TABANG ALANG SA PAMILYA | KAMINYOON
Kon Unsaon nga Malikayan ang Pagselos
Dili magmalipayon ang magtiayon kon pirme nilang dudahan ang ilang kapikas ug wala silay pagsalig sa usag usa. Busa sa unsang paagi malikayan ang sayop o dili angay nga pagselos?
Niining artikuloha
Unsa ang pagselos?
Ang pulong nga “pagselos” naay lainlaing kahulogan. Niining artikuloha, kini nagtumong sa atong bation kon naay makagusto sa atong kapikas o kaha ang atong kapikas morag nakagusto sa lain. Mobati tingali ta nga nameligro ang atong kaminyoon. Kon mao gyod nay kahimtang, normal lang ug haom ang pagselos. Ang kaminyoon maoy panaghiusa sa duha ka tawo, ug angay lang nga himoon sa magtiayon ang ilang maarangan aron maproteksiyonan kini.
Prinsipyo sa Bibliya: “Dili na sila duha, kondili usa ka unod. . . . Kon unsay gihiusa sa Diyos dili angayng bulagon sa tawo.”—Mateo 19:6.
“Kon naay makadaot sa inyong kaminyoon, ang pagselos mahisamag smoke detector nga mopahibalo nimo nga naay kapeligrohan, ug mopalihok ni nimo nga mohimog aksiyon.”—Benjamin.
Sa laing bahin, ang sayop o dili angay nga pagselos maoy resulta sa pagduda ug pagkahadlok nga walay tinuod nga basehanan. Ang tinuod nga gugma manalipod nato gikan nianang makadaot nga klase sa pagselos. (1 Corinto 13:4, 7) Si Dr. Robert L. Leahy miingon: “Kon magselos ka nga walay basehanan, sagad makahimo kag mga butang nga makadaot na hinuon sa relasyon nga gusto unta nimong proteksiyonan.”a
Unsay hinungdan sa sayop nga pagselos?
Tingali giluiban ka sa imong bana o asawa kaniadto maong kanunay kang mobatig sayop nga pagselos. O kaha nagbulag ang imong ginikanan kay naay usa nila nga nagluib, ug nahadlok ka nga basig mahitabo pod na ninyo.
“Sa bata pa ko, giluiban sa akong papa ang akong mama maong maglisod kog salig sa uban. Naapektohan ko pag-ayo adto, maong malisdan ko usahay nga mosalig sa akong bana.”—Melissa.
Ubang rason: Kon ma-insecure ka, basin maghunahuna dayon ka nga gustong bungkagon sa uban ang inyong kaminyoon. Basin magtuo pa gani ka nga biyaan ka dayon sa imong kapikas kon makakita siyag lain.
“Ang akong bana gihangyo nga mahimong groomsman sa kasal sa iyang amigo. Siyempre, naa gyod siyay maparis nga bridesmaid. Dili ko okey ana. Ako siyang giingnan nga mobalibad.”—Naomi.
Lainlaig kostumbre ang kasal sa matag nasod, pero ang mga Kristohanon angayng magpagiya sa mga prinsipyo sa Bibliya. Rasonable ba ang gihimo ni Naomi niadtong higayona? Naamgohan niya nga wala ra diay siyay rason nga magselos. Siya miingon: “Na-insecure gyod ko adtong panahona. Abi nakog gikompara ko sa akong bana sa laing babaye, pero hunahuna ra man diay to nako.”
Bisag unsa pay hinungdan, tungod sa dili angay nga pagselos, magduda ka sa imong kapikas ug basin imo pa gani siyang akusahan nga nagluib. Kana nga pagbati mahimong moresultag problema sa inyong kaminyoon ug makaapektar pa gani sa imong panglawas.
Prinsipyo sa Bibliya: “Ang kasina [o, pagselos] sama sa kanser nga mout-ot sa lawas.”—Panultihon 14:30, Ang Bag-ong Maayong Balita Biblia.
Unsaon nimo pagkontrol ang imong pagselos?
Palig-ona ang imong pagsalig. Imbes nga magduda sa iyang pagkamaunongon, hunahunaa ang mga butang nga gihimo sa imong kapikas nga naghatag nimog rason nga mosalig niya.
“Hunahunaon nako ang maayong mga hiyas sa akong bana. Kon mohatag siyag atensiyon sa uban, tungod na kay naghunahuna siya sa ilang kaayohan, dili tungod kay naa siyay laing motibo. Kinahanglan nakong pahinumdoman ang akong kaugalingon nga bisag dili maayo ang kaminyoon sa akong ginikanan, wala na magpasabot nga mao pod nay mahitabo sa akong kaminyoon.”—Melissa.
Prinsipyo sa Bibliya: “Ang gugma . . . motuo sa tanang butang.”—1 Corinto 13:4, 7.
Ayaw dayon hunahunaa nga sakto ang imong pagduda. Si Dr. Leahy miingon: “Sagad, magtuo ta nga sakto kanunay ang atong gihunahuna. Kay kombinsido man ta, paminaw nato nga naay basehanan ang atong pagduda. Pero bisan pag kombinsido kaayo ta, dili ni ebidensiya nga tinuod dayon ang atong gihunahuna.”b
“Kon hatagan nimog kahulogan ang situwasyon ug magduda dayon, moresulta ra nig problema.”—Nadine.
Prinsipyo sa Bibliya: “Ipakita sa tanan ang inyong pagkamakataronganon.”—Filipos 4:5.
Isulti ang imong gibati. Bisag unsa pay rason sa imong pagselos, sultihi ang imong bana o asawa aron inyo ning maestoryahan. Niining paagiha, inyong masabotan kon unsay haom ug dili haom nga mga lihok aron malikayan ang pagselos.
“Dihang mag-estorya mo sa imong kapikas, hunahunaa nga dili ka niya gustong pasakitan ug gusto niya nga ma-okey ang situwasyon. Hunahunaa nga naay maayong intensiyon ang imong kapikas. Tingali sensitibo ra kaayo ka ug sobra ra ang imong mga gidahom. O basig wala ra makaamgo ang imong kapikas nga kulang na ang atensiyon nga iyang ginahatag nimo.”—Ciara.
Prinsipyo sa Bibliya: “Ang matag usa padayong magtinguha, dili sa iyang kaugalingong kaayohan, kondili nianang sa laing tawo.”—1 Corinto 10:24.