MGA BATAN-ON NANGUTANA

Sa Unsang Paagi Matabangan Ko sa Bibliya?—Bahin 3: Pahimusli Pag-ayo ang Imong Pagbasa sa Bibliya

Inig-abli nimo sa Bibliya, pulos lang pulong ang imong makita. Pero ayawg tugoti nga dili na ka ganahang mobasa tungod ana. Hinuon, isipa ang Bibliya nga samag buffet table. Dili nimo makaon ang tanan nimong makita. Pero puwede kang mopili sa gusto nimong kaonon.

Aron mas makabenepisyo ka sa pagbasa sa Bibliya, kinahanglan kang magpokus sa imong ginabasa. Kini nga artikulo motabang nimo sa pagbuhat ana.

Niining artikuloha

Nganong angay kang magpokus sa imong ginabasa diha sa Bibliya?

Kon mas maningkamot ka sa pagbasa sa Bibliya, mas daghan kag makat-onan gikan niini. Hunahunaa ni nga ilustrasyon: Kon kadiyot ra nimo ihumol ang tsa sa ininit, wala kaayo ni lasa. Pero kon taudtaod nimo ning ihumol, mas molami ni.

Tasa nga naay linya sa tunga. Ang katunga sa tasa naay lapsaw nga tsa. Ang laing katunga naay tea bag nga taudtaod nang gihumol.

Ingon ana sab ang pagbasag Bibliya. Imbes dalidalion ug basa ang Bibliya, paggahin ug panahon sa paghunahuna bahin sa imong ginabasa. Kanay gihimo sa magsusulat sa Salmo 119. Bahin sa balaod sa Diyos, siya miingon: “Gipamalandong nako kini sa tibuok adlaw.”—Salmo 119:97.

Siyempre, wala na magpasabot nga tibuok adlaw kang magbasa ug maghunahuna bahin sa Bibliya. Kini ang punto: Ang salmista naggahin ug panahon sa paghunahuna sa Pulong sa Diyos. Nakatabang na niya sa paghimog maayong mga desisyon.—Salmo 119:98-100.

“Giingnan ko ni Mama kas-a, ‘Naa kay pito ka adlaw sa usa ka semana, ug anang semanaha, daghan kag himoon para sa imong kaugalingon. Maong husto lang nga gahinan nimo si Jehova ug panahon!’”—Melanie.

Kon imong hunahunaon ang mga prinsipyo sa Bibliya, mas makahimo kag maayong mga desisyon—pananglitan, dihang mopili kag mga higala o dihang tentalon ka sa paghimog dili maayo.

Sa unsang paagi bug-os kang makabenepisyo sa pagbasa sa Bibliya?

Pagplano. Ang tin-edyer nga si Julia misugyot, “Paghimog eskedyul sa pagbasag Bibliya. Planoha kon unsay imong basahon, kon kanus-a nimo kini basahon, ug kon asa nimo kini basahon.”

Tin-edyer nga babaye nagsulat sa iyang eskedyul sa pagbasag Bibliya diha sa kalendaryo.

Pangitag paagi nga makapokus. Ang batan-ong si Gianna misugyot, “Pangitag hilom nga lugar. Dayon pahibaloa ang imong pamilya bahin sa imong eskedyul sa pagbasag Bibliya aron dili ka nila madisturbo.”

Kon sa gadyet ka magbasa, i-off ang tanang notification. Pero puwede pod kang magbasa sa inimprenta nga Bibliya. Gani, gipakita sa research nga mas dali nimong masabtan ang imong ginabasa kon sa inimprentang publikasyon ka magbasa. Pero kon sa gadyet ka magbasa, basin mas malisdan ka sa pagpokus.

“Dili kaayo ko makapokus kon sa gadyet ko magbasa. Naay mangabot nga mga notification, ma-lowbat, o mawala ang Internet. Kon sa inimprentang libro ko magbasa, ang ako lang kinahanglan kay igong kahayag.”—Elena.

Pag-ampo sa dili pa ka mobasa. Hangyoa si Jehova nga tabangan kang masabtan, mahinumdoman, ug makabenepisyo sa mga bersikulo nga giplano nimong basahon.—Santiago 1:5.

Aron makalihok ka sumala sa imong giampo, tun-i pag-ayo ang imong ginabasa. Unsaon nimo na paghimo? Kon naggamit kag JW Library app o nagbasag Bibliya online, puwede nimong i-click ang bersikulo aron imong makita ang dugang nga mga impormasyon ug mga artikulo bahin niini.

Pagsuknag mga pangutana. Pananglitan: ‘Unsay gitudlo niini kanako bahin kang Jehova? Nagpasiugda ba ni sa iyang hiyas nga puwede nakong sundogon?’ (Efeso 5:1) ‘Unsang leksiyon ang akong nakat-onan niini nga mapadapat nako sa akong kinabuhi?’ (Salmo 119:105) ‘Puwede ba nakong gamiton ang akong nabasa sa pagtabang sa uban?’—Roma 1:11.

Pangutan-a sab ang kaugalingon, ‘Unsay koneksiyon sa akong gibasa sa tema sa Bibliya?’ Kini nga pangutana importante kaayo. Ngano? Kay ang tanang naa sa Bibliya—gikan sa Genesis hangtod sa Pinadayag—konektado sa pangunang tema: Kon sa unsang paagi balaanon ni Jehova ang iyang ngalan pinaagi sa iyang langitnong Gingharian ug pamatud-an nga naa siyay katungod sa pagmando ug nga ang iyang paagi sa pagmando mao ang pinakamaayo.

Ang giingon sa ubang batan-on

“Kon ganahan kag history, tun-i ang mga time line o arkeolohiya sa mga nasod sa Bibliya. Kon malingaw kang magtuon bahin sa personalidad sa mga tawo, tun-i ang kinabuhi sa mga tawo nga sama ni David. Naa gyoy makapainteres nga tun-an para sa tanan. Kinahanglan lang kang maghunahuna kon unsay ganahan nimong tun-an ug dugang.”—Judah.

“Samtang magbasa ko, akong i-analyze ang matag karakter sa Bibliya—maayo man o daotan—ug pangutan-on nako ang akong kaugalingon, ‘Unsay nahitabo niini nga tawo? Unsang kinaiya ang iyang gipakita ug unsay mga resulta?’ Dayon pangutan-on nako ang akong kaugalingon, ‘Unsay akong makat-onan niini?’”—Mackenzie.

“Gina-research nako ang konteksto sa akong ginabasa. Pananglitan, kanus-a ni gisulat? Kinsay nagsulat niini, ug unsay katibuk-ang katuyoan niini nga basahon sa Bibliya? Daghang estorya sa Bibliya ang mapadapat sa atong panahon, pero ang pagtuon ug dugang nakatabang nako nga mas masabtan kon sa unsang paagi ang mga hitabo sa Bibliya nakaapektar sa mga tawo nga buhi adtong panahona.”—Elle.

“Dihang magbasa kog Bibliya, mag-imagine ko nga ako ning i-explain sa usa ka tawo. Unsaon nako pagtabang ang maong tawo aron iya ning masabtan? Unsang ilustrasyon ang puwede nakong gamiton niini? Ang paghunahuna sa mga tubag niini nga mga pangutana nakatabang nako nga mas masabtan ang akong ginabasa. Sama sa giingon sa uban, ‘Ang pinakamaayong paagi sa pagkat-on mao ang pagtudlo.’”—Owen.