Angay Bang Moapil sa Politika ang Relihiyon?

Sa tibuok kalibotan, daghan sa nag-angkong sumusunod ni Jesu-Kristo ang nalangkit pag-ayo sa politika. Gi-promote pa gani sa uban ang ilang tinuohan ug moral nga mga sukdanan pinaagi sa pagsuporta sa usa ka kandidato o politikal nga partido. Sa laing bahin, sagad gamiton sa mga politiko ang mga isyu bahin sa moralidad o kahimtang sa komunidad aron makuha ang suporta sa relihiyosong mga tawo. Komon na karon nga naay mga lider sa relihiyon nga modagan sa politika para sa posisyon sa gobyerno. Ug sa ubang nasod, ang usa ka “Kristohanong” denominasyon lagmit nailhan ingong pangunang relihiyon sa nasod.

Unsay imong hunahuna? Angay bang moapil sa politika ang mga sumusunod ni Jesu-Kristo? Makita nimo ang tubag pinaagi sa pagkat-on sa ehemplo ni Jesus. Siya miingon: “Naghatag kog sumbanan kaninyo, nga kon unsay akong gihimo kaninyo, angay usab ninyong himoon.” (Juan 13:15) Kon bahin sa politika, unsang sumbanan ang gihatag ni Jesus?

Miapil ba si Jesus sa politika?

Wala. Si Jesus wala moapil sa politika niining kalibotana.

Si Jesus wala magtinguhag posisyon sa politika. Wala siya modawat nga mahimong magmamando sa gobyerno sa tawo dihang gitanyag ni Satanas nga Yawa “ang tanang gingharian sa kalibotan.” (Mateo 4:8-10)a Diha poy higayon nga nakita sa mga tawo nga si Jesus angayan kaayo nga mahimong lider, ug gipugos nila siya nga moapil sa politika. Ang Bibliya nag-ingon: “Kay nahibalo si Jesus nga ila siyang pugson nga mahimong hari, siya mibiya pag-usab ug mitungas sa bukid nga nag-inusara.” (Juan 6:15) Imbes magpadala sa gusto sa mga tawo, si Jesus wala gyod mag-apil-apil sa politika.

Si Jesus wala modapig sa bisan unsang isyu sa politika. Pananglitan sa panahon ni Jesus, ang mga Hudiyo nasuko kay gibati nila nga pabug-at ug dili makataronganon ang paghatag ug buhis ngadto sa gobyerno sa Roma. Dihang gisulayan nilag pangayo ang opinyon ni Jesus bahin sa maong isyu, wala siya makiglalis kon angay bang mohatag ug buhis o dili. Iya silang giingnan: “Ibayad ninyo sa Cesar ang iya sa Cesar, apan ngadto sa Diyos ang iya sa Diyos.” (Marcos 12:13-17) Nagpabiling neyutral si Jesus sa maong isyu pero iyang gipakita nga kinahanglang bayran ang buhis nga gipangayo sa gobyerno sa Roma, o sa Cesar. Ug sa samang higayon, iyang gipakita nga dunay limitasyon ang pagsunod sa sekular nga awtoridad. Dili angayng ihatag sa tawo ngadto sa gobyerno ang mga butang nga para lang Diyos, sama sa debosyon ug pagsimba.—Mateo 4:10; 22:37, 38.

Gisuportahan ug gitudlo ni Jesus sa uban ang gobyerno sa langit, ang Gingharian sa Diyos. (Lucas 4:43) Wala siya moapil sa politika kay nahibalo siya nga ang Gingharian sa Diyos, dili ang gobyerno sa tawo, mao ang makahimo sa katuyoan sa Diyos para sa yuta. (Mateo 6:10) Nasabtan niya nga dili gamiton sa Gingharian sa Diyos ang gobyerno sa tawo, hinuon mao ni ang mopuli niini.—Daniel 2:44.

Miapil ba sa politika ang mga Kristohanon sa unang siglo?

Wala. Gisunod sa mga sumusunod ni Jesus ang iyang sugo nga dili sila mahimong “bahin sa kalibotan.” (Juan 15:19) Ilang gisunod ang ehemplo ni Jesus ug wala gyod moapil sa politika. (Juan 17:16; 18:36) Imbes mag-apil-apil sa politika, ilang gituman ang sugo ni Jesus—ang pagsangyaw ug pagpanudlo bahin sa Gingharian sa Diyos.—Mateo 28:18-20; Buhat 10:42.

Para sa mga Kristohanon sa unang siglo, ang pagsunod sa Diyos mao ang pinakaimportante, pero nahibalo sila nga angay sab nilang tahoron ang sekular nga mga awtoridad. (Buhat 5:29; 1 Pedro 2:13, 17) Gisunod nila ang balaod ug nagbayad ug buhis. (Roma 13:1, 7) Bisag wala sila mag-apil-apil sa politika, gipabilhan nila ang proteksiyon ug serbisyo nga ilang nadawat gikan sa gobyerno.—Buhat 25:10, 11; Filipos 1:7.

Mga Kristohanon sa unang siglo ug ang politika—ang giingon sa kasaysayan

“Ang mga Kristohanon wala makigbahin sa mga kalihokan nga ginahimo sa Romanong mga lungsoranon. . . . Dili sila modawat ug bisan unsang posisyon sa politika.”—On the Road to Civilization—A World History, panid 238.
“Wala tay makitang pamatuod nga naay ambisyon si Jesus nga moapil sa politika o sa militar, ug . . . tinuod sab na kon bahin sa iyang mga tinun-an.”—Jesus and Judaism, panid 231.
“Para sa usa ka Kristohanon, ang iyang relihiyon bulag ug mas labaw kay sa politika; ang iyang pagkamaunongon dili sa Cesar kondili sa Kristo.”—Caesar and Christ, panid 647.
“[Si apostol] Pablo andam nga mogamit sa iyang pagkalungsoranon sa Roma aron makabenepisyo sa legal nga proteksiyon gikan sa korte, pero wala siya moapil sa mga isyu sa politika. . . . Bisan pag ang mga Kristohanon sa unang siglo nagtuo nga naa silay obligasyon nga tahoron ang gobyerno, wala sila mag-apil-apil sa politika.”—Beyond Good Intentions—A Biblical View of Politics, panid 122-123.
“Daghang Kristohanon ang nagtuo nga dili sila angayng magbaton ug posisyon sa politika . . . Sa sayong bahin sa ikatulong siglo, si Hippolytus miingon nga kon ang usa ka mahistrado [o, gobernador] gustong mahimong Kristohanon, kinahanglan siyang moresayn sa iyang katungdanan.”—A History of Christianity, Volume I, panid 253.

Kristohanong neyutralidad karon

Klarong gipakita sa Bibliya nga si Jesus, ug bisan ang iyang mga sumusunod sa unang siglo, wala mag-apil-apil sa politika. Busa, ingong mga Kristohanon, ang mga Saksi ni Jehova sa tibuok kalibotan nagpabilin gyong neyutral. Sama sa mga Kristohanon sa unang siglo, ilang gisunod ang sugo ni Jesus—ilang gisangyaw ang “maayong balita sa Gingharian.”—Mateo 24:14.

a Dihang mibalibad si Jesus, wala siya moingon nga walay katungod si Satanas nga mohimo sa maong pagtanyag. Gitawag pa gani niya si Satanas ingong “magmamando niining kalibotana.”—Juan 14:30.