Mobalik pa ba sa Normal ang Kinabuhi? Kon sa Unsang Paagi Makatabang ang Bibliya sa Kalibotan nga Gibag-o sa Pandemic

“Gusto natong mobalik sa normal ang atong kinabuhi.”—Angela Merkel, German chancellor.

Samtang ang COVID-19 pandemic padayong nakaapektar sa mga tawo sa tibuok kalibotan, mouyon ka tingali sa iyang giingon. Pero unsay gipasabot sa “normal” nga kinabuhi? Unsay gilaoman sa mga tawo nga buhaton?

• Mahimo na nila ang ilang ginahimo kaniadto. Ang pipila nangandoy nga madugangan ang ilang panahon sa pagpakig-uban sa uban, nga magakos nila sila ug malamano. Nangandoy pod sila nga makabiyahe pag-usab. Gibati nila nga “ang normal nga kinabuhi” naglakip sa pag-adtog “mga restawran, sinehan, [ug] mga butang nga sama niana,” nag-ingon si Dr. Anthony Fauci.a

• Mapauswag ang ilang kinabuhi. Ang uban nakakitag kahigayonan para sa “new normal,” kinabuhi nga mas maayo kay sa ilang kinabuhi kaniadto. Gibati nila nga naay mga butang nga kinahanglang mabag-o, sama sa trabaho nga nagkinahanglag dakong panahon ug kusog, pagpihigpihig tungod sa rasa o kahimtang sa kinabuhi, ug sa nagkadaghang tawo nga nag-antos tungod sa mental nga sakit. Ang founder sa World Economic Forum nga si Klaus Schwab miingon nga ang pandemic naghatag natog talagsaon pero dili molungtad nga kahigayonan sa pagpamalandong bahin sa atong kinabuhi, paghunahuna sa gusto nato nga kahimtang sa kalibotan, ug paghimog kausaban sa kalibotan.

Para sa uban, ang pandemic nakapahinabog daghan kaayong problema nga naghunahuna sila nga dili na gyod mobalik sa “normal” ang kinabuhi. Pananglitan, daghan ang nawad-ag trabaho, balay, maayong panglawas, o namatyan pa ganig minahal.

Siyempre, walay makasulti kon unsa gyoy atong kinabuhi human sa pandemic. (Ecclesiastes 9:11) Pero ang Bibliya makatabang nato nga mahimong realistiko bahin sa umaabot ug sa pag-atubang sa posibleng mahitabo. Dugang pa, ang Bibliya naghisgot bahin sa seguradong kaugmaon nga tingali wala nimo dahoma.

Hustong panghunahuna bahin sa COVID-19 pandemic

Ang Bibliya dugay nang nagtagna nga dunay motunghang mga sakit o mahitabong “kamatay” sa “hinapos sa sistema sa mga butang.” (Lucas 21:11; Mateo 24:3) Kon sama niana ang atong panghunahuna sa COVID-19 pandemic, isipon nato ni ingong usa sa daghang talagsaong hitabo—apil ang mga gubat, dagkong linog, ug kanihit sa pagkaon—nga katumanan sa tagna sa Bibliya.

Kon sa unsang paagi ang pagkahibalo niini makatabang: Bisag ang kahimtang sa pandemic moarang-arang, ang Bibliya nagpasidaan nga kita nagkinabuhi sa “kuyaw nga mga panahong lisod sagubangon.” (2 Timoteo 3:1) Ang pagkahibalo niini makatabang nato nga mahimong realistiko sa atong mga pagdahom bahin sa kinabuhi niining lisod nga mga panahon.

Ang Bibliya naghatag nato sa hustong panghunahuna: Ang kalibotan, diin nagkaanam ka lisod ang kinabuhi, hapit nang makaeksperyensiyag dakong kausaban. Kausaban sa unsa?

Kahimtang human sa pandemic nga wala tingali nimo dahoma

Ang Bibliya wala lang magtagna bahin sa seryosong mga problema nga atong giatubang karon kondili sa mas maayo sab nga kahimtang nga hapit na natong maeksperyensiyahan. Naghisgot ni ug kaugmaon nga mas maayo kay sa gipaningkamotang makab-ot sa tawhanong mga gobyerno, kaugmaon nga ang Diyos lang ang makatagana. “Iyang pahiran ang matag luha sa ilang mga mata, ug ang kamatayon mawala na, ug wala na unyay pagbangotan, pagtiyabaw, ug kasakit.”—Pinadayag 21:4.

Si Jehovab nga Diyos nagsaad: “Tan-awa! Ginabag-o nako ang tanang butang.” (Pinadayag 21:5) Iyang sulbaron ang mga problema sa kalibotan, apil na ang mga problema nga gipasamot sa pandemic. Iyang itagana ang mosunod:

• Hingpit nga panglawas ug hunahuna, ug wala nay sakit ug kamatayon.—Isaias 25:8; 33:24.

• Buluhaton nga makapalipay nga makahatag ug tinuod nga katagbawan, dili buluhaton nga makapadismayar o makahurot sa kusog.—Isaias 65:22, 23.

• Kadagaya, busa wala nay kakabos ug gutom.—Salmo 72:12, 13; 145:16.

• Pagkaayo gikan sa emosyonal nga kasakit, apil na ang paglaom nga mabuhi pag-usab ang namatay nga mga minahal.—Isaias 65:17; Buhat 24:15.

Kon sa unsang paagi ang pagkahibalo niini makatabang: Ang Bibliya nag-ingon: “Kining paglaom nga atong nabatonan samag angkla sa atong kinabuhi.” (Hebreohanon 6:19) Ang maong paglaom makapalig-on kanato. Kini makatabang nato sa pag-atubang sa lisod nga mga kahimtang karon, makapamenos sa kabalaka, ug makatabang nga magpabilin tang kalmado ug malipayon.

Pero katuohan ba gyod ang mga saad sa Bibliya? Tan-awa ang artikulong “Ang Bibliya—Kasaligang Tinubdan sa Kamatuoran.”

Mga prinsipyo sa Bibliya nga makatabang nato sa pag-atubang sa kinabuhi human sa pandemic

• Pabilhi ang kinabuhi

  Teksto: “Ang kaalam magtipig sa kinabuhi sa tag-iya niini.”—Ecclesiastes 7:12.

  Kahulogan niini para kanimo: Paghimog maalamong desisyon aron mamenosan ang posibilidad nga masakit. Sayra ang kahimtang sa inyong lugar. Konsideraha ang health and safety regulation, ang gidaghanon sa na-COVID, ug ang gidaghanon sa fully vaccinated.

• Padayon sa pag-amping

  Teksto: “Ang maalamon mag-amping ug mopalayo sa daotan, apan ang buangbuang kompiyansa kaayo ug magpasagad lang.”—Proverbio 14:16.

  Kahulogan niini para kanimo: Padayong himoa ang gikinahanglan aron dili ka matakdan. Ang mga eksperto nagtuo nga ang coronavirus magdugay pa.

• Seguroa nga kasaligan ang impormasyon nga imong tuohan

  Teksto: “Ang inosente motuo sa tanan niyang madunggan, apan ang maalamon mamalandong sa matag lakang.”—Proverbio 14:15.

  Kahulogan niini para kanimo: Pilia pag-ayo ang tambag nga imong sundon. Importante na kay posibleng mameligro ang imong panglawas kon ang imong desisyon gibase sa sayop nga impormasyon.

• Pabiling positibo

  Teksto: “Ayaw pag-ingon, ‘Nganong ang kanhing mga adlaw mas maayo pa kay sa karon?’ kay dili maalamon ang pagpangutana niini.”—Ecclesiastes 7:10.

  Kahulogan niini para kanimo: Paningkamot nga ma-enjoy nimo ang kinabuhi bisan sa imong presenteng kahimtang. Likayi ang paghunahuna nga mas maayo ang kinabuhi sa wala pa ang pandemic, ug likayi pod ang pagsigeg hunahuna sa mga butang nga wala nimo mahimo tungod sa pandemic.

• Tahora ang uban

  Teksto: “Pasidunggi ang tanang klase sa tawo.”—1 Pedro 2:17.

  Kahulogan niini para kanimo: Ang mga tawo lainlaig reaksiyon sa pandemic ug sa mga epekto niini. Tahora ang ilang opinyon, pero ayawg usba ang maayong mga desisyon nga imong nahimo. Pakitaig konsiderasyon ang wala pa mabakunahi, ang mga tigulang, ug kadtong dunay grabeng sakit.

• Magmapailobon

  Teksto: “Ang gugma taas ug pailob ug maayo.”—1 Corinto 13:4.

  Kahulogan niini para kanimo: Ipakita ang pagkamaayo dihang ang uban moingon nga mahadlok silang mohimo sa ilang naandan sa wala pa ang pandemic. Dihang moluag na ang mga restriksiyon ug makahimo ka na sa pagplano sa imong mga kalihokan, magmapailobon sa imong kaugalingon.

Kon sa unsang paagi ang Bibliya nagtabang sa mga tawo sa pag-atubang sa pandemic

Ang mga Saksi ni Jehova nahupayan sa nindot nga kaugmaon nga gisaad sa Bibliya, ug kini nakatabang nila nga dili magpokus sa pandemic. Gitabangan pod nila ang usag usa pinaagi sa pagsunod sa sugo sa Bibliya nga regular nga magtigom para sa pagsimba. (Hebreohanon 10:24, 25) Ang tanan puwedeng motambong sa tigom sa mga Saksi ni Jehova, nga gihimo sa virtual nga paagi panahon sa pandemic.

Ang uban mouyon nga ang pagtigom uban sa mga Saksi ni Jehova para sa pagsimba nakatabang nila niining lisod nga mga panahon. Pananglitan, ang usa ka babaye nga natakdan ug COVID-19 midawat sa imbitasyon nga motambong sa virtual nga mga tigom sa mga Saksi ni Jehova. Kini nga mga tigom nakatabang sa iyang emosyon bisan pag padayon siyang nag-antos tungod sa virus. Sa ulahi, siya miingon: “Gibati nako nga bahin pod ko niini nga pamilya. Ang pagbasag Bibliya nakahatag nakog kalinaw sa hunahuna. Nakatabang ni nako nga magpokus sa paglaom sa umaabot imbes sa akong mga problema. Salamat sa pagtabang nako nga masuod sa Diyos nga maoy akong gipangandoy sukad pa sa una.”