Usa ka Video nga Magpahimangno ug Magpalagsik Kanimo!
Kadto maoy Abril 1951. Libolibo ka Saksi ni Jehova sa kanhi Unyon Sobyet—enterong mga pamilya—ang gitigom, gipasakay sa mga bagon sa tren, ug gidestiyero ngadto sa Siberia. Nganong determinado man ang gamhanang gobyerno sa Sobyet sa pagwagtang kanila? Sa unsang paagi naluwas ang atong mga igsoon ug miuswag pa gani bisan pa sa mga dekada sa way-hunong nga paglutos? Makaplagan mo ang mga tubag diha sa video nga Faithful Under Trials—Jehovah’s Witnesses in the Soviet Union. Tan-awa kini, ug tugoti ang matulon-anong mensahe niini nga magdasig kanimo sa paghupot sa imong pagkamatinumanon kang Jehova, bisag unsay mahitabo!
Matubag ba nimo kining mga pangutanaha? (1) Kanus-a unang nadawat sa mga Saksi ni Jehova ang opisyal nga pag-ila sa Rusya? (2) Sa wala pa ug human sa Gubat sa Kalibotan II, sa unsang paagi ang Unyon Sobyet nakabaton ug libolibo pa ka pamilyang Saksi? (3) Sa unsang paagi ang ilang mga tinuohan supak gayod sa pilosopiya ni Lenin? (4) Unsa ang Operation North, ug unsay gilaoman ni Stalin nga mapalampos pinaagi niana? (5) Unsay kahulogan sa pagdestiyero alang sa mga Saksi, ug unsay giingon kanila aron sila dili madestiyero? (6) Diha sa taas nga panaw sa tren paingon sa Siberia, giunsa pagdasig sa atong mga igsoon ang usag usa ug nakapatingala sa nagbihag kanila? (7) Unsang mga kaalaotan ang giantos sa mga Saksi didto sa Siberia? (8) Unsang espirituwal nga tagana ang gipabilhan pag-ayo sa katawhan ni Jehova, ug ngano? (9) Nganong andam ipameligro sa atong mga igsoon ang ilang kinabuhi tungod ug alang sa ilang literatura, ug sa unsang paagi nagmadaogon sila batok sa way-hunong nga mga paningkamot sa mga awtoridad sa pagbabag kanila sa pagdawat niana? (10) Sa unsang paagi gipadayon ni Khrushchev ang paglutos sa katawhan sa Diyos? (11) Sa unsang paagi misulay ang mga awtoridad sa pagbungkag sa pagtuo sa mga batang Saksi? (12) Unsang tin-awng pagsabot ang nabatonan sa atong mga igsoon kon nganong sila ginalutos? (2002 Tinuig nga Basahon, mga panid 203-4) (13) Sa unsang paagi ang bug-os nga pag-atake sa organisasyon sa Diyos misumbalik sa mga maglulutos? (2002 Tinuig nga Basahon, mga panid 220-1) (14) Unsang mga butang ang natuman nga kaniadto mga damgo lamang alang sa mga Saksi sa kanhi Unyon Sobyet? (15) Unsay nakatabang sa atong mga igsoon sa pag-antos sa ilang mga pagsulay, ug sa unsang paagi gihubit sa kataposang esena sa video nga tinuod ang Jeremias 1:19? (16) Pag-asoy ug usa sa tinuod-kinabuhing mga eksperyensiya sa pagkamatinumanon ilalom sa pagsulay nga nakadasig gayod kanimo.