Gitubag ang mga Pag-ampo sa Babayeng Buta

Si Yanmei, usa ka Saksi sa Asia, mitabang sa babayeng buta nga ginganlag Mingjie sa pagtabok sa kalsada.a Si Mingjie miingon niya: “Salamat. Panalanginan unta ka sa Diyos!” Human niana, gipangutana ni Yanmei si Mingjie kon mosugot ba siya nga maghisgot sila bahin sa Bibliya sa sunod higayon. Sa ulahi, miingon si Mingjie nga kada adlaw siyang nag-ampo nga giyahan siya ngadto sa tinuod nga katawhan sa Diyos. Nganong iya kining giampo?

Si Mingjie miingon nga niadtong 2008, gidawat niya ang imbitasyon sa iyang amiga nga buta nga motambong sa simbahan nga nagtabang sa mga baldado. Human makapaminaw sa wali, gipangutana ni Mingjie ang pari kon unsa nga libro ang iyang gikutlo. Giingnan niya si Mingjie nga gikan kini sa Bibliya, ang Pulong sa Diyos. Gusto kaayo ni Mingjie nga basahon kini. Busa mipalit siyag braille nga Bibliya sa Chinese nga pinulongan ug gibasa ang 32 ka tomo sulod sa mga unom ka bulan. Sa iyang pagbasa sa Bibliya, iyang nasabtan nga sayop ang doktrina sa Trinidad nga gitudlo sa simbahan ug dunay ngalan ang Diyos, si Jehova.

Ngadtongadto, si Mingjie nadismaya sa binuhatan sa mga membro sa simbahan. Naamgohan niya nga wala sila magkinabuhi sumala sa gitudlo sa Bibliya. Pananglitan, ang mga buta hatagan ug salin nga pagkaon samtang ang uban makadawat ug preskong pagkaon. Nasakitan si Mingjie sa maong inhustisya, maong nangita siyag laing simbahan sa ilang lugar. Mao nay rason nga nag-ampo si Mingjie nga makita unta niya ang tinuod nga mga Kristohanon.

Tungod sa kaayo nga gipakita ni Yanmei, gidawat ni Mingjie ang iyang tanyag nga mag-Bible study. Sa ulahi, si Mingjie mitambong ug tigom sa mga Saksi ni Jehova. Siya nahinumdom: “Di gyod nako malimtan ang una nakong pagtambong sa tigom. Giabiabi gyod ko sa mga igsoon. Natandog kaayo ko. Bisag buta ko, gibati nako ang tinuod nga gugma didto.”

Si Mingjie miuswag ug regular nang tigtambongan sa mga tigom. Ganahan siyang mokanta sa mga Kingdom song, pero naglisod siya kay wala pay braille nga songbook sa iyang pinulongan. Busa sa tabang sa kongregasyon, nakahimo si Mingjie ug kaugalingon niyang songbook. Nahuman niyag transcribe ang 151 ka awit sulod sa 22 ka oras! Niadtong Abril 2018, si Mingjie misugod sa pagpakigbahin sa publikong pagsangyaw ug migahin ug mga 30 ka oras kada bulan sa pagsangyaw.

Aron makapangandam si Mingjie sa bawtismo, naghimo si Yanmei ug audio recording sa mga pangutana ug mga teksto sa Bibliya sa librong Organisado Aron Buhaton ang Kabubut-on ni Jehova. Nabawtismohan si Mingjie niadtong Hulyo 2018. Siya miingon: “Natandog kaayo ko sa gipakitang gugma sa mga igsoon sa maong kombensiyon. Nakahilak ko sa kalipay kay apil na gyod ko sa tinuod nga katawhan sa Diyos.” (Juan 13:34, 35) Kay gipakitaan man si Mingjie ug gugma, gusto sab niya nga magpakitag gugma sa uban, ug karon siya nag-alagad ingong bug-os panahong magsasangyaw.