Nagtuo ba ang mga Eskolar nga si Jesus Naglungtad Kanhi?

Ang mga eskolar dunay lig-ong basehanan sa pagtuo nga si Jesus naglungtad kanhi. Maylabot sa mga historyano sa una ug ikaduhang siglo nga naghisgot kang Jesus ug sa mga Kristohanon, ang Encyclopædia Britannica, 2002 nga Edisyon, nag-ingon: “Kini nga mga asoy nagpamatuod nga sa karaang panahon bisan ang mga kaaway sa Kristiyanidad wala gayod magduhaduha sa paglungtad ni Jesus, nga sa unang higayon gikuwestiyon bisag walay igong basehanan sa hinapos nga bahin sa katuigang 1700, sa katuigang 1800, ug sa pagsugod sa katuigang 1900.”

Sa 2006, ang librong Jesus and Archaeology nag-ingon: “Walay tinamod nga eskolar karon ang nagkuwestiyon nga may Hudiyo nga ginganlag Jesus nga anak ni Jose nga nabuhi kaniadto; kadaghanan moingon gayod nga karon daghan na kitag nahibaloan bahin sa iyang mga gibuhat ug mga pagtulon-an.”

Ang Bibliya nagpaila kang Jesus ingong tinuod nga persona. Mabasa nato niini ang mga ngalan sa katigulangan ug pamilya ni Jesus. (Mateo 1:1; 13:55) Mabasa usab nato ang mga ngalan sa iladong mga magmamando sa iyang panahon. (Lucas 3:1, 2) Kini nga mga detalye nakatabang sa mga tigdukiduki sa pagsusi sa katukma sa mga asoy sa Bibliya.