Kon Unsay Imong Mahimo Dihang Kalit Kang Masakit

Kalit ba kang nasakit? Kon oo, nahibalo ka nga makapa-stress ni sa imong hunahuna ug emosyon, ug dili sab lalim ang gasto sa pagpatambal. Unsay makatabang nimo sa pag-atubang niini? Unsaon nimo pagtabang ang usa ka membro sa pamilya o higala nga nasakit? Bisag ang Bibliya dili medical textbook, kini dunay praktikal nga mga tambag nga makatabang nimo sa pag-atubang niining lisod nga situwasyon.

Mga sugyot nga makatabang nimo dihang masakit ka

• Pagpadoktor

  Ang giingon sa Bibliya: “Ang mga tawong himsog wala magkinahanglag doktor, apan kadto lang mga masakiton.”​—Mateo 9:12.

  Kon unsaon kini pagpadapat: Kon gikinahanglan, pagpakonsulta sa doktor.

  Sulayi kini: Pilia ang kinamaayohang opsiyon sa pagpatambal nga mabatonan. Usahay, maayo tingali nga dili lang usa ka doktor ang konsultahon. (Proverbio 14:15) Pakig-estoryag maayo sa mga doktor​—seguroa nga nakasabot ka nila ug nga nahibalo sila sa tanang simtoma nga imong gibati. (Proverbio 15:22) Pag-research bahin sa imong sakit, apil ang tanan nimong opsiyon sa pagpatambal. Kon mahibalo ka sa posibleng mahitabo, mas dali nimong madawat ang imong kahimtang ug matabangan ka sa paghimog maayong mga desisyon bahin sa pagpatambal.

• Pagbaton ug rutina nga makaayo sa imong panglawas

  Ang giingon sa Bibliya: “Ang ehersisyo makaayo sa imong lawas.”​—1 Timoteo 4:8, Contemporary English Version.

  Kon unsaon kini pagpadapat: Makabenepisyo ka kon duna kay rutina nga makaayo sa imong panglawas, sama sa regular nga pag-ehersisyo.

  Sulayi kini: Regular nga mag-ehersisyo, kaon ug sustansiyadong pagkaon, ug paneguroa nga sakto ang imong tulog. Tingali nag-adjust ka pa sa kahimtang nimo karon. Pero sumala pa sa mga eksperto, ang pagbaton ug maayong rutina alang sa imong panglawas dakog ikatabang. Siyempre, seguroa nga ang imong himoon dili makapasamot sa imong sakit ug dili kontra sa imong pagpatambal.

• Pangayog tabang sa uban

  Ang giingon sa Bibliya: “Ang tinuod nga higala magpakitag gugma sa tanang panahon ug siya igsoon nga masaligan panahon sa kalisdanan.”​—Proverbio 17:17.

  Kon unsaon kini pagpadapat: Ang imong mga higala makatabang nimo nga malahutay ang lisod nga mga kahimtang.

  Sulayi kini: Pakigsulti sa usa ka kasaligang higala nga imong kapahungawan sa imong mga gibati. Makatabang ni nimo nga mahuwasan ka sa gibati nimong stress tungod sa imong sakit. Gusto sa imong mga higala ug pamilya nga tabangan ka, pero tingali wala sila mahibalo kon unsaon kana paghimo. Busa sultihi sila kon unsay ilang ikatabang kanimo. Magmakataronganon sa imong mga pagdahom, ug kanunay silang pasalamati sa ilang mga tabang. Pero hinumdomi nga bisag gusto kang tabangan sa imong mga higala, may mga panahon nga kinahanglang magtakda kag mga limitasyon, sama sa kon unsa ka subsob ug unsa ka dugay sila nga mobisita nimo. Makatabang ni aron makapahulay ka.

• Magmapositibo

  Ang giingon sa Bibliya: “Ang malipayong kasingkasing maayo nga tambal, apan ang dugmok nga espiritu makahurot sa kusog.”​—Proverbio 17:22.

  Kon unsaon kini pagpadapat: Kon positibo ka, makatabang na nimo sa pagpabiling kalmado ug pag-atubang sa makapa-stress nga sakit.

  Sulayi kini: Samtang nag-adjust ka sa imong bag-ong kahimtang, pagpokus sa kon unsay imong mahimo, dili sa mga butang nga dili nimo kontrolado. Ayawg itandi ang imong kaugalingon sa uban o ang imong kahimtang karon sa kahimtang nimo sa una sa wala pa ka masakit. (Galacia 6:4) Pagtakdag realistikong mga tumong. Makatabang ni nga makapabilin kang positibo. (Proverbio 24:10) Tabangi ang uban kutob sa imong maarangan. Ang kalipay nga imong bation sa paghimo niana makatabang nimo nga dili magpokus sa imong mga problema.​—Buhat 20:35.

Tabangan ba ka sa Diyos dihang masakit ka?

Gipakita sa Bibliya nga si Jehova nga Diyosa makatabang sa usa ka tawo nga nasakit. Bisan pag dili ta makadahom nga ayohon ta niya pinaagig milagro, ang mga magsisimba sa Diyos makadawat sa mosunod nga mga tabang:

Kalinaw. Si Jehova makataganag “kalinaw ... nga labaw sa tanang pagsabot.” (Filipos 4:6, 7) Kini nga kalinaw sa hunahuna makatabang sa usa nga dili malumsan sa kabalaka. Ang maong kalinaw ihatag sa Diyos niadtong nag-ampo ug nagpahungaw sa ilang mga kabalaka ngadto kaniya.​—1 Pedro 5:7.

Kaalam. Si Jehova makahatag ug kaalam aron makahimo tag maayong mga desisyon. (Santiago 1:5) Mabatonan sa usa ang maong kaalam kon iyang tun-an ug ipadapat ang way paglubad nga mga prinsipyo sa Bibliya.

Nindot nga paglaom sa umaabot. Si Jehova nagsaad nga sa umaabot “walay residente nga moingon: ‘Masakiton ko.’” (Isaias 33:24) Kini nga paglaom nakatabang sa daghan nga magpabiling positibo bisan pag sila dunay grabeng mga sakit.​—Jeremias 29:11, 12.