Makaiikag nga Report sa Miaging Tuig

MAKAPADASIG nga makita ang gipalampos ni Jehova pinaagi sa iyang katawhan sa tibuok kalibotan. Kining Tinuig nga Basahon nagtaho sa kaugmaran maylabot sa senyas nga pinulongan ug nagsaysay kon sa unsang paagi nanukiduki ang Writing Department. Imong masayran ang bahin sa atong internasyonal nga mga kombensiyon, ug ang makapainteres nga mga detalye sa atong bag-ong songbok. Imo usab nga mahibaloan ang kaugmaran bahin sa legal nga mga kaso sa atong mga igsoon, mga balita gikan sa Haiti, ug sa di pa dugayng pagpahinungod sa mga sangang buhatan. Madasig ka gayod sa imong mabasa.

‘GUSTO SA DIYOS NGA MAKAILA KANIYA ANG MGA BUNGOL’

Tagda ang kaugmaran maylabot sa senyas nga pinulongan. Si Salvatore, nga taga-United States, maoy usa ka bungol nga ang asawa Saksi ni Jehova. Bisag dugay nang nasinati sa kamatuoran, siya wala mouswag. Ang iyang asawa misugyot nga iyang basahon ang Bibliya kada adlaw sulod sa usa ka tuig. Apan kay wala makasabot sa iyang gibasa, nawad-an siyag kadasig. “Dili gyod ko makakat-on sa paghigugma kang Jehova,” matod niya.

Nausab ang panglantaw ni Salvatore sa dihang giingnan siya nga ang usa ka bahin sa New World Translation of the Holy Scriptures mabatonan na sa DVD diha sa American Sign Language. Human susiha ang Pulong sa Diyos diha sa senyas nga pinulongan, siya nakaingon, “Gusto gayod sa Diyos nga makaila ko kaniya!” Nagtuon ug Bibliya si Salvatore ug karon bawtismado na nga malipayong nag-alagad kang Jehova.

Sama kang Salvatore, nabatyagan sa ubang bungol sa tibuok kalibotan ang mainitong gugma ug kahangawa ni Jehova pinaagi sa mga Bibliya ug ubang publikasyon diha sa senyas nga pinulongan nga mabatonan sa DVD ug ma-download sa Internet. Ang mga publikasyon mabatonan na sa 46 ka senyas nga pinulongan ug duna pay 13 nga idugang. Ang The Watchtower mabatonan sa siyam niini nga pinulongan, ug ang mga bahin sa New World Translation giluwatan diha sa American, Brazilian, Colombian, Italian, Mexican, ug Russian nga senyas nga pinulongan.

Makapadasig gayod kon sa unsang paagi ang mga publikasyon diha sa senyas nga pinulongan nakatandog sa mga bag-ohan. “Una kong nagtuon niadtong 1981 gamit ang sinulat nga mga publikasyon sa Japanese,” matod ni Natsue, usa ka bungol nga babaye sa Japan. “Sa dihang wala ko kini masabti ug misupak ang akong pamilya sa akong pagtuon, ako miundang.

“Sa Abril 2007, gipakita kanako sa usa ka magmamantala ang Japanese Sign Language nga edisyon sa You Can Be God’s Friend!—On DVD. Kadto maoy 26 ka tuig sukad sa akong unang pagtuon sa Bibliya. Dihadiha gipadayon ko ang akong pagtuon ug natagbaw ang akong espirituwal nga panginahanglan. Ako nabawtismohan sa Nobyembre 2008.”

Karon, dunay kapin sa 16,000 ka bungol nga magmamantala sa tibuok kalibotan. Pinaagi sa ilang mga kamot ug ekspresyon sa nawong, ilang gidayeg si Jehova. Ang 30 ka libro, brosyur, video, ug mga drama sa Bibliya nga gihubad ngadto sa lainlaing senyas nga pinulongan maoy pamatuod sa gugma ug pagpabili ni Jehova sa ilang maunongong pag-alagad.

Ang 54 ka sanga nga naghubad sa mga publikasyon ngadto sa senyas nga pinulongan nakadawat ug daghang pasalamat gikan sa mga igsoon ug mga interesado. Kini nga mga sulat nagpakita sa kalipay sa mga bungol kay natugkad nila ang lalom nga mga kamatuoran pinaagi sa senyas nga pinulongan. Ingon niini ang gisulat ni Emi nga taga-Japan, kansang ginikanan mga bungol.

“Naunag daghang tuig nga nabawtismohan ang akong ginikanan kay kanako,” matod ni Emi, “apan maglisod silag sabot sa sinulat nga mga publikasyon sa Japanese. Kon duna silay dili masabtan, mangutana pa sila nako. Karon masaligon na silang makighisgot sa kamatuoran. Si Mama miingon, ‘Ayha ko lang nasabtan ang mga detalye sa Bibliya sa dihang duna nay mga publikasyon sa senyas nga pinulongan.’ Tungod niini, sila mas nasuod kang Jehova ug kami mas nasuod sa usag usa.”

‘GISUBAY ANG TANANG BUTANG UBAN ANG KATUKMA’

Si Jesus miingon nga ang matinumanong ulipon maalamon sa pagtaganag “pagkaon sa hustong panahon” alang sa iyang panimalay. Busa gipakita ni Kristo nga makugihon, maampingon, ug mabinantayon ang nagtagana sa espirituwal nga “pagkaon” alang sa matuod nga mga magsisimba.—Mat. 24:45-47.

Sa atong panahon, gigamit sa dinihogang mga igsoon ni Kristo ang Writing Department sa Brooklyn, New York sa pagtaganag espirituwal nga pagkaon pinaagig mga magasin, brosyur, libro, ug ubang pinatik ug elektronikong mga publikasyon. Kini samag literal nga pagkaon nga kinahanglang andamon pag-ayo. Gani, ang mga magsusulat sa Bibliya nga giniyahan sa balaang espiritu naningkamot nga ilang marekord ang tukma ug napanukiduki pag-ayong impormasyon. Pananglitan, si Lucas nakigsulti sa daghang saksing-nakakita ug ‘gisubay ang tanang butang uban ang katukma.’—Luc. 1:1-4.

Ang Writing Department usab ‘nagsubay sa tanang butang uban ang katukma.’ Apan asa makaplagi ang kasaligang impormasyon? Bisan tuod ang Internet kombenyente ug daling kakuhaag impormasyon, ang atong mga tigpanukiduki wala magsalig sa mga komento diha sa Internet o sa dili kasaligang mga Website. Pananglitan, ang ensiklopedia sa Internet nga Wikipedia nagpasidaan nga ang ilang pipila ka artikulo “naundan ug sayop ug dili kasaligang impormasyon,” ug kinahanglang “mag-amping ang mga mogamit.” Busa ang Writing Department migamit ug kasaligang mga reperensiya, mga artikulong gisulat sa tinamod nga mga tawo, ug mga libro gikan sa tinahod nga mga magpapatik.

Ang Writing Department dunay librarya nga naundan ug linibo ka libro. Dugang pa, ang atong mga tigpanukiduki mokonsulta usab sa publikong mga librarya. Puwede usab nilang hangyoon ang usa ka librarya sa paghulam ug linaing mga materyal gikan sa ubang librarya. Usa sa dagkong librarya sa unibersidad nga gikonsulta sa atong mga tigpanukiduki dunay mga lima ka milyong libro, 58,000 ka magasin, 5.4 ka milyong microform, ug linibo ka electronic database. Ang Writing Department usab naghipos ug daghang kinutlo, kasinatian, ug impormasyon sa kasaysayan, ug sila kanunayng gipadad-ag bag-ong impormasyon gikan sa lokal nga mga tinubdan ingon man gikan sa atong mga sangang buhatan sa tibuok kalibotan.

Siyempre, ang Ecclesiastes 12:12 nagpahinumdom kanato: “Sa paghimog daghang basahon walay kataposan.” Bisan ang iladong mga tinubdan naundan ug sayop nga mga impormasyon. Busa sa unsang paagi nato matino ang kalidad, katukma, ug pagkakasaligan niini?

Matikdi pananglitan ang giingon sa brosyur nga Gilalang ba ang Kinabuhi? bahin sa laway sa kaka ingong usa sa labing lig-ong materyales sa yuta: “Kon padak-on ang balay sa kaka nga ingon ka dako sa dulaanag potbol, ug ang matag hilo niini mga medya pulgada ka baga nga dos pulgadas ang gilay-on gikan sa matag hilo, kini makapahunong ug dakong ayroplano nga naglupad!” Bisan tuod gikuha kini sa usa ka tinamod nga magasin sa siyensiya, ang maong magasin dili maoy orihinal nga tinubdan, ug ang orihinal nga tinubdan dili klaro. Busa kinahanglang kontakon ang orihinal nga nanukiduki niana aron matino kon nganong mao kanay iyang konklusyon. Kinahanglang mahibaloan usab sa atong mga tigpanukiduki ang pormula ug gikinahanglang impormasyon aron ilang makalkulo kon sa unsang paagi mapahunong sa balay sa kaka nga ingon ka dako sa dulaanag potbol ang ayroplano nga naglupad. Human sa daghang oras nga panukiduki ug makuting kalkulasyon, ilang napamatud-an nga tukma kining talagsaong impormasyon.

Apan usahay bisan ang tinamod nga tinubdan dili makahatag ug eksaktong detalye. Pananglitan: si Gandhi gikutlo nga miingon kang Lord Irwin diha sa iyang ashram (relihiyosong pinuy-anan): “Kon ang imong nasod ug ang akoa magkahiusa sa mga pagtulon-an ni Kristo sa Wali sa Bukid, masulbad unta nato ang mga suliran dili lamang sa atong mga nasod kondili apil na ang sa tibuok kalibotan.” Ugaling, ang maampingong pagsusi nagpakita nga walay pamatuod nga si Lord Irwin nakaduaw kang Gandhi diha sa iyang ashram, nga nagpatunghag mga pangutana kon diin, kanus-a, ug kon gisulti ba gayod kini ni Gandhi. Busa wala na gamita kini nga pangutlo sa atong mga publikasyon.

O tingali imong nabasahan ang asoy bahin kang Sir Isaac Newton ug sa iyang modelo sa sistema solar. Gikataho nga ang miduaw nga ateyista nangutana: “Kinsay nagbuhat niini?” Sa dihang mitubag si Newton, “Wala!” ang ateyista miingon, “Gibuangan man seguro ka nako!” Dayon giingnan kono ni Newton ang ateyista nga ang iyang gamayng modelo sa mas dakong sistema solar nagpamatuod nga dunay tigdisenyo o magbubuhat. Bisan tuod nindot kini nga asoy, ang mga tinubdan sa kasaysayan, maingon man ang mga eskolar ug mga tawong nagsulat sa kaagi ni Newton, dili makapamatuod nga nahitabo kini nga panag-estorya. Makaiikag, ang kinaunahang paghisgot niini maoy sa sayong katuigan sa 1800 nga naggamit, dili sa ngalan ni Newton, kondili sa German nga eskolar nga si Athanasius Kircher. Busa ang Writing Department wala na mogamit niini nga asoy sa atong mga publikasyon.

Usahay bisan ang ginagmayng pahayag kinahanglag panukiduki aron matino ang katukma. Pananglitan, ang usa ka igsoon moingon diha sa iyang asoy sa kinabuhi nga siya natawo sa Czechoslovakia sa 1915. Apan namugna lang ang Czechoslovakia niadtong 1918. Busa, diin siya natawo? Aron matubag kini, kinahanglang susihon ang karaang mga mapa o mga rekord sa kasaysayan.

Lain pa, ang usa ka igsoon tingali moingon nga siya nabawtismohan sa San Francisco sa usa ka espesipikong petsa. Apan human sa maampingong panukiduki, walay kombensiyon o asembliya nianang petsaha sa maong dapit. Sa unsang paagi kini masulbad? Usahay ang mahinumdoman lang sa igsoon mao ang dapit nga siya nabawtismohan apan dili ang eksaktong petsa. Aron matino ang katukma sa detalye, kinahanglan kining susihon ug ikomparar sa lainlaing tinubdan sa impormasyon.

Busa ang Writing Department mogamit lang ug tukma ug kasaligang impormasyon, bisan sa ginagmayng detalye. Ingong resulta, ang “matinumanon ug maalamong ulipon” padayong nagtaganag espirituwal nga pagkaon nga makapasidungog sa “Diyos sa kamatuoran,” si Jehova.—Sal. 31:5.

NATABANGAN NGA “MAGPADAYON SA PAGBANTAY”

Minilyon ka Saksi ni Jehova sa tibuok kalibotan ang nakapahimulos sa praktikal ug nunot sa panahong programa sa “Padayon sa Pagbantay!” nga Distritong Kombensiyon sa 2009. Dunay kapin sa 200,000 ka delegado gikan sa 136 ka nasod ang gidapit sa pagtambong sa usa sa 37 ka internasyonal nga kombensiyon. Ang mga kombensiyon gihimo sa Austria, Chile, Côte d’Ivoire, France, Germany, Ghana, Italy, Kenya, Korea, Mexico, Myanmar, Peru, Poland, South Africa, Trinidad and Tobago, ug sa United States. Ang katibuk-ang ihap sa mitambong maoy 1,495,045, ug 15,730 ang nabawtismohan.

Unsay katuyoan sa internasyonal nga mga kombensiyon? Ang Nagamandong Lawas nag-eskedyul niini matag pipila ka tuig sa piniling mga siyudad—usahay sa mga dapit diin ang mga Saksi gibando kanhi. Kini nakapalig-on sa mga igsoon ug nakapalambo sa pagsangyaw sa maayong balita sa maong mga dapit.

Kini nga mga kombensiyon nakahatag ug talagsaong kahigayonan sa mga igsoon nga masinati mismo ang linaing “bugkos sa panaghiusa” sa atong internasyonal nga panag-igsoonay. (Col. 3:14) Pagkanindot nga makita ang gugma, kalinaw, ug panaghiusa panahon sa kombensiyon—nga nagbungkag sa ulang sa nasyonalidad, kultura, ug pinulongan! Ang tinuod nga gugma makita usab human sa sesyon samtang ang lainlaing etnikong grupo magkaubang nangaon, nagbayloayg regalo ug mga adres o numero sa telepono, nagpahulagway, ug naghalogay. Daghan sa mga delegado ug lokal nga mga Saksi ang nagsul-ob sa ilang tradisyonal nga sinina.

Usa ka espesyal nga bahin sa programa sa internasyonal nga mga kombensiyon mao ang “Taho Gikan sa Ubang Kayutaan,” nga gipresentar sa tanang upat ka adlaw. Usa ka nagapanawng magtatan-aw gikan sa Italy miingon nga kini nakatabang sa tanang nanambong nga “mobating bahin sa tinuod nga internasyonal nga panag-igsoonay sa pagkab-ot sa samang tumong—ang pagsangyaw sa Gingharian.” Pagkamakapadasig nga madungog ang mga kasinatian sa mga misyonaryo ug sa ubang bug-os panahong mga alagad nga mipauli gikan sa ilang asaynment sa laing nasod! Ang ilang maayong panig-ingnan nakadasig gayod sa mga batan-on ug tigulang!

Pagkadakong pribilehiyo nga dunay mga membro sa Nagamandong Lawas nga mitambong niining mga kombensiyona aron ipaambit ang nunot sa panahong giya ug pagdasig! Ang mga pakigpulong sa mga membro sa Nagamandong Lawas maingon man ang “Taho Gikan sa Ubang Kayutaan” dungang gihubad aron makapahimulos sa programa ang tanang grupo sa pinulongan. Pananglitan, sa ikaduhang internasyonal nga kombensiyon nga gipahigayon sa Honolulu, Hawaii, si Stephen Lett sa Nagamandong Lawas mihatag ug upat ka pakigpulong sa English nga dungang gihubad sa Chuukese, Iloko, Japanese, Mandarin, Marshallese, ug Samoan.

Sa magplanog internasyonal nga mga kombensiyon, konsiderahon sa Nagamandong Lawas ang gidak-on sa pasilidad, ang gidaghanon sa lokal nga mga igsoon ug sa mga delegado sa laing nasod, ug ang ilang kaestaran. Human niana, ang responsableng mga igsoon sa dapit nga kombensiyonan mokuhag permiso sa gobyerno ug makigkontrata sa mga tigdumala sa pasilidad.

Sanglit dagkong dulaanan ang sagad gamiton, nalangkit niini ang maayong pagplano ug dakong trabaho aron ang pasilidad mahimong haom alang sa pagsimba kang Jehova. Sa Peru, pananglitan, tungod kay dunay dula sa soccer sa adlaw una ang kombensiyon, ang mga igsoon nakasulod lamang sa estadyum pagkagabii aron hinloan ug andamon kini. Bisag 3,000 lang ang gihangyo sa pagboluntaryo, kapin sa 7,000 ka igsoon ang miabot sa 6:00 s.g. ug kuging nanghinlo sa tibuok gabii.

Human sa kombensiyon sa Long Beach, California, U.S.A., tulo ka trabahante sa arena ang miingon: “Daghan nang relihiyon ang migamit dinhi, apan dili nila matupngan ang inyong gihimo. Talagsaon kaayo kini.” Usa kanila ang miingon nga sa dihang manuktok ang mga Saksi sa ilaha, siya moingon sa kaugalingon, “Tuktok lang total walay mangabli ninyo.” Apan karon siya miingon nga kon dunay mga igsoon nga manuktok, iya na kining ablihan ug maminaw kanila. Ang usa pa miingon, “Wala koy relihiyon, apan kini ang relihiyon nga gusto kong pasakopan.”

Pagkadakong pamatuod kini diha sa mga siyudad nga gikombensiyonan alang sa kahimayaan ni Jehova! Mapasalamaton kita kang Jehova sa pagtagana niining makapalig-on sa pagtuo nga mga kombensiyon aron kita “magpadayon sa pagbantay”!—Mat. 24:42.

PAG-AWIT UG PAGDAYEG KANG JEHOVA

Ang pag-awit alang sa pagdayeg kang Jehova maoy hinungdanong bahin sa atong pagsimba. Busa sa mga kombensiyon sa 2009, nalipay kaayo ang mga igsoon sa pagkahibalo nga dunay bag-ong songbok nga Mag-awit Kang Jehova. Nganong gikinahanglan ang bag-ong songbok?

Matag karon ug unya, ang atong songbok girebisar aron mapahiuyon kini sa nag-uswag nga kahayag sa kamatuoran. (Prov. 4:18) Ang pag-andam ug bag-ong songbok maoy kahigayonan sa paghimog kausaban sa mga liriko sa atong mga alawiton. Gipili ang mga pulong aron daling masabtan ang mensahe samtang kini giawit ug aron mas dali kining mahinumdoman. Aron sayon sag-ulohon, daghang kanta ang gipamubo. Kon haom, gidugang ang mga koro aron masubli ang pangunang mga ideya. Dugang pa, gipaningkamotan nga ang matag silaba iasayn sa usa ka nota inay nga saw-ag duha ka nota.

Sa gisusi pag-ayo ang atong daang songbok nga Mag-awit ug mga Pagdayeg Kang Jehova, nakita nga kinahanglang usbon ang ubang nota aron sayon kining kantahon. Busa gipaubsag tono ang ubang awit aron dili lisod kantahon ang taas nga mga nota niini. Namatikdan usab nga dili eksaktong masunod ang liriko sa pipila ka awit. Ang tono sa ubang awit gipahaom sa mas natural nga pagkanta niini sa mga igsoon sa tibuok kalibotan.

Gihatagan usab ug maampingong pagtagad ang ubang detalye, sama sa gitas-on sa awit diha sa panid. Bisan tuod gipaigo sa duha ka panid ang tag-as nga mga awit, gipahiluna kini nga dili na kinahanglang mopakli pa. Wala nay awit nga mokapig tulo ka estansa.

Sa unsang paagi nalampos kining dakong proyekto sa pag-andam ug bag-ong songbok? Sa Agosto 2007, usa ka tem sa eksperyensiyadong mga tigkomposo ug mga lyricist gidapit sa pagtabang sa Nagamandong Lawas alang niini. Ang tanang awit sa daang songbok gisusi pag-ayo aron makita ang angayng usbon labot sa doktrina, pulong nga gipasiugda, ug sa tono. Nakita nga ang pipila sa daang tono maayo ra apan kinahanglan nang bag-ohon ang liriko. Ang ubang awit nga gamay rag usbonon sa liriko dakog usbonon sa tono. Dayon ang Komite sa Pagtudlo sa Nagamandong Lawas nag-aprobar ug mga ulohan nga himoong awit diha sa mga tigom sa kongregasyon, asembliya, kombensiyon, ug mga programa sa pagpahinungod.

Dugang pa, gisusi pag-ayo sa mga tigkomposo ang estilo sa musika nga gigamit sa mga igsoon sa atong mga tigom. Aron makakomposog solemne apan nindot nga mga awit, ilang gilikayan ang tono nga amgid sa mga himno sa mga simbahan sa Kakristiyanohan. Gilikayan usab nila nga ang mga awit sa pagdayeg kang Jehova mahisama sa estilo nga popular sa daghang karismatik nga mga simbahan.

Sa tibuok proyekto, gisusi kanunay sa Nagamandong Lawas ang honi ug liriko sa matag awit. Ang mga bag-ong awit nga dili pamilyar sa Nagamandong Lawas gikanta ug girekord aron ilang mapaminawan ug marepaso. Sa dihang maaprobahan, kini ipadala ngadto sa mga sangang buhatan aron mahubad ug maluwatan dungan sa English nga songbok.

Dugang pa, sa 2007, ang Nagamandong Lawas nag-organisar ug grupo sa mga mag-aawit aron irekord ang mga awit nga makatabang sa mga kongregasyon nga makat-onan kini. Sulod na sa daghang tuig, usa ka orkestra gikan sa 14 ka sanga ang magtigom mga duha ka beses kada tuig sa Patterson, New York aron sa pagrekord ug mga musika alang sa edukasyonal nga mga programa sa mga Saksi ni Jehova, lakip sa mga drama, video, ug mga musika sa kombensiyon ug asembliya. Kining makugihong mga igsoon, nga ang kadaghanan bug-os panahong ministro, naggamit sa ilang panahon ug salapi sa pagbiyahe aron magrekord ug musika para sa mga igsoon sa tibuok kalibotan. Ang tanan batid nga mga musikero. Ang mga rekording sa orkestra ipadala sa mga sanga sa tibuok kalibotan aron gamiton sa mga kombensiyon ug aron sa pagrekord ug gikanta nga awit diha sa lokal nga mga pinulongan. Daghan sa gikanta nga mga rekording ma-download na sa atong Website nga www.jw.org.

Unsay komento sa mga igsoon sa bag-ong songbok nga Mag-awit Kang Jehova? Kining sulat gikan sa usa ka sister susama sa gatosan ka sulat sa apresasyon nga nadawat: “Una sa tanan gusto kong magpasalamat sa maanindot nga mga awit sa atong bag-ong songbok. Kini makapatandog, makapalig-on sa pagtuo, ug makapahupay—usa ka bililhong gasa gikan kang Jehova.”

Malaomon kami nga ang songbok nga Mag-awit Kang Jehova makapahupay ug makapadasig sa mga igsoon sa tibuok yuta. Nag-inusara man o nagtigom, hinaot nga atong gamiton kini sa pagpahayag sa atong gugma sa atong langitnong Amahan, si Jehova!

“PAGATARALON ATUBANGAN SA MGA GOBERNADOR UG SA MGA HARI . . . INGONG USA KA PAGPAMATUOD”

Giingnan ni Jesus ang iyang mga tinun-an nga sila pagataralon atubangan sa “lokal nga mga korte,” ug sa “mga gobernador ug sa mga hari.” Bisan pa niana, siya miingon nga kini maoy “usa ka pagpamatuod kanila ug sa mga nasod.” (Mat. 10:17, 18) Sa miaging tuig, nasinati gayod sa mga Saksi ni Jehova ang gitagna ni Jesus. Ug sama sa giingon sa ilang Agalon, ang pagmaltratar kanila naghatag kahigayonan nga sila makapamatuod.

Armenia

Si Vahan Bayatyan nga usa sa mga Saksi gibilanggo sa duha ug tunga ka tuig kay midumili sa pagsundalo tungod sa tanlag. Human mapildi ang iyang kaso ug pag-apelar sa mga korte sa Armenia, iya kining gisang-at sa European Court of Human Rights (ECHR) niadtong 2003. Sa kataposan, sa Oktubre 27, 2009, ang ECHR mihukom pabor sa Armenia pinasukad sa hukom nga gipakanaog kapin sa 50 ka tuig kanhi. Apan ang usa ka huwes nga wala mouyon miingon nga kini “dili subay sa bag-ong pamalaod sa Europe bahin sa pagdumili tungod sa tanlag.”

Tungod sa kahinungdanon niini nga isyu, miuyon ang European Court nga kini isang-at sa Grand Chamber niini. Ang husay gieskedyul sa Nobyembre 24, 2010 sa Strasbourg, France. Ang desisyon sa Grand Chamber wala pa mahibaloi sa dihang gipatik kini nga report.

Azerbaijan

Ang mga Saksi ni Jehova nalisdan gihapon sa pagpasulod ug mga literatura nganha sa nasod. Ang mga awtoridad nagtugot sa pagpasulod ug pipila ka literatura samtang ang uban gidili kay matod nila “ang kaundan niini nagtuboy sa tinuohan sa mga Saksi ni Jehova ug makapasuko sa ubang Kristohanong relihiyon.” Tungod niini, ang mga balay sa ubang igsoon gisusi, ug gikompiskar ang ilang mga literatura.

Niadtong Abril 25, 2010, sa siyudad sa Qazax, mga 250 ka igsoon sakay sa lima ka bus ug usa ka van ang mipauli gikan sa asembliya sa Georgia. Pag-abot nila sa utlanan, gikompiskar sa mga polis ang ilang literatura, lakip na ang 33 ka Bibliya. Daghan kanila, bisan ang mga tigulang ug maluyahon, naghulat ug walo ka oras sa utlanan una palargaha. Aron malikayan ang mga panghitabo nga sama niini ug maseguro nga padayong makadawat ug espirituwal nga pagkaon ang mga igsoon sa Azerbaijan, kini nga isyu gisang-at sa ECHR.

Belarus

Sa Nobyembre 6, 2009, si Dmitry Smyk nga usa ka Saksi ni Jehova gipamulta ug 3,500,000 ka ruble ($1,154 U.S.) kay dili magsundalo. “Naningkamot ko nga magmatinumanon sa Bibliya sa tanang bahin sa akong kinabuhi,” matod ni Brader Smyk, “ug akong gisunod ang mga pagtulon-an niini. Para nako, ang Bibliya wala motugot nga ang usa magbansay o moapil sa gubat.”—Isa. 2:1-4.

Bisan pag ang Konstitusyon sa Belarus nagtugot nga makapilig alternatibong serbisyo, walay probisyon sa balaod kon unsaon kini paghimo. “Sa papel maorag duna koy katungod nga mopilig alternatibong serbisyo,” matod ni Brader Smyk, “apan sa pagkatinuod dili nako magamit ang maong katungod.”

Aron matul-id kini nga depekto sa balaod, sa Pebrero 18, 2010, ang presidente sa Belarus nagpormag komisyon sa paglatid ug balaod maylabot sa alternatibong serbisyo. Wala magdugay, nakita sa korte nga inosente si Brader Smyk ug gikanselar ang iyang multa. Tungod kay ang ubang batan-ong Saksi sa Belarus nag-atubang sa samang isyu ug dili gustong magbansay sa gubat, gilaoman nga ang gobyerno makahimog probisyon sa alternatibong pagserbisyo.

Belgium

Ang propiedad sa Bethel didto sa Brussels, Belgium libre sa buhis sama sa tanang relihiyosong tinukod sa Belgium. Apan sa 1993, giusab sa administrasyon sa pagbuhis ang ilang patakaran ug gipabuhisan na kini. Ang Bethel kono dili lang para sa relihiyon kondili sa negosyo usab, ug ang mga Bethelite dili bug-os nga nagtrabaho para sa relihiyosong kalihokan. Gihusay sa ubos nga korte ang kaso niadtong 2008, apan ang huwes mihukom pabor sa administrasyon sa pagbuhis. Ang desisyon giapelar, ug sa Mayo 4, 2010 gibali sa korte sa apelasyon ang desisyon sa ubos nga korte. Sa sinulat nga desisyon, ang tulo ka huwes miingon: “Ang kinabuhi sa Bethel para sa mga Saksi nga nagpuyo didto maoy pinasukad sa lalom nga relihiyosong pagtuo nga nagkinahanglag bug-os nga pagsakripisyo alang sa pag-alagad sa Diyos. . . . Silang tanan maoy mga membro sa Tibuok-Kalibotang Orden sa Linaing Bug-os Panahong mga Alagad, ug sila magkaubang nagpuyo, nag-ampo, nag-awit, ug nagtuon sa Bibliya. Ila usab nga gisuportahan ang ilang pagsimba sa buntag.”

Eritrea

Ang mga Saksi ni Jehova sa Eritrea padayong nakasinatig kalisdanan sa ilang pag-alagad sa Diyos. Karon dunay 58 ka Saksi ang nabilanggo, apil ang mga babaye ug mga bata. Tungod sa mga pagdili sa gobyerno ug sa hulga sa pag-aresto, lisod makakuhag impormasyon bahin sa mga nabilanggo. Sulod sa katuigan, ang mga Saksi naningkamot sa pagtabang sa mga igsoon sa Eritrea pinaagi sa ubang ahensiya. Ang mga igsoon miapelar sa mga opisyal sa U.S. Department of State, sa European Union, ug sa lainlaing embahada. Nakigkita usab sila sa daghang opisyal sa Horn of Africa, sama sa mga hawas sa African Union. Di pa dugay, ang mga igsoon nagpadalag sulat ug listahan sa mga nabilanggo nga ang edad dili mahimong magsundalo ngadto sa 18 ka embahada sa Eritrea sa tibuok kalibotan. Ang sulat naghangyo kang Presidente Afewerki nga buhian ang tanang nabilanggo nga ang edad dili mahimong magsundalo, apil na ang mga bata ug tigulang. Sa pagkakaron wala pay tubag ang gobyerno.

Greece

Sa Enero 15, 2010, midesisyon ang korte suprema sa Greece, ang Council of State, nga si Evangelos Delis nga usa ka Saksi ni Jehova dunay katungod nga modumili sa pagserbisyo sa militar ingong reserbado. Si Brader Delis maoy usa ka sundalo una ma-Saksi, apan sa dihang gitawag aron sa pagbansay, siya midumili pinasukad sa iyang tanlag nga nabansay sa Bibliya. Bisan pag gibalibaran sa Administrasyon ang iyang hangyo nga dili magsundalo tungod sa tanlag, ang Council of State nga nagkutlo sa pamalaod sa European Convention of Human Rights miingon nga ang usa dunay katungod sa pagbag-o sa iyang relihiyon bisan human makaserbisyo sa militar ug sa dili pagsundalo pinasukad sa iyang bag-ong relihiyon. Kining positibong desisyon sa korte suprema sa Greece makatabang gayod niadtong dili magsundalo tungod sa tanlag didto sa Greece ug sa ubang nasod, sama sa Armenia, Azerbaijan, South Korea, ug Turkey.

Portugal

Sa Septiyembre 25, 2009, giaprobahan sa Ministry of Justice ang Association of Jehovah’s Witnesses ingong dugay nang naglungtad nga relihiyosong komunidad. Karon nabatonan na sa mga Saksi sa Portugal ang kinatas-ang hudisyal ug relihiyosong pag-ila, nga makatabang kanila sa pagpalampos sa ilang ministeryo. Kini makahatag ug daghang kaayohan sa katawhan ni Jehova. Lakip niini mao ang pag-awtorisar ug mga ministro aron mokasal diha sa mga Kingdom Hall maingon man sa pag-adto ug mga ospital ug mga prisohan aron sa paghatag ug espirituwal nga tabang niadtong mohangyo niini.

Puerto Rico

Usa ka hinungdanong desisyon ang gipakanaog sa Korte Suprema sa Puerto Rico niadtong Enero 27, 2010 nga nagpabor sa katungod sa adultong pasyente nga modumili ug pamaagi sa pagtambal. Giila usab sa korte ang katungod sa pasyente sa paggamit ug abanteng direktiba ug sa pagtudlog tig-atiman sa panglawas nga maoy mohawas kaniya kon siya walay panimuot. Si Victor Hernandez nga usa ka Saksi abanteng nag-andam ug direktiba una nagpaospital. Una pa niini, ang usa ka ubos nga korte midumili sa pagsunod sa desisyon ni Brader Hernandez segun sa nasulat sa iyang direktiba nga gisuportahan sa iyang tig-atiman sa panglawas. Sa pagbali sa desisyon sa ubos nga korte, ang Korte Suprema miila “sa pangunang katungod sa usa ka tawo nga panalipdan ang iyang lawas.” Kini nga kadaogan maghatag ug kaayohan dili lang sa kapin sa 25,000 ka Saksi ni Jehova dinhi kondili sa tanang pasyente sa Puerto Rico.

Russia

Sa di pa dugayng mga bulan, ang giniyahan sa espiritu nga kalihokan sa katawhan ni Jehova nakasinatig kinagrabehang hulga sukad mabungkag ang Soviet Union. Sa Disyembre 8, 2009, giuyonan sa Korte Suprema sa Russia ang desisyon sa ubos nga korte sa Rostov nga hanawon ang atong relihiyosong organisasyon sa Taganrog, kompiskahon ang Kingdom Hall, ug ideklarar ang 34 sa atong publikasyon ingong kontra-gobyerno, apil na ang kaylap gibasa nga mga librong Unsay Tinuod nga Gitudlo sa Bibliya?, Akong Basahon sa mga Estorya sa Bibliya, ug “Umari Ka, Mahimong Akong Sumusunod.”

Pipila ka semana sa ulahi, ang Korte Suprema sa Altay Republic, sa habagatang Russia, mihimog samang desisyon sa siyudad sa Gorno-Altaysk, diin 18 pa ka publikasyon ang gideklarar nga kontra-gobyerno. Tungod niini imposible ang pagpasulod sa maong mga publikasyon sa Russia ug misamot kaaresgado ang mga kaaway ni Kristo sa paghulga ug pag-atake sa iyang malinawong mga sumusunod diha sa lainlaing siyudad. Sukad sa Disyembre 8 nga desisyon, diha nay kapin sa 300 ka pagronda, pag-aresto, pagrekisa sa mga balay, ug ubang pagbalda sa mga panagkatigom.

Agig sanong, giaprobahan sa Nagamandong Lawas ang pagpanagtag sa 12 ka milyong kopya sa linaing tract nga nag-ulohang Could It Happen Again? A Question for the Citizens of Russia. Gipakita niini ang kaamgiran sa pag-atake batok sa mga Saksi panahon sa mga Komunista ug sa nahitabo karon. Gipanagtag kini sa mga Saksi sa tibuok Russia tali sa Pebrero 26 ug 28, 2010. Bisan pa sa grabeng katugnaw nga miabot ug -40°C, napanagtag sa daghang kongregasyon ang tanan nilang tract sulod lang sa duha ka adlaw.

Agig balos, sa Abril 26, 2010, gikanselar sa Federal Service for the Oversight of Communications, Information Technology and Mass Communications (Roskomnadzor) ang atong lisensiya sa pagpasulod sa mga magasing Bantayanang Torre ug Pagmata!

Apan “ang kamot ni Jehova wala mahimong mubo kaayo nga kana dili makaluwas.” (Isa. 59:1) Sa Hunyo 10, 2010, nagpakanaog ang European Court of Human Rights (ECHR) ug hinungdanong desisyon batok sa Russia ug pabor sa atong buluhaton. Sumala sa desisyon sa kaso nga Jehovah’s Witnesses of Moscow v. Russia, ang paghanaw ug pagbando sa kalihokan sa Moscow Community of Jehovah’s Witnesses maoy ilegal ug supak sa pangunang tawhanong katungod sa kagawasan sa panghunahuna, tanlag, ug relihiyon. Ang paghanaw ug pagbando gipatuman sa Moscow sukad sa Marso 26, 2004 nga nakapasamot sa pagpangatake. Kini nga desisyon dayag nga nag-ingong ang gobyerno sa Russia “dunay legal nga obligasyon . . . nga hunongon ang paglapas nga nakita sa Korte ug sa pagbayad sa nahimong kadaot.”

Gipunting niining hinungdanong desisyon ang siyam ka kadaogan sa mga Saksi ni Jehova diha sa taas nga mga korte sa Canada, Japan, Russia, South Africa, Spain, United Kingdom, ug United States, maingon man sa walo ka naunang desisyon sa ECHR nga pabor sa mga Saksi. Pinaagi niini, gikompirmar sa korte nga ang ECHR padayong nagtuo nga husto ang ilang gipakanaog nga desisyon sa naunang mga kaso. Pinasukad sa European Convention of Human Rights ug sa naunang mga desisyon, ang korte mihukom nga ang mga Saksi ni Jehova dili sad-an sa bisan unsang giakusar kanila sa gobyerno sa Russia.

“Ang . . . komunidad sa mga Saksi ni Jehova,” matod sa korte, “naglungtad na ug legal nga giila diha sa Moscow sa kapin na sa dose ka tuig, sukad sa 1992 hangtod sa 2004. Panahon sa legal nga paglungtad niini, ang . . . komunidad, ang mga ansiyano ug mga membro niini wala gayod makahimog bisan unsang krimen o salaod o kadaot sa katilingban.” Busa ang korte mihukom nga ang mga katungod sa mga Saksi ni Jehova nalapas ug nga midugang, “ang . . . Estado dunay legal nga obligasyon . . . sa pagpangitag . . . mga pamaagi nga ipadapat diha sa ilang balaod aron mahunong ang mga paglapas nga nakita sa Korte.”

Sa Septiyembre 9, 2010, ang gobyerno sa Russia mihangyo nga isang-at kini nga kaso sa Grand Chamber sa korte, nga usa gayod ka taktika aron malangay ang ilang pagsunod sa desisyon. Itugot man ni Jehova nga repasohon kini sa Grand Chamber o dili, kita makatino nga dakong pamatuod ang ikahatag niini.

Serbia

Human sa kaso sa korte nga miabot ug halos upat ka tuig, girehistro sa Serbian Ministry of Religious Affairs ang “Jehovah’s Witnesses—Christian Religious Community” diha sa Register on Churches and Religious Communities sa Serbia. Una pa niini, ang ahensiya midumili sa tulo ka aplikasyon sa pagrehistro, bisan pag ang mga grupo sa International Bible Students, nga maoy pagtawag sa mga Saksi ni Jehova kaniadto, naglungtad na didto sukad pa sa sayong katuigan sa 1920. Apan human mipakanaog ang Korte Suprema sa Serbia ug duha ka desisyon nga pabor kanato, ang Ministry of Religious Affairs miuyon sa pagrehistro kanato.

Sa miagi, ang mga kaaway—sa tabang sa media—sagad nagtawag sa mga Saksi ni Jehova ingong peligrosong sekta. Ang pagrehistro ingong legal nga relihiyosong komunidad makatabang gayod sa sinserong mga tawo sa Serbia nga makita nga ang mga Saksi ni Jehova maoy maayong mga lungsoranon nga nagtahod sa balaod ug dili hulga sa komunidad o sa matag tawo. Ingong unang resulta, ang mga literatura ug uban pang mga kinahanglanon alang sa mga tigom ug pagsangyaw mahimo nang ipasulod sa nasod nga walay bayad o buhis.

Slovenia

Sa Nobyembre 27, 2009, ang “Jehovah’s Witnesses—Christian Religious Community” giapil diha sa rehistro sa mga simbahan ug ubang relihiyosong komunidad nga gihuptan sa Republika sa Slovenia. Ang direktor sa Office for Religious Communities nagpahibalo sa atong mga hawas nga sa 40 ka relihiyosong organisasyon ug grupo sa Slovenia, ang “Jehovah’s Witnesses—Christian Religious Community” mao ang ikawalo nga narehistro pag-usab ubos sa bag-ong Religious Freedom Act. Kini nga pagrehistro makatabang aron ang bug-os panahong mga ministro makadawat ug mga benepisyo sa gobyerno para sa tanang mohimog relihiyosong serbisyo nga bug-os panahon.

Turkey

Ang mga Saksi ni Jehova sa Mersin naggamit sa ilang Kingdom Hall sa mga 20 na ka tuig. Dayon sa Agosto 2003, kini gipasira sa awtoridad tungod sa paglapas sa balaod bahin sa pagtukod, nahiangayng paggamit, ug lokasyon sa pasilidad. Bisan pa sa paningkamot sa mga igsoon sa pag-apelar sa mga korte, sa Disyembre 30, 2009, ang korte suprema sa Turkey midumili sa apelasyon ug mipabor sa opisina sa gobernador sa Mersin. Karon ila na kining gisang-at sa ECHR.

MILIHOK ANG INIGSOONG GUGMA SA HAITI

Sa Enero 12, 2010, gipayhag sa kusog kaayong linog ang Port-au-Prince nga kaulohan sa Haiti ug ang sikbit nga mga dapit. Gatosan ka libo ang namatay ug daghan ang nawad-ag pinuy-anan. Pipila ka libo usab sa mga Saksi ni Jehova ang nawad-ag pinuy-anan, ug 154 ang namatay. Daghan ang naangol o hapit mamatay.

Si Acloque anaa sa iyang balay sa paglinog. Ang mga bungbong ug mga haloblak nangatumba samag domino, ug siya naipit diha sa salog tungod sa nahagsang atop. Hinuon, wala ra kaayo siya maunsa ug misugod sa pagpangapkap sa palibot tungod sa kangitngit. “Nahikapan ko ang balde sa tubig,” matod ni Acloque. “Dili ko kini mabira, apan akong ikatuslo ang akong mga tudlo sa tubig ug ipatulo kana sa akong baba. Nakakuha sab kog bato nga akong ikadukdok aron dunay makamatikod nako.” Siya nag-ampo alang sa tabang ug padayong nagdukdok sa bato ug nagpaabot.

“Wala koy relo ug wala koy ideya kon unsa na kadtong orasa,” matod ni Acloque. “Sa sinugdan, ako mihilak ug mihangyo kang Jehova nga luwason. Apan sa paglabay sa panahon, nausab ang akong pag-ampo. ‘Ako nahibalo nga imo kong banhawon,’ ako miampo. ‘Apan batan-on pa ko! Kon dili ko mamatay, makaalagad pa ko nimo.’”

Ngadtongadto, naluya na kaayo si Acloque ug wala na siyay kusog bisan sa pagdukdok sa bato. Dayon siya nawad-ag panimuot.

Sa naulian si Acloque, ang mga Saksing rescuer naningkamot nga makuha siya. “Kalit lang nga natangtang ang konkreto nga nagdat-og sa akong bitiis,” siya miingon. “Ako nakaamgo nga ang sunod nga hapak moigo sa akong tuhod, busa akong gipalusot ang akong kamot sa buho ug gikab-ot ang bukton sa rescuer.” Wala magdugay nasalbar si Acloque human sa upat ka adlaw niyang pagkaipit didto.

DIHADIHANG PAGPADALAG HINABANG

Sulod lang sa 24 oras, miabot ang unang Saksing doktor gikan sa sanga sa Dominican Republic. Dayon misunod ang uban pang Saksing doktor ug nars kauban sa mga nagdalag hinabang. Gitukod dayon ang usa ka temporaryong ospital diha sa propiedad sa sanga, diin kapin sa 1,000 ka Saksi ug dili Saksi ang gitambalan.

Lakip sa mga pasyente mao ang duha ka batan-ong babaye nga parehong naputlag tuong bukton. “Sama sa ubang tagsaanong pasyente nga naputlag bukton,” matod ni Mylène nga usa ka boluntaryo, “sila nabalaka nga dili na maminyo o makabatog pamilya.” Busa gikontak ni Mylène ang usa ka sister nga taga-France nga naputlag bukton sa bata pa tungod sa aksidente sa sakyanan ug gihangyo siya nga dasigon kining duha ka babaye. Ang sister sa France nagpadalag mga hulagway diha sa e-mail uban sa iyang bana ug duha ka matahom nga anak. Nahupayan niini ang duha ka batan-ong pasyente, nga karon nakadawat na sa ilang kahimtang.

Gawas pa sa pagkaon, besti, ug tambal, ang mga nakalingkawas nanginahanglan dayog kapuy-an. Ang mga boluntaryong Saksi gikan sa Haiti ug sa ubang nasod nagtukod ug kapin sa 1,700 ka temporaryong puy-anan aron kasilongan sa ulan ug kaestaran sa mga pamilyang Saksi nga nawad-ag balay. Pagka-Hunyo, ang mga boluntaryo nagsugod sa pagtukod ug temporaryong mga Kingdom Hall, ug pagka-Hulyo ang gobyerno miisyu sa unang permiso sa pagtukod ug permanenteng mga Kingdom Hall.

PISIKAL, EMOSYONAL, UG ESPIRITUWAL NGA PAGPANG-AYO

Pagka-Marso, usa ka Saksing doktor nga batid sa pagtambal ug post-traumatic stress disorder nakigkita sa mga ansiyano sa 115 ka kongregasyon nga naapektohan sa linog. Siya naghatag kanilag praktikal nga mga sugyot kon unsaon paghatag ug espirituwal nga suporta sa mga membro sa ilang kongregasyon nga na-trauma. Human niana, siya personal nga nakigkita sa kapig 100 ka igsoon nga nagkinahanglag linaing atensiyon.

Wala madugay human sa linog, si David Splane sa Nagamandong Lawas miadto sa Haiti aron sa paghupay ug sa pagdasig. Si Brader Splane, nga makasultig French, mipakigpulong sa usa ka sirkitong asembliya ug nakighimamat sa pamilyang Bethel, mga misyonaryo, ug mga magtatan-aw sa sirkito. Ang tanan nagpabili gayod sa iyang mahigugmaong kabalaka ug sa pagmahal sa Nagamandong Lawas.

Bisan pa sa daw dagkong mga babag, ang Bag-ong Kalibotang Hubad sa Kristohanon Gregong Kasulatan sa pinulongang Haitian Creole nakompleto, naimprenta, ug napadala sa sanga. Kini miabot pipila na lang ka oras una luwatan sa distritong kombensiyon sa Hulyo. Sulod sa daghang kalihokan sa 2010, sugod sa unang pagpadalag hinabang hangtod karon, ang tanang nalangkit nakakita sa paggiya ug pagpaluyo ni Jehova sa tanang paagi. Kanunay gayod nga ang mga suplay, transportasyon, ug mga boluntaryo moabot sa hustong panahon ug sa mga paagi nga dili gayod ikaingong sulagma lang. Matod pa sa usa ka karaang misyonaryo, “Kinahanglang ania ka dinhi aron imong makita kon sa unsang paagi tin-awng gigiyahan ni Jehova ang mga butang.”

PAGPAHINUNGOD SA MGA SANGANG BUHATAN NAGHIMAYA SA DIYOS

Ang Pebrero 13, 2010 maoy dili malimtang adlaw sa mga Saksi ni Jehova sa Solomon Islands. Si Stephen Lett, nga membro sa Nagamandong Lawas, mihatag sa pakigpulong sa pagpahinungod diha sa bag-ong pasilidad sa sanga didto. Lakip sa 368 nga mitambong mao ang unang lokal nga Saksi, si Clement Fa’abasua. Usa ka bulan una pa niana, gibuksan ang pasilidad para sa tanang anaa sa palibot nga buot mosuroy, ug 273 ang miadto. Usa sa mga mibisita mao ang usa ka arkitekto, ug siya misulat sa nag-unang mantalaan sa nasod: “Sa katibuk-an, ang tibuok pasilidad kahatagag triple A. Usa kini ka modelo sa komunidad sa Solomon Islands aron makita kon unsay puwedeng himoon dinhi bisag kinsa pay mogamit. Ang nagdisenyo, ang mga nagtrabaho, ug ang mga administrador daw nakahimog mutya diha sa paraiso.”

Usa ka halandomong pagpahinungod ang gipahigayon sa sanga sa Estonia sa Sabado, Abril 3, 2010. Ang 438 nga mitambong nakapahimulos sa programa nga naglakip sa pakigpulong sa pagpahinungod nga gihatag ni Christian Muntean, gikan sa sanga sa Greece. Napalit sa sanga ang dos andanas nga bilding sa tapad niini nga gipanag-iya sa lokal nga kompaniya sa tubig. Kini giayo ug gihimong audio ug video studio maingon man klasehanan sa mga tunghaan, sama sa Bible School for Single Brothers.

Ang sanga sa silingang Latvia gipahinungod sa Abril 10, 2010. Human unang nakaabot ang maayong balita sa Latvia niadtong 1918, ang atong buluhaton grabeng gisupak sulod sa mga dekada. Apan karon mauswagon na ang pagsangyaw sa Latvia ug 248 ang mitambong apil na ang mga delegado gikan sa siyam ka nasod aron mamati sa pakigpulong sa pagpahinungod nga gihatag ni Christian Muntean.

Sa Sabado, Mayo 8, 2010, kapin sa 2,200 ang nakapamati sa pakigpulong sa pagpahinungod nga gihatag ni Gerrit Lösch sa Nagamandong Lawas didto sa sanga sa Paraguay. Gitukod ang usa ka puy-anan nga may 32 ka lawak ug bag-ong mga opisina, ug ang presenteng puy-anan giayo ug gibag-o. Dugang pa, gihimo ang usa ka tangke sa tubig ilalom sa yuta nga kasudlag 10,000 ka galon. Sukad sa pagsugod, ang lokal nga awtoridad nakadayeg kaayo sa kalidad sa konstruksiyon nga gihimo sa internasyonal ug lokal nga mga boluntaryo. Ang usa ka opisyal miingon nga daghag problema ang mga tinukod sa ubang relihiyon apan ang mga Saksi ni Jehova nailhan nga maayo kaayo sa pagpanukod. Ingong resulta, dili gayod lisod ang pagkuhag permiso sa pagpanukod didto sa sanga.

Sa sanga sa Papua New Guinea niadtong Sabado, Mayo 29, 2010, halos 500 ka igsoon gikan sa 12 ka nasod ang nagtigom ug namati sa pakigpulong sa pagpahinungod nga gihatag ni Winston Payne gikan sa sanga sa Australia. Ang gipadak-ang sanga naglakip sa upat ka andanang tinukod nga may mga lawak, kan-anan, kosina, ug labhanan; usa ka bilding para sa ubang buluhaton sa Bethel ug may Kingdom Hall; ug dakong opisina para sa paghubad. Lakip sa mga nanambong mao ang usa ka grupo sa mga Saksing mibaktas ug unom ka adlaw agi sa kabukiran. Sila nagsul-ob sa ilang tradisyonal nga besting Orokaiva ug mainitong miabiabi sa mga bisita pinaagig sayaw ug kanta. Usa ka karaang sister nga naghilak mipahayag sa gibati sa daghan sa dihang siya miingon, “Karon daw naa na ko sa Paraiso!”

“MAGPADAYON SA PAGPAMUNGAG DAGHAN”

Walay duhaduha nga ang hiniusang paningkamot sa mga Saksi ni Jehova padayong maghimaya sa Diyos. “Ang akong Amahan mahimaya niini,” matod ni Jesus, “nga kamo magpadayon sa pagpamungag daghan ug magpamatuod nga akong mga tinun-an.” (Juan 15:8) Uban sa panalangin ug mahigugmaong paggiya ni Jehova, sila maningkamot nga “magalakaw nga takos kang Jehova aron bug-os nga makapahimuot kaniya samtang padayon [silang] magapamunga sa tanang maayong buhat ug molambo sa tukmang kahibalo sa Diyos, nga gihimong gamhanan sa bug-os nga gahom sumala sa iyang mahimayaong gahom aron makaantos sa bug-os ug magpakitag hataas-nga-pailob uban ang kalipay.”—Col. 1:10, 11.

[Hulagway sa panid 8]

Gipadayon ni Natsue ang iyang pagtuon sa Bibliya

[Mga hulagway sa panid 11]

Mga tigpanukiduki nga nagsusi pag-ayo sa impormasyon

[Hulagway sa panid 13]

Korea

[Hulagway sa panid 14]

Mexico

[Mga hulagway sa panid 14]

South Africa

[Hulagway sa panid 15]

Si Stephen Lett diha sa usa sa internasyonal nga mga kombensiyon sa Hawaii

[Hulagway sa panid 22]

Si Dmitry Smyk

[Hulagway sa panid 25]

Si Evangelos Delis

[Hulagway sa panid 25]

Ang sertipiko nga giisyu sa Ministry of Justice

[Hulagway sa panid 33]

Miabot ang mga Saksing doktor wala madugay human sa linog

[Hulagway sa panid 33]

Mga boluntaryong gikan sa Haiti ug sa ubang nasod nagtukod ug kapin sa 1,700 ka temporaryong puy-anan

[Hulagway sa panid 34]

Ang “Bag-ong Kalibotang Hubad sa Kristohanon Gregong Kasulatan” giluwatan sa pinulongang Haitian Creole

[Hulagway sa panid 36]

Gipadak-ang sanga sa Estonia

[Hulagway sa panid 37]

Ang sanga sa Paraguay

[Mga hulagway sa panid 37]

Si Winston Payne mihatag sa pakigpulong sa pagpahinungod sa sanga sa Papua New Guinea