pribilehiyo nga hatagan tag pagtagad sa Soberano sa uniberso! Hunahunaa ang pipila ka alagad ni Jehova nga giisip sa uban nga ubos pero iyang gipasidunggan. Ang uban nila dili tingali kaayo ilado, pero naa sila sa Bibliya. Pananglitan, gigiyahan ni Jehova si Moises nga isulat ang ngalan sa yaya ni Rebeca nga si Debora. Matinumanon siyang nag-alagad sa pamilya ni Isaac ug Jacob sulod sa mga 125 ka tuig. Bisag gamay ra tag nahibaloan bahin niining maunongon nga babaye, gipasulat gyod ni Jehova diha sa Bibliya ang usa ka detalye nga nagpakita kon unsa siya ka bililhon. (Gen. 24:59; 35:​8, footnote) Daghang tuig sa ulahi, gipili ni Jehova si David, usa ka batan-on nga magbalantayg karnero, aron mahimong hari sa nasod sa Israel. (2 Sam. 22:​1, 36) Dihang natawo si Jesus, gipasidunggan sa Diyos ang mapainubsanon nga mga magbalantayg karnero. Dako kaayong pribilehiyo para nila nga sila ang unang nahibalo nga natawo na didto sa Betlehem ang umaabot nga Mesiyas. (Luc. 2:​8-11) Ug dihang gidala ni Jose ug Maria si Jesus didto sa templo, gipasidunggan ni Jehova ang tigulang na nga si Simeon ug Ana—iyang gipaila kanila pinaagi sa balaang espiritu nga ang bata mao ang iyang Anak. (Luc. 2:​25-30, 36-38) Kini nga mga pananglitan nagpakita nga “bisag si Jehova hataas, gihatagan niyag pagtagad ang mapainubsanon”!

16. Giunsa pagsundog ni Jesus ang iyang Amahan?

¹⁶ Gisundog ni Jesus ang iyang Amahan. Sama kang Jehova, gipasidunggan ni Jesus ang mapainubsanong mga tawo. Iyang gitudloan ang ‘ordinaryo ug dili edukado’ nga mga tawo sa mga kamatuoran bahin sa Gingharian sa Diyos. (Buh. 4:13; Mat. 11:25) Giayo pod niya ang mga masakiton, nga tungod ana nabalik ang ilang maayong panglawas ug ang ilang dignidad. (Luc. 5:13) Ug sa gabii una mamatay si Jesus, iyang gihugasan ang tiil sa iyang mga apostoles, nga sagad ginahimo lang sa mga ulipon. (Juan 13:5) Ug sa wala pa siya mosaka sa langit, iyang gipasidunggan ang tanan niyang mapainubsanong mga sumusunod pinaagi sa paghatag nila sa pinakaimportanteng buluhaton—ang pagtabang sa mga tawo nga makabatog kinabuhing walay kataposan.—Mat. 28:​19, 20.

17. Sa unsang paagi nato mapasidunggan ang uban? (Tan-awa sab ang hulagway.)

¹⁷ Unsaon nato pagsundog si Jehova? Atong mapasidunggan ang mga tawo kon sangyawan nato sila sa maayong balita bisag unsa pay ilang rasa, kultura, o nakab-ot nga edukasyon. Mapasidunggan pod nato ang mga igsoon kon isipon nato sila nga mas labaw kay kanato, bisag unsa pay atong abilidad o pribilehiyo. (Filip. 2:3) Kon mapainubsanon tang “manguna” sa pagpasidungog sa usag usa niining mga paagiha ug sa uban pang paagi, seguradong mapalipay nato si Jehova.—Roma 12:10; Sof. 3:12.

18. Nganong gusto nimong sundogon ang pagkamapainubsanon ni Jehova?

¹⁸ Samtang maningkamot ta nga sundogon ang pagkamapainubsanon sa atong mahigugmaong langitnong Amahan, mahimo tang mas daling duolon, mas rasonable, ug mas mapailobon. Mapasidunggan pod nato ang uban, sama sa ginahimo ni Jehova. Hinaot nga padayon natong sundogon ang atong mapainubsanong Diyos, ug seguradong mahimo tang mas bililhon para niya.—Isa. 43:4.