Kalihokan sa mga Saksi ni Jehova sa Modernong Kapanahonan

Curaçao

Sa mapa sa yuta, ang mga isla sa Curaçao, Aruba, ug Bonaire daw gagmay kaayo kon itandi sa dagkong mga kontinente nga nahimutang sa duol niini. Apan, niining mga islaha nanimuyo ang mga tawo gikan sa daghang nasod ug mga kultura. Daghan sa nanimuyo niining tulo ka isla sa Caribbeano karon nagakalipay ilalom sa matarong nga pagmando ni Jehova. Basaha kon giunsa pagbuntog sa masibotong mga Saksi ang mga suliran sa kadaiyahan sa kultura ug pinulongan aron sa pagtudlo sa putling pinulongan sa kamatuoran sa Bibliya.

Ukraine

Abril 8, 1951 kadto. Ang dinahunog sa mga trak sa sundalo nakatugaw sa kahilom sa sayong kabuntagon. Sa tibuok kasadpang Ukraine, ang mga sundalo nangabot sa mga pinuy-anan sa mga Saksi ni Jehova ug ang matag pamilya gihatagag duha ka oras aron sa pag-empake sa ilang mga gamit alang sa usa ka panaw nga daghan kanila wala na gayod mahibalik. Niadtong adlawa, kapin sa 6,100 ka Saksi ang gipasakay sa mga tren dekarga ug gidestiyero sa Siberia. Kadto nga misyon sa mga sundalo maoy bahin sa mapinadayonong kampanya sa gamhanang Unyon Sobyet aron pahilomon ang bisan kinsa nga mangahas pagmantala sa Gingharian sa Diyos. Ang makapahinam nga sugilanon kon sa unsang paagi ang mga Saksi sa Ukraine nakalahutay sa pagdili ug paglutos sulod sa kapin sa 50 ka tuig magpalig-on sa imong pagtuo sa gahom ni Jehova sa pagpalig-on sa iyang katawhan.