4 | Ang Bibliya Naay Praktikal nga Tambag

Kon Unsay Gipasabot Niana

Bisag ang Bibliya dili libro bahin sa medikal, naa ni mga tambag nga praktikal ug mapuslanon. Kini nga mga tambag makatabang sa usa nga naay problema sa mental health. Konsideraha ang pipila ka pananglitan.

Kon sa Unsang Paagi Kini Makatabang

“Ang mga tawong himsog wala magkinahanglag doktor, apan kadto lang mga masakiton.”​—MATEO 9:12.

Ang Bibliya naghisgot nga basin kinahanglan tang mokonsultag doktor. Daghang naay problema sa mental health ang natabangan dihang nasabtan nila pag-ayo ang ilang situwasyon ug dihang mikonsulta silag doktor.

‘Ang pag-ehersisyo naay kaayohan.’​—1 TIMOTEO 4:8, footnote.

Ang paghimo sa mga butang nga makaayo sa imong panglawas makahatag pod ug kaayohan sa imong mental health. Apil ani ang regular nga pag-ehersisyo, pagkaon ug sustansiyadong pagkaon, ug pagbaton ug igong tulog.

“Ang malipayong kasingkasing maayo nga tambal, apan ang dugmok nga espiritu makahurot sa kusog.”​—PROVERBIO 17:22.

Ang pagbasag makapadasig nga mga teksto sa Bibliya ug ang pagtakdag mga tumong nga kaya nimong kab-oton makatabang nimo nga magmalipayon. Kon magpokus ka sa positibong mga butang ug molaom nga moarang-arang ra ang kahimtang, motabang ni nimo sa pag-atubang sa problema sa mental health.

“Ang kaalam naa sa mga mapainubsanon.”​—PROVERBIO 11:2.

Mobati tingali ka nga dili nimo kayang himoon ang tanan nga ikaw-ikaw ra, mao nga maayong dawaton nimo ang tabang sa uban. Ang imong mga higala ug pamilya gusto tingaling motabang nimo, pero wala sila mahibalo kon unsay himoon. Puwede nimo silang ingnon kon unsa gyod nga tabang ang imong gikinahanglan. Magmabalanse sa imong pagdahom, ug pasalamati sila pirme sa ilang tabang.

Kon sa Unsang Paagi Natabangan ang Uban sa Praktikal nga Tambag sa Bibliya

“Gibati nako nga morag naay dili normal sa akoa, maong mikonsulta kog doktor. Nadayagnos niya ang akong kondisyon. Nakatabang ni nako nga madawat kon unsa gyoy akong situwasyon ug mahibaloan kon unsa nga mga paagi sa pagtambal ang makatabang nako.”​—Nicole,a nga naay bipolar disorder.

“Ang regular nga pagbasag Bibliya uban sa akong asawa nakatabang nako nga mapunog positibo ug makapalig-on nga mga butang ang akong hunahuna sa sugod pa lang sa adlaw. Ug sagad sa mga adlaw nga lisod kaayo para nako, naay teksto nga makahupay nako.”​—Peter, nga naay depresyon.

“Nalisdan kong isulti sa uban ang akong kondisyon kay maulaw ko. Pero naa koy suod nga amiga nga naminaw pag-ayo nako ug naningkamot nga masabtan ko. Gitabangan gyod ko niya nga mogaan ang akong paminaw ug mobating wala ko mag-inusara.”​—Ji-yoo, nga naay eating disorder.

“Natabangan ko sa Bibliya nga mahimong balanse sa trabaho ug maningkamot nga mopahulayg sakto. Ang mga tambag niini nakatabang nako sa pag-atubang sa akong problema sa emosyon.”​—Timothy, nga naay obsessive-compulsive disorder.